Ni Joseph Smith ken dagiti Tallo a Saksi a nakaparintumeng nga agkarkararag

Pebrero 15–21

Doktrina ken Katulagan 14–17

“Agpaay a Saksi”

Kasano a matulongam dagiti ubbing nga agpaay a kas saksi iti ebanghelio? Mabalin a mangted kenka iti kapanunotan dagiti aktibidad iti daytoy a balabala.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ibilang ti panangawis iti sumagmamano nga ubbing a mangibinglay iti maysa a banag a nasursuroda itoy a lawas, iti pagtaengan wenno iti Primary, a mamatida a pudno.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 14:1–7

Matulongak ti Apo a mangaramid ti trabahona.

Ibilangmo no kasano a makatulong dagiti balikas ti Apo ken ni David Whitmer tapno maawatan dagiti ubbing no kasano a makiramanda iti aramid ti Dios.

Dagiti Mabalin nga Aktibidad

• Ibinglay biit dagiti sumagmamano a detalye maipapan ti pamilia a Whitmer (kitaen iti Saints, 1:68–71 wenno balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Kas pagarigan, ibinglay no siasino ni David Whitmer idi ken no kasano a tinulonganna ken ti pamiliana ni Joseph Smith bayat ti pannakaipatarus ti Libro ni Mormon.

• Tulongam dagiti ubbing a makaawat iti panangidilig iti panagtrabaho iti talon ken pannakiraman iti “naindaklan ken nakakaskasdaaw” nga aramid ti Dios. (bersikulo 1 ). Kas pagarigan, ti panagapit mabalin nga isimbolona ti mangidatag kadagiti tao ken ni Cristo. Mabalinmo ti mangipakita iti ladawan ti maysa a mannalon, mangitugot kadagiti kawes ti mannalon nga ipadas nga ikawes dagiti ubbing, wenno paglilinnawagan maipapan dagiti inaldaw a trabaho nga ar-aramiden ti mannalon. Ilawlawag a maysa a mannalon ni David Whitmer a nagtarigagay a mangammo no kasano a makatulong isuna iti Apo. Ibasam ti Doktrina ken Katulagan 14:3–4 kadagiti ubbing, ket awisem ida a mangtakuat no ania ti imbaga ti Apo ken ni David Whitmer nga aramidenna. Kasano a makatulongtayo iti trabaho ti Apo?

• Mangusar iti maysa a sagut a pangisuro kadagiti ubbing maipapan iti sagut ti Dios nga agnanayon a biag. Kas pagarigan, mangipakita kadagiti ubbing ti maysa a sagut nga addaan iti papel iti unegna a mabasa ti, “Agnanayon a Biag” (Doktrina ken Katulagan 14:7). Pawarwarmo iti maysa nga ubbing ti bungon ti sagut, ket pabasam ti Doktrina ken Katulagan 14:7 iti napigsa. Ibinglay a ti kaipapanan ti agnanayon a biag ket agbiag nga agnanayon iti sidong ti Dios ken agbalin a kas Kenkuana. Ibinglaymo ti pammaneknekmo maipapan kadagiti bendision ti panagtungpal kadagiti bilin ken panangawat iti agnanayon a biag.

  dagiti missionario a mangisursuro iti maysa a pamilia

  Ti aramid ti misionario ket maysa a wagas a pakatulongantayo iti Dios nga agaramid ti trabahona.

Doktrina ken Katulagan 15:6; 16:6

Makatulongak kadagiti dadduma nga umas-asideg ken ni Jesucristo.

Da John Whitmer ken Peter Whitmer Jr. ti kakabsat ni David Whitmer. Kas ken ni David, kayatda a maammuan no kasano a makatulongda iti Apo. Kiniddawna kadakuada a “mangyeg kadagiti karurua” Kenkuana.

Dagiti Mabalin nga Aktibidad

• Kiddawem kadagiti ubbing a mangiladawan iti maysa a banag nga importante wenno napateg kadakuada (kas iti maysa nga abalbalay, libro, wenno ay-ayam). Basaem ti Doktrina ken Katulagan 15:6 wenno 16:6, ket kiddawem kadagiti ubbing nga ingato dagiti imada no mangngeganda no ania ti kinuna ti Apo a “kapatgan.”

• Kadua dagiti ubbing, ilista dagiti wagas a pakatulonganda iti maysa a tao a mangsurot ken ni Jesucristo, kas iti panagbalin a gayyem kadagiti dadduma, panangibinglay kadagiti nasantuan a kasuratan iti maysa a gayyem, wenno panagkararag para iti maysa a tao nga agkasapulan. Tapno makaited iti kapanunotan kadagiti ubbing, mabalinmo nga ipakita dagiti sumagmamano nga adda pakainaiganna a ladawan manipud kadagiti magasin ti Simbaan wenno ti Libro ti Arte ti Ebanghelio. Wenno mabalin nga agdrowing dagiti ubbing kadagiti bukodda a ladawan. Awisem ida a mangpadas ti maysa a banag iti listaanda kabayatan ti lawas.

Doktrina ken Katulagan 17

Makapagbalinak a saksi kadagiti banag nga inaramid ti Dios para kaniak.

Nagbalin ni David Whitmer a maysa kadagiti Tallo a Saksi iti Libro ni Mormon, ken naibilang dagiti uppat a kakabsatna a lallaki kadagiti Walo a Saksi. Kas ken ni David ken dagiti kakabsatna a lallaki,makapagbalin ti tunggal maysa kadatayo nga “agpaay a saksi” ti kinapudno (Doktrina ken Katulagan 14:8).

Dagiti Mabalin nga Aktibidad

• Isaritam kadagiti ubbing ti maipapan kadagiti Tallo a Saksi (kitaen iti “Chapter 7: Witnesses See the Gold Plates” [Doctrine and Covenants Stories, 31–33], wenno ti maitutop a video iti ChurchofJesusChrist.org). Awisem dagiti ubbing a mangidrowing iti ladawan dagiti saksi a kumitkita kadagiti pinanid.

• Awisem dagiti ubbing a mangkolor iti panid ti aktibidad ita a lawas, ket usarem daytoy a mangisarita iti pakaammuan maipapan iti Tallo a Saksi.

• Iggamam ti maysa a kopia ti Libro ni Mormon, ket basaem kadagiti ubbing ti maudi a linia ti Doktrina ken Katulagan 17:6: “Ket pudno a kas iti panagbiag ti Apo ken Diosyo.” Isaritam kadagiti ubbing no kasano a naammuam a pudno ti Libro ni Mormon. Awisem dagiti ubbing nga agbalinda a saksi iti Libro ni Mormon babaen ti panangbasa iti daytoy ken panagkararag tapno ammuen no pudno daytoy ken kalpasanna ibinglayda ti pammaneknekda kadagiti dadduma.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 14–16

Matulongak ti Apo a mangaramid ti trabahona.

Bayat ti panangilawlawagmo kadagiti paltiing kadagiti agkakabsat a Whitmer, mabalinmo nga ibinglay dagiti sumagmamano a wagas a pangawisan ti Apo iti tunggal maysa kadatayo a tumulong Kenkuana iti trabahona.

Dagiti Mabalin nga Aktibidad

• Ibinglay dagiti estoria maipapan ken ni David Whitmer ken ti pamiliana a mariknam a makaparegta kadagiti ubbing (kitaen iti Saints, 1:68–71). Kasano nga inaramat ti Apo dagiti Whitmer a mangtulong a mangbangon iti pagarianna?

• Iti babassit a papel, isurat dagiti simple a saludsod ken mainaig a nasantuan a kasuratan manipud iti Doktrina ken Katulagan 14–16. Kas pagarigan: Ania ti kayarigan ti balikas ti Dios? (14:2). Ania ti kaindaklanan a sagut ti Dios? (14:7). Ania ti kinuna ti Apo a dakkel ti pategna? (15:6; 16:6). Awisem ti tunggal ubing a mangpili iti maysa a saludsod ken mangsapul kadagiti sungbat kadagiti bersikulo.

• Isurat ti dua a paulo iti pisarra: Trabaho iti Talon ken Ti Trabaho ti Apo. Tulongam dagiti ubbing a mangsarak iti Doktrina ken Katulagan 14:3–4 kadagiti ragup ti balikas a mainaig iti trabaho iti talon, ken isurat dagitoy iti baba ti umuna a paulo. Ania ti isuro kadatayo dagitoy ragup ti balikas maipapan iti trabaho ti Dios? Isurat dagiti sungbat dagiti ubbing iti baba ti maikadua a paulo. Kasano a makatulongtayo iti trabaho ti Apo?

Doktrina ken Katulagan 17

Makapagbalinak a saksi kadagiti banag nga inaramid ti Dios para kaniak.

Iti Doktrina ken Katulagan 17, imbaga ti Apo kada Oliver Cowdery, David Whitmer, ken Martin Harris nga agbalinda a Tallo a Saksi iti Libro ni Mormon. Tulongam dagiti ubbing a makasursuro no kasano a makapagbalinda met a saksi iti kinapudno.

• Awisem ti maysa nga ubing nga umay a nakasagana a mangibinglay iti pakaammuan maipapan iti Tallo a Saksi (kitaen iti “Chapter 7: Witnesses See the Gold Plates” [Doctrine and Covenants Stories, 31–33], wenno ti maitutop a video iti ChurchofJesusChrist.org). Ania ti masursurotayo manipud iti daytoy a pakaammuan maipapan iti no kasano nga agbalin a natutured a saksi? Mabalinmo pay ti mangipakita kadagiti napili a paset manipud iti video nga “A Day for the Eternities” (ChurchofJesusChrist.org; ti paset maipapan iti Tallo a Saksi a mangrugi iti 15:00).

• Aggigiddan a mangbasa iti kari ti Apo iti Doktrina ken Katulagan 17:1–3, ken tulongam dagiti ubbing a sapulenda ti pannakaipatungpalna daytoy iti “The Testimony of Three Witnesses” iti Libro ni Mormon.

• Aggigiddan a mangbasa iti Doktrina ken Katulagan 17:3–5 tapno maammuan no ania ti nakiddaw nga aramiden da Oliver Cowdery, Martin Harris, ken David Whitmer kalpasan a nakitada dagiti balitok a pinanid. Ania dagiti sumagmamano a kinapudno a mabalintayo a paneknekan? Mangisalaysay no kasano a naibinglaymo ti pamaneknekmo kadagiti dadduma, ket awisem dagiti ubbing nga ibinglay ti ania man kadagiti napadasanda.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing nga agpaay a kas maysa a saksi iti maysa a banag a nasursuroda iti klase ita nga aldaw. Kiddawem kadakuada a mangibinglay no kasano nga inaramidda daytoy iti klase inton sumaruno a lawas.

Panangpadur-as iti Panangisurotayo

Bay-am dagiti ubbing nga agbalin nga aktibo. Mapabilegmo ti aktibo a kinatao dagiti ubbing babaen iti panangawismo kadakuada a mangyakem iti maysa nga estoria wenno agtignay a maitunos iti maysa a kanta wenno maysa a binatog iti nasantuan a kasuratan. (Kitaen iti Panangisuro iti Wagas ti Mangisalakan, 25–26.)

panid ti aktibidad: makapagbalinak a saksi ti Dios