Inawagannak iti Naganko, ni Michael Malm

Enero 11–17

Doktrina ken Katulagan 2; Joseph Smith—Pakasaritan 1:27–65

“Umasidegto dagiti Puso dagiti Annak kadagiti Ammada”

Maisuronaka ti Espiritu Santo iti tunggal kanito nga agbasaka kadagiti nasantuan a kasuratan—uray pay dagiti nasantuan a kasuratan a namin-adu idin a binasam. Agbalinka a nakasagana kadagiti baro a nalawag a pannakaammo ken pannakaawat [insights] ken pammaregta.

Isuratmo dagiti Impresionmo

Tallo a tawenen manipud idi nagparang ti Dios nga Ama ken ti Anakna, ni Jesucristo, ken ni Joseph Smith iti kakaywan, ngem di pay nakaawat ni Joseph manipud idi kadagiti nayon a paltiing. Nangrugi a masdaaw maipapan iti saadna iti sanguanan ti Apo. Kas iti amin kadatayo, nakaaramid isuna kadagiti biddut, ket nariknana a nagbasol babaen kadagitoy. Nupay kasta adda paaramid ti Dios kenkuana. Ket ti aramid a nakaawagan ni Joseph ket mainaig iti no ania ti paaramid ti Dios kadatayo. Ni Joseph ti mangyeg iti Libro ni Mormon; ania ti naidawat nga aramidentayo iti daytoy? Awaten ni Joseph dagiti tulbek ti priesthood a mangisubli kadagiti puso dagiti annak iti ammada; kasano ti panangisublitayo iti puspusotayo kadagiti kapuonantayo? Naibaga ken ni Joseph dagiti padto a maipatungpalto iti mabiit; ania ti pasettayo iti panangtulong a maipatungpal dagitoy? No makiramantayo iti aramid ti Dios, manamnama a maipasangotayo iti pannakasupiat ken uray pay pannakairurumen, kas iti inaramid ti Propeta. Ngem maaddaantayo met iti pammati nga aramidennatayonto ti Apo a ramramit kadagiti imana, kas iti inaramidna ken ni Joseph.

Kitaen met iti Saints, 1:20–48.

Dagiti Kapanunotan para iti Bukod a Panagadal iti Nasantuan a Kasuratan

Joseph Smith—Pakasaritaan 1:27–33

Adda trabaho nga ipaaramid ti Dios kaniak.

Bayat ti panangbasam iti Joseph Smith—Pakasaritaan 1:27–33, ibilang nga adda ipaaramid ti Dios kenka, kas iti Inaramidna ken Joseph Smith. Utobem daytoy nga awis manipud ken ni Presidente Russell M. Nelson: “Saludsodenyo iti Nailangitan nga Ama, iti nagan ni Jesucristo, no kasano ti riknana kadakayo ken ti misionyo ditoy daga. No agdawatkayo nga addaan iti pudno a panggep, iti panaglabas ti panawen yarasaasto ti Espiritu ti mamagbalbaliw-biag a kinapudno kadakayo. … Ikarik kadakayo nga inton rugianyo a makita uray taldiap laeng iti no kasano a makitanakayo ti Nailangitan nga Ama ken no ania ti namnamaenna nga aramidenyo para Kenkuana, saanton a kastan ti biagyo!” (“Becoming True Millennials” [worldwide devotional for young adults, Ene. 10, 2016], broadcasts.ChurchofJesusChrist.org).

Mariknam no dadduma ti inaramid ni Joseph kadagiti bersikulo 28–29. Ania ti masursurom manipud iti pagwadan ni Joseph maipapan ti no ania ti aramidem no dagiti tignaymo ket saan a maitunos iti aramid a nangawagan kenka ti Dios nga aramiden?

Joseph Smith—Pakasaritaan 1:34–65

Naglaon ti Libro ni Mormon iti “pakabuklan ti awan patinggana nga Ebanghelio.”

Bayat ti panangbasam iti Joseph Smith—Pakasaritaan 1:34–65, ibilang ti no ania dagiti detalye kadagitoy a bersikulo a kasla adda kaipapananna kenka no saanmo pay idi a nangngeg ti Libro ni Mormon. Kas maysa a mamati, apay a napateg daytoy a pakaammuan iti pammaneknekmo iti Libro ni Mormon?

Ibilangmo no kasano nga ipatungpal ti Libro ni Mormon dagiti padto iti Isaias 29:4, 11–18.

Joseph Smith—Pakasaritaan 1:36–41

Impatungpal ti Pannakaisubli ti ebanghelio dagiti nagkauna a padto.

Dinakamat ni Moroni ken ni Joseph dagiti sumagmamano a padto iti Daan ken Baro a Tulag, a kas iti Isaias 11; Dagiti Aramid 3:22–23; ken Joel 2:28–32. Apay a mabalin a napateg a maammuan ni Joseph dagitoy a padto? Apay a napategda a maammuam ?

Doktrina ken Katulagan 2

Ania ti impasubli ni Elias?

Kinuna ni Presidente Henry B. Eyring: “Napateg a maammuan no apay nga inkari ti Apo nga ibaonna ni Elias. Maysa a naindaklan a propeta ni Elias nga addaan iti naindaklan a bileg nga inted kenkuana ti Dios. Iggemna ti kaindaklanan a bileg nga ited ti Dios kadagiti annakna: iggemna ti bileg a pangilantip, ti bileg nga ibegkes iti daga ket maibegkes daytoy iti langit” (“Hearts Bound Together,” Ensign wenno Liahona, Mayo 2005, 78).

Kitaen met iti Doktrina ken Katulagan 110:13–16; David A. Bednar, “Let This House Be Built unto My Name,” Ensign wenno Liahona, Mayo 2020, 84–87.

Templo iti Palmyra New York. Dagiti pamilia a mailantip iti templo babaen iti bileg a naisubli babaen ken ni Elias.

Doktrina ken Katulagan 2

Immay ni Elias a mangisubli ti pusok kadagiti kapuonak.

Ania ti isuro kenka dagiti balikas a kas “mula,” “puspuso,” ken “isubli” iti daytoy a benneg maipapan iti mision ni Elias ken dagiti bendision dagiti naipasubli a tulbek? Kasano ti riknam a maisubli ti pusom kadagiti kapuonam? Panunotem dagiti wagas a mabalinmo a mapadasan dagiti kasta a rikna nga ad-adda a nasansan. Nalabit a mabalinmo a dawaten iti maysa a kabagian nga ibinglay ti maysa nga estoria maipapan iti maysa kadagiti kapuonam—nasaysayaat pay, no maisuratmo daytoy. Nalabit a mailasinmo ti maysa a kapuonan a pimmusayen a di pay pulos immawat kadagiti ordinansa ti ebanghelio ket kalpasanna aramidem dayta a trabaho iti templo.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Joseph Smith—Pakasaritaan 1:28–29.Kasano ti narikna ni Joseph Smith maipapan kadagiti biddutna? Ania ti inaramidna gapu kadagitoy a rikna? Ania ti masursurotayo manipud kenkuana maipapan iti no ania ti aramiden no makaaramidtayo kadagiti biddut?

Joseph Smith—Pakasaritaan 1:33–54.Mabalinmo a dawaten iti maysa a miembro ti pamilia a mangbasa iti napigsa ti paset wenno amin a mensahe ni Moroni manipud iti Joseph Smith—Pakasaritaan 1:33–42 iti namin-uppat a gundaway (gapu ta inulit ni Moroni daytoy a mensahe iti namin-uppat a daras). Iti baet ti tunggal panagbasa, dawatem iti dadduma pay a miembro ti pamilia a mangibinglay iti no ania ti malagipda manipud iti mensahena, a saan a kumitkita kadagiti nasantuan a kasuratan. Apay a mabalin nga uliten ti Apo dagiti napateg a mensahe iti adu a gundaway? Ania dagiti sumagmamano pay a wagas a pangisuruan ti Apo kadatayo babaen iti pannakadagullit?

Doktrina ken Katulagan 2:2.Tapno matulongan dagiti ubbing a makaawat kadagiti “kari a naaramid kadagiti amma,” mabalin nga aggigiddan a basaenyo ti Abraham 2:9–11 wenno buyaenyo ti video “Special Witnesses of Christ—President Russell M. Nelson” (ChurchofJesusChrist.org). Lasinen no ania dagiti kari nga inaramid ti Dios kas paset ti katulaganna ken ni Abraham. Kasano nga “imula[tayo]” dagitoy a kari iti puspusotayo?

Doktrina ken Katulagan 2:2–3.Tapno makatulong kadagiti miembro ti pamilia a mangisubli iti puspusoda iti ammada (wenno dagiti kapuonanda), mabalinmo nga awisen ida nga agsursuro maipapan iti maysa a kapuonan ket ibinglay no ania ti nasursuroda kadagiti dadduma pay a miembro ti pamilia. Apay a kayat ti Dios nga agsursurotayo maipapan kadagiti miembro ti pamiliatayo ket aramiden dagiti ordinansa ti templo para kadakuada? Kasano a mabendisionantayo no makiramantayo iti family history ken temple work? (kitaen iti Dale G. Renlund, “Family History and Temple Work: Sealing and Healing,” Ensign wenno Liahona, Mayo 2018, 46–49).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Family History—I Am Doing It,” Children’s Songbook, 94.

Panangpadur-as iti Bukod a Panagadal

Usaren dagiti tulong iti panagadal iti nasantuan a kasuratan. Dagiti ramit kas footnotes, Topical Guide, Bible Dictionary, Pangiwanan iti Nasantuan a Kasuratan, ken ChurchofJesusChrist.org makatulong kenka nga ad-adda a maawatam dagiti tattao, paspasamak, ken dagiti ragup dagiti balikas iti nasantuan a kasuratan.

Awaten ni Joseph dagiti Pinanid, ni Gary E. Smith