Panawen ti Panagapit iti Francia, ni James Taylor Harwood

Enero 18–24

Doktrina ken Katulagan 3–5

“Maituloy ti Aramidko”

Isuratmo no ania ti masursuro ken mariknam bayat ti panagadalmo kadagiti nasantuan a kasuratan. Tulongannaka daytoy a manglagip kadagitoy nga impresion ken mangibinglay kadagitoy iti dadduma.

Isuratmo dagiti Impresionmo

Kabayatan dagiti umuna a sumagmamano a tawenna kas propeta ti Apo, di pay ammo ni Joseph Smith ti amin a banag maipanggep iti “nakaskasdaaw nga aramid” a nakaawaganna nga aramiden. Ngem maysa a banag nga insuro kenkuana dagiti immuna a padasna ket ti pannakaikarina iti aramid ti Dios, a nasken a sipupudno ti imatangna a “naitalimudok iti gloria ti Dios” (Doktrina ken Katulagan 4:1, 5). Kas pagarigan, no nangted ti Apo kenkuana iti balakad a maibusor kadagiti bukodna a tarigagay, kasapulan a surotenna ti balakad ti Apo. Ken nupay naaddaan isuna iti “adu a paltiing, ken … bileg nga agaramid kadagiti adu a naindaklan nga aramid,” no ti bukodna a pagayatan ket agbalinto a napatpateg iti imatangna ngem iti pagayatan ti Dios, isu ket “nasken a matnag” (Doktrina ken Katulagan 3:4). Ngem nasursuro ni Joseph ti maysa a sabali a banag a napateg a kas met laeng iti panangaramid iti aramid ti Dios: “Manangngaasi ti Dios,” ket no sipupudno a nagbabawi ni Joseph, isu “pay laeng ti mapili” (bersikulo 10). Ti aramid ti Dios, kalpasan iti amin, maysa nga aramid ti panangsubbot. Ken dayta nga aramid ket “saan a mapaay” (bersikulo 1).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 3:1–15

Nasken nga agtalekak iti Dios imbes nga agbuteng iti tao.

Iti nasapa a panagserbi ni Joseph Smith, narigat a sapulen dagiti nasasayaat a gayyem—nangnangruna dagiti gagayyem a kas ken ni Martin Harris, maysa a madaydayaw, narang-ay a tao, nga adda iti maysa a saad a mangted iti napateg a suporta. Ket sitatallugod ni Martin a nangsuporta ken ni Joseph, nupay daytoy ti pakapukawan ti panangrespeto dagiti kapatadana ken agkasapulan iti sakripisio nga adda pakainaiganna iti kuarta.

Isu a nalaka a maawatan no apay a tinarigagayan ni Joseph a mangpatgan iti kiddaw ni Martin a mangala iti umuna a paset ti patarus ti Libro ni Mormon tapno ipakitana iti asawana, a nagduadua iti kinapudno ti Libro ni Mormon. Intuloy ni Joseph ti nagsaludsod iti Apo maipanggep itoy a kiddaw, nupay imparitna daytoy, agingga iti kamaudiananna, kalpasan a nagsaludsod ni Joseph iti maikatlo a gundaway, kinuna ti Apo ti wen. Pagdaksanna, napukaw ti manuskrito bayat ti kaaddana iti ikut ni Martin, ket naulpit a dinusa ti Apo da Joseph ken Martin (kitaen iti Saints 1:51–53).

Bayat ti panangbasam iti Doktrina ken Katulagan 3:1–15, utobem no kasano a maim-impluensiaandaka dagiti opinion ti dadduma a tattao. Mabalin a tandaanam pay a mainayon iti pannakatubngar ni Joseph Smith, nagsao ti Apo kadagiti balikas a naasi. Ania ti masursurom manipud iti wagas a panangatur ken panangparegta ti Apo ken ni Joseph? Ania a balakad ti masarakam tapno makatulong kenka no masulisogka nga agbuteng iti sabali a tao ngem iti Dios?

Kitaen met iti “The Contributions of Martin Harris,” Revelations in Context, 1–9, history.ChurchofJesusChrist.org.

Doktrina ken Katulagan 4

Idawat ti Apo nga agserbiak Kenkuana iti amin a pusok.

Ti benneg 4 ket masansan a mayaplikar kadagiti full-time a misionario. Nupay kasta, makaay-ayo a tandaanam a daytoy a paltiing ket immuna a naited ken ni Joseph Smith Sr., a saan a naawagan nga agmision ngem addaan pay laeng iti “tarigagay nga agserbi iti Dios” (bersikulo 3).

Maysa a wagas a panangbasa iti daytoy a benneg ket mangipapan iti daytoy kas maysa a panangiladawan iti trabaho para iti maysa a tao nga agtarigagay a mangaramid iti trabaho ti Apo. Ania dagiti kualipikasion? Apay a kasapulan dagitoy a paglaingan ken kababalin? Nalabit a mabalin a nainkararagan a piliem ti maysa a banag a maaramidmo tapno nasaysayaat a “mangikari [kenka] iti aramid” (bersikulo 5).

Doktrina ken Katulagan 5

Magun-odko ti bukodko a pammaneknek iti Libro ni Mormon.

Martin Harris, ni Lewis A. Ramsey

No naawaganka nga agpaneknek iti korte maipanggep iti kinapudno ti Libro ni Mormon, ania koma a pakakitaan ti itedmo? Pampanunoten ni Martin Harris ti isu met la a saludsod idi ti asawana, a ni Lucy, ket nagidarum maipapan iti reklamo nga al-allilawen ni Joseph Smith dagiti tao babaen iti panagpampammarangna nga agipatarus kadagiti balitok a pinanid (kitaen iti Saints, 1:56–58). Iti kasta dimmawat ni Martin ken ni Joseph iti ad-adu pay a pakakitaan a pudno dagiti balitok a pinanid. Doktrina ken Katulagan 5 ti maysa a paltiing a kas sungbat ti kiddaw ni Martin.

Ania ti masursurom manipud iti Doktrina ken Katulagan 5 maipanggep iti sumaganad:

• Kasano a marikna ti Apo maipapan kadagiti tao a saanto a mamatpati kadagiti naespirituan a kinapudno malaksid no addaanda iti pakakitaan (kitaen kadagiti bersikulo 5–8; kitaen met iti Juan 20:24–29).

• Ti akem dagiti saksi iti aramid ti Apo (kitaen kadagiti bersikulo 11–15; kitaen met iti 2 Taga Corinto 13:1).

• Kasano a gun-odem ti pammaneknek iti Libro ni Mormon para iti bagim (kitaen kadagiti bersikulo 16, kitaen met iti Moroni 10:3–5).

Doktrina ken Katulagan 5:1–10

Awatento daytoy a kaputotan ti balikas ti Dios babaen ken ni Joseph Smith.

Ania ti isuro kenka ti Doktrina ken Katulagan 5:1–10 maipapan iti napateg nga akem ni Joseph Smith iti dispensasiontayo—ken iti biagmo? Utobem no kasano a naawatmo ti balikas ti Dios babaen ken ni Propeta Joseph Smith. Ibilangmo ti panangisurat iti maysa a journal wenno panangibinglay iti maysa a tao ti panagyamanmo para kadagiti kinapudno a naisubli wenno nailawlawag babaen kenkuana.

Kitaen met iti 2 Nephi 3:6–24.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Doktrina ken Katulagan 3:1–4.Idawat iti maysa a miembro ti pamilia a magna iti “killo” a linia ket kalpasanna iti “nalinteg” a linia. Ania ti kayatna a sawen iti pamiliatayo ti mangammo a “nalinteg dagiti dalan ti [Dios]”?

Doktrina ken Katulagan 3:7–10.No maysa a tao ti mangpilpilit kadatayo nga agsukir iti Dios, ania dagiti kinapudno kadagitoy a bersikulo a makatulong kadatayo nga agtalinaed a napudno? Nalabit mabalin a yakem dagiti miembro ti pamilia ti maysa a situasion a pagtalinaeden a napudno ti maysa a tao iti laksid ti pammilit nga agsukir iti Dios.

Doktrina ken Katulagan 4.Bayat ti panaglilinnawag ti pamiliam no ania ti kayat a sawen ti agtrabaho iti talon ti Dios, mabalinda ti agaramid iti sumagmamano a trabaho iti maysa a minuyongan (wenno agpammarang). Ania dagiti ramit a kasapulan para iti aramid iti minuyongan? Ania ti iladawan ti Dios iti benneg 4 a mabalin nga ibilang a ramramit a kasapulan a mangaramid iti trabahona? Mabalin a paglilinnawagan ti pamiliam no apay a tunggal ramit ket napateg iti panangaramid iti trabaho ti Dios?

Doktrina ken Katulagan 5:7.Ania dagiti sumagmamano a pagarigan ti kinapudno a patientayo ngem saan a makita? Kasano a makapagrespondetayo iti maysa a gayyem nga agtarigagay iti pakakitaan a pudno ti Libro ni Mormon?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Will Be Valiant,” Children’s Songbook, 162.

Panangpadur-as iti Bukod a Panagadal

Mangyulo iti maysa a bersikulo. “Ti mangyulo iti nasantuan a kasuratan ket mangipasdek iti baro a pannakigayyem. Maipada daytoy iti panangtakuat iti maysa a kabarbaro nga indibidual a makatulong iti oras a panagkasapulan, mangted iti inspirasion ken liwliwa, ken agbalin a maysa a pagtaudan ti motibasion para iti kasapulan a panagbalbaliw” (Richard G. Scott,”The Power of Scripture,” Ensign wenno Liahona, Nob. 2011, 6).

Nakaro a Dagensen dagiti116 Panid, ni Kwani Povi Winder