Pebrero 8–14

Doktrina ken Katulagan 12–13; Joseph Smith—Pakasaritaan 1:66–75

“Kadakayo Padak a Katulongan”

Nakaawat da Joseph Smith ken Oliver Cowdery iti nayon a pannakaammo kabayatan ti panagkararagda maipapan kadagiti kinapudno a nasursuroda kadagiti nasantuan a kasuratan (kitaen iti Joseph Smith—Pakasaritaan 1:68). Kasano a masurotmo ti pagwadanda?

Isuratmo dagiti Impresionmo

Kaaduanna a tattao iti intero a lubong ti nalabit a saan pay pulos nakangngeg iti maysa a lugar a maaw-awagan iti Harmony, Pennsylvania. Ngem masansan a pilien ti Apo dagiti nasulinek a lokasion para kadagiti kapapatgan a paspasamak iti pagarianna. Idi Mayo 15, 1829, iti kakaywan a lugar nga asideg ti Harmony, nagparang ni Juan a Mammuniag a kas maysa a nagungar a nabiag kada Joseph Smith ken Oliver Cowdery. Impatayna dagiti imana iti rabaw dagiti uloda ket intalekna ti Aaronic Priesthood kadakuada, nga inawaganna ida iti “padak a katulongan” (Doktrina ken Katulagan 13:1).

Tapno maibilang a pada a katulongan ni Juan a Mammuniag, a nangbuniag iti Mangisalakan ken nangisagana iti dalan iti yaayna (kitaen iti Mateo 3:1–6, 13–17), ket nalabit a namagpakumbaba kenkuanan, nalabit uray kadagitoy dua nga agtutubo a lallaki iti edadda a duapulo. Iti dayta a panawen, saan unay nga am-ammo da Joseph ken Oliver, aglalo iti Harmony. Ngem ti panagserbi iti aramid ti Dios ket kanayon a maipanggep iti no kasano ti panagserbitayo, a saan a maipanggep iti no asino dagiti makakita. Numan kasta a bassit wenno di makita ti tulong wenno kontribusionmo no dadduma, maysaka met a pada a katulongan iti naindaklan nga aramid ti Apo.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 12

Kayat ti Apo a tumulongak a mangipasdek iti pagsayaatan ti Zion.

Naam-ammo ni Joseph Knight Sr. ken ti asawana, ni Polly, ni Joseph Smith idi, kas agtawen iti 20, nangrugi nga agtrabaho iti talonda iti Colesville, Nueva York. Inladawan ni Joseph Knight isuna nga isu ti kalalaingan a trabahador nga adda kenkuana. Pinatina ti pammaneknek ni Joseph Smith maipapan kadagiti balitok a pinanid ket intugotna ni Polly tapno sarungkaranda ni Joseph Smith bayat ti panagipatarusna iti Libro ni Mormon iti pagtaenganna, iti Harmony, Pennsylvania. Dagus a pinatina. Iti nabati pay a panagbiagda, nagtalinaed a napudno da Joseph ken Polly iti naisubli nga ebanghelio. Nasurok a 60 a miembro ti pamilia a Knight ti nagkameng ket timmulong a nangbangon iti Simbaan iti Nueva York, Ohio, Missouri, Nauvoo, ken iti kamaudiananna iti Salt Lake City.

Kinayat nga ammuen ni Joseph Knight no kasano a makatulong isuna iti aramid ti Apo. Mayaplikar ti sungbat ti Apo (adda itan iti Doktrina ken Katulagan 12) iti “amin nga addaan iti tarigagay a mangyeg ken mangipasdek iti daytoy nga aramid” (bersikulo 7)—a pakairamanam. Ania ti kayat a sawen kenka ti “yeg ken ipasdek ti pagsayaatan ti Zion”? (bersikulo 6). Kasano a matulongandaka dagiti pagbatayan ken dagiti galad kadagiti bersikulo 7–9 a mangaramid iti daytoy?

Kitaen met iti “The Knight and Whitmer Families,” Revelations in Context 20–24.

Doktrina ken Katulagan 13

Insubli ni Juan a Mammuniag ti Aaronic Priesthood.

Iti maysa laeng a binatog, impalgak ni Juan a Mammuniag ti adu a kinapudno maipapan iti Aaronic Priesthood. Ibilangmo ti panangisurat iti amin a banag a masursurom manipud iti daytoy a benneg (pakairamanan manipud iti paulo ti benneg. Mabalin a makatulong kenka a mangadal iti sumagmamano a ragup dagiti balikas a mabirokam. Dagitoy ti sumagmamano a pagarigan a pangrugiam:

• “Dagiti tulbek ti panagserserbi dagiti anghel”: 2 Nephi 32:2–3; Moroni 7:29–32; Jeffrey R. Holland, “The Ministry of Angels,” Ensign wenno Liahona, Nob. 2008, 29–31; Pangiwanwan iti Nasantuan a Kasuratan, “Dagiti Anghel,” scriptures.ChurchofJesusChrist.org

• “Dagiti tulbek … ti ebanghelio ti panagbabawi”: 3 Nephi 27:16–22; Doktrina ken Katulagan 84:26–27; Dale G. Renlund, “The Priesthood and the Savior’s Atoning Power,” Ensign wenno Liahona, Nob. 2017, 64–67

• “Dagiti annak ni Levi”: Dagiti Numero 3:5–13; Doktrina ken Katulagan 84:31–34; Pangiwanwan iti Nasantuan a Kasuratan, “Aaronic Priesthood,” “Levi,” scriptures.ChurchofJesusChrist.org

Ania dagiti bendision a naawatmo babaen kadagiti ordinansa ti Aaronic Priesthood?

Buniagan ni Joseph Smith ni Oliver Cowdery, ni Del Parson

Joseph Smith—Pakasaritaan 1:66–75

Mangted dagiti ordinansa kaniak iti dalan a manggun-od iti bileg ti Dios.

Kinuna ni Sister Carole M. Stephens, sigud a mamagbaga iti Sapasap a Panguluen ti Relief Society, “Dagiti ordinansa ken katulagan ti priesthood ket mangted iti dalan a manggun-od ti pakabuklan dagiti bendision nga inkari ti Dios kadatayo, nga inaramid a posible ti Pannubbot ti Mangisalakan. Armasanda dagiti annak a lallaki ken babbai ti Dios iti bileg, ti bileg ti Dios, ket mangted kadatayo iti gundaway nga umawat iti agnanayon a biag” (“Do We Know What We Have” Ensign wenno Liahona, Nob. 2013, 12).

Bayat ti panangbasam ti Joseph Smith—Pakasaritaan 1:66–75, agraman ti surat iti gibus ti bersikulo 71, ibilangmo no ania ti nangparegta kada Joseph ken Oliver nga agsaludsod maipapan iti panagbuniag, ken isuratmo dagiti bendision a dimteng kadakuada kalpasan ti pannakiraman kadagiti ordinansa ti priesthood. Ibilangmo ti panangbasa kadagiti naisurat iti journalmo nga insuratmo kalpasan ti panangawat kadagiti ordinansa wenno panangisurat dagiti lagipmo kadagita a pasamak. Ania dagiti bendision a naawatmo babaen dagiti ordinansa ti priesthood?

Kitaen met iti Doktrina ken Katulagan 84:20–22; Saints, 1:65–68.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Doktrina ken Katulagan 12:8.Apay a kasapulan dagiti kababalin a nailista para iti panangobra iti aramid ti Apo?

Doktrina ken Katulagan 13.Ania ti mabalin a mangpatibker iti pammati ti pamiliam iti pannakaisubli ti Aaronic Priesthood? Ti video “Pannakaisubli ti Aaronic Priesthood” (ChurchofJesusChrist.org) wenno ti artwork a naikadua itoy a balabala ket makatulong iti pamiliam a mangiladawan iti panunot ti pamiliam maipapan iti pannakaisubli ti Aaronic Priesthood. Maay-ayoda ngata nga agdrowing iti maysa a ladawan ti pasamak, a maibasar ti no ania ti nabasada iti Joseph Smith—Pakasaritaan 1:68–74? Mabalinda pay nga iburay dagiti pammaneknekda maipapan iti bileg ti priesthood iti biagda.

Kitaen met iti “Priesthood Restoration Site” iti history.ChurchofJesusChrist.org.

Joseph Smith—Pakasaritaan 1:68.Kasano a masurottayo ti pagwadan da Joseph Smith ken Oliver Cowdery nga agbirok kadagiti sungbat dagiti saludsodtayo? Nalabit a bayat ti panagbasayo nga aggigiddan, maaramidyo daytoy a maysa a gagangay nga ugali tapno agsardeng ken agdamag iti asinoman nga addaan kadagiti saludsod maipapan iti no ania ti basbasaenda.

Joseph Smith—Pakasaritaan 1:71, isuratmo.Ania ti nakaawis iti imatang dagiti miembro ti pamiliam maipapan kadagiti balikas ni Oliver Cowdery? Ania dagiti sumagmamano a “dagiti aldaw a di malipatan” ti pamiliam?

Joseph Smith—Pakasaritaan 1:73–74Ania ti nagbalin nga epekto ti Espiritu Santo kada Joseph ken Oliver? Kaano a natulongan ti Espiritu ti pamiliam a maawatan dagiti nasantuan a kasuratan ket agrag-o iti Apo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “The Priesthood Is Restored,” Children’s Songbook, 89.

Panangpadur-as iti Panangisurotayo

Agadal iti maysa a topiko. Kas maysa a pamilia, pumili iti maysa a topiko a kayatyo a sursuruen a nadetdetaliado. Kas pagarigan, daytoy a lawas mabalinmo nga aramaten ti Topical Guide wenno Pangiwanwan iti Nasantuan a Kasuratan (scriptures.ChurchofJesusChrist.org) a mangsarak kadagiti nasantuan a kasuratan maipapan iti Aaronic Priesthood.

Kadakayo Padak a Katulongan, ni Linda Curley Christensen