Ni Moroni nga agparparang ken ni Joseph Smith

Inawagannak iti Naganko, ni Michael Malm

Enero 11–17

Doktrina ken Katulagan 2; Joseph Smith—Pakasaritan 1:27–65

“Umasidegto ti Puso dagiti Annak kadagiti Ammada”

Irugim ti agsagana babaen iti panagbasam iti Doktrina ken Katulagan 2 ken Joseph Smith—Pakasaritaan 1:27–65. Makatulong kenka dagiti kapanunotan iti daytoy a balabala a mangisuro kadagiti kinapudno kadagitoy a binatog.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalinmo a rugian ti klase babaen iti panagkiddawmo kadagiti ubbing a mangibinglay no ania ti ammoda maipapan iti panangsarungkar ni anghel a ni Moroni ken ni Joseph Smith.

icon iti panangisuro

Isuro ti Doktrina: In-inaudi nga Ubbing

Joseph Smith—Pakasaritaan 1:27–54

Inawagan ti Nailangitan nga Ama ni Joseph Smith a mangtulong Kenkuana a mangaramid iti trabahona.

Mapauneg ti panagyaman dagiti ubbing ken ni Propeta a Joseph Smith bayat ti panagsursuroda maipapan iti trabaho a nakaawagan ti Dios kenkuana nga aramidenna.

Dagiti Mabalin nga Aktibidad

• I-display ti ladawan ni Moroni a sarsarungkaranna ni Joseph Smith (kitaen iti Libro ti Arte ti Ebanghelio, blg. 91). Kiddawem kadagiti ubbing a mangilawlawag kadagiti banag a madlawda iti ladawan. Gupgopem ti pakaammuan iti panangsarungkar ni Moroni ken ni Joseph. No kasapulan, agibasar iti Joseph Smith—Pakasaritaan 1:27–54 ken“Chapter 3: The Angel Moroni and the Gold Plates” (Doctrine and Covenants Stories, 13–17). Awisem dagiti ubbing nga agpammarangda a ni Joseph Smith iti nagduduma a paset iti estoria babaen ti panagdalikepkep a kasla agkarkararagda, panagpammarang a kasla umul-uli iti Turod ti Cumorah, ken dadduma pay.

• Basaem iti napigsa ti Joseph Smith—Pakasaritaan 1:33 ket kiddawem kadagiti ubbing a tumakder no mangngeganda ti ragup dagiti balikas a “Adda ti ipaaramid kaniak ti Dios.” Ania ti kayat nga ipaaramid ti Dios ken ni Joseph? Ania ti kayatna nga aramidentayo? Pagdrowingem dagiti ubbing kadagiti banag a kayat ti Dios nga aramidenda, kas iti panagkararag, panagserbi, wenno panagbasa kadagiti nasantuan a kasuratan.

Doktrina ken Katulagan 2

Inikkan ni Elias ni Joseph Smith iti bileg a mangilantip a mamagkaykaysa dagiti pamilia.

Ti panangsursuro maipapan iti bileg a mangilantip a naisubli babaen ken ni Joseph Smith ket makatulong kadagiti ubbing a mangbigbig iti pateg dagiti bendision dagiti agnanayon a pamilia.

Dagiti Mabalin nga Aktibidad

• Tulongam dagiti ubbing a mangisao iti nagan nga “Elias” iti sumagmamano a gundaway. Kiddawem kadakuada a dumngeg iti daytoy a nagan bayat ti panangbasam iti Doktrina ken Katulagan 2:1. Ilawlawag a dagitoy ti balikas ni Moroni ken ni Joseph Smith, ket isuro dagitoy nga umayto ni Elias a mangisubli iti turay ti priesthood. Idi agangay nagparang ni Elias ken ni Joseph iti Templo ti Kirtland ket intedna iti Propeta ti bileg a mangilantip a mamagkaykaysa dagiti pamilia iti agnanayon.

• Kiddawem kadagiti ubbing nga ibagada kenka ti maysa a banag a magustuanda maipapan kadagiti pamiliada. I-display ti ladawan ti maysa a pamilia iti abay ti maysa a templo—ti bukodmo a pamilia, no mabalin (wenno kitaen iti Libro ti Arte ti Ebanghelio, blg. 120). Paneknekam a kayat ti Nailangitan nga Ama a kadennatayo dagiti pamiliatayo iti agnanayon, ken daytoy ti gapuna no apay nga inikkannatayo dagiti templo.

• Aggigiddan a kantaen ti “Families Can Be Together Forever” (Children’s Songbook, 188). Ania ti ibaga daytoy a kanta a maaramidtayo tapno makadennatayo dagiti pamiliatayo iti agnanayon?

Doktrina ken Katulagan 2

Mangisangbay kaniak ti rag-o ti panagadal maipapan kadagiti kapuonak.

Aggagar uray pay dagiti babassit nga ubbing ken mariknada ti rag-o ti pakasaritaan ti pamilia.

Dagiti Mabalin nga Aktibidad

• Awisem ti maysa a nagannak ti maysa kadagiti ubbing nga umay ti klase ket mangibinglay iti estoria maipapan iti maysa a kapuonan (ket i-display ti maysa a ladawan no adda). Isaritam ti maipapan iti rag-o a mariknam no maammuam maipapan iti pakasaritaan ti pamiliam.

• Mangted iti tunggal ubing iti papel a sinanpuso. Tulongam ida a mangisurat iti naganda ken ti “Ikarik a laglagipek dagiti kapuonak” iti daytoy. Basaen ti Doktrina ken Katulagan 2:2, ket ilawlawag nga immay ni Elias tapno mangyasideg iti pusotayo kadagiti kapuonantayo.

icon iti panangisuro

Isuro ti Doktrina: In-inauna nga Ubbing

Joseph Smith—Pakasaritaan 1:28–29

Makapagkararagak tapno mapakawannak.

No dadduma mabalin a marikna dagiti ubbing a sursuruam a “nagbasol [da] gapu iti kinalupoy ken dagiti pagkurangan[da]” (Joseph Smith—Pakasaritaan 1:29) kas iti inaramid ni Joseph Smith. Tulongam dagiti ubbing a maammuanda a makaasidegda iti Nailangitan nga Ama para iti pammakawan.

Dagiti Mabalin nga Aktibidad

• Basaem kadagiti ubbing ti Joseph Smith—Pakasaritaan 1:29. Kasano ti panagrikna ni Joseph Smith maipapan kadagiti biddutna? Ania ti inaramidna maipapan kadagitoy? Ania ti masursurotayo manipud iti pagwadan ni Joseph a makatulongto kadatayo no agbidduttayo? Saludsodem kadagiti ubbing no ania ti mangiparikna a maammuanda nga inawagan ti Dios ni Joseph uray pay no adda pagkuranganna.

• Apay a nasken a panunoten ti maipapan iti “kasasaadtayo iti [Dios]”? (Joseph Smith—Pakasaritaan 1:29). Ibagam kadagiti ubbing no ania ti aramidem no panunotem no ania ti kasasaadmo iti Dios.

Joseph Smith—Pakasaritaan 1:30–54

Inawagan ti Dios ni Joseph Smith a mangaramid iti maysa a napateg a trabaho.

Ti panagadal ti mensahe ni Moroni ken ni Joseph Smith ket makatulong kadagiti ubbing a mangpatibker kadagiti pammaneknekda maipapan iti sagrado a takem [calling] ni Joseph.

Dagiti Mabalin nga Aktibidad

• Awisem dagiti ubbing a mangiyakem wenno mangidrowing kadagiti ladawan dagiti pasamak manipud iti Joseph Smith—Pakasaritaan 1:30–54, kas iti panagparang ni Moroni ken ni Joseph (bersikulo 30–47), ni Joseph a makisarsarita iti amana (dagiti bersikulo 48–50), ken ni Joseph a mangsapsapul kadagiti pinanid (dagiti bersikulo 51–54). Ania ti masursurotayo manipud iti daytoy a pakaammuan maipapan iti trabaho a nakaawagan ni Joseph nga aramidenna?

• Basaen kadagiti ubbing ti Joseph Smith—Pakasaritaan 1:33–35, ket idawat kadakuada a dumngegda no ania ti kayat ni Moroni a maammuan ni Joseph maipapan iti trabaho a nakaawaganna. Kasano a nabendisionnantayo gapu ta impatungpal ni Joseph Smith ti trabahona kas maysa nga agipatpatarus iti Libro ni Mormon? Awisem dagiti ubbing a kanayon a basaenda ti Libro ni Mormon.

Doktrina ken Katulagan 2

Kayat ti Nailangitan nga Ama a mailantip dagiti pamilia iti templo.

Imbaga ni Moroni ken ni Joseph Smith nga umayto ni Elias tapno “ipalgak … ti Kinasaserdote” (bersikulo 1). Maipanggep daytoy iti bileg a pangilantip ti priesthood a mangpalugod kadagiti pamilia a mapagkaykaysa iti agnanayon ken mangpabael kadatayo a makaawat kadagiti ordinansa para kadagiti kapuonantayo iti templo.

Dagiti Mabalin nga Aktibidad

• Pagbasaem dagiti ubbing ti padto iti Doktrina ken Katulagan 2:1. Pagsapulem ida no siasino ti ibaonto ti Apo kadagiti maudi nga al-aldaw ken no anianto ti ipalgak daytoy a tao. I-display ti maysa a ladawan ni Elias iti Templo ti Kirtland (kitaen iti Libro ti Arte ti Ebanghelio, blg. 95), ken pagsasaritaan no kasano a naipatungpal daytoy a padto iti 13 a tawen kalpasan iti isasarungkar ni Moroni (kitaen iti Doktrina ken Katulagan 110:13–15).

• Ilawlawag nga insubli ni Elias dagiti tulbek ti priesthood a mangilantip kadagiti pamilia a mamagkaykaysa iti agnanayon. Mangipakita iti sumagmamano a banag a makatulong kadagiti ubbing a makaawat iti kaipapanan ti mangiselio [seal] iti maysa a banag, kas iti maysa a delata ti taraon wenno plastik a pagidulinan a bag nga adda zipper lockna. Kasano a makatulong kadatayo dagitoy a banag tapno maawatan no ania ti kaipapanan ti mailantip ti pamilia?

• I-display ti ladawan ti maysa a templo, ken tulongam dagiti ubbing a manginagan iti sumagmamano kadagiti banag nga aramidentayo kadagiti templo. Ilawlawag a posible amin dagiti panangbuniag iti natay, agnanayon a kallaysa, ken panaglantip dagiti pamilia gapu kadagiti tulbek ti priesthood nga insubli ni Elias.

• Awisem ti maysa nga agtutubo a babai ken agtutubo a lalaki iti ward tapno mangibinglay iti padas a nakasarakanna iti nagan ti maysa a kapuonan ken nabunniagan para iti dayta a kapuonan iti templo.

  Templo ti Palmyra New York

  Mailantip dagiti pamilia iti templo babaen iti bileg a naisubli babaen ken ni Elias.

icon iti panagsursuro

Yallukoy ti Panagsursuro iti Pagtaengan

Allukoyem dagiti ubbing a mangkiddaw kadagiti nagannakda a mangisalaysay kadakuada ti estoria maipapan ti maysa kadagiti kapuonanda wenno mangtulong kadakuada a mangisagana iti paggugusto a taraon ket aggigiddan a kanenda daytoy.

Panangpadur-as iti Panangisurotayo

Tulongam dagiti babassit nga ubbing a makasursuro manipud kadagiti nasantuan a kasuratan. Tapno matulongan dagiti babassit nga ubbing a makasursuro manipud kadagiti nasantuan a kasuratan, agpokuska iti maysa a bersikulo wenno uray maysa laeng a kangrunaan a ragup ti balikas. Mabalinmo nga awisen dagiti ubbing a tumakder wenno mangingato kadagiti imada no mangngeganda dayta a balikas wenno ragup ti balikas. (Kitaen iti Panangisuro iti Wagas ti Mangisalakan, 21.)

panid ti aktibidad: maaramidko ti pakasaritaan ti pamiliak