Karayan Susquehanna

Pebrero 8–14

Doktrina ken Katulagan 12–13; Joseph Smith—Pakasaritaan 1:66–75

“Kadakayo Padak a Katulongan”

Aggapu manipud kadagiti nagduduma a situasion dagiti ubbing a sursuruam ken addaanda iti agduduma a kasapulan. Bayat ti panagsaganam, panunotem no kasano a kasayaatan a matulongam ida a makasursuro kadagiti kinapudno a naisuro iti Doktrina ken Katulagan 12–13 ken Joseph Smith —Pakasaritaan 1:66–75.

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay kadagiti panawen idi nakitada ti maysa a tao nga agpabuniag wenno umawat iti bendision ti priesthood. Kasano nga inawat da Joseph Smith ken Oliver Cowdery ti priesthood?

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 13

Insubli ni Juan a Mammuniag ti Aaronic Priesthood.

Idi Mayo 15, 1829, nagparang ni Juan a Mammuniag kada Joseph Smith ken Oliver Cowdery ket intedna kadakuada ti Aaronic Priesthood. Kasano a ti panagadal maipapan iti daytoy a pasamak ket mangbendision kadagiti ubbing a sursuruam?

Dagiti Mabalin nga Aktibidad

• Ibagam kadagiti ubbing maipapan iti no kasano a naisubli ti Aaronic Priesthood (kitaen iti Joseph Smith—Pakasaritaan 1:68–70; kitaen met iti “Chapter 6: Joseph and Oliver Are Given the Priesthood,” Doctrine and Covenants Stories, 26–27). Wenno awisem ti maysa a lallaki iti ward nga umay iti klase ket isalaysayna ti estoria a kasla isuna ni Juan a Mammuniag, a mangibasbasa kadagiti ubbing no ania ti kinuna ni Juan kada Joseph Smith ken Oliver Cowdery.

• I-display dagiti ladawan ni Juan a Mammuniag a mangbumbuniag iti Mangisalakan ken mangisubsubli iti Aaronic Priesthood (Libro ti Arte ti Ebanghelio, 35, 93; kitaen met iti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Awisem dagiti ubbing nga ibinglayda no ania ti ammoda maipapan iti no ania ti mapaspasamak kadagiti ladawan (kitaen iti Mateo 3:13–17; Doktrina ken Katulagan 13; Joseph Smith—Pakasaritaan 1:68–70).

• Tulongam dagiti ubbing nga agsursuro ti maysa a kanta maipapan iti priesthood, kas iti “The Priesthood Is Restored” (Children’s Songbook, 89). Awisem dagiti ubbing nga agmartsa iti lawlaw ti siled bayat ti panagkantada, nga agsisinublat a mangiggem iti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.

Doktrina ken Katulagan 13

Ti priesthood ket bileg ti Dios.

Dagiti adalen maipapan iti pannakaisubli ti Aaronic Priesthood ket dakkel a gundaway a makatulong kadagiti ubbing tapno nasaysayaat a maawatanda no ania ti priesthood ken no kasano a mabendisionanda iti daytoy.

Dagiti Mabalin nga Aktibidad

• Mangitugot iti sumagmamano a banag iti klase, agraman ti maysa a tulbek. I-display dagiti banag, ket kiddawen kadagiti ubbing a dumngegda bayat ti panangbasam iti Doktrina ken Katulagan 13 ken sapulenda ti banag a nadakamat iti nasantuan a kasuratan. Ania ti maaramidtayo iti tulbek? Ipakita dagiti ladawan ti banag a mabalintayo nga aramiden gapu ta naisubli ti Aaronic Priesthood (kitaen iti panid ti aktibidad iti daytoy a lawas; kitaen met iti Libro ti Arte ti Ebanghelio, 103–4, 107–8). Isaritam kadagiti ubbing no kasano a binendisionan ti priesthood ti biagmo.

• Tapno matulongan dagiti ubbing a masursuruan iti ragup dagiti balikas a Ti priesthood ti bileg ti Dios, idawat kadakuada nga agpalakpakda bayat ti panagisaoda iti tunggal silaba. Ipakitam ti maysa a banag nga agkasapulan iti bateria tapno aggunay, ken isuro a, kas iti bateria a mangyeg iti bileg iti banag, ti priesthood ti mangyeg ti bileg ti Dios iti biagtayo. Ibinglaymo ti pammaneknekmo maipapan kadagiti bendision a simmangbay kenka gapu iti priesthood.

Joseph Smith—Pakasaritaan 1:66–75

Makapagbuniagak.

Nabasa da Joseph Smith ken Oliver Cowdery ti maipapan iti panagbuniag iti Libro ni Mormon ket kayatda a maammuan ti ad-adu pay. Matulongam dagiti ubbing a sursuruam a mangpadpadaan iti panagbuniagda ken agsursuro ti ad-adu pay maipapan iti daytoy a sagrado nga ordinansa.

Dagiti Mabalin nga Aktibidad

• Ipabuya ti video a “Restoration of the Aaronic Priesthood” (ChurchofJesusChrist.org). Isardeng ti video iti sagpaminsan tapno agdamag kadagiti ubbing kadagiti saludsod a kas “Apay a napan da Joseph Smith ken Oliver Cowdery iti kakaywan?” ken “Kasano ngata ti panagrikna da Joseph Smith ken Oliver Cowdery kalpasan a nabuniaganda?” Kiddawem kadakuada a mangibinglay no kasano ti riknada idi nabuniaganda.

• Isaritam kadagiti ubbing maipapan iti pannakabuniag da Joseph Smith ken Oliver Cowdery (kitaen iti Joseph Smith—Pakasaritaan 1:68–74; kitaen met iti “Chapter 6: Joseph and Oliver Are Given the Priesthood,” Doctrine and Covenants Stories, 26–28). Yunay-unay ti rag-o a narikna da Joseph ken Oliver, ket ibagam kadagiti ubbing ti maipapan iti panagbuniagmo. Awisem dagiti ubbing a mangidrowing iti ladawan ti bagbagida a mabuniagan iti maysan tu a sumangbay nga aldaw.

  ubing a lalaki a mabumbuniagan

  Mabuniaganak gapu ta naisublin ti priesthood.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 13; Joseph Smith—Pakasaritaan 1:66–72

Insubli ni Juan a Mammuniag ti Aaronic Priesthood.

Ti salaysay iti pannakaisubli ti Aaronic Priesthood ket makatulong kadagiti ubbing a sursuruam a maawatanda dagiti napateg a kinapudno maipapan iti priesthood ken dagiti ordinansa ti priesthood.

Dagiti Mabalin nga Aktibidad

• Aggigiddan a basaen ti Joseph Smith—Pakasaritaan 1:66–72, ket awisem dagiti ubbing a mangidrowing kadagiti ladawan no ania ti iladawan dagitoy a bersikulo. Kalpasanna tulongam dagiti ubbing a mangisalaysay iti estoria babaen iti panangusar kadagiti ladawanda. Awisem ti maysa a tao a mangibinglay iti maysa a padas idi nakitana ti maysa a tao a maordenan ti maysa a takem ti priesthood. Kasano a kapada daytoy iti pannakaorden da Joseph ken Oliver a nailadawan iti Joseph Smith—Patarus 1:66–72?

• Ikkam dagiti ubbing iti sumagmamano a minuto a mangilista iti amin nga ammoda maipapan ken ni Juan a Mammuniag, ket palubosam ida a mangibinglay no ania ti insuratda. Awisem dagiti ubbing a sagdudua nga agbasa iti maysa kadagiti sumaganad a binatog ket inayonda daytoy iti listaanda: Mateo 3:13–17; Doktrina ken Katulagan 13; Joseph Smith—Pakasaritaan 1:66–72).

Doktrina ken Katulagan 13

Umawatak kadagiti bendision babaen ti Aaronic Priesthood.

Umawattayo iti ad-adu pay a bendision babaen ti Aaronic Priesthood. Ania ti maaramidmo a makatulong kadagiti ubbing a sursuruam a maawatanda a dagitoy a bendision ket agbalin gapu ta naisublin ti priesthood?

Dagiti Mabalin nga Aktibidad

• Mangikabil kadagiti ladawan iti maysa a panagbuniag ken ti sakramento iti maysa a pagyanan a kasapulan ti maysa a tulbek tapno maluktan. Pagsaritaan no apay a napateg dagiti tulbek, ken pausarmo kadagiti ubbing ti tulbek a manglukat iti pagyanan. Awisem dagiti ubbing a mangbasa ti Doctrine and Covenants 13 ket mangsapul kadagiti balikas ken ragup dagiti balikas a mangisuro kadakuada a dagiti bendision ket sumangbay manipud iti Aaronic Priesthood.

• Ipabuyam ti video a “Blessings of the Priesthood” (ChurchofJesusChrist.org), ket kiddawem kadagiti ubbing a mangilasin kadagiti wagas a nakabendisionan dagiti tao iti video gapu iti priesthood.

Joseph Smith—Pakasaritaan 1:73–74

Matulongannak ti Espiritu Santo a makaawat kadagiti nasantuan a kasuratan.

Kalpasan a nabuniagan da Joseph Smith ken Oliver Cowdery, tinulongan ida ti Espiritu Santo a mangipaawat kadakuada a nasaysayaat dagiti nasantuan a kasuratan. Mabalin a makaparegta dagitoy kadagiti ubbing, a mabalin a marigatan a makaawat kadagiti nasantuan a kasuratan.

Dagiti Mabalin nga Aktibidad

• Mangitugot ti maysa a simple a puzzle iti klase, ket awisem dagiti ubbing a mangbukel iti daytoy a sangkamaysa. Bayat ti panangaramidda daytoy, saludsodem kadakuada no kasano a maipada ti panangbasa kadagiti nasantuan a kasuratan iti panangbukel ti maysa a puzzle a sangkamaysa. Aggigiddan a basaen ti Joseph Smith—Pakasaritaan 1:73-74, ket awisem dagiti ubbing nga ibinglayda no ania ti nakatulong kada Joseph ken Oliver a naawatanda dagiti nasantuan a kasuratan. Ania ti maaramidtayo tapno agpatulong tayo iti Espiritu Santo bayat ti panagadaltayo kadagiti nasantuan a kasuratan?

• Awisem dagiti ubbing a mangaramid ti bookmark a mabalinda nga ikabil iti nasantuan a kasuratanda tapno mangipalagip kadakuada nga agpatulongda iti Espiritu Santo no agbasada. Nalabit aa masarakanda ti makaparegta a ragup dagiti balikas iti Joseph Smith—Pakasaritaan 1:74 a mabalinda nga isurat iti bookmarkda.

icon iti panagsursuro

Yallukoy ti Panagsursuro iti Pagtaengan

No awan ti panawenmo para kadagiti ubbing a mangileppas iti panid ti aktibidad iti klase, ibilangmo ti mangipatulod kadagiti kopia iti pagtaengan tapno maaramid dagiti ubbing daytoy a kadua dagiti pamiliada.

Panangpadur-as iti Panangisurotayo

Makibagay ken dumngegka iti Espiritu. Saanmo a riknaen a nasken nga usarem dagiti kapanunotan iti daytoy a balabala. Am-ammom dagiti ubbing a sursuruam; kiddawem ti Nailangitan nga Ama nga iwanwannaka iti kasayaatan a wagas tapno matulongan ida nga agsursuro ti doktrina ti ebanghelio ken mapabileg ti pammatida.

panid ti aktibidad: ti priesthood ket bileg ti Dios