pamilia nga agbasbasa kadagiti nasantuan a kasuratan

Disiembre 28–Enero 3

Doktrina ken Katulagan 1

“Dumngegkayo, O Dakayo a Tattao”

Ti umuna nga addangmo iti panagsaganam a mangisuro ket nasken a sikakararag nga adalem ti Doktrina ken Katulagan 1. Bayat nga aramidem daytoy, dumngegka kadagiti parikna maipapan kadagiti kasapulan dagiti ubbing, ket mangsapul kadagiti pagbatayan a napategto kadakuada. Dagitoy nga impresion ti mangtulongto kenka nga agplano kadagiti napapateg nga aktibidad a pangisuruam kadagitoy a pagbatayan.

Isuratmo dagiti Impresionmo

icon iti panagbibinninglay

Yawis ti Panagbibinninglay

Itag-aymo ti Doktrina ken Katulagan, ket kiddawem kadagiti ubbing nga ibinglayda ti ania man a banag nga ammoda maipapan iti daytoy a libro. Asino ti nangisurat iti daytoy? Ania ti linaonna daytoy? Apay a napateg daytoy? Para iti tulong, mabalinmo nga ibasar iti “Chapter 23: The Doctrine and Covenants” (Doctrine and Covenants Stories, 90–92). Ibinglaymo ti pammategmo iti Doktrina ken Katulagan ken ti gagarmo nga agsursuro manipud iti daytoy itoy a tawen.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 1:4

Babaen kadagiti propetana, ballaagannatayo ti Apo ti naespirituan a pagpeggadan.

Impakdaar ti Apo a ti timekna ket “timek a pammallaag.” Kasano a maparegtamto dagiti ubbing a dumngeg ken agtungpal kadagiti ballaag nga itedna?

Dagiti Mabalin nga Aktibidad

• Ipaiggemmo kadagiti ubbing dagiti ladawan dagiti tanda ti pammallaag—kas iti peggad iti dalan, dakes a panawen, wenno sabidong—ket isaritam maipapan iti no kasano a ballaagannatayo dagitoy iti peggad. Wenno isaritam ti maysa nga estoria maipapan iti maysa a panawen idi tinungpalmo ti maysa a ballaag. Idilig dagitoy a pammallaag kadagiti ballaag ti Apo nga it-itedna kadatayo babaen kadagiti propetana. Paneknekam a ballaagannatayo gapu ta ay-ayatennatayo ken kayatna a natalgedtayo (kitaen met iti panid ti aktibidad iti daytoy a lawas).

• Ibasam kadagiti ubbing manipud iti Doktrina ken Katulagan 1:4, “Ket agpaayto iti amin a tao ti timek a pammallaag.” Ibinglaymo ti maysa a banag a nabiit pay nga insuro ti propeta a mabalin a mangpatalinaed kadatayo a natalged. Mangipakita kadagiti mainaig a ladawan, no mabalin. Isaritam ti maipapan iti no kasano a tungtungpalem ti ballaag ti propeta.

Doktrina ken Katulagan 1:17, 29

Maysa a propeta ti Dios ni Joseph Smith.

Bayat ti panagadalmo ken panangrugi nga adalen dagiti ubbing iti Doktrina ken Katulagan, tulongam ida a mangpapigsa kadagiti pammaneknekda iti nadiosan a takem ni Joseph Smith.

Dagiti Mabalin nga Aktibidad

• Ipakitam kadagiti ubbing ti maysa a ladawan ni Propeta Joseph Smith (kitaen iti Umaykayo, Sumurot Kaniak—Para kadagiti Indibidual ken Pamilia; kitaen met iti Libro ti Arte ti Ebanghelio, blg. 87). Pagtakderem dagiti ubbing iti abay iti ladawan ket ibinglayda no ania ti ammoda maipapan ken ni Joseph Smith.

• Ipaiggemmo kadagiti ubbing ti maysa a ladawan ti Mangisalakan ken maysa a ladawan ni Joseph Smith. Isaritam kadakuada maipapan iti no ania ti inted ti Mangisalakan babaen ken ni Joseph Smith, kas dagiti bilin (kitaen iti bersikulo 17) ken ti Libro ni Mormon (kitaen iti bersikulo 29). Isaritam kadagiti ubbing nga iti Doktrina ken Katulagan masursuroda maipapan kadagiti bilin nga inted ti Apo iti Simbaan babaen ken ni Joseph Smith.

• Ibinglaymo dagiti riknam maipapan ken ni Joseph Smith, ket paneknekam a ti Dios “inawagak ti katulongak a ni Joseph Smith, Jun., ket kinasaok manipud iti langit” (bersikulo 17).

Doktrina ken Katulagan 1:38

Dagiti balikas ti propeta ket balikas ti Dios.

Mabalin a nangngegan dagiti ubbing a sursuruam nga agsarita ti Presidente ti Simbaan, ngem mabalin a saanda a maamiris a dagiti balikasna ket naggapu iti Dios. Tulongam ida a makasursuro a mangilasin a dagiti balikas ti propeta ket balikas ti Dios.

Dagiti Mabalin nga Aktibidad

• Agay-ayam ti simple nga ay-ayam babaen iti panangited kadagiti pangiturong iti maysa nga ubing ket ipaulit kenkuana dagiti pangiturong para kadagiti dadduma pay nga ubbing. Tulongam ida a makaawat a ti panangsurot iti pangiturong ti ubing ket maipada iti panangsurot kadagiti pangiturongmo ken ti panangsurot ti propeta ket maipada iti panangsurot iti Apo. Ibasam kadakuada ti maudi a linia iti Doktrina ken Katulagan 1:38: “Babaen man ti timekko wenno babaen ti timek dagiti katulongak, isu nga isu.”

• Aggigiddan nga agkansion iti maysa a kanta maipapan kadagiti propeta, kas iti maudi a bersikulo ti “Follow the Prophet” (Children’s Songbook, 110–11). Ibinglaymo ti pammaneknekmo nga agsao ti propeta iti balikas ti Dios.

• Mangibinglay ti maysa a ladawan, rekording, wenno video clip ti sibibiag a propeta. Ibinglaymo ti pammaneknekmo nga isarita kadatayo ti propeta no ania ti kayat ti Dios a maammuantayo. Awisem dagiti ubbing a mangibinglay no ania ti riknada maipapan iti propeta.

  sesion ti sapasap a komperensia

  Isuro kadatayo ti propeta no ania ti kayat ti Dios a maammuantayo.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 1:15–17, 29–30

Ammo ti Apo dagiti karit a maipasango kadatayo, isu nga insublina ti ebanghelio babaen ken ni Joseph Smith.

Matulongam dagiti ubbing nga agsagana para kadagiti masakbayan a karit babaen ti panangisuro kadakuada no kasano a makaipaay ti naespirituan a pannakasaluad ti Pannakaisubli ti ebanghelio.

Dagiti Mabalin nga Aktibidad

• Tulongam dagiti ubbing nga agpanunot kadagiti sumagmamano a parikut iti lubong iti agdama. Irebyum kadakuada ti Doktrina ken Katulagan 1:15–16 ken tulongam ida a mangilasin kadagiti sumagmamano a parikut nga impadto ti Apo a mapasamakto. Awisem ida a mangtakuat kadagiti bersikulo 17 ken 29–30 no ania ti inaramid ti Apo a mangtulong kadatayo a mangsango kadagiti karit ti panawentayo.

• Kiddawem kadagiti ubbing a mangipapan nga agsagsaganada para iti maysa a biahe. Ania koma ti maempakeda? Kasano a makatulong daytoy kadakuada tapno maammuanda nga agtudonto bayat ti panagdaliasatda wenno umpesto ti pilid ti luganda? Aggigiddan a basaen ti bersikulo 17, ket paglilinnawagan no ania ti naammuan ti Apo a mapasamak kadatayo ken no kasano a nagsagana Isuna para iti daytoy. (No kasapulan, ilawlawag a ti “kalamidad” ket maysa a didigra wenno nakaam-amak a banag.) Kasano a makatulong kadatayo dagiti bilin ti Dios a mangdaer kadagiti karit iti biag iti panawentayo?

Doktrina ken Katulagan 1:30

Ti Simbaan ni Jesucristo dagiti Santo iti Ud-udina nga Aldaw ti “pudno ken nabiag a simbaan” ti Apo.

Kasano a matulongam dagiti ubbing a mangbigbig iti pateg dagiti naindaklan a bendision ti pannakikameng iti “pudno ken nabiag a simbaan”?

Dagiti Mabalin nga Aktibidad

• Awisem dagiti ubbing a mangilista kadagiti banag a sibibiag ken sumagmamano a banag a saan a sibibiag(no mabalin, mangitugot kadagiti ladawan wenno pagarigan). Ania ti pagdumaan ti nabiag a banag ken ti saan a nabiag a banag? Aggigiddan a basaen ti bersikulo 30. Ania ti kaipapanan a ti Simbaan ket “pudno”? a daytoy ket “nabiag”?

• I-display ti maysa a ladawan, kas iti maysa a naipinta a ladawan ti Mangisalakan, ket kiddawem kadagiti ubbing a mangiladawan iti daytoy a nakaiddep ti silaw iti siled. Usarem daytoy nga aktibidad a mangtulong kadagiti ubbing a makaawat a para iti adu a tao, ti pudno a Simbaan ti Mangisalakan ket adda iti “kalideman” ken “kasipngetan.” Kasano a matulongantayo dagiti dadduma a mangammo maipapan iti Simbaan?

Doktrina ken Katulagan 1:37–38

Agnanayon ti balikas ti Apo.

Matulongam dagiti ubbing a mapatibker dagiti pammatida ken ni Jesucristo babaen ti panangisuro kadakuada nga awan duadua ken mapagpannurayan ti balikasna.

Dagiti Mabalin nga Aktibidad

• Tulongam dagiti ubbing a mangidilig kadagiti banag a saan nga agpaut, kas iti labutab wenno arbis ti niebe, kadagiti banag a kasla manayon, a kas iti bantay, wenno ti init. Kiddawem kadakuada a mangsapul kadagiti bersikulo 37–38 ti maysa a banag a kinuna ti Apo a manayon. Apay a maysa a bendision a maammuan a ti balikas ti Dios “saanto a mapukaw “?

• Tulongam dagiti ubbing a mangawat a ti “timek dagiti katulongak” ket mairaman dagiti timek dagiti apostol ken propetatayo. Tulongam dagiti ubbing a mangsapul kadagiti “padto ken kari” iti kaudian a mensahe iti sapasap a komperensia ti maysa kadagiti katulongan ti Apo. Ibinglaymo ti pammaneknekmo a dagitoy a balikas ket pinaregta ti Apo ken “matungpalto amin.”

icon iti panagsursuro

Yallukoy ti Panagsursuro iti Pagtaengan

Irebyum kadagiti ubbing no ania ti nasursuroda ita, ken awisem ida nga agpili ti maysa a banag a mariknada a nasken a maammuan iti amin. Allukoyem ida a mangibinglay iti daytoy ti maysa a gayyem wenno miembro ti pamilia.

Panangpadur-as iti Panangisurotayo

Masursuro dagiti ubbing iti adu a wagas. “Saan nga agpapada ti amin nga ubbing, ket alisto a dumur-as ti tunggal ubing. Dagiti panagkagumaanmo a mangisuro kadagiti ubbing ket agbalinto a kasamayan kabayatan ti panangusarmo iti nadumaduma a pamay-an iti panangisuro,” mairaman dagiti estoria, tulong a ladawan [visual aid], ken musika (Panangisuro ti Wagas iti Mangisalakan, 25).

panid ti aktibidad: ballaagannatayo ti propeta iti naespirituan a peggad