“Pebrero 15–21. Doktrina ken Katulagan 14–17: ‘Agpaay a Saksi,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Pebrero 15–21. Doktrina ken Katulagan 14–17,” Umaykayo, Sumurot Kaniak—Para kadagiti Indibidual ken Pamilia: 2021
Pebrero 15–21
Doktrina ken Katulagan 14–17
“Agpaay a Saksi ”
No dadduma indawat ti pamilia ken dagiti gagayyem ni Joseph Smith a kalikagumanna a gun-oden ti paltiing maipapan iti no ania ti kayat ti Dios nga ipaaramid kadakuada. Bayat ti panagbasam kadagitoy a paltiing, ibilangmo no ania a direksion ti ited ti Dios para kenka.
Isuratmo dagiti Impresionmo
Nupay dumurdur-asen a nasayaat ti aramid a panagipatarus, ti situasion idi Mayo1829 sadiay Harmony ket nagbalin a narigrigat para kada Joseph, Emma, ken Oliver. Dumakdakkel ti gura manipud kadagiti kaarruba bayat ti bumasbassit a suporta manipud iti pamilia ni Emma. Idi mariknada a saanen a natalged ti Harmony, immasideg ni Oliver iti maysa a gayyem a nakaipeksa iti panagessemna iti aramid ni Joseph: David Whitmer. Nakipagnaed ni David kadagiti nagannak ken kakabsatna iti Fayette, Nueva York, agarup 100 a milia ti kaadayona. Naam-ammona ni Oliver iti nasapsapa ngem maysa a tawen, ket manipud idin agsursuraten ni Oliver kenkuana, a mangisarsarita kadagiti padasna iti pannakipagtrabahona iti Propeta. Saan pay idi am-ammo ni David wenno asino man iti pamiliana ni Joseph. Ngem idi kiniddaw ni Oliver no mabalin isuna ken ni Joseph nga umakar iti pagtaengan dagiti Whitmer tapno ileppasda ti pannakaipatarus ti Libro ni Mormon, siraragsak dagiti Whitmer a nangpasangbay kadakuada. Ket ammo ti Apo nga ad-adu pay ti napatpateg a bambanag a mapasamak kadagiti Whitmer ngem ti panangpasangbayda a makipagnaed ti Propeta kadakuada. Addaan isuna iti sumagmamano a nalawag a pangiturong para kadakuada, a masarakan iti Doktrina ken Katulagan 14–17, ket iti agangay agbalinda a maysa a pundasion dagiti pamilia iti Simbaan ken dagiti saksi ti pannakaipalgak ti Pannakaisubli.
Para iti ad-adu pay maipapan iti pamilia a Whitmer, kitaen iti Saints, 1:68–71.
Dagiti Kapanunotan para iti Bukod a Panagadal iti Nasantuan a Kasuratan
Mabalinko ti makiraman iti “naindaklan ken nakaskasdaaw nga aramid” ti Dios.
Idi maam-ammona ni Joseph Smith, maysa nga agtutubo ni David Whitmer a napasnek iti trabahona iti talon ti pamilia. Ngem napanunot ti Apo nga adda sabali a paaramidna ken ni David—numan pay iti sumagmamano a wagas kasla met la iti panagtalon. Bayat ti panangbasam iti Doktrina ken Katulagan 14:1–4, kitaem no kasano nga idasig ti Apo ti aramidna iti kita ti trabaho ni David a nakairuamanna. Ania ti masursurom maipapan iti aramid ti Apo manipud iti daytoy a panagidasig?
Kasano a mabalinmo nga “ipakan ti kumpay[mo]”? (bersikulo 4). Kitaem dagiti kari itoy intero a benneg a naited kadagiti “agkalikagum a yeg ken ipasdek ti … Zion” (bersikulo 6).
Ti balikas ti Dios ket “napartak ken nabileg.”
Indasig ti Dios ti saona iti maysa a “dua ti tademna nga espada” (Doktrina ken Katulagan 14:2). Ania ti isingasing kenka daytoy a panagidasig maipapan iti balikas ti Dios? Kas pagarigan, no kasano a napartak, nabileg ken natadem ti balikasna? Kasano a napadasam ti bileg ti balikas ti Dios?
Ibilangmo dagiti dadduma pay a wagas a mangiladawan iti balikasna. Kas pagarigan, ania ti masursurom maipapan iti balikas ti Dios manipud kadagiti panagidasig kadagiti sumaganad a binatog?
Indasig ti Apo ti balikasna iti maysa nga espada.
Ti agnanayon a biag ti “kapatgan iti amin a sagut ti Dios.”
Bayat ti panangbasam iti Doktrina ken Katulagan 14:7, utobem no apay a ti agnanayon a biag ti “kapatgan iti amin a sagut ti Dios.” Mabalin a makatulong daytoy a nalawag a pannakaammo ken pannakaawat manipud ken ni Presidente Russell M. Nelson: “Babaen ti naindaklan a plano ti ragsak ti Dios, makapaglantip dagiti pamilia kadagiti templo ket nakasaganada nga agsubli a makipagtaeng iti nasantuan a sidongna iti agnanayon. Dayta ti agnanayon a biag! (“Thanks Be to God,” Ensign wenno Liahona, Mayo 2012, 77).
Ibilangmo ti panangnayon kadagiti cross reference iti bersikulo 7 a mangtulong kenka a makaawat iti ad-adu pay maipapan iti agnanayon a biag (kitaen iti “Eternal Life” iti Topical Guide wenno Pangiwanwan iti Nasantuan a Kasuratan, scriptures.ChurchofJesusChrist.org). Ania ti masursurom a mangparegta kenka nga agkagumaan para iti agnanayon a biag?
Ti panangyeg kadagiti kararua ken ni Cristo ket maysa a naindaklan ti pategna.
Agpada da John ken Peter Whitmer a nagtarigagay a nangammo no ania “ti kapatgan” iti biagda (Doktrina ken Katulagan 15:4; 16:4). Nasdaawka kadin maipapan iti daytoy para iti bagim? Bayat ti panangbasam iti Doktrina ken Katulagan 15–16, utobem no apay a naindaklan ti pateg ti panangyeg kadagiti kararua ken Cristo. Kasano a maawismo dagiti kararua ken ni Cristo?
Kitaen met iti Doktrina ken Katulagan 18:10–16.
Aramaten ti Apo dagiti saksi a mangipasdek iti balikasna.
Ania ti maysa a saksi? Apay nga aramaten ti Apo dagiti saksi iti aramidna? (kitaen iti 2 Taga Corinto13:1). Utobem dagitoy a saludsod bayat ti panangbasam kadagiti balikas ti Dios iti Tallo a Saksi iti Doktrina ken Katulagan 17. Mabalin a makatulong met ti mangrebyu iti “Ti Pammaneknek dagiti Tallo a Saksi” iti Libro ni Mormon. Kasano a makatulong dagiti saksi a mayeg “dagiti nalinteg a panggep”? (bersikulo 4).
Ammoyo kadi nga immawat met ni Mary Whitmer iti pammaneknek kadagiti balitok a pinanid? Impakita ni anghel Moroni kenkuana kas maysa a panangbigbig kadagiti sakripisio nga impaayna kabayatan ti panagnaed da Joseph, Emma, ken Oliver iti pagtaenganna. (kitaen iti Saints, 1:70–71). Ania ti masursurom manipud iti padasna maipapan iti panangawatna iti maysa a pammaneknek?
Kitaen met iti Saints, 1:73–75; Ulisses Soares, “The Coming Forth of the Book of Mormon,” Ensign wenno Liahona, Mayo 2020, 32–35.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Doktrina ken Katulagan 14:1–4.Ibilangmo ti panangawis iti pamiliam nga agsapul kadagiti ragup ti balikas kadagitoy a bersikulo nga adda pakainaiganna iti panagtalon. Apay mabalin nga idasig ti Apo ti aramidna iti panagapit? Ania ti maaramidtayo a makatulong iti aramidna?
-
Doktrina ken Katulagan 14:2.Dagiti aktibidad para iti daytoy a bersikulo iti “Dagiti Kapanunotan para iti Bukod a Panagadal iti Nasantuan a Kasuratan” ket nailista ti sumagmamano a binatog ti nasantuan a kasuratan maipapan iti balikas ti Dios. Nalabit a mabalin a basaen ida dagiti miembro ti pamilia ket ibinglayda no ania ti masursuroda. Kasano a maparegtanatayo dagitoy a binatog iti nasantuan a kasuratan a “dumngeg” iti balikas ti Dios?
-
Doktrina ken Katulagan 15:6; 16:6.Dagitoy a bersikulo ket makaparegta iti panaglilinnawag maipapan kadagiti banag a kapatgan iti pamiliam (kitaen met iti Doktrina ken Katulagan 18:10).
-
Doktrina ken Katulagan 17.Mabalin a kaay-ayo ti pamiliam ti agdrowing kadagiti ladawan ti tunggal maysa kadagiti banag a nakita dagiti Tallo a Saksi (kitaen iti bersikulo 1). Bayat ti panagbasam iti benneg 17, kitaem dagiti ragup ti balikas a mangisuro maipapan iti kinapateg ti Libro ni Mormon. Kasano a makapagbalintayo a saksi ti Libro ni Mormon? Mabalin met a buyaen ti pamiliam ti video a “A Day for the Eternities” (ChurchofJesusChrist.org).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “I’ll Go Where You Want Me to Go,” Hymns, no. 270.
Dagiti Timek ti Pannakaisubli
Ni Lucy Mack Smith ken dagiti Tallo ken Walo a Saksi
Impakita ti anghel a ni Moroni dagiti balitok a pinanid kada Joseph Smith, Oliver Cowdery, David Whitmer, ken Martin Harris iti kakaywan iti asideg ti pagtaengan dagiti Whitmer iti Fayette, Nueva York. Sarsarungkaran dagiti nagannak ni Joseph dagiti Whitmer iti dayta a panawen. Inladawan ni Lucy Mack Smith, ti ina ni Joseph ti epekto daytoy a namilagruan a padas kadagiti saksi:
“Nagbaetan idi ti oras nga alas tres ken alas kuatro. Agtugtugawkami kada Mrs. Whitmer ken Mr. Smith iti maysa a siled a pagturogan. Nagtugawak iti abay ti katre. Idi simrek ni Joseph, nakakapkapsut a nagtugaw iti sibayko. ‘Ama! Ina!’ kinunana. ‘Saanyo nga ammo no kasano ti kinaragsakko. Impalubos ti Apo a maipakita dagiti pinanid iti tallo pay malaksid kaniak, a nakakita met iti anghel ket paneknekandanto ti kinapudno ti no ania ti insaok. Gapu ta ammoda para iti bagbagida a diak padasen nga allilawen dagiti tao. Ket mariknak a kasla nalag-ananak iti nakabutbuteng a dagensen, a kasta unay a dumani diakon maibturan. Ngem ita addaandanto ti maysa a paset nga ibturanda, ket daytoy ti pagragsakan ti kararuak ta saanakon a maminpinsan nga agmaymaysa iti lubong.’ Kalpasanna dimteng ni Martin Harris. Isu ket kasla dumani narimbawan iti nalaus a rag-o. Kalpasanna pinaneknekanna no ania ti nakita ken nangngegna, a kas met iti inaramid dagiti dadduma, da Oliver ken David. Ti pammaneknekda ket agpada ti kaipapanan a kas iti linaon ti Libro ni Mormon. …
“Ni Martin Harris ti ad-adda a kasla binalkot a di mailadawan iti balikas dagiti riknana. Kinunana, ‘Nakitakon ita ti maysa nga anghel manipud iti Langit nga addaan iti maysa a sigurado a pammaneknek iti kinapudno iti amin a nangngegko a mainaig iti kasuratan, ket nakita dagiti matak isuna. Nakitak met dagiti pinanid ken iniggamak ida kadagiti imak ket mapaneknekak ti isu met laeng iti sibubukel a lubong. Ngem naawatko para iti bagik ti maysa a pammaneknek a saan a mayebkas dagiti balikas, nga awan ti dila a makailadawan, ket bendisionak ti Dios iti kinapudno ti kararuak ta bimmaba isuna tapno aramidennak, uray pay siak, a maysa a saksi ti kinaindaklan ti aramidna ken dagiti naisangrat a para kadagiti annak [ti] tao.’ Kimmadua da Oliver ken David kenkuana iti nadaeg a panagdaydayaw iti Dios para iti kinaimbag ken kinamanangngaasina. Nagawidkami [iti Palmyra, Nueva York,] iti sumaruno nga aldaw a naragsak, agragragsak iti bassit a bunggoy.”1
Dagiti Ladawan da Oliver Cowdery, David Whitmer, ken Martin Harris babaen ni Lewis A. Ramsey
Adda met idi ni Lucy Mack Smith idi nakasubli dagiti Walo a Saksi manipud kadagiti padasda:
“Kalpasan a nagsubli dagitoy a saksi iti balay, nagparang manen ti anghel ken ni Joseph; iti dayta nga oras inyawat ni Joseph dagiti pinanid kadagiti imana. Nangangaykami ti miting iti dayta a rabii, a nangiburayan iti pammaneknek dagiti amin a saksi kadagiti kinapudno kas nadakamat iti ngato; ken amin dagiti pamiliami, uray pay ni Don Carlos [Smith], a 14 ti tawenna, ket nagpaneknek maipapan iti kinapudno ti dispensasion iti ud-udina nga aldaw—a naan-anayen ti pannakaitulodna.”2
Ti kitikit da Joseph Smith ken dagiti Walo a Saksi ni Gary Ernest Smith
Ni Anghel Moroni a Mangipakpakita kadagiti Balitok a Pinanid kada Joseph Smith, Oliver Cowdery, ken David Whitmer, ni Gary B. Smith