Panawen ti Panagani iti Pransia, ni James Taylor Harwood

Enero 18–24

Doktrina ken Katulagan 3–5

“Maituloy ti Aramidko”

Bayat ti panagadalmo ti Doktrina ken Katulagan 3–5, mabalinmo nga awaten dagiti impresion maipapan iti no ania ti kasapulan a maawatan dagiti ubbing a sursuruam. Makaited met kenka iti daytoy a balabala kadagiti kapanunotan.

Isuratmo dagiti Impresionmo

Yawis ti Panagbibinninglay

Ipakita ti ladawan ni Joseph Smith manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket tulongam dagiti ubbing a mangibinglay no ania ti ammoda maipapan ti estoria nga iladladawanna. Tulongam ida a manglagip ti estoria ti panakapukaw ni Martin Harris kadagiti umuna a panid ti patarus ti Libro ni Mormon (kitaen iti “Chapter 4: Martin Harris and the Lost Pages,” Doctrine and Covenants Stories, 18–21; wenno Saints, 1:51–56).

Isuro ti Doktrina: In-inaudi nga Ubbing

Doktrina ken Katulagan 3:7–10

Makapagpiliak iti rumbeng uray no padpadasen dagiti dadduma a pagaramidendak iti biddut.

Tulongam dagiti ubbing a makasursuro iti nasursuro ni Joseph Smith: no agtalekda iti Nailangitan nga Ama, ket addanto Isuna “[kadakuada] iti amin a kanito ti riribuk” (Doktrina ken Katulagan 3:8).

Dagiti Mabalin nga Aktibidad

• Irebyu ti estoria ni Martin Harris ken dagiti napukaw a panid ti manuskrito (kitaen iti Doctrine and Covenants Stories, 18–21, wenno iti maitutop a video iti ChurchofJesusChrist.org). Ibinglay kadagiti ubbing ti sumagmamano a posible a situasion no masulisogda nga agaramid iti maysa a banag nga ammoda a saan a rumbeng. Kasano a makatulong kadatayo ti Nailangitan nga Ama nga agpili iti rumbeng? (kitaen iti Doktrina ken Katulagan 3:8).

  

  Martin Harris, ni Lewis A. Ramsey

• Basaem dagitoy a balikas manipud iti Doktrina ken Katulagan 3:8, “ket intaggayanna koma ti takiagna ket tinarabaynaka.” Awisem dagiti ubbing a tumakder ken itanggayada dagiti takiakda bayat ti panangbasam manen iti ragup dagiti balikas. Ibinglay kadakuada dagiti sumagmamano a wagas a mabalin a pakaitanggayaan ti Apo iti takiagna tapno tulonganna ida no padasen dagiti dadduma nga allukoyen ida nga agaramid kadagiti biddut a banag. Pagsinnublattem ida a mangitanggaya kadagiti takiagda bayat ti panangisarsaritada iti maipapan iti dadduma pay a wagas a pangitanggayaan ti Apo iti takiagna tapno tulongannatayo.

Doktrina ken Katulagan 4

Kasapulannak ti Apo a mangaramid ti trabahona.

Mabalin a “sumrek nga agserbi ti Dios” (Doktrina ken Katulagan 4:2) dagiti ubbing iti adu a wagas, ket makapagsaganada itan para kadagiti nayon a gundaway iti masakbayanda.

Dagiti Mabalin nga Aktibidad

• Ibasam ti Doktrina ken Katulagan 4:1 kadagiti ubbing. Mangitugot iti sumagmamano a ladawan a mangipakita kadagiti “nakaskasdaaw” nga aramid ti Dios iti ud-udina nga aldaw (kas kadagiti ladawan dagiti misionario, templo, ken ti Libro ni Mormon). Pagsisinnublattem dagiti ubbing a mangpili ti maysa a ladawan ken mangisarita iti maipapan iti daytoy. Ibinglay no apay a nakaskasdaaw kenka ti aramid ti Dios.

• Tulongam dagiti ubbing nga agpanunot kadagiti tignay wenno agdrowing kadagiti ladawan a mangiladawan ti ragup dagiti balikas nga “agserbikayo kenkuana iti amin a puso, kabaelan, panunot ken pigsayo” (Doktrina ken Katulagan 4:2). Ibinglay ti maysa a pagarigan ti maysa a tao nga am-ammom nga agserserbi iti Dios iti kastoy a wagas.

• Aggigiddan nga agkansion iti maysa a kanta maipapan iti aramid ti misionario, kas iti “I Want to Be a Missionary Now” (Children’s Songbook, 168). Pagsaritaan no ania ti isursuro ti kanta maipapan iti no kasano a matulongantayo ti Dios a mangaramid ti trabahona.

Doktrina ken Katulagan 5:10

Naawattayo ti balikas ti Dios babaen ken ni Joseph Smith.

Kasano a matulongam dagiti ubbing a patibkerenda dagiti pammaneknekda a ni Joseph Smith ken dagiti dadduma a propeta ket mangisuro ti balikas ti Dios?

Dagiti Mabalin nga Aktibidad

• Ilemmeng ti maysa a ladawan ni Joseph iti maysa a disso iti siled (kitaen iti Libro ti Arte ti Ebanghelio, num. 87). Basaen ti Doktrina ken Katulagan 5:10, ket awisen dagiti ubbing a mangsapul iti ladawan tapno maammuan no siasino ti pakaiturongan ti balikas a “kenka.” Ibinglaymo ti pammaneknekmo a naawattayo ti balikas ti Dios babaen ken ni Joseph Smith.

• Ipakitam kadagiti ubbing dagiti kopia ti Libro ni Mormon ken Doktrina ken Katulagan. Ilawlawag nga inted ti Dios kadatayo dagitoy a nasantuan a kasuratan babaen ken ni Joseph Smith. Ibinglay ti sumagmamano kadagiti paggugustom a bersikulo manipud kadagitoy a libro, ket isaritam no apay a pagyamanam dagitoy.

Isuro ti Doktrina: In-inauna nga Ubbing

Doktrina ken Katulagan 3:5–10; 5:21–22

Nasken nga ad-adda nga ipategko maipapan iti panangparagsak iti Dios ngem ti panangparagsak kadagiti dadduma.

Bayat ti panangsursuro dagiti ubbing ti maipapan iti padas ni Joseph Smith kadagiti napukaw a panid ti patarus ti Libro ni Mormon, mabalin a maparegtada nga agtalinaed a napudno no sulisogen ida dagiti dadduma nga agbalin a nasukir.

Dagiti Mabalin nga Aktibidad

• Iti sumagmamano nga aldaw a nasaksakbay, awisem ti maysa kadagiti ubbing nga umay iti klase a nakasagana a mangibinglay ti estoria da Joseph Smith ken Martin Harris a nakapukawan dagiti umuna a panid ti patarus ti Libro ni Mormon (kitaen iti Doctrine and Covenants Stories, 18–21) wenno Saints, 1:51–56). Aggigiddan a basaen ti Doktrina ken Katulagan 3:5–8; 5:21–22, ken sapulen dagiti bendision a sumangbay no agtalinaedtayo a napudno iti Dios.

• Ikkam dagiti ubbing ti panawen a mangpanunot maipapan iti maysa a situasion a mabalin a padpadasen ti maysa a gayyem nga ipaaramid kadakuada iti maysa a banag a biddut. Awisem dagiti ubbing a mangsarak iti binatog iti Doktrina ken Katulagan 3:5–8; 5:21–22 a makatulong kadakuada kabayatan dagitoy a situasion. Yakem ti sumagmamano a pagarigan.

Doktrina ken Katulagan 4

Kasapulannak ti Apo a mangaramid ti trabahona.

Makaparegta kadagiti ubbing tiDoktrina ken Katulagan 4 iti panagbalin a paset ti “nakakasdaaw nga aramid” ti Apo (bersikulo 1).

Dagiti Mabalin nga Aktibidad

• Isurat iti pisarra ti Agserbi iti Dios. Awisem dagiti ubbing a mangsarak iti Doktrina ken Katulagan 4 ken mangaramid ti listaan dagiti banag a sursuruenda maipapan iti no ania ti kaipapanan ti agserbi iti Dios. Kiddawem kadakuada a manginayon iti listaan dagiti banag a sursuruenda manipud iti kanta “I Will Be Valiant” (Children’s Songbook, 162) wenno sabali pay a kanta maipapan iti panagserbi iti Dios.

• Mangitugot kadagiti ramit (wenno ladawan dagiti ramit) a mabalin nga usaren nga agtrabaho iti talon. Kasano a makatulong kadatayo dagitoy a banag? Awisem dagiti ubbing a mangsarak kadagiti banag iti Doktrina ken Katulagan 4:5–6 a kas dagiti ramit para iti agaramid ti trabaho ti Dios.

• Awisem dagiti full-time wenno misionario ti ward a mangibinglay iti maysa a banag manipud iti Doktrina ken Katulagan 4 a nangparegta kadakuada a mangaramid iti trabaho ti Dios. Ania ti maaramidtayo a makatulong iti trabaho ti Dios?

Doktrina ken Katulagan 5:1–7, 11, 16, 23–24

Makabagbalinak a maysa a saksi a pudno ti Libro ni Mormon.

Naikari ken ni Martin Harris a mabalin nga isu ti maysa kadagiti saksi dagiti balitok a pinanid no napudno isuna. Saantayo a makita dagiti pinanid a kas iti inaramid ni Martin, ngem makaawattayo iti naespirituan a saksi iti Libro ni Mormon. Kasano a matulongam dagiti ubbing a mangpatanor ken mangibinglay kadagiti bukkodda a saksi iti Libro ni Mormon?

Dagiti Mabalin nga Aktibidad

• Isurat dagiti saludsod a kas iti sumaganad iti pisarra, ket tulongam dagiti ubbing a mangsapul kadagiti sungbat iti Doktrina ken Katulagan 5:1–3, 7, 11: Ania ti tinarigagayan ni Martin Harris a maammuan? Asino ti mabalin a pangipakitaan ni Joseph Smith kadagiti balitok a pinanid? Apay koma nga iti pannakakita dagiti pinanid ket nalabit a saan nga umdas tapno mangkumbinsi iti maysa a tao a pudno ti Libro ni Mormon?

• Saludsodem kadagiti ubbing no ania ti saksi ken no apay a napateg ti maysa a saksi. Ania ti kasapulan nga aramiden ni Martin Harris tapno agbalin a saksi kadagiti nabalitokan a pinanid? (kitaen iti Doktrina ken Katulagan 5:23–24). Uray pay a saantayo a nakita dagiti pinanid, ania ti maaramidtayo tapno agbalin a saksi iti Libro ni Mormon? (Kitaen ti Doktrina ken Katulagan 5:16; Moroni 10:3–5).

Yallukoy ti Panagsursuro iti Pagtaengan

Allukoyen dagiti ubbing nga isurat dagiti pammaneknekda iti Libro ni Mormon ket ibinglay dagitoy ti maysa a tao nga am-ammoda.

Panangpadur-as iti Panangisurotayo

Ibagay dagiti aktibidad tapno mairaman dagiti ubbing nga addaan iti pagkurangan. Dagiti bassit a panangibagay kadagiti aktibidad ket makasigurado a makasursuro dagiti ubbing manipud kadagitoy. Kas pagarigan, no isingasing ti maysa nga aktibidad a mangipakita iti ladawan, mabalin nga agkantakayo iti maysa a kanta a mangiraman kadagiti ubbing nga addaan iti pagkurangan iti panagkita.