“Enero 4–10. Joseph Smith—Pakasaritaan 1:1–26: ‘Nakitak ti kasla Adigi a Lawag,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Enero 4–10. Joseph Smith—Pakasaritaan 1:1–26,” Umaykayo, Sumurot Kaniak—Para kadagiti Indibidual ken Pamilia: 2021
Sagrado a Kakaywan, ni Greg K. Olsen
Enero 4–10
Joseph Smith—Pakasaritaan 1:1–26
“Nakitak ti kasla Adigi a Lawag”
Bayat ti panangbasam iti Joseph Smith—Pakasaritaan 1:1–26, ania dagiti makitam a mensahe a para iti biagmo? Ania ti kapatgan kenka ken iti pamiliam?
Isuratmo dagiti Impresionmo
Ti Doktrina ken Katulagan ket maysa a libro dagiti sungbat iti karkararag: adu kadagiti sagrado a paltiing itoy a libro ti dimteng kas sungbat dagiti saludsod. Isu a maikanatad nga irugi ti panagadal iti Doktrina ken Katulagan babaen ti panangibilang iti saludsod a nangirugi iti pannakaibukbok ti paltiing iti ud-udi nga aldaw—ti saludsod ni Joseph Smith iti kakaywan idi 1820. Maysa a “sinnait ti sasao ken di agressat a panagsisinnupanget ti kapanunotan” (Joseph Smith—Pakasaritaan 1:10) ti nakaigapuan ni Joseph a natikaw maipapan iti relihion ken ti kasasaad ti kararuana; nalabit a maitarusanyo dayta. Adu dagiti agsisinnupanget a kapanunotan ken makaguyugoy nga impluensia iti panawentayo, ket no kayattayo nga urnosen dagitoy a mensahe ken agsapul iti kinapudno, maaramidtayo no ania ti inaramid ni Joseph. Mabalintayo ti agdamag kadagiti saludsod, agadal kadagiti nasantuan a kasuratan, agutob, ken iti kamaudiananna agsaludsod iti Dios. Kas sungbat iti kararag ni Joseph, bimmaba ti kasla adigi a lawag manipud iti langit; nagparang ti Dios nga Ama ken Jesucristo ket sinungbatanda dagiti saludsodna. Ti pammaneknek ni Joseph iti dayta nainmilagruan a padas ket natured a mangipakdaar a mabalin ti siasino man “nga [agkurang] iti kinasirib ti dumawat iti Dios, ket maikkanto” (Joseph Smith—Pakasaritaan1:26). Makaawattayo amin, no saan a nailangitan a parmata, ngem nalawlawag a parmata, a silnagan ti nailangitan a lawag.
Dagiti Kapanunotan para iti Bukod a Panagadal iti Nasantuan a Kasuratan
Joseph Smith—Pakasaritaan 1:1–26
Ni Joseph Smith ti Propeta ti Pannakaisubli
Ti panggep ti pakasaritaan ni Joseph Smith ket tapno ipakaammona kadatayo “iti kaadda dagiti pagbatayan” agsipud ta ti kinapudno maipanggep ken ni Joseph ket masansan a makillo (Joseph Smith—Pakasaritaan 1:1). Bayat ti panangbasam iti Joseph Smith—Pakasaritaan 1:1–26, ania ti mangpapigsa iti pammaneknekmo iti nadiosan a takemna? Kitaem dagiti pammaneknek a masarakam nga insagana ti Apo ni Joseph Smith para iti naimpadtuan a misionna. Kabayatan ti panagbasam, mabalinmo met nga isurat dagiti kapanunotam ken riknam maipanggep ken ni Joseph Smith ken ti pammaneknekna.
Kitaen met iti Saints, 1:3–19.
Joseph Smith—Pakasaritaan 1:5–20
No agsaludsodak a sipapammati, sungbatan ti Dios.
Napadasam kadin ti “agkurang iti kinasirib” wenno nakarikna iti pannakatikaw maipapan iti pangngeddeng a kasapulam nga aramiden? (Joseph Smith—Pakasaritaan 1:13). Ania ti masursurom manipud iti padas ni Joseph Smith kadagiti bersikulo 5–20? Panunotem ti bukodmo a kasapulan para iti sirib ken ad-adda a pannakaawat, ket ibilangmo no kasano ti panangbirokmo iti kinapudno.
Kitaen met iti 1 Nephi 10:17–19; 15:6–11; Russell M. Nelson, “Revelation for the Church, Revelation for Our Lives,” Ensign wenno Liahona, Mayo 2018, 93–96.
Madamagtayo iti Dios dagiti saludsodtayo babaen iti kararag.
Joseph Smith—Pakasaritaan 1:15–20
Apay adda dagiti nadumaduma a pakaammuan ti Umuna a Parmata?
Kabayatan ti panagbiagna, nairekord ni Joseph Smith ti padasna iti Sagrado a Kakaywan ti saan a nababbaba iti uppat a daras, masansan nga ar-aramatenna ti parasurat. Mainayon pay, ti sumagmamano a di masinunuo a pakaammuan ket insurat dagiti tao a nakangngeg ken ni Joseph a nagsarita maipapan iti parmatana. Nupay aggigiddiat dagitoy a pakaammuan iti sumagmamano a detalye, depende iti agdenggeg ken disso, no saan man dagitoy ket agpapada. Ket mangnayon ti tunggal pakaammuan kadagiti detalye a makatulong kadatayo a nasaysayaat a makaawat iti padas ni Joseph Smith, kas met laeng iti panangtulong kadatayo dagiti uppat nga Ebanghelio nasaysayaat a makaawat iti panagministro ti Mangisalakan.
Tapno mabasa dagiti dadduma pay a pakaammuan ni Joseph, kitaen iti “First Vision Accounts” (Gospel Topics, topics.ChurchofJesusChrist.org). Ania ti masursurom manipud iti panangbasam amin kadagitoy a pakaammuan?
Joseph Smith—Pakasaritaan 1:15–20
Ti Umuna a Parmata ti nangirugi iti Pannakaisubli ti ebanghelio ni Jesucristo.
Nagtalek ni Joseph Smith a sungbatan ti Dios ti kararagna, ngem saanna a naammuan no kasano dayta a sungbat ti mangbalbaliw iti biagna—ken ti lubong. Bayat ti panangbasam maipapan iti padas ni Joseph, utobem no kasano a nabalbaliwan ti Umuna a Parmata ti biagmo. Kas pagarigan, mabalin nga ileppasmo daytoy a binatog iti nadumaduma a wagas: “Gapu ta napasamak ti Umuna a Parmata, ammok a …” Kasano a nabendisionankayo gapu iti Umuna a Parmata?
Kitaen met iti “Ask of God: Joseph Smith’s First Vision,” video, ChurchofJesusChrist.org; Saints, 1:14–19; Russell M. Nelson, “Hear Him,” Ensign wenno Liahona, Mayo 2020, 88–92.
Joseph Smith—Pakasaritaan 1:21–26
Maitakderak no ania ti ammok a pudno, uray no didak awaten ti dadduma.
Maysa kadagiti bendision dagiti nasantuan a kasuratan ket linaonda dagiti makaparegta a pagwadan dagiti natured a lallaki ken babbai a nakapadas kadagiti karit nga addaan iti pammati ken ni Jesucristo. Idi napadasan ni Joseph Smith ti masuppiat gapu iti parmatana, nariknana ti narikna ni Apostol Pablo, a naidadanes met gapu ta kinunana a nakakita iti parmata. Bayat ti panangbasam ti pakaammuan ni Joseph, ania ti mangparegta kenka tapno agtalinaed a napudno iti pammaneknekmo? Ania dagiti dadduma pay a pagarigan—manipud kadagiti nasantuan a kasuratan wenno dagiti tao nga am-ammom—a mangted kenka iti tured nga agtalinaed a napudno kadagiti naespirituan a padas nga adda kenkan?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Joseph Smith—Pakasaritaan 1:6.Kasano a mabalintayo a sanguen dagiti panagsisinnuppiat a saan nga agsisinnupanget kas kadagiti tao a nailadawan itoy a bersikulo?
-
Joseph Smith—Pakasaritaan 1:11–13.Ti panangbasbasa kadagitoy a bersikulo ket mabalin a mangparegta kadagiti miembro ti pamilia a mangibinglay kadagiti padasda no ti maysa a binatog iti nasantuan a kasuratan ket mangsagid iti puspusoda ken mangparegta kadakuada nga agtignay.
-
Joseph Smith—Pakasaritaan 1:16–20.Kabayatan ti panangbasa ti pamiliam kadagitoy a bersikulo, ibilangmo ti panangipakitam iti maysa a naipinta a ladawan a naikadua iti daytoy a balabala wenno sabali pay a ladawan ti Umuna a Parmata (nalabit a magustuan ti pamiliam ti agdrowing iti bukodda a panangiladawan). Mabalinyo met a buyaen ti video “Ask of God: Joseph Smith’s First Vision” (ChurchofJesusChrist.org). Mabalin nga ilista ti tunggal maysa dagiti kinapudno a masursurotayo manipud iti daytoy a parmata, kalpasanna ibinglayyo dagiti listaan iti maysa ken maysa. Mabalin a daytoy ti nasayaat nga oras a mangawis kadagiti miembro ti pamilia a mangiburay no kasano a nagun-odda dagiti pammaneknekda iti Umuna a Parmata ni Joseph Smith.
-
Joseph Smith—Pakasaritaan 1:17.Idi nagparang ti Dios ken ni Joseph Smith, Inawaganna ni Joseph iti naganna. Kaano a narikna dagiti miembro ti pamiliam a personal nga am-ammo ida ti Nailangitan nga Ama?
-
Joseph Smith—Pakasaritaan 1:21–26.Kasano a makasungbattayo no agduadua dagiti tao kadagiti pammaneknektayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Joseph Smith’s First Prayer,” Hymns, no. 26.
Dagiti Timek ti Pannakaisubli
Ti Pamilia ni Joseph Smith
Tunggal maysa kadatayo ket napalaus nga inaringan ti panagbiag ti pamiliatayo, ket awan pakaidumaan ni Joseph Smith. Ti natibker a panamati iti relihion ken dagiti kannawidan dagiti nagannak kenkuana ti nangipasdek iti pundasion ti pammati a namagbalin a posible ti Pannakaisubli. Nairekord iti journal ni Joseph daytoy a pammigbig: “Dagiti balikas ken pagsasao [ket] saan nga umdas a pangyebkas iti panagyaman nga utangko iti Dios iti panangtedna kaniak iti madaydayaw a nagannak.”1
Dagiti sumaganad nga adaw manipud iti inana, ni Lucy Mack Smith; ti kabsatna a ni William Smith; ken ti Propeta mismo ti mangted kadatayo iti sumagmamano a pannakaawat iti impluensia ti relihion iti pagtaengan ti pamilia nga Smith.
Ti Pamilia ni Joseph Smith, ni Dan Baxter
Lucy Mack Smith
“[Idi agarup 1802], nagbalinak a masaksakit. … Napanunotko, saanak a nakasagana a matay gapu ta diak ammo dagiti wagas ni Cristo, ket simken kaniak a kasla adda dakkel nga abut ti sipnget ken liday iti nagbaetanmi ken ni Cristo a diak kabaelan a ballasiwen. …
“Kimmita-ak iti Apo ket impakaasi ken indawatko iti Apo nga agtultuloyak payla nga agbiag tapno patanorek dagiti annakko ken mangliwliwa iti puso ti asawak; kasta ti inaramidko iti amin a rabii. … Nakitulagak iti Dios [a] no koma bay-annak nga agbiag ket aramidek ti amin a kabaelak a mangsukisok iti dayta a relihion a mangted kaniak iti gundaway nga agserbi a napudno kenkuana, adda man dayta iti Biblia wenno iti sadino man a mabalin a pakasarakan nga uray no magun-od manipud iti langit babaen ti kararag ken pammati. Ket itan adda maysa a timek ti nagsao kaniak ket kinunana, ‘Agsapulkayo ket makasarakkayto, umawagkayo ket malukatankayto. Bay-anyo a maliwliwa ti pusoyo. Mamatikayo iti Dios; kasta met a mamatikayo kaniak.’ …
“Manipud ita a kanito ken iti masanguanan nagtultuloy a nagun-odko ti pigsa Awan iti adu a nasaok maipanggep iti relihion ngem kankanayon a pinampanunotko, ket napanunotko nga aramidek ti amin a kinaregta iti kabiitan a makasapulak iti sumagmamano a tao a mamati iti relihion a nakaammo kadagiti wagas ti Dios a mangisuro kaniak iti bambanag ti Langit.”2
William Smith
“Ti inak, a maysa a napeklan a relihioso a babai ket maseknan unay iti pagimbagan dagiti annakna, agpada para ditoy a biag ken kalpasan daytoy a biag, inaramatna ti tunggal pamuspusan a mabalin nga isingasing ti ayatna kas nagannak tapno maiturongnakami a manggun-od iti pannakaisalakan dagiti kararuami, wenno (kas iti termino idi) ‘iti panagbalin a relihioso.’ Guyugoyennakami idi a dumar-ay kadagiti miting, ket karuayan ti sibubukel a pamilia ket nagbalin nga interesado iti relihion, ket nagsukisok iti kinapudno.”3
“Naaddaankami a kanayon kadagiti kararag iti pamilia manipud pay iti pannakalagipko. Malagipko unay a nakabulsa ti anteohos ni tatang iti bulsa ti tsalekona, … ket no dakami a lallaki makitamin nga arikapenna ti anteohosna, ammomi a maysa dayta a pangipadlaw nga agsagana para iti kararag, ket no saanmi a madlaw idi a sawen ni nanang ti, ‘William,’ wenno asino man ti managbaybay-a, ‘agsagana para iti kararag.’ Kalpasan ti kararag naaddaankami iti maysa a kanta a kantaenmi.”4
Insuro da Joseph Sr. ken Lucy Smith ti pamiliada nga agadal kadagiti nasantuan a kasuratan.
Joseph Smith
“Masaok ita, a [ti amak] di pulos nakaaramid iti maysa a naranggas a tignay a maibilang a saan a managparabur, iti biagna, segun iti pannakaammok. Inayatko ti amak ken ti pakalaglagipanna; ket ti lagip dagiti natakneng nga aramidna, ket napigsa nga impluensia ti panunotko; ket adu dagiti naasi ken naamaan a balikasna kaniak, a naisurat iti taptapi (tablet) iti pusok. Sagrado kaniak, dagiti kapanunotan nga ipategko iti pakasaritaan ti biagna, nga adda iti panunotko ket naimula sadiay, babaen ti bukodko a panangpaliiw manipud pay idi naipasngayak. … Ti inak met ti maysa kadagiti kataknengan, ken ti kasayaatan kadagiti amin a babbai.”5
Ti Umuna a Parmata ti Pannakaisubli, ni Michael Bedard