Manuskrito ti Libro ni Mormon

Replika ti manuskrito ti orihinal a Libro ni Mormon.

Pebrero 1–7

Doktrina ken Katulagan 10–11

“Tapno Agballigika”

Sikakararag a basaem ti Doktrina ken Katulagan 10–11, nga ut-utobem no kasano a matulongam dagiti ubbing a maawatanda dagiti kinapudno kadagitoy a benneg. Dagiti kapanunotan iti daytoy a balabala—para itoy a dua nga in-inaudi ken in-inauna nga ubbing—ket makatulongto.

Isuratmo dagiti Impresionmo

icon iti panagbibinninglay

Yawis ti Panagbibinninglay

Kiddawen kadagiti ubbing nga ibinglayda no ania ti malaglagipda manipud kadagitoy nga adalen maipapan ken ni Martin Harris ken dagiti napukaw a panid ti patarus ti Libro ni Mormon. Ibinglay ti ania man a detalye a saanda a malagip. Mabalin a kayatmo nga ibasar iti “Chapter 4: Martin Harris and the Lost Pages” (Doctrine and Covenants Stories, 18–21).

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 10:5

No kanayon nga agkararagak, bendisionannakto ti Nailangitan nga Ama.

No dadduma panunoten dagiti ubbing a mabalinda laeng nga agkararag kadagiti maitudinga panawen ken lugar, ken no nakaparintumeng wenno nakakidemda laeng. Kasano a matulongam ida a makasursuro a “kanayon nga agkararag”?

Dagiti Mabalin nga Aktibidad

• Ipakitam dagiti ladawan ti bambanag a kanayontayo nga ar-aramiden, kas iti pannangan, panagturog, wenno panagay-ayam. Kasano a makatulong kadatayo dagitoy a banag? I-display ti maysa a ladawan ti maysa nga ubing nga agkarkararag bayat ti panagbasam kadagiti ubbing manipud iti Doktrina ken Katulagan 10:5 dagiti balikas a “kanayon nga agkararag.” Kiddawem kadagiti ubbing nga uliten dagitoy a balikas iti sumagmamano a daras. Kasano a makatulong kadatayo ti kanayon a panagkararag?

• Usarem ti panid ti aktibidad daytoy a lawas a mangtulong kadagiti ubbing nga agpanunot kadagiti adu a lugar ken panawen a makapagkararagtayo.

• Awisem dagiti ubbing nga agdrowing kadagiti bukodda a ladawan wenno dagiti pamiliada nga agkarkararag iti nadumaduma a panawen ken lugar, kas iti simbaan, sakbay ageskuela, wenno iti pannaturog. Ilawlawag a ti kanayon a panagkararag ket mabalin a kaipapananna ti masansan a panagkararag iti agmalem. Kasano a makapagkararagtayo uray no addatayo iti lawlaw dagiti dadduma a tao, a kas iti pagadalan wenno kaduatayo dagiti gagayyemtayo?

  ubbing a lallaki nga agkarkararag

  Tulongannatayto ti Apo no agkararagtayo.

Doktrina ken Katulagan 11:12–13

Iturongnak ti Espiritu Santo nga agaramid iti nasayaat.

Uray no ubbingda pay, mangrugi a mailasin dagiti ubbing no makisasao ti Espiritu kadakuada.

Dagiti Mabalin nga Aktibidad

• Ilemmeng ti maysa a bombilia wenno flashlight ken maysa a ladawan ti naragsak a rupa iti maysa a paset iti siled. Awisem dagiti ubbing a mangsapul kadagitoy a banag. Basaem ti Doktrina ken Katulagan 11:13 AM, ket tulongam dagiti ubbing a mangilasin kadagiti balikas a mainaig kadagiti banag a nasarakanda. Ania ti isursuro dagitoy a balikas maipapan iti no kasano a tulongannatayo ti Espiritu Santo?

• Ikkam dagiti ubbing iti sumagmamano a situasion a kasapulanda nga agaramid ti pili iti umno ken biddut—kas iti pili a panagibaga ti kinapudno wenno agulbod, wenno ti pili nga agbalin a nasayaat wenno natangsit. Kasano a maammuantayo no ania ti rumbeng? Aggigiddan a basaen iti Doktrina ken Katulagan 11:12, ken paneknekam a tulongannatayonto ti Espiritu Santo nga agaramid iti umno a pili no dumngegtayo Kenkuana.

• Aggigiddan nga agkansion iti kanta maipapan iti pannarabay ti Espiritu Santo,kas iti “Listen, Listen” (Children’s Songbook, 107). Saludsodem kadagiti ubbing no ania ti isursuro ti kanta maipapan iti no kasano a mangtulong ti Espiritu Santo kadatayo.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 10:5

No kanayonnak nga agkararag, maparmekko ti sulisog ni Satanas.

Matulongamto dagiti ubbing a makaawat a ti awan sardayna a kararag ket mangted kadakuada ti bileg a mangparmek iti sulisog.

Dagiti Mabalin nga Aktibidad

• Isurat dagiti balikas wenno ragup dagiti balikas manipud iti Doktrina ken Katulagan 10:5. iti babassit a papel, ket kiddawem kadagiti ubbing nga ikabilda iti husto nga urnos. Allukoyen ida a mangkita iti bersikulo no kasapulanda ti tulong. Segun iti daytoy a bersikulo, ania dagiti sumangbay a bendision no agkararagtayo a kanayon? Kasano a makatulong kadatayo no laglagipentayo nga agkararag iti amin nga aldawtayo, nangruna no masulisogtayo nga agaramid iti maysa a banag a saan a rumbeng?

• Awisem dagiti ubbing a mangilista iti sumagmamano a panawen a makapagkararagtayo ken no sadino dagiti lugar a mabalin a pagkararagantayo. Para kadagiti mainayon a kapanunotan, allukoyem ida a kitaen ti Alma 34:17-27.

• Tulongam dagiti ubbing nga agaramid ti babassit a pagilasinan wenno ladawan a mangipalagipto kadakuada a kanayon nga agkararag. Awisem ida nga ibitin dagiti pagilasinanda iti pagtaenganda iti lugar a makitadanto a kanayon.

Doktrina ken Katulagan 11:12–13

Iturongnak ti Espiritu Santo nga agaramid iti nasayaat.

Masansan a masdaaw dagiti agtutubo no ania ti rikna iti pannarabay ti Espiritu Santo. Mabalin nga usarem ti Doktrina ken Katulagan 11 a mangisuro kadagiti ubbing no kasano ti mangilasin ti “Espiritu a mangidalan iti panagaramid iti nasayaat” (bersikulo 12).

Dagiti Mabalin nga Aktibidad

• Tulongam dagiti ubbing a mangaramid iti listaan dagiti tao a papananda no agkapasulanda ti tulong wenno addaanda ti saludsod. Apay nga agtalektayo a matulongannatayo dagitoy a tao? Awisem dagiti ubbing a basaen ti Doktrina ken Katulagan 11:12 ken sapulenda no ania ti naibaga ken ni Hyrum Smith a pagtalkanna. Ania ti masursurotayo manipud iti daytoy a bersikulo maipapan iti no apay a nasken a pagtalkantayo ti pannarabay ti Espiritu Santo?

• Saludsodem kadagiti ubbing no ania ti ibagada iti maysa a gayyemda nga agsaludsod kadakuada no ania ti mariknada no agsao ti Espiritu Santo kadakuada. Awisem dagiti ubbing a basaen ti Doktrina ken Katulagan 11:12–13 tapno maammuan dagiti sumagmamano a mabalin a sungbat.

• Ibinglay kadagiti ubbing dagiti sumagmamano a padasmo iti Espiritu Santo a mangtartarabay kenka nga agaramid kadagiti nasayaat a banag. Awisem dagiti ubbing a mangutob idi mabalin a naadaanda ti kas kadagitoy a padas ket kalpasanna ibinglayda dagiti padasda no mariknada a komportableda nga aramiden daytoy. Paneknekam a kayat ti Dios a tarabayennatayo babaen ti Espiritu Santo. Allukoyem dagiti ubbing a kitaenda kabayatan iti umay a lawas no maaddaanda kadagitoy a rikna a nailadawan iti Doktrina ken Katulagan 11:12–13.

Doktrina ken Katulagan 11:21, 26

Kasapulak a maammuan ti ebanghelio tapno matulongak dagiti dadduma a mabirukanda ti kinapudno.

Adunto ti gundaway dagiti ubbing a mangibinglay ti ebanghelio. Makaisuro kadakuada dagitoy a bersikulo no kasanoda nga agsagana para kadagitoy a gundaway.

Dagiti Mabalin nga Aktibidad

• Awisem dagiti ubbing a mangyakem no kasano nga isaritada ti ebanghelio iti maysa a tao a saan pay pulos a nakangngeg iti daytoy. Kas pagarigan, kasanoda a sungbatan dagiti saludsod maipapan iti Libro ni Mormon? Kasanoda nga ilawlawag no siasino ni Jesucristo? Basaem a kagiddan dagiti ubbing ti Doktrina ken Katulagan 11:21, 26. Ania ti inbaga ti Apo ken ni Hyrum Smith a masapul nga aramidenna tapno maisurona ti ebanghelio? Ania ti kayat a sawen ti “gun-oden” ti balikas ti Dios, ken kasano ti panagaramidtayo daytoy? Kasanotayo nga “tagibenen” ti balikas ti Dios iti puspusotayo?

• Awisem dagiti ubbing a mangibinglay iti nasantuan a kasuratan a magustuanda ket ilawlawagda no apay a magustuanda daytoy. Pagsaritaem ida maipapan iti no kasano a binendisionan dagiti nasantuan a kasuratan ti biagda ken no ania ti ar-aramidenda a panagadal iti balikas ti Dios iti pagtaengan. Allukoyem ida nga agaramid kadagiti panggep a tun-oyen a masansan nga agbasa iti balikas ti Dios.

• Aggigiddan nga agkansion iti maysa a kanta maipapan iti panangibinglay iti ebanghelio kas iti “I Want to Be a Missionary Now” (Children’s Songbook, 168). Ania ti isuro daytoy a kanta maipapan iti no kasano nga agbalintayo a misionario iti inaldaw?

• Ibinglay ti maysa a banag manipud iti “Hope of Israel” ni Presidente Russell M. Nelson ken Sister Wendy W. Nelson (worldwide devotional para kadagit agtutubo, Hunio 3, 2018, ChurchofJesusChrist.org) a mangparegta kadagiti ubbing a mangtulong a mangummong kadagiti annak ti Dios babaen ti panangibinglay ti ebanghelio.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a makisarita iti maysa a miembro ti pamilia maipapan iti maysa a banag a naadalda manipud iti Doktrina ken Katulagan 10 wenno 11 iti agdama. Kas pagarigan, mabalinda nga ibinglay no kasano ti panagplanoda nga agkararag a kanayon.

Panangpadur-as iti Panangisurotayo

Agkalikagum a maaddaan iti paltiing iti inaldaw. Bayat ti panagsaganam a mangisuro, agkararag, ken utobem dagiti nasantuan a kasuratan iti uneg ti makalawas. Maammuam a ti Espiritu ket “mangpalawag iti panunotmo” (Doktrina ken Katulagan 11:13). Sumangbay dagiti kapanunotan ken impresion maipapan iti no kasano a mangisuro iti ania man a panawen ken sadino man—bayat ti panagbiahem iti trabaho, agtrabaho iti pagtaengan, wenno makisarita kadagiti dadduma.

panid ti aktibidad: makapagkararagak a kanayon