ti parasurat nga agsursurat iti papel

Enero 25–31

Doktrina ken Katulagan 6–9

“Daytoy ti Espiritu ti Paltiing”

Irugim ti panagsaganam a mangisuro babaen ti panangbasam iti Doktrina ken Katulagan 6–9. Umaykayo, Sumurot Kaniak—Para kadagiti Indibidual ken Pamilia ken daytoy a balabala mabalin a mangpataud kadagiti kapanunotan maipapan iti no kasano a mangisuro kadagiti ubbing iti klasem.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ammo kadi dagiti ubbing ti estoria ni Oliver Cowdery maipapan iti panangawat iti sungbat ti kararag? (kitaen iti Saints, 1:58–60). Nalabit a naaddaanda met iti padas iti kararag a mabalinda nga ibinglay.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 6:5; 8:2; 9:7–9

Mabalin a makisao ti Dios kadatayo babaen ti Espiritu Santo.

Tulongam dagiti ubbing a makaawat nga addaanda iti maysa a managayat nga Ama iti Langit a dumngeg kadagiti kararagda ken sungbatanna ida babaen ti Espirituna.

Dagiti Mabalin nga Aktibidad

• Usarem ti “Kapitulo 5: Da Joseph Smith ken Oliver Cowdery” (Doctrine and Covenants Stories, 22–25, wenno ti maitutop a video iti ChurchofJesusChrist.org) tapno mangisarita kadagiti ubbing maipapan ken ni Oliver Cowdery ken no ania ti nasursurona maipapan iti no kasano a makisao ti Nailangitan nga Ama kadatayo. Kiddawen kadagiti ubbing a mangisarita kenka dagiti paggugustoda a paset ti estoria, ken pagsisinublatem ida a mangisarita kenka maipapan ken ni Oliver Cowdery.

• Isaritam kadagiti ubbing a pinadas ni Oliver Cowdery a mangipatarus iti Libro ni Mormon ngem dina kabaelan, isu a dinamag ni Joseph iti Apo no apay. Ibasam kadagiti ubbing ti sungbat ti Apo: “Nasken nga adalem iti panunotmo; kalpasanna damagem kaniak no pudno” (Doktrina ken Katulagan 9:8). Awisem ida nga agpammarang nga agadal ken agkararag. Tulongam dagiti ubbing a makaawat a daytoy pay ti pakaawatantayo kadagiti sungbat manipud iti Apo—babaen ti panagadal ken panagkiddaw iti tulongna.

  Oliver Cowdery

  Oliver Cowdery, ni Lewis A. Ramsey

• Awisem dagiti ubbing a mangsagid kadagiti uloda ken barukongda bayat ti panangbasam kadagiti balikas a “panunot” ken “puso” iti Doktrina ken Katulagan 8:2. Tulongam ida a makaawat a makisao ti Nailangitan nga Ama kadatayo babaen ti Espiritu Santo, a mangted kadatayo kadagiti kapanunotan ken rikna. Aggigiddan nga agkansion iti kanta maipapan iti Espiritu Santo, kas iti.“The Holy Ghost” (Children’s Songbook, 105). Ania ti isuro daytoy a kanta maipapan iti no kasano a makisao kadatayo ti Espiritu Santo? Ibinglaymo ti maysa a padas idi nariknam ti Espiritu Santo iti panunotmo ken pusom.

Doktrina ken Katulagan 6:33–36

Babaen iti tulong ti Mangisalakan, diak kasapulan ti agbuteng.

Adu dagiti rason tapno agbuteng da Joseph Smith ken Oliver Cowdery—ti pannakaidadanes ken kinapanglaw ti sumagmamano laeng kadagiti karit a sinangoda. Ti mensahe ti Apo kada Joseph ken Oliver ti mabalin pay a mangparegta kadagiti ubbing no mariknada ti buteng.

Dagiti Mabalin nga Aktibidad

• Kiddawem kadagiti ubbing a mangulit iti ragup dagiti balikas a “dikayo agbuteng, bassit a pangen” (Doktrina ken Katulagan 6:34) iti sumagmamano a gundaway. Ilawlawag a ti pangen ket maysa a grupo dagiti ayup, kas iti karnero. Mangipakita ti maysa a ladawan ti Mangisalakan kas maysa a pastor (kitaen iti Libro ti Arte ti Ebanghelio num. 64), ket ipaneknek a bambantayannatayo kas maysa a pastor a mangbambantay kadagiti karnerona. Gapu ta ay-ayatennatayo, nasken a ditayo agbuteng.

• Pagpammarangem dagiti ubbing a maysa a pangen dagiti mabutbuteng a karnero. Ania ngata ti mabalin a kabuteng ti karnero no dadduma? Pagpammarangem ti maysa nga ubbing a maysa a pastor a mangsalsalaknib kadagiti karnero. Ania dagiti kabutengtayo no dadduma? Paneknekam a ni Jesucristo ket maipada iti pastortayo ket Isu ti makapagpakalma kadagiti pagbutngantayo. Aggigiddan nga agkansion iti maysa a kanta maipapan iti Mangisalakan, kas iti “Little Lambs So White and Fair” (Children’s Songbook, 58).

• Ibasam ti Doktrina ken Katulagan 6:36 kadagiti ubbing, ket awisem ida a mangulit iti ragup dagiti balikas a “saankayo nga agduadua, saankayo nga agbuteng.” Tulongam dagiti ubbing a mangpanunot kadagiti wagas a mabalinda a “kitaen, wenno laglagipen, ti Mangisalakan bayat iti umay a lawas (kitaen met iti panid ti aktibidad iti daytoy a lawas).

icon iti panangisuro

Isuro ti Doktrina: In-inauna nga Ubbing

Doktrina ken Katulagan 6:5, 15–16, 22–23; 8:2; 9:7–9

Makisao ti Espiritu Santo iti panunotko ken pusok.

Mabalin a nakaawaten dagiti ubbing a sursuruam iti sagut ti Espiritu Santo. Maawatanda kadi no kasano ti mangilasin iti bukod a paltiing manipud iti Espiritu?

Dagiti Mabalin nga Aktibidad

• Mangidrowing iti pisarra iti maysa nga ulo ken maysa a puso. Tulongam dagiti ubbing a mangbasa kadagiti sumaganad a bersikulo ken mangikeddeng no ania ti mangiladawan iti Espiritu Santo a makisasao iti pampanunottayo, iti puspusotayo, wenno iti agpada: Doktrina ken Katulagan 6:15, 23; 8:2; 9:8; 9:9. Isaritam kadagiti ubbing, manipud kadagiti padasmo, no ania ti kayariganna no makisao ti Espiritu Santo iti panunotmo ken pusom.

• Aggigiddan a basaen ti Doktrina ken Katulagan 6:5, ket kiddawen kadagiti ubbing nga ibinglayda dagiti padasda iti panagkararag ken panangawat kadagiti sungbat. Tulongam ida nga agpanunot kadagiti pagwadan ti maysa a tao kadagiti nasantuan a kasuratan a nagkararag ken nakaawat iti sungbat iti maysa a saludsod (kitaen iti 1 Nephi 2:16; Enos 1:1–6; Ether 2:18–3:6).

• Isurat iti pisarra ti Kasano a makisarita ti Espiritu Santo kadatayo? Awisem dagiti ubbing a mangsukisok iti Doktrina ken Katulagan 6:15–16, 22–23; 8:2; 9:7–9 para kadagiti sungbat iti saludsod. Ibinglaymo dagiti padas a nakariknaam iti Espiritu Santo a makisarsarita kenka.

Doktrina ken Katulagan 6:33–37

“Dikayo agbuteng nga agaramid iti nasayaat.”

Mabalin a marikna dagiti ubbing a no dadduma ket mabutengda a mangitakder iti umno. Makaparegta kadakuada ti Doktrina ken Katulagan 6:33–37 nga agbalin a natured, uray pay kadagiti narigat a kasasaad.

Dagiti Mabalin nga Aktibidad

• Aggigiddan a basaen ti Doktrina ken Katulagan 6:33, ket paglilinnawagan no apay a ti maysa a tao ket mabuteng nga agaramid iti nasayaat (kitaen met kadagiti bersikulo 28–29). Tulongam dagiti ubbing a mangsapul kadagiti balikas wenno ragup dagiti balikas kadagiti bersikulo 33–37 a makatulong a mangted kadakuada iti tured nga agaramid iti nasayaat.

• Tulongam dagiti ubbing a mangaramid kadagiti drowing a mai-displayda kadagiti pagtaenganda a mangipalagip kadakuada a “kitaen ni [Jesucristo] iti tunggal panunot” (bersikulo 36). Bayat ti panagaramidda kadagiti drowing, ilawlawagmo no ania ti kaipapanan ti panangkita iti Mangisalakan ken no kasano a masalaknibanna ida.

• Aggigiddan nga agkansion iti maysa a kanta maipapan iti kinatured, kas iti “Dare to Do Right” (Children’s Songbook, 158) wenno “Let Us All Press On” (Hymns, no. 243). Kiddawem kadagiti ubbing a mangsapul iti kanta ti sumagmamano a rason no apay a nasken a “ditayo agbuteng” (bersikulo 6).

Doktrina ken Katulagan 8:10

Makapagkiddawak a sipapammati.

Iti intero a nasantuan a kasuratan, ipalagip kadatayo ti Apo a maaddaantayo iti pammati Kenkuana. Kasano a matulongam dagiti ubbing a sursuruam a maaddaan iti dakdakkel a pammati ken ni Jesucristo?

Dagiti Mabalin nga Aktibidad

• Isurat iti pisarra ti No awan ti awan ti maaramidam; ngarud agkiddaw a . Awisem dagiti ubbing a mangpadas a mangpanunot iti maysa a balikas a mangpunno kadagiti blangko. Kalpasanna aggigiddan a basaen ti Doktrina ken Katulagan 8:10 a mangsapul iti sungbat. Ania dagiti sumagmamano a banag a maaramidtayo no addaantayo iti pammati?

• Kalpasan ti aggigiddan a panangbasa iti Doktrina ken Katulagan 8:10, tulongam dagiti ubbing a mangpanunot kadagiti banag a mabalinda a kiddawen iti Apo a makatulong kadakuada. Awisem dagiti ubbing a mangidrowing iti maysa a ladawan a mangibagi ti maysa a banag a nasken a kiddawenda. Bayat ti panangipakitada kadagiti drowingda, kiddawem kadagiti dadduma pay nga ubbing a mangpugto no ania ti ibagbagi ti ladawan.

icon iti panagsursuro

Yallukoy ti Panagsursuro iti Pagtaengan

Tulongam dagiti ubbing a mangpili iti ababa a ragup dagiti balikas manipud iti Doktrina ken Katulagan 6–9 a kayatda nga ibinglay iti maysa a tao iti pagtaengan, kas iti “dikayo agbuteng nga agaramid iti nasayaat” (6:33), “saankayo nga agduadua, saankayo nga agbuteng” (6:36), wenno “awan ti maramidan no awan ti pammati” (8:10).

Panangpadur-as iti Panangisurotayo

Agusar kadagiti estoria. Makatulong kadagiti ubbing dagiti estoria a maawatan dagiti pagbatayan ti ebanghelio gapu ta maipakitada no kasano a tinungpal dagiti dadduma dagita a pagbatayan. Kabayatan ti panangisurom, mangsapul kadagiti wagas tapno mairaman dagiti estoria—manipud kadagiti nasantuan a kasuratan, manipud iti pakasaritaan ti Simbaan, wenno manipud iti bukodmo a biag—a mangiladawan kadagiti pagbatayan iti nasantuan a kasuratan.

panid ti aktibidad: matulongannak ni Jesucristo no mariknak ti panagbuteng