Ti Talon ni Martin Harris, ni Al Rounds

Pebrero 22–28

Doktrina ken Katulagan 18–19

“Napateg dagiti Karaurua”

Kiddawem ti Nailangitan nga Ama a tulongannaka a mangsapul kadagiti pagbatayan iti Doktrina ken Katulagan 18–19 a naisangsangayan a napateg kadagiti ubbing.

Isuratmo dagiti Impresionmo

Yawis ti Panagbibinninglay

Basaen iti Doktrina ken Katulagan 18:2, ken ilawlawag a tinulongan ti Espiritu ni Oliver Cowdery a maammuan a pudno dagiti nasantuan a kasuratan. Isalaysay kadagiti ubbing ti maipapan iti maysa a padas idi a ti espiritu ket nagpaneknek kenka a pudno dagiti nasantuan a kasuratan. Paibinglay kadakuada dagiti padasda idi nariknada a pudno dagiti nasantuan a kasuratan.

Isuro ti Doktrina: In-inaudi nga Ubbing

Doktrina ken Katulagan 18:10–12

Napateg iti Dios ti tunggal maysa kadatayo.

No ammo dagiti ubbing nga ya-ayaten ida ti Nailangitan nga Ama —ken dagiti amin nga annakna—ad-adda a managtalek ken naasida kadagiti dadduma.

Dagiti Mabalin nga Aktibidad

• Tulongam dagiti ubbing nga ulitenda kenka ti Doktrina ken Katulagan 18:10 iti sumagmamano a gundaway. Ilawlawag a ti “kararua” ket maitudo iti amin nga annak ti Dios. Ulitem ti bersikulo 10 kadagiti ubbing, itatta suktam ti “kararua” iti nagan dagiti ubbing. (Kitaem ti panid ti aktibidad iti daytoy a lawas.)

• Tulongam dagiti ubbing a mangpanunot kadagiti banag nga ibilang dagiti tao a napateg. Kalpasanna, pagsisinublatem dagiti ubbing a mangkita iti maysa a sarming, ket bayat nga ar-aramidenda daytoy, ibagam iti tunggal ubing nga anak isuna ti Dios ket napateg isuna. Paneknekam a para iti Nailangitan nga Ama, napatpategda kadagiti amin a banag ngem tay napanunotda a nasapsapa.

Doktrina ken Katulagan 18:13–16.

Mangyeg kaniak ti rag-o ti panangibinglay ti ebanghelio.

Kasanom a maparegta dagiti ubbing tapno awisenda dagiti dadduma nga umay ken ni Cristo ken padasenda ti aglaplapusanan a rag-o?

Dagiti Mabalin nga Aktibidad

• Isaritam kadagiti ubbing ti maipapan iti maysa a banag a mangyeg iti rag-o kenka. Palubosam ti tunggal ubing a mangibaga kenka ti maipapan iti maysa a banag a mangyeg kenkuana ti rag-o. Basaem ti Doktrina ken Katulagan 18:13, 16. Ania ti mangyeg ti Apo iti rag-o? Ania ti kinunana a mangyeg kadatayo ti rag-o?

• Aggigiddan nga agkansion iti maysa a kanta maipapan iti aramid ti misionario. kas iti “I Want to Be a Missionary Now” (Children’s Songbook, 168), ken tulongam dagiti ubbing a mangpanunot kadagiti wagas a makaibinglayda ti ebanghelio, agraman iti bukodda a pagtaengan. Isalaysaymo ti panawen idi nangibinglayka ti ebanghelio, ket palubosam nga mangibinglay dagiti ubbing kadagiti padasda.

Doktrina ken Katulagan 19:18–19, 23–24

Nagtulnog ni Jesucristo iti Nailangitan nga Ama, uray pay a narigat daytoy.

Ti iyaanamong ti Mangisalakan nga “uminum iti napait a kopa, ken [saan] kumsen” (bersikulo 18) ket maysa a pagwadan kadatayo amin iti panagtulnog ti kayat ti Nailangitan nga Ama. Ibilang no kasano a maparegtam dagiti ubbing a sumurot iti pagwadan ni Jesus.

Dagiti Mabalin nga Aktibidad

• Ipakitam ti ladawan ni Jesucristo nga agsagsagaba iti Getsemani (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Kiddawem kadagiti ubbing nga ibagada kenka no ania ti ammoda maipapan iti mapaspasamak iti ladawan. Gupgopem iti bukodmo a balikas no ania ti kinuna ti Mangisalakan iti Doktrina ken Katulagan 19:18–19 maipapan iti panagsagabana. Ipaganetget a ti panagsagaba kadagiti bukodtayo a basol ket isu ti karigatan a banag a naaramid ti asinoman, ngem gapu iti ayat ni Jesus iti Nailangitan nga Ama ken kadatayo, nagtulnog Isuna iti kayat ti Dios. Kasano a makapagtulnogtayo iti Nailangitan nga Ama?

• Tulongam dagiti ubbing a mangpanunot kadagiti simple a tignay a mainaig iti ragup dagiti balikas iti Doktrina ken Katulagan 19:23. Basaen ti bersikulo iti sumagmamano a daras kabayatan nga agtignay dagiti ubbing. Tulongam ida a mangpanunot kadagiti wagas a mabalintayo a masursuro ken Cristo ket dumngeg kadagiti balikasna.

Isuro ti Doktrina: In-inauna nga Ubbing

Doktrina ken Katulagan 18:10–12

Napateg iti Dios ti tunggal maysa kadatayo.

Adu kadagiti tao ti marigatan kadagiti pannakarikna iti bassit a panangipateg iti bagi, dagiti dadduma ket saan a nasingpet kadagiti tao a sabsabali kadakuada. Ti napigsa a mensahe ti Doktrina ken Katulagan 18:10 ket mamagbaliw ti panagkitatayo kadagiti bagitayo ken dagiti tao iti lawlawtayo.

Dagiti Mabalin nga Aktibidad

• Kiddawem ti tunggal ubbing nga isurat ti naganda iti maysa a pedaso ti papel ket ipasada dagitoy a papel iti lawlaw ti siled. Awisem ida nga isurat iti tunggal papel a naawatda ti maysa a banag a kayatda maipapan iti daytoy a tao. Allukoyem ida nga agbalin a nasingpet ken manangngaasi kadagiti komentoda. Kalpasana tulongam dagiti ubbing a mangbasa ti Doktrina ken Katulagan 18:10–12, ket awisem ida a mangibinglay no ania ti nasursuroda maipapan iti no kasano ti rikna ti Dios kadatayo. Ilawlawag a napategtayo amin iti Dios gapu ta annaknatayo.

• Ipakita kadagiti ubbing ti maysa a banag a napateg unay kenka. Kasano ti panangtratotayo kadagiti banag a napateg kadatayo? Kiddawem iti maysa nga ubing a basaen ti Doktrina ken Katulagan 18:10. Kasano a maipakitatayo kadagiti dadduma a tao a “napateg[da] dagiti kararua” iti imatangtayo?

  

  Ti Pateg ti Maysa a Kararua, ni Liz Lemon Swindle

Doktrina ken Katulagan 19:16–19

Nagsagaba ni Jesucristo gapu kaniak.

Kasano nga awisem ti espiritu ti panagraem iti klasem tapno mabalin nga agpaneknek ti Espiritu Santo kadagiti ubbing a nagbayad ni Jesucristo ti gatad dagiti basolda?

Dagiti Mabalin nga Aktibidad

• Isalaysaymo ti estoria ni Jesucristo a nagsagaba para kadagiti basoltayo (see “Chapter 51: Jesus Suffers in the Garden of Gethsemane,” New Testament Stories, 129–32, wenno ti maitutop a video iti ChurchofJesusChrist.org). Awisem dagiti ubbing nga isalaysayda manen ti estoria iti bukodda a balikas, ket kalpasanna awisem ida a basaen no kasano nga inladawan ti Mangisalakan ti napasaran iti Doktrina ken Katulagan 19:16–19. Ania ti masursurotayo manipud iti panangiladawanna?

• Awisem dagiti ubbing nga agkidem bayat ti panagbasam ti Doktrina ken Katulagan19:16–19 ket panunoten no kasano ti riknada maipapan iti Mangisalakan. Tulongam dagiti ubbing a kitaen iti Hymns wenno iti Children’s Songbook kadagiti kanta a mangtulong kadakuada nga ipeksa dagiti riknada maipapan ken ni Jesucristo (kitaen ti topic indexes kadagitoy a libro). Awisem dagiti ubbing nga agkansion kadagiti mapilida a kanta ket iburay dagiti pammaneknekda.

• Tulongam dagiti ubbing a mangikabesa ti maikatlo a pagannurotan ti pammati.

Doktrina ken Katulagan 19:26, 34–35, 38

Dakdakkel dagiti bendision ti Dios ngem dagiti kinabaknang ti daga.

Nangina ti panagimprenta ti Libro ni Mormon, ket awan pannakabael ni Joseph Smith. Sinaludsod ti Apo ni Martin Harris a “mangibinglay iti paset ti sanikua[na],” ti narang-ay a talonna, tapno bayadanan ti nagimprenta, (bersikulo 34). Nakaawattayo kadagiti naindakkelan a bendision gapu kadagiti sakripisio ni Martin ken dadduma pay.

Dagiti Mabalin nga Aktibidad

• Isurat iti pisarra dagiti saludsod kas dagiti sumaganad a mangtulong kadagiti ubbing a maawatan ti Doktrina ken Katulagan 19:26, 34–35, 38: Ania ti impaaramid ti Apo ken ni Martin Harris? Apay nga impaaramidna daytoy kenkuana? Ania ti inkarina kenkuana kas supapak? Awisem dagiti ubbing a sagpaparis a mangsapul kadagiti sungbat kadagitoy a bersikulo. Saludsodem no kasano ti mariknada no isuda ni Martin Harris.

• Ipakitam kadagiti ubbing ti maysa a kopia ti Libro ni Mormon ket ibagam kadakuada ti maysa a banag nga ipatpategmo maipapan iti daytoy. Awisem ida a mangiburay no ania ti mariknada maipapan iti daytoy. Isalaysaymo nga apagbiit ti maipapan kadagiti sakripisio ni Martin Harris tapno maiprinta ti Libro ni Mormon (Doctrine and Covenants Stories, 33). Ania ti kinuna ti Apo ken ni Martin iti Doktrina ken Katulagan 19:38 a mabalin a nakatulong kenkuana nga agbalin a napudno ken natulnog? Tulongam dagiti ubbing a mangpanunot kadagiti banag a mabalinda nga isakripisio tapno agtulnog iti Dios wenno tumulong iti trabahona.

Yallukoy ti Panagsursuro iti Pagtaengan

Awisem dagiti ubbing nga agpanunot ti maysa a tao a mabalin a matulongan babaen iti nasursuroda manipud iti Doktrina ken Katulagan 18 wenno 19—kas pagarigan, a napategtayo amin iti Dios. Allukoyem ida nga agplano no kasanoda nga ibinglay no ania ti nasursuroda iti dayta a tao.

Panangpadur-as iti Panangisurotayo

Tulongam dagiti ubbing nga agsursuro manipud kadagiti nasantuan a kasuratan. Marigatan dagiti sumagmamano nga ubbing nga agbasa kadagiti nasantuan a kasuratan. Makatulong ti panagpokus iti maysa a bersikulo, wenno ragup dagiti balikas.