Sagrado a Kakaywan, ni Greg K. Olsen

Enero 4–10

Joseph Smith—Pakasaritaan 1:1–26

“Nakitak ti Kasla Adigi a Lawag”

Bayat ti panangbasam kadagiti nasantuan a kasuratan, panunotem ti maipapan kadagiti ubbing nga isursurom. Maparegtanakanto ti Espiritu Santo, babaen kadagiti parikna a maawatmo, no ania ti ipokusmo iti klase.

Isuratmo dagiti Impresionmo

Yawis ti Panagbibinninglay

Awisem ti sumagmamano nga ubbing a mangibinglay no ania ti ammoda maipapan ken ni Joseph Smith ken ti kararagna iti Sagrado a Kakaywan (makatulongto no mangipakitaka ti ladawan ti Umuna a Parmata). Saludsodem kadakuada no ania ti mariknada no mangngeganda a sinarungkaran ti Nailangitan nga Ama ken ni Jesucristo ni Joseph Smith. No sarungkaran ni Joseph Smith ti klasetayo, ania ngata ti saludsodentayo Kenkuana maipapan iti padasna?

Isuro ti Doktrina: In-inaudi nga Ubbing

Joseph Smith—Pakasaritaan 1:3–20

Naisagana ni Joseph Smith nga agbalin a propeta ti Dios.

Ti panagadal maipapan iti kinaagtutubo ni Joseph Smith ket makatulong kadagiti ubbing a manginaig kenkuana ken agsagana nga agsursuro manipud kadagiti padasna. Nalabit a matulongam ida a maawatanda no kasano a dagiti padas ni Joseph a nagubing ket nangisagana kenkuana nga agbalin a propeta ti Dios.

Dagiti Mabalin nga Aktibidad

• Kiddawem iti maysa nga ubing nga iggamanna ti maysa a ladawan ni Joseph Smith (kitaen iti Libro ti Arte ti Ebanghelio, blg. 87) bayat iti panangibinglaymo ti sumagmamano a kinapudno maipapan ken ni Joseph a masarakan iti Joseph Smith—Pakasaritaan 1:3–14 (kitaen met iti “Chapter 1: Joseph Smith and His Family,” Doctrine and Covenants Stories, 6–8, wenno ti maitutop a video iti ChurchofJesusChrist.org). Tulongam ida a mangidilig kadagiti detalye maipapan iti pamiliana ken ti biagna iti bukodda a biag. Mangibinglay iti pammaneknekmo a pinili ti Dios ni Joseph Smith ken naisagana nga agbalin a propeta (kitaen iti “Dagiti Timek ti Pannakaisubli: Pamilia ni Joseph Smith,” iti Umaykayo, Sumurot Kaniak—Para kadagiti Indibidual ken Pamilia). No kasapulan, isurom kadagiti ubbing a ti propeta ket maysa a tao nga agsarita para iti Dios.

• Awisem ti maysa nga agtutubo a lalaki iti ward a sumarungkar iti klasem, nga agpammarang a ni Joseph Smith. Mangisagana ti sumagmamano a saludsod para kadagiti ubbing a saludsodenda kenkuana a masungbatan iti Joseph Smith—Pakasaritaan 1:3–20 (mabalin a kayatmo nga ibinglay dagitoy a saludsod iti agtutubo a lallaki a nasapsapa). Kalpasanna awisem ti agtutubo a lallaki a mangbasa kadagiti sumagmamano a bukod a balikas ni Joseph Smith maipapan iti Umuna a Parmata (kas pagarigan, Joseph Smith—Pakasaritaan 1:25).

Joseph Smith—Pakasaritaan 1:10–17

Denggen ken sungbatan ti Nailangitan nga Ama dagiti kararagko.

Makaparegta kadagiti ubbing ti padas ni Joseph Smith nga agkararag nga addaan iti pammati a denggento ti Dios ida.

Dagiti Mabalin nga Aktibidad

• Ibagam kadagiti ubbing ti maipapan kadagiti saludsod ni Joseph Smith (kitaen iti Joseph Smith—Pakasaritaan 1:10). Ania ti maaramidantayo no addaantayo kadagiti saludsod maipapan iti Dios? Mangipakita kadagiti ubbing iti maysa a kopia ti Biblia, ket ilawlawag nga idi binasa ni Joseph ti Biblia, naammuanna a mabalinna a “saludsoden ti Dios” (Santiago 1:5; kitaen met iti Libro ti Arte ti Ebanghelio, blg. 89). Ibinglaymo ti pammaneknekmo a mabalintayo ti agdamag iti Dios kadagiti saludsod babaen iti kararag.

• Isaritam maipapan iti padasmo idi natikawka, nagpatulongka iti Dios, ket nakaawatka iti sungbat. Tulongam dagiti ubbing a mangpanunot iti panawen idi nasungbatan dagiti kararagda. Mabalinmo met nga isarita iti estoria manipud iti magasin ti Simbaan maipapan iti kararag ti maysa nga ubing a masungsungbatan.

Joseph Smith—Pakasaritaan 1:17–19

Nakita ni Joseph Smith ti Nailangitan nga Ama ken ti anakna, ni Jesucristo.

Mabalinmo met a tulongan dagiti ubbing a mangisaad iti pundasion para iti napigsa a pammaneknek iti Umuna a Parmata ni Joseph Smith. Ibinglaymo kadakuada no kasano a nagun-odmo ti pammaneknekmo iti daytoy a napateg a pasamak.

Dagiti Mabalin nga Aktibidad

• Ipakitam ti ladawan ti Umuna a Parmata iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ken ibinglaymo iti bukodmo a balikas no ania ti napasamak idi nagkararag ni Joseph Smith. Awisem dagiti ubbing a mangidrowing kadagiti bukodda a ladawan iti estoria.

• Awisem dagiti ubbing a mangkolor ti panid ti aktibidad iti daytoy a lawas ken mangusar iti daytoy a mangisarita iti estoria maipapan iti Umuna a Parmata (kitaen met iti “Chapter 2: Joseph Smith’s First Vision,” Doctrine and Covenants Stories, 9–12, wenno iti maitutop a video iti ChurchofJesusChrist.org).

• Basaen ti Joseph Smith—Pakasaritaan 1:17, ken ilawlawag kadagiti ubbing dagiti balikas nga imbaga ti Nailangitan nga Ama ken ni Joseph Smith.

Isuro ti Doktrina: In-inauna nga Ubbing

Joseph Smith—Pakasaritaan 1:10–13

Masungbatan ti Dios dagiti saludsodko babaen kadagiti nasantuan a kasuratan.

Naparegta ni Joseph Smith babaen iti nabasana a binatog iti Biblia, ket nangiturong daytoy iti Umuna a Parmata ken iti Pannakaisubli ti Simbaan ni Cristo. Tulongam dagiti ubbing a makaawat no kasano a ti panagadal kadagiti nasantuan a kasuratan ket makatulong a mangsapul kadagiti sungbat ti naespirituan a saludsodda.

Dagiti Mabalin nga Aktibidad

• Ipakitam kadagiti ubbing dagiti nagduduma a libro (kas iti ensayklopedia wenno libro ti panagluto), ket tulongam ida a mangpanunot kadagiti saludsod a masungbatan dagitoy a libro. Kalpasanna mangipakita kadakuada iti maysa a kopia dagiti nasantuan a kasuratan. Ania dagiti saludsod a mabalin a masungbatan dagitoy a libro? Mabalin a mangtedka iti pagarigan ti maysa a saludsod a masungbatan kadagiti nasantuan a kasuratan. Aggigiddan a basaen ti Joseph Smith—Pakasaritaan 1:10–11 tapno maammuan no ania dagiti saludsod ni Joseph Smith ken no ania dagiti sungbat a naammuanna kadagiti nasantuan a kasuratan.

• Tulongam dagiti ubbing a mangsapul kadagiti balikas iti bersikulo 12 a mangiladawan no kasano a ti panangbasa iti Santiago 1:5 ket nangapekto ken ni Joseph Smith. Mangibinglayka iti padasmo kadagiti nasantuan a kasuratan—kas pagarigan, idi nakasapulka iti sungbat iti maysa kadagiti saludsodmo babaen iti panagbasam kadagiti nasantuan a kasuratan. Aggigiddan a kantaen ti “Search, Ponder, and Pray” (Children’s Songbook, 109).

Joseph Smith—Pakasaritaan 1:10–19

Denggen ken sungbatan ti Nailangitan nga Ama dagiti kararagko.

Am-ammo ti Dios ni Joseph Smith, ket idi nagkararag ni Joseph, nangngegan ti Dios isuna. Nupay sabali dagiti padas dagiti ubbing a sursuruam kadagiti padas ni Joseph, makatulongka kadakuada a makarikna nga am-ammo ida ti Dios ken mangngegna ida no agkararagda.

Dagiti Mabalin nga Aktibidad

• Awisem ti maysa a nagannak dagiti ubbing a tumakder iti ruar ti siled ti klase ket sungbatanna dagiti saludsod manipud kadagiti ubbing babaen ti panagusarna kadagiti pamay-an kas iti panagteks iti mensahe, panagtawag iti telepono, panagsurat iti bassit a papel, wenno panangibaon iti mensahero. Ania dagiti sumagmamano a wagas ti Nailangitan nga Ama a makisarita kadatayo? (kitaen iti “Apocalipsis,” Pangiwanwan iti Nasantuan a Kasuratan, scriptures.ChurchofJesusChrist.org). Segun iti Joseph Smith—Pakasaritaan 1:16–19, kasano a sinungbatan ti Nailangitan nga Ama ti kararag ni Joseph Smith? Kasano a sinungbatanna dagiti kararagtayo?

• Aggigiddan a kantaen ti “A Child’s Prayer” (Children’s Songbook, 12–13).

  

  Denggen ken sungbatan ti Nailangitan nga Amatayo dagiti kararagtayo.

Joseph Smith—Pakasaritaan 1:14–19, 25

Nagparang ti Nailangitan nga Ama ken ni Jesucristo ken ni Joseph Smith.

Agkasapulan ti tunggal ubing a sursuruam iti pammaneknek maipapan iti padas ni Joseph Smith iti Sagrado a Kakaywan. Kasano a matulongam ida a manggun-od wenno mangpatibker iti pammaneknekda?

Dagiti Mabalin nga Aktibidad

• Tapno marebyu ti pakaammuan maipapan iti Umuna a Parmata, mangisurat kadagiti pakagupgopan ti tunggal bersikulo manipud iti Joseph Smith—Pakasaritaan 1:14–19 iti nagsisina a babassit a papel. Ikabil dagiti papel iti maysa a pagkargaan, ket awisem dagiti ubbing a sagaysa a mangpili kadagitoy ket ikabil dagitoy iti pisarra iti husto nga urnos.

• Awisem dagiti ubbing nga agkidem ket iladawanda iti panunotda no kasano ti agbalin a kas ken ni Joseph bayat ti panangbasam iti Joseph Smith—Pakasaritaan 1:14–17. Paibinglay kadakuada dagiti kapanunotan ken riknada maipapan iti padas ni Joseph Smith.

• Ipabuyam ti video “Ask of God: Joseph Smith’s First Vision” (ChurchofJesusChrist.org), ket paibinglaymo kadagiti ubbing ti maysa a banag a masursuroda maipapan iti parmata ni Joseph Smith iti Nailangitan nga Ama ken ni Jesucristo.

• Aggigiddan a basaen ti pammaneknek ni Joseph Smith iti Joseph Smith—Pakasaritaan 1:25. Pasapul kadagiti ubbing dagiti balikas ken ragup dagiti balikas a mangipakita iti pammati ni Joseph Smith. Kasano a makapagtalinaedtayo a napudno iti Dios ken dagiti pammaneknektayo no sumuppiat dagiti dadduma a tao kadatayo?

Yallukoy ti Panagsursuro iti Pagtaengan

Awisem dagiti ubbing a mangibinglay iti estoria ti Umuna a Parmata ni Joseph Smith iti maysa a tao—no mabalin, iti maysa a tao a saan pay pulos a nakangngeg iti daytoy. Mabalinda nga usaren ti panid ti aktibidad itoy a lawas a mangtulong kadakuada a mangisarita daytoy nga estoria.

Panangpadur-as iti Panangisurotayo

Yallukoy ti panagraem. Tapno maipalagip kadagiti ubbing nga agbalin a managraem, mabalin nga agkansion wenno agdayyeng ti maysa a kanta, mangipakita ti ladawan ni Jesus, wenno mangusar ti senias ti ima a mabigbig dagiti ubbing.