Ti Pagtaengan ni Martin Harris, ni Al Rounds

Marso 1–7

Doktrina ken Katulagan 20–22

“Ti Ilulutuad ti Simbaan ni Cristo”

Bayat iti panagadalmo ti Doktrina ken Katulagan 20–22 ita a lawas, ti kapanunotan ti panagisuro ket mabalin a sumangbay iti panunotmo. Mabalinmo a sapulen dagiti mainayon a kapanunotan ti panagisuro iti daytoy a balabala.

Isuratmo dagiti Impresionmo

Yawis ti Panagbibinninglay

Ipakitam ti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket kiddawem kadagiti ubbing a mangibinglay no ania ti ammoda maipapan ti pannakabukel ti Simbaan. Para iti tulong, kitaen iti “Chapter 9: Organization of the Church of Jesus Christ” (Doctrine and Covenants Stories, 40–42).

Isuro ti Doktrina: In-inaudi nga Ubbing

Doktrina ken Katulagan 20–21

Naisublin ti Simbaan ni Jesucristo.

Idi Abril 6, 1830, nagguummong da Joseph Smith ken Oliver Cowdery a kadua dagiti dadduma pay tapno mangbukel iti naisubli a Simbaan ni Jesucristo. Kasano a matulongam dagiti ubbing a sursuruam a makaawat iti kinapateg daytoy a pasamak?

Dagiti Mabalin nga Aktibidad

• Usarem ti paulo ti benneg para iti Doktrina ken Katulagan 21 wenno chapter 9 ti Doctrine and Covenants Stories tapno isaritam biit kadagiti ubbing no ania ti napasamak iti aldaw a pannanabukel ti Simbaan. Tapno maawatanda daytoy a pasamak, ipakitam ti video nga “Organization of the Church” (ChurchofJesusChrist.org).

• Ibagam kadagiti ubbing no apay nga agyamyamanka nga adda kadatayo ti Ti Simbaan ni Jesucristo dagiti Santo iti Ud-udina nga Aldaw. Ilawlawagmo a ti panagbalin a miembro ti Ti Simbaan ni Jesucristo dagiti Santo iti Ud-udina nga Aldaw ket mangisagana kadatayo a makipagnaed manen iti Dios. Tulongam ida a mangulit iti ragup dagiti balikas a “Kamengak ti Ti Simbaan ni Jesucristo dagiti Santo iti Ud-udina nga Aldaw” iti sumagmamano a gundaway wenno agkanta iti “The Church of Jesus Christ” (Children’s Songbook, 77).

Doktrina ken Katulagan 20:37, 71–74

Agsagsaganaak a mabuniagan.

Agsagsagana dagiti ubbing a sursuruam a mabuniagan. Tulongam ida a makaawat no ania ti kaipapanan ti agpabuniag ken no ania ti mabalin nga aramidenda tapno makapagsagana.

Dagiti Mabalin nga Aktibidad

• Ipakitam ti ladawan ti maysa nga ubing a mabumbuniagan (kitaen iti Libro ti Arte ti Ebanghelio, num. 104), ket kiddawem kadagiti ubbing a mangilawlawag kadagiti banag a madlawda. Basaen ken gupgopen ti Doktrina ken Katulagan 20:71–74, ken tulongam dagiti ubbing a mangkita no kasano a maipadis dagiti ladawan kadagiti pannursuro kadagitoy a bersikulo. Paneknekam a nasken a surotentayo ti pagwadan ti Mangisalakan ken mabuniagantayo iti wagas nga imbilinna.

• Gupgopem ti Doktrina ken Katulagan 20:37. Ania ti masursurotayo manipud iti daytoy a bersikulo maipapan kadagiti tao nga agtarigagay a mabuniagan? Ipakitam dagiti ladawan dagiti wagas a pakapagsaganaan dagiti ubbing para iti panagbuniag, kas iti panagserbi kadagiti dadduma ken panagkararag.

• Agkansion ti maysa a kanta maipapan iti panagbuniag, kas iti “When I Am Baptized” (Children’s Songbook, 103), wenno buyaen ti “The Baptism of Jesus” (biblevideos.ChurchofJesusChrist.org). Awisem dagiti ubbing a mangibinglay kadagiti riknada maipapan iti pannakabuniag.

Doktrina ken Katulagan 20:75–79

Makatulong kaniak ti sakramento a manglagip ken ni Jesucristo.

Kasano a matulongam dagiti ubbing a nasaysayaat a maawatanda no apay a makiranud iti sakramento kada lawas?

Dagiti Mabalin nga Aktibidad

• Basaen ti Doktrina ken Katulagan 20:77 kadagiti ubbing. Kiddawem kadakuada a tumakder no mangngeganda no ania ti nasken a lagipentayo no makiranudtayo ti tinapay ti sakramento. Kasta met laeng ti aramidenda iti bersikulo 79. (Mabalin a kayatmo nga ilawlawag nga uminumtayo iti danum imbes nga arak.) Kasano a maipakitatayo a laglagipentayo ni Jesus?

• Isaritam kadagiti ubbing maipapan iti maysa a panawen a nagkarika ken tinungpalmo daytoy. Awisem ida a mangisarita kadagiti kasta met laeng a bukodda nga estoria. Ilawlawag a no makiranudtayo iti sakramento, agkaritayo. Basaen ti Doktrina ken Katulagan 20:77, a mangyunay-unay kadagiti inkaritayo a “kanayon a laglagipen isuna” ken “tungpalen dagiti bilinna.” Awisem dagiti ubbing a mangibinglay iti maysa a panawen a nalagipda ti Mangisalakan wenno nagtungpalda ti maysa a bilin.

  

  Mangipalagip kaniak ti sakramento a mangpanunot ken ni Jesucristo.

Isuro ti Doktrina: In-inauna nga Ubbing

Doktrina ken Katulagan 20–21

Naisublin ti Simbaan ni Jesucristo.

Kas panagtungpal iti bilin ti Apo, binukel da Joseph Smith, Oliver Cowdery, ken dagiti dadduma pay ti naisubli a Simbaan ni Jesucristo idi Abril 6, 1830. Mangibilang kadagiti wagas a makatulong kadagiti ubbing a mangkita no kasano a naparaburan ti biagda iti daytoy a pasamak.

Dagiti Mabalin nga Aktibidad

• Ipalagip kadagiti ubbing ti sumagmamano a napapateg a pasamak a sursuruenda—kas iti pannakaisubli ti priesthood ken pannakaipatarus ti Libro ni Mormon. Apay a nasken a mapasamak dagitoy a banag sakbay a mabukel ti Simbaan?

• I-display dagiti ladawan ti banag nga ar-aramidentayo iti Simbaan a nailadawan iti benneg 20, kas iti panagsursuro maipapan ti Dios ken Jesucristo, ministering, panagbuniag, ken pannakiranud ti sakramento. Tulongam dagiti ubbing a mangipadis kadagitoy a ladawan kadagiti nasantuan a kasuratan a mangiladawan kadagitoy, kas iti Doktrina ken Katulagan 20:17–21, 47, 70, 72–74, 75–79, ken ti paulo iti benneg 21. Ania dagiti bendision nga adda kadatayo gapu ta miembrotayo ti Simbaan?

• Aggigiddan a mangkanta iti “The Church of Jesus Christ” (Children’s Songbook, 77).

Doktrina ken Katulagan 20:37, 77, 79

Idi nabuniagannak, nagkariak a suroten ni Jesucristo.

Adu kadagiti ubbing iti klasem ti nabuniaganen. Ipalagipmo kadakuada dagiti katulagan nga inaramidda a “mangawat iti nagan ni Jesucristo” (Doktrina ken Katulagan 20:37).

Dagiti Mabalin nga Aktibidad

• Awisem ti sumagmamano nga ubbing nga umay a nakasagana a mangibinglay no ania ti nariknada wenno napadasanda idi nabuniaganda. Nalabit mabalinda a mangitugot ti maysa a ladawan manipud iti aldaw a nabuniaganda tapno ipakita iti klase. Apay a pinilida a mabuniagan? Kasano a nangparabur kadakuada ti panagpabuniag ken panangawatda iti Espiritu Santo?

• Aggigiddan a basaen ti Doktrina ken Katulagan 20:77, ket kiddawen kadagiti ubbing nga ilasinda dagiti kari nga aramidentayo bayat iti sakramento. Tapno matulongan dagiti ubbing a maawatanda nga adda dagiti banag a mabalinda nga aramiden iti inaldaw tapno “kanayon a laglagipen” ni Jesucristo, awisem ti maysa nga ubing a mangyakto ti maysa a banag a mabalinna nga aramiden tapnu malaglagipna ti Mangisalakan. Kiddawem kadagiti dadduma pay a mangpugto no ania ti tignay. Segun iti bersikulo 77, kasano a mabendisionantayo no kanayon a laglagipentayo ti Mangisalakan?

• Tulongam dagiti ubbing a mangidilig iti Doktrina ken Katulagan 20:37 iti bersikulo 77 tapno mangsapul iti ragup dagiti balikas nga agpada a naulit. Ipakitam kadagiti ubbing ti maysa a banag nga adda naganna (kas maysa a nagan ti produkto wenno maysa a bukod a nagan). Ania ti ibaga kadatayo ti nagan maipapan iti banag? Aggigiddan a basaen ti Doktrina ken Katulagan 20:37 tapno maammuan no asino ti akinnagan ti awatentayo iti bagitayo no mabuniagantayo. Ania ti kayat a sawen ti awaten ti nagan ni Cristo iti bagbagitayo? Kasano ti nasken a panagpampanunot ken panagtigtignaytayo gapu ta adda kadatayo ti naganna?

Doktrina ken Katulagan 21:4–6

Mabendisionannak no surotek ti propeta.

Kasano a matulongamto dagiti ubbing nga umawat kadagiti bendision a naikari kadagitoy a bersikulo para kadagiti sumurot iti propeta?

Dagiti Mabalin nga Aktibidad

• Isurat iti pisarra ti Dagiti Bilin ken Dagiti Bendision. Awisem dagiti ubbing a basaenda ti Doktrina ken Katulagan 21:4-6, a mangsapsapul kadagiti bilin nga inted ti Apo ken dagiti bendision nga inkarina. Awisem ida a mangisurat iti pisarra no ania ti nasarakanda.

• Ipakitam ti maysa a ladawan ti agdama a propeta, ket awisem dagiti ubbing a mangibinglay ti maysa a banag a nasursuro wenno nangngeganda kenkuana iti nabiit pay. Aggigiddan a basaen ti Doktrina ken Katulagan 21:5. Awisem dagiti ubbing a mangisurat wenno mangidrowing iti maysa a banag a maaramidda a mangsurot iti propeta. Ibinglaymo ti pammaneknekmo a no surotentayo ti propeta, sursurotentayo ti Mangisalakan.

Yallukoy ti Panagsursuro iti Pagtaengan

Kiddawen kadagiti ubbing a mangilista kadagiti banag a pagyamananda gapu iti naisubli a Simbaan ni Jesucristo. Allukoyem ida a mangibinglay iti listaanda iti maysa a miembro ti pamilia wenno gayyem.

Panangpadur-as iti Panangisurotayo

Usarem dagiti estoria a mangisuro iti doktrina. “Makatulong dagiti estoria kadagiti ubbing a mangkita no kasano a mayaplikar ti ebanghelio iti inaldaw a panagbiag. … No mangisursuro kadagiti babassit nga ubbing, agplano kadagiti wagas a mairamanda iti estoria; kas pagarigan, mabalinda nga iggaman dagiti ladawan, mangulit kadagiti balikas, wenno mangyakem kadagiti paset” (Panangisuro iti Wagas ti Mangisalakan, 25).