Manuskrito ti Libro ni Mormon

Kopia ti kauunaan a manuskrito ti Libro ni Mormon

Pebrero 1–7

Doktrina ken Katulagan 10–11

“Tapno Agballigika”

Ti panangisurat kadagiti impresion a naawat bayat ti panangbasam kadagiti nasantuan a kasuratan ket mayarig ti panagmula iti bukbukel; makaiturong uray dagiti babassit nga impresion a napnuan kaipapanan iti personal a paltiing.

Isuratmo dagiti Impresionmo

Bayat ti panagprogreso ti pannakaipatarus ti Libro ni Mormon, maysa a saludsod ti gagangay a timmaud: Ania ti nasken nga aramiden da Joseph Smith ken Oliver Cowdery maipapan kadagita a pinanid ti patarus a napukaw? Mabalin a ti nainrasonan nga aramiden ket ti agsubli ken maipatarus manen dayta a paset, ngem adda maysa a banag a makita ti Apo a saanda kabaelan—ti panagkukunsabo dagiti nadangkes a tao a mangbaliw kadagiti balikas kadagitoy a pinanid tapno makaipasdek iti panagduadua iti naparegta nga aramid ni Joseph. Adda plano ti Dios a mangpengdan dagiti panagkagumaan ni Satanas ket supapakanna ti ania man a napukaw. Immuna a narugian daytoy a plano iti napalabas a rinibribu a tawen idi naparegta ni propeta a Nephi a mangaramid iti maikadua a sinurat a mangsakup iti isu met laeng a panawen. Idi agangay, naparegta ni Mormon nga iraman daytoy a kasuratan iti Libro ni Mormon “iti nainsiriban a gagem” nga ammo ti Apo ( kitaen iti Dagiti Balikas ni Mormon 1:3–7).

“Ti siribko,” kinuna ti Apo ken ni Joseph, “nabilbileg ngem iti panangballaibo ti sairo” (Doktrina ken Katulagan 10:43). Dayta ti makapanamnama a mensahe iti panawen a kas iti aldawtayo, no ti agtultuloy a panagkagumaan ti kabusor a mangpakapsut iti pammatitayo ket pumigpigsa. Kas ken ni Joseph, makapagbalintayo a “napudno ken agtultuloy” iti aramid ti Apo a nangawaganna kadatayo.(bersikulo 3). Kalpasanna makitatayonto a nangteden iti wagas tapno, “saan nga agballigi ti ruangan ti impierno” a mangallukoy kadatayo (bersikulo 69).

Kitaen met iti Saints, 1:51–61.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 10:1–33

Kalikaguman ni Satanas a dadaelen ti aramid ti Dios.

Gusgustuen ni Satanas a malipatantayo a sibibiag isuna—wenno ditayo man lang mabigbig dagiti pananggandatna a mangimpluensia kadatayo (kitaen iti 2 Nephi 28:22–23). Ngem ipalgak dagiti balikas ti Apo iti Doktrina ken Katulagan 10 a ni Satanas ket kanayon, naregta a sumupsuppiat iti aramid ti Dios. Bayat ti panagbasam kadagiti bersikulo 1–33, ammuen no kasano a kinalikaguman ni Satanas a dadaelen ti aramid ti Dios iti panawen ni Joseph Smith (kitaen met kadagiti bersikulo 62–63). Ania dagiti pagpapadaan a makitam kadagi wagas ti aramid ni Satanas ita a panawen? Mabalinmo a kiddawen iti Apo a tulongannaka a makakita no kasano a mabalinnaka a sulisogen ni Satanas. Ania ti masursurom manipud iti benneg 10 a makatulong kenka nga agkedked kadagiti panagkagumaan ni Satanas?

Doktrina ken Katulagan 10:34–52

Ti Apo ket “nabilbileg ti sirib[na] ngem ti panangballaibo ti sairo.”

Nasurok a 2,400 a tawen a nasapsapa, insaganan ti Apo ti mangsupapak para kadagiti napukaw a pinanid ti Libro ni Mormon (kitaen iti 1 Nephi 9). Ania ti masursurom maipapan iti Apo manipud iti Doktrina ken Katulagan 10:34–52? Ania ti pakakitaan ti sirib ti Apo ken naisakbay a pannakaammo ti nakitam iti biagmo?

Ti sinurat nga insagana ti Dios a pangsukat iti napukaw a manuskrito ket masarakan itan iti 1 Nephi inggana ti Omni. Kasano a dagiti estoria ken pannursuro iti daytoy a kasuratan ti “[mangiturong] iti daddadakkel a panirigan [iti] ebanghelio” para kenka? (Doktrina ken Katulagan 10:45).

Ni Mormon a mangyab-ababa kadagiti balitok a pinanid

Ni Moroni a Mangyab-ababa kadagiti Pinanid, ni Tom Lovell

Doktrina ken Katulagan 11

No agdawatak iti Dios, maawatkonto.

Sumagmamano kadagiti miembro ti pamilia ken gagayyem ni Joseph Smith ti nangidawat kenkuana a gun-odenna ti pagayatan ti Apo para kadakuada. Naragsak nga aramiden ni Joseph dayta, ngem nataltallugod met ti Apo a mangted iti bukod a paltiing kadakuada. Iti Doktrina ken Katulagan 11, maysa a paltiing nga inawat ni Joseph para iti in-inauna a kabsatna a ni Hyrum, kinuna ti Apo, “Itdekto kenka ti Espirituk, … ket isunton ti pannakaammoyo … amin a banag a tarigagayam kaniak” (Doktrina ken Katulagan 11:13–14).

Kuna ti Apo a dagiti saona ket para iti “amin nga addaan iti nasayaat a tarigagay, ken nangipakan iti kumpayda a pagan” (bersikulo 27). Iti Doktrina ken Katulagan 11, ania ti padpadasen nga ibaga ti Apo kenka maipapan iti bukod a paltiing? maipapan iti pannakiraman iti aramid ti Dios? Ania dagiti dadduma pay a mensahe nga adda iti Apo para kenka?

Doktrina ken Katulagan 11:15–26

Bayat ti pananggamgamko a “magun-od ti balikas [ti Dios],” awatekto ti Espiritu ken bilegna.

Uray idi sakbay a naipatarus ti Libro ni Mormon, naggagar ni Hyrum Smith a mangikasaba iti ebanghelio. Bayat ti panangbasam iti sungbat ti Apo iti tarigagayna, ibilangmo no ania ti kaipapanan kenka ti “manggun-od iti balikas [ti Dios]” (bersikulo 21). Kasano a makatulong kenka ti pananggun-od iti sao ti Dios iti panagserbim iti Simbaan? Kasano a mangyeg daytoy iti impluensia ti Dios iti biagmo?

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Doktrina ken Katulagan 10:5.Ania ti masursurotayo manipud iti daytoy a bersikulo maipapan iti bileg ti kararag? Kasanotayo a “kanayon nga agkararag”? (Para iti sumagmamano a kapanunotan, kitaen ti David A. Bednar, “Pray Always,” Ensign wenno Liahona, Nob. 2008, 41–44.)

Doktrina ken Katulagan 10:38–46Tapno matulongam ti pamiliam a paglilinnawagan no kasano a nasulnitan ti Apo dagiti napukaw a pinanid ti patarus ti Libro ni Mormon, nalabit nga isarita dagiti miembro ti pamilia maipapan iti maysa a banag a napukawda itay nabiit. Kasano ti riknada kalpasan a naduktalanda a napukaw daytoy? Kasano ti riknada kalpasan a nabirokanda daytoy? Nupay saanen a nabirokan dagiti napukaw a pinanid ti Libro ni Mormon, kasano a sinulnitan ti Apo ti pukawda, segun iti Doktrina ken Katulagan 10:38–46?

Doktrina ken Katulagan 10:55–70.Awisem dagiti miembro ti pamilia a mangsapul wenno mangmarka kadagiti ragup dagiti balikas a mangrugi iti “Siak” wenno “Aramidek.” Ania ti masursurotayo manipud iti “Siak” a ragup dagiti balikas maipapan iti no siasino ni Jesucristo ken no ania ti mayarig Kenkuana? Ania ti masursurotayo manipud iti “Aramidek” a ragup dagiti balikas maipapan iti no ania ti Aramidenna? Allukoyem dagiti miembro ti pamilia nga ibinglayda no kasano dagitoy a kinapudno ket mangpatibker iti pammatida ken ni Jesucristo.

Doktrina ken Katulagan11:12–14.Ti panangbasa kadagitoy a bersikulo ket makatulong iti pamiliam a makailasin no makisasao ti Espiritu kadakuada. Mabalinmo a pasilawan iti maysa a flashlight iti suelo ket awisem ti maysa a miembro ti pamilia nga umakar iti no ayan ti lawag nga agrimrimat. Kasano a maipada daytoy iti pannarabay ti Espiritu Santo? Ania dagiti bukod a padas a maibinglaymo?

Doktrina ken Katulagan 11:15–30.Ibilangmo ti agaramid iti listaan dagiti banag nga imbaga ti Apo nga aramiden ni Hyrum Smith tapno nakasagana isuna a mangibinglay iti ebanghelio. Ania ti nasken nga aramidentayo amin a kas maysa a pamilia?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Search, Ponder, and Pray,” Childrens Songbook, 109; kitaen iti “Dagiti Kapanunotan a Mangpadur-as ti Panagadal ti Pamiliam iti Nasantuan a Kasuratan.”

Panangpadur-as iti Panangisurotayo

Yaplikarmo dagiti nasantuan a kasuratan iti biagmo. Kalpasan ti panangbasam iti maysa a binatog ti nasantuan a kasuratan, kiddawem kadagiti miembro ti pamilia a mangibinglay kadagiti wagas a pakayaplikaran ti mensahe iti biagda. Kas pagarigan, mabalinda nga iburay no kasano nga inimpluensiaan ida ti Espiritu babaen dagiti wagas a nailadawan iti Doktrina ken Katulagan 11:12–13.

Da Joseph ken Hyrum Smith

Da Joseph ken Hyrum Smith, ni Ken Corbett