“Enero 25–31. Doktrina ken Katulagan 6–9: ‘Daytoy ti Espiritu ti Pammaltiing,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Enero 25–31. Doktrina ken Katulagan 6–9,” Umaykayo, Sumurot Kaniak—Para kadagiti Indibidual ken Pamilia: 2021
Enero 25–31
Doktrina ken Katulagan 6–9
“Daytoy ti Espiritu ti Pammaltiing”
Ipalgak kadatayo ti Apo dagiti kinapudno iti pampanunot ken puspusotayo (kitaen iti Doktrina ken Katulagan 8:2–3). Bayat ti panangbasam ti Doktrina ken Katulagan 6–9, isuratmo dagiti ania man nga impresion a maawatmo.
Isuratmo dagiti Impresionmo
Iti panawen ti panagtitinnag ti 1828, maysa a naubing nga schoolteacher nga agnagan iti Oliver Cowdery ti nakaala iti trabaho a panangisuro iti Manchester, Nueva York, ket nakipagnaed iti pamilia da Lucy ken Joseph Smith Sr. Nadamag ni Oliver ti maipanggep iti anakda a ni Joseph Smith, nga idin agnanaed iti Harmony, Pennsylvania, ket ni Oliver, a nangibilang iti bagina nga agsapsapul iti kinapudno, nagtarigagay a mangammo iti ad-adu pay. Inladawan dagiti Smith ti isasarungkar dagiti anghel, ti maysa a kadaanan a kasuratan, ken ti sagut nga agipatarus babaen ti bileg ti Dios. Naallukoy ni Oliver. Mabalin kadi a pudno daytoy? Nangted da Lucy ken Joseph Sr. kenkuana iti balakad a mayaplikar iti asino man nga agsapsapul iti kinapudno: agkararag ken agsaludsod iti Apo.
Nagkararag ken nagsaludsod ni Oliver, ket sinungbatan ti Apo, a nagsasao maipapan iti kappia ken namnama iti panunot ni Oliver. Natakuatan ni Oliver a mabalin a personal ti paltiing—maysa a banag a masursurona kadagiti umay a bulan. Ti paltiing ket saan laeng a para kadagiti propeta; daytoy ket para iti asino man nga agtarigagay ken agkalikagum a manggun-od iti daytoy. Saanpay nga ammo ni Oliver ti amin, ngem umdasen ti ammona tapno mangala iti sumaruno nga addangna. Ar-aramiden ti Apo ti napateg a banag babaen ken ni Joseph Smith, ket tinarigagayan ni Oliver nga agbalin a paset iti daytoy.
Para iti ad-adu pay nga impormasion maipapan iti pakasaritaan iti likudan ti Doktrina ken Katulagan 6–9, kitaen iti Saints, 1:58–64; “Days of Harmony” (video, ChurchofJesusChrist.org).
Dagiti Kapanunotan para iti Bukod a Panagadal iti Nasantuan a Kasuratan
Makisao ti Nailangitan nga Ama kaniak babaen “ti Espiritu ti kinapudno.”
Iti panagsusulbod ti 1829 nagdaliasat ni Oliver Cowdery iti Harmony ket nagboluntario nga agbalin a parasurat ni Joseph Smith kabayatan ti panagipatarusna iti Libro ni Mormon. Itan asideg a makita ni Oliver ti napaltiingan a proseso ti panagipatarus. Pinaregta dayta a padas ti riknana, ket napanunotna no maparaburan met isuna iti maysa a sagut nga agipatarus. Impalubos ti Apo ti pananggandatna nga agipatarus, ngem kabarbaro pay laeng ken ni Oliver ti umawat iti paltiing, ket ti gandatna ket saan a nasayaat. Adu pay laeng ti nasken a sursuruenna, ket ipakita ti Doktrina ken Katulagan 6, 8, ken 9 a nakasagana ti Apo a mangisuro kenkuana.
Bayat ti panangbasam kadagitoy a benneg, kitaem no ania ti insuro ti Apo maipanggep iti bukod a paltiing. Kasano a dagiti balikasna ket mainaig kadagiti padasmo—wenno kayatmo a maaddaan?
Kas pagarigan, ania ti isingasing ti Doktrina ken Katulagan 6:5–7; 8:1; 9:7–8 maipapan iti no ania ti kasapulan ti Apo kenka sakbay nga ipalgaknanto ti pagayatanna?
Ania ti masursurom manipud iti Doktrina ken Katulagan 6:14–17, 22–24; 8:2–3; 9:7–9 maipapan kadagiti agduduma a wagas a mabalin nga umay ti paltiing?
Adda kadi pay ania man a banag a masursurom maipapan iti paltiing manipud kadagitoy a benneg?
Tapno ad-adu pay ti masursuro maipapan iti paltiing, kitaen iti Russell M. Nelson, “Revelation for the Church, Revelation for Our Lives,” Ensign wenno Liahona, Mayo 2018, 93–96; Julie B. Beck, “And upon the Handmaids in Those Days Will I Pour Out My Spirit,” Ensign wenno Liahona, Mayo 2010, 10–12. Para iti ad-adu pay nga impormasion maipapan iti “sagut ni Aaron” a nailadawan iti benneg 8, kitaen iti “Oliver Cowdery’s Gift,” Revelations in Context, 15–19.
Doktrina ken Katulagan 6:18–21, 29–37
Kitaenyo ni Cristo iti tunggal panunot.
Uray pay napadasanen ni Joseph ti “parikut a pakaipasungalngalanna” bayat ti panagaramidna iti aramid ti Apo (Doktrina ken Katulagan 6:18), nalabit nga awan iti kapanunotanda ken ni Oliver no kasano ti kinarigat ti pagbalinan dagita a kasasaad kadagiti simmaruno a sumagmamano a tawen. Ngem ammo ti Apo, ken ammona no ania pay dagiti pannubok iti masakbayanyo. Ti balakadna kada Joseph ken Oliver iti Doktrina ken Katulagan 6:18–21, 29–37 ket makatulong pay kenka. Kasano ti mabalin a narikna da Joseph ken Oliver kalpasan ti pannakangngegda kadagitoy a balikas? Ania ti masarakam kadagitoy a bersikulo a makatulong kenka nga agtalek iti Apo? Kasano nga ad-adda a makitam ni Cristo iti biagmo?
Oliver Cowdery, ni Lewis A. Ramsey
Doktrina ken Katulagan 6–7; 9:3, 7–14
“Kas iti panagtarigagayyo kaniak ti maaramidto.”
Kitaem no namin-ano a gundaway a nagparang ti balikas a kas “ti tarigagay” wenno “tarigagayan” iti benneg 6 ken 7. Ania ti masursurom manipud kadagitoy a bersikulo maipapan iti kinapateg nga inted ti Dios kadagiti tarigagaymo? Damagem ti bagim ti saludsod ti Apo iti Doktrina ken Katulagan 7:1: “Ania ti tarigagaymo?”
Maysa kadagiti nalinteg a tarigagay ni Oliver Cowdery—ti agipatarus a kas iti inaramid ni Joseph Smith—ket saan a naipatungpal. Bayat ti panangbasam iti Doktrina ken Katulagan 9:3, 7–14, ania dagiti pakaawisan ti imatang a maawatmo a makatulong kenka no dagiti nalinteg a tarigagaymo ket saan a naipatungpal?
Kitaen met iti Doktrina ken Katulagan 11:8; Dallin H. Oaks, “Desire,” Ensign wenno Liahona, Mayo 2011, 42–45.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Doktrina ken Katulagan 6:7, 13.Kasano a matulongam ti pamiliam a makaawat a ti pudpudno a “kinabaknang” ket masarakan iti agnanayon a biag? (bersikulo 7). Mabalinmo nga awisen dagiti miembro ti pamilia nga agaramid iti sinsinan a kuarta ket isurat wenno idrowing ditoy dagiti adu a bendision a naawat ti pamiliam gapu iti naipasubli nga ebanghelio.
-
Doktrina ken Katulagan 6:15, 22–23; 8:2–3; 9:7–9.Ti panangbasa kadagitoy a bersikulo maipapan iti no kasano a makisao ti Dios kadagiti annakna ket mabalin a napintas a gundaway a mangiburay iti pamiliam no kasano Isuna a nakisarita kenka.
-
Doktrina ken Katulagan 6:33–37.Mabalin nga ibinglay dagiti miembro ti pamilia dagiti wagas a pakabaelanda nga ”agaramid iti nasayaat,” uray no mariknada iti buteng. Makatulong met no buyaen ti amin wenno sumagmamano a mensahe ni Elder Ronald A. Rasband “Be Not Troubled” (Ensign wenno Liahona, Nob. 2018, 18–21). Ania ti kayat a sawen ti “kumita ken ni [Cristo] iti tunggal panunot”? (bersikulo 36). Ania dagiti sumagmamano a dadduma pay a pagarigan dagiti tao a nagsubli iti Apo tapno maparmekda ti panagduadua ken buteng? (kitaen, kas pagarigan, iti Esther 4; Alma 26:23–31).
-
Doktrina ken Katulagan 8:10.Daytoy ket mabalin a nasayaat a gundaway a mangilawlawag no kasano a napatibkernaka ken ti pamiliam ti pammatim ken ni Jesucristo. Apay a napateg nga “agdawattayo a sipapammati”? Ania dagiti bendision a nakitamon manipud iti panagbiruk kadagiti sungbat wenno tulong iti pammati?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Dare to Do Right,” Children’s Songbook, 158.
Dagiti Timek ti Pannakaisubli
Pannakaipatarus ti Libro ni Mormon
Idi Abril 1829, ti bulan idi naawat dagiti benneg 6–9 ti Doktrina ken Katulagan, ti kangrunaan a trabaho ni Joseph Smith ket ti pannakaipatarus ti Libro ni Mormon. Idi iti saan a nabayag nakiddaw kenkuana a mangisalaysay no kasano a naipatarus daytoy a kasuratan, kinuna ni Joseph “a daytoy ket saan a naisangrat a mangisarita iti lubong dagiti amin a detalye.”1 Masansan a gagangay nga ibagana a naipatarus daytoy “babaen iti sagut ken bileg ti Dios.”2
Saantayo nga ammo dagiti adu a detalye maipanggep iti namilagruan a proseso ti panagipatarus, ngem ammotayo a ni Joseph Smith ket maysa a mammadto, a tinulongan dagiti instrumento nga insagana ti Dios: dua a nalitnaw a bato a maawagan iti Urim ken Thummim ken sabali pay a bato a maawagan iti bato a pagipadto.3
Dagiti sumaganad a palawag, manipud kadagiti saksi iti proseso ti pannakaipatarus, ket mangsuporta iti pammaneknek ni Joseph.
Pinatida a dayta a kahon, a kukua ni Hyrum Smith, ket naaramat a temporario a nakailemmengan dagiti balitok a pinanid.
Emma Smith
“Idi ipatpatarus ti asawak ti Libro ni Mormon, nagsuratak iti maysa a pasetna, bayat ti panangidiktana iti tunggal binatog, ibalikas iti kada balikas, ket idi madanonna dagiti umisu a nagan a dina maibalikas, wenno dagiti atitiddog a balikas, inispelingna dagitoy, ket bayat ti panangisursuratko ida, no adda biddut ko iti ispeling, pagsardengennak nokua ket aturenna ti ispelingko numan imposible a makitana no kasano nga isursuratko dagitoy iti dayta nga oras. Uray ti balikas a Sara ket saanna a maibalikas iti damo, ngem nasken nga ispelingenna daytoy, ket ibalikasko nokua daytoy para kenkuana.”4
“Masansan a maiparabaw dagiti pinanid iti lamisaan nga awan iti ania man a panggep a mangilemmeng, nabungon daytoy iti bassit a tela nga arpaw ti lamisaan, nga intedko kenkuana a pangikupinanna kadagitoy. Naminsan nga inapirasko dagiti pinanid, kabayatan ti pannakaiparabawda iti lamisaan, a sursurotek ti balabala ken sukogna. Kasla makulpida a kas iti nabengbeng a papel, ken agkalanggiking iti aweng ti metal no makuti dagiti igid babaen ti tangan ti ima, kas ar-aramiden ti maysa a tao no dadduma no manglukib nga usaren ti tanganna dagiti panid ti maysa a libro. …
“Ti pammatik ket nagtaud iti nadiosan a kinapudno ti Libro ni Mormon—awan ti uray kabassitan a panagduaduak iti daytoy. Mapnekak nga awan tao a makaidikta koma iti pannakaisurat dagiti manuskrito malaksid no isu ket naparegta; gapu ta, no agakemak a kas parasuratna, idikta koma ni [Joseph] kaniak iti inoras; ken no agsubli kalpasan dagiti pannangan, wenno dagiti pannakataktak, rugianna a dagus iti nagsardenganna, a saanna a kitkitaen ti manuskrito wenno ti ania man a paset daytoy a naibasa kenkuana. Daytoy ket gagangay a banag nga aramidenna. Nalabit a saan koma a mapasamak a ti maysa a tao a deadal ket makaaramid iti daytoy, ken, para iti maysa nga ignorante ken saan a nakaadal a kas kenkuana, gagangay nga imposible daytoy.”5
Ladawan da Emma ken Joseph Smith ni Michael T. Malm
Oliver Cowdery
“Insuratko babaen iti bukodko a pluma ti sibubukel a Libro ni Mormon (malaksid iti sumagmamano a panid) manipud iti bibig ti propeta, bayat ti panangipatarusna iti daytoy babaen ti sagut ken bileg ti Dios, babaen ti Urim ken Thummim, wenno, kas iti panangawagna ti libro, dagiti nasantuan nga agipatpatarus. Naimatangak kadagiti matak, ken natengngelko kadagiti imak, dagiti balitok a pinanid a nakaipatarusanna. Nakitak met dagiti agipatpatarus.”6
Adu ti nasursuro da Joseph Smith ken Oliver Cowdery babaen ti proseso ti panagipatarus kadagiti balitok a pinanid.