Disiembre 28–Enero 3

Doktrina ken Katulagan 1

“Dumngegkayo, O Dakayo a Tattao”

Panunotem ti Doktrina ken Katulagan 1 a kas bukod a pakauna ti Apo iti daytoy a libro kadagiti ud-udina nga aldaw a paltiingna. Ania ti kayatna a maammuam maipapan iti Doktrina ken Katulagan? Utobem daytoy a saludsod, ket isuratmo dagiti ania man nga impresion a sumangbay bayat ti panangbasam iti benneg 1.

Isuratmo dagiti Impresionmo

Idi Nobiembre 1831, maysa ket kagudua a tawen pay laeng ti naisubli a Simbaan ni Jesucristo. Nupay dumakdakkel, maysa pay laeng daytoy idi a saan nga am-ammo a grupo dagiti napudno a mamatpati nga agbibiag iti saan unay a matagtagitao a lugar, nga indauluan ti maysa a propeta nga adda iti katengngaan ti duapulo ti edadna. Ngem imbilang ti Dios dagitoy a mamatpati nga agbalin a katulonganna ken mensaherona, ket tinarigagayanna a maipablaak iti lubong dagiti paltiing nga intedna kadakuada.

Ti Doktrina ken Katulagan benneg 1 ket ti pakauna a sao ti Apo iti pannakatipon ken pannakaisurat dagitoy a paltiing, ket silalawag daytoy a mangipakita nga uray no bassit dagiti miembro ti Simbaan idi, awan ti bassit a maipapan iti mensahe a tinarigagayan ti Dios nga ibinglay kadagiti Santona. Daytoy ti maysa a “timek a pammallaag” para iti amin “nga agindeg iti daga,” a mangisursuro kadakuada nga agbabawi ken mangipasdek iti “agnanayon a katulagan” ti Dios (dagiti bersikulo 4, 8, 22). Dagiti katulongan a mangisangsangbay iti daytoy a mensahe ket “dagiti nalupoy ken nanumo,” ngem napakumbaba a katulongan laeng ti kasapulan ti Dios—idi ken ita—a mangyeg iti Simbaanna a “mangwayawaya iti di pannakaaw-awat ken iti kasipngetan” (bersikulo 23, 30).

Para iti ad-adu pay maipapan iti pakasaritaan ti paspasamak iti Doktrina ken Katulagan 1, kitaen iti Saints, 1: 140–43.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 1

Awisennak ti Apo a “sukimaten dagitoy a bilin.”

Ti maysa a pakauna ket mangyam-ammo iti libro. Itudona dagiti tema ken panggep ti libro ket makatulong kadagiti agsagsagana nga agbasa. Bayat ti panangbasam iti benneg 1—ti “pakauna” ti Apo iti Doktrina ken Katulagan (bersikulo 6)—sapulem dagiti tema ken panggep nga inted ti Apo para kadagti paltiingna. Ania ti masursurom manipud iti benneg 1 a makatulongto kenka a manggun-od iti kangrunaan a pagimbagan manipud iti panagadalmo iti Doktrina ken katulagan? Kas pagarigan, mabalinmo nga utobem no ania ti kaipapanan ti “denggen ti timek ti Apo” kadagitoy a paltiing (bersikulo 14) wenno “sukimaten[yo] dagitoy a bilin (bersikulo 37).

Kitaen met iti pakauna iti Doktrina ken Katulagan.

Doktrina ken Katulagan 1:1–6, 23–24, 37–39

Makisasao ti Dios babaen dagiti katulonganna, ket maipatungpalto dagiti balikasna.

Mangrugi ken aggibus ti benneg 1 iti palawag ti Dios nga agsao Isuna babaen kadagti napili a katulonganna (kitaen kadagiti bersikulo 4–6,23–24, 38). Isuratmo no ania ti masursurom manipud iti daytoy a paltiing maipanggep iti Apo ken ti timekna. Ania ti masursurom maipanggep kadagiti katulongan ti Apo? Kaano a nakangngegka iti timek ti Apo iti timek dagiti katulonganna? (kitaen ti bersikulo 38).

Isuro kadatayo dagiti propeta ken apostol dagiti bilin ti Dios.

Doktrina ken Katulagan 1:3, 24–28, 31–33

No napakumbabaak, ti pannusa ti Apo ket maiturongnak nga agbabawi.

Kitaen nga iti bersikulo 3 ken dagiti bersikulo 24–28, kinuna ti Apo a dagiti basol ken biddut ti tattao ket maammuanto. Iti maysa a kasasaad nasakit ken naleddaang daytoy a padas, ken iti sabali pay a kasasaad makaisuro daytoy. Apay nga agduduma unay dagitoy a situasion? Ibilangmo no kasano ti reaksionmo no agbalinka a mannakaammo kadagiti basolmo ken pagkapsutam. Ania dagiti kababalin a masarakam kadagiti bersikulo 24–28 a makatulong kenka nga agresponde iti umisu a wagas? Ania ti isuro kenka dagitoy a bersikulo, a karagpin dagiti bersikulo 31–33, maipanggep iti no kasano ti panangkita ti Apo kadagiti pagkapsutam ken basolmo?

Kitaen met iti Dagiti Proverbio 3:11–12; Ether 12:27; Moroni 10:6:8.

Doktrina ken Katulagan 1:12–30, 35–36

Impasubli ti Apo ti ebangheliona tapno matulongannak a mangsango kadagiti karit dagiti ud-udi nga aldaw.

Nupay iballaag ti benneg 1 dagiti nariribuk nga aldaw a sumangbay, naglaon pay daytoy iti mensahe a pammasingked: “Siak nga Apo, iti pannakaammok iti didigra a dumtengto kadagiti agindeg iti daga, inawagak ti katulongak a ni Joseph Smith, Jun., ket kinasaok manipud iti langit” (bersikulo 17).

Kitaen dagiti kalamidad nga imballaag ti Apo (kitaen, kas pagarigan, dagiti bersikulo 13–16, 35). Ania dagiti dadduma pay a kalamidad a madlawmo ditoy lubong ita—wenno iti bukodmo a biag? Dagiti bersikulo 17–30 ket mangiladawan no ania ti inaramid ti Apo para kenka a mangpadpadaan kadagitoy a kalamidad. Ibilangmo ti panangilista iti no ania ti mabirokam.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Doktrina ken Katulagan 1:1–6, 37–39.Tapno mangirugi iti panaglilinnawag maipapan kadagiti ballaag manipud iti Apo, mabalinmo nga isarita maipapan kadagiti ballaag nga awatentayo manipud kadagiti dadduma maipapan kadagiti pagpeggadan a saantayo a makita—kas iti maysa a nagalis a suelo, maysa a naranggas a bagyo, wenno maysa a sumungsungad a kotse. Ania ti isuro kadatayo dagitoy a pagarigan maipapan kadagiti ballaag ti Apo? Segun iti Doktrina ken Katulagan 1:1–6, 37–39, kasano a ballaagannatayo ti Apo? Ania ti imballaagna kadatayo iti nabiit(kallabes)? Nalabit a mabalinmo a buyaen wenno basaen dagiti paset dagiti mensahe ti kaudian a sapasap a komperensia ket sapulem dagiti pagarigan ti Dios “a timek a pammallaag.”

Doktrina ken Katulagan 1:16.Ania ti kayat a sawen ti “panangbangon ti kinalinteg [ti Apo]”? Kasano a masiguradotayo nga ar-aramidentayo dayta, imbes a magmagna “iti bukod[tayo] a dana”?

Doktrina ken Katulagan 1:30.Ania ti kaipapananna no sawen a ti Simbaan ket “pudno ken nabiag”? Tapno malawlawagan ti panangpampanunot ti pamiliam maipapan iti daytoy a saludsod, mabalinmo nga ipakita kadakuada dagiti ladawan dagiti sibibiag a bambanag ken saan a nabiag a bambanag. Mabalinmo pay nga ilawlawag no ania ti maaramidyo kas maysa a pamilia a mangtulong a “mangwayawaya [iti Simbaan] iti di pannakaaw-awat ken iti kasipngetan.”

Doktrina ken Katulagan 1:37Ibilangmo ti panagplano kas maysa a pamilia no kasano a “sukimatenyo dagitoy a bilin” iti Doktrina ken Katulagan iti daytoy a tawen. Kasano ti panangaramidmonto iti panagadal iti nasantuan a kasuratan a maysa a gagangay a paset ti biag ti pamilia? Ania kadagiti kapanunotan iti panagadal ti makatulong kenka a makasursuro manipud kadagiti nasantuan a kasuratan? (Kitaen iti “Dagiti Kapanunotan a Mangpadur-as iti Sangapamiliaan a Panagadal iti Nasantuan a Kasuratan” iti rugi daytoy a pagadawan.)

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Follow the Prophet,” Children’s Songbook, 110–11, nangnangruna ti maudi a bersikulo.

Panangpadur-as iti Bukod a Panagadal

Sapulem ni Jesucristo. Ti panggep dagiti nasantuan a kasuratan ket mangipaneknek iti Mangisalakan ken ti ebangheliona. Bayat ti panangbasam ti Doktrina ken Katulagan 1, ibilangmo ti panangmarka wenno panangisurat kadagiti bersikulo a mangisuro kenka iti maysa a banag maipapan ken ni Jesucristo.

Dagiti immuna a paltiing iti naisubli a Simbaan ket natipon ken naisurat iti Libro dagiti Bilin.