Marso 15–21

Doktrina ken Katulagan 27–28

“Nasken a Naurnos ti Pannakaaramid dagiti Amin a Banag”

Dagiti kinapudno a maisursuro iti Doktrina ken Katulagan 27–28 ket makapapigsa kadagiti pammaneknek dagiti ubbing a sursuruam. Bayat nga ibilangmo dagiti kasapulan dagiti ubbing, ania dagiti kinapudno a mangawis kenka nga ipokus iti klase?

Isuratmo dagiti Impresionmo

Yawis ti Panagbibinninglay

Ipakitam ti maysa a ladawan ni Propeta Joseph Smith ken maysa a ladawan ti agdama a propeta. Awisem dagiti ubbing a manginagan kadagiti tao iti ladawan ken mangibinglay kadagiti banag nga ar-aramiden dagiti propeta.

Isuro ti Doktrina: In-inaudi nga Ubbing

Doktrina ken Katulagan 27:1–2

Makatulong kaniak ti sakramento a manglagip ken ni Jesucristo.

Mabalin a masursuro dagiti ubbing ti kinapateg ti sakramento ken makasapul kadagiti wagas a mangipalagip iti Mangisalakan bayat daytoy a sagrado nga ordinansa.

Dagiti Mabalin nga Aktibidad

• Ipakitam kadagiti ubbing ti ladawan ni Jesus a mangmangted ti sakramento kadagiti Apostolna (kitaen iti Libro ti Arte ti Ebanghelio, num. 54). Ania ngata koma ti mabalin a kayarigan ti makiranud iti sakramento a kadua ti Mangisalakan (kitaen iti Doktrina ken Katulagan 27:5). Basaen ti Doktrina ken Katulagan 27:2, a mangrugi iti “manglaglagip iti Amak,” ken kiddawem kadagiti ubbing a dumngeg iti no ania ti kayat ti Mangisalakan a laglagipentayo no makiranudtayo ti sakramento.

• Ipakitam kadagiti ubbing ti sumagmamano a tinapay ken danum ken maysa a ladawan ti Mangisalakan. Paiggamam kadagiti ubbing ti ladawan bayat ti panangisurom kadakuada a makatulong kadatayo ti sakramento a manglagip ken ni Jesucristo.

• Tulongam dagiti ubbing a mangpanunot kadagiti banag a mabalin nga aramidenda tapno malagipda ni Jesus bayat ti sakramento. Ania ti ar-aramiden dagiti pamiliada tapno agtitinnulong iti tunggal maysa nga agbalin a managraem? Awisem dagiti ubbing nga agdrowing ti maysa a ladawan a mabalinda a kitaen bayat iti sakramento tapno makatulong kadakuada a manglagip iti Mangisalakan.

Kitaen iti Doktrina ken Katulagan 27:15–18

Salaknibannak ti kabal ti Dios.

Agpanunot kadagiti wagas a matulongam dagiti ubbing a sursuruam a mangkita no kasano a ti panagtungpal dagiti bilin ket kas iti panagkawes ti kabal ti Dios.

Dagiti Mabalin nga Aktibidad

• Ipakitam kadagiti ubbing ti ladawan ti kabal (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Bayat ti panagbasam iti Doktrina ken Katulagan 27:15–18, tulongam dagiti ubbing a mangsapul kadagiti pedaso ti kabal iti ladawan. Ibinglay kadagiti ubbing no kasano a nakatulong kenka ti kabal ti Dios tapno “madaeran ti dakes nga aldaw” (bersikulo 15).

• Ti balabala para iti Taga Efeso iti Umaykayo, Sumurot Kaniak—Para iti Primary: Baro a Tulag 2019 addaan iti panid ti aktibidad maipapan iti kabal ti Dios. Putputdem dagiti paset ti kabal, ket ipakawesmo kadagiti ubbing ti maysa kadagiti ladawan ti tao bayat iti panagbasam iti Doktrina ken Katulagan 27:15–18. Tulongam dagiti ubbing a maawatanda dagiti bambanag a mabalin nga aramidenda tapno maikawesda ti kabal ti Dios, kas iti panagkararag, panagpili iti rumbeng, panagserbi kadagiti dadduma, ken dadduma pay.

  

  Maikawesko ti kabal ti Dios.

Doktrina ken Katulagan 28:2, 6–7

Ti propeta ti mangidadaulo ti Simbaan.

Ammo kadi dagiti ubbing a sursuruam no apay nga addaantayo kadagiti propeta? Usaren ti Doktrina ken Katulagan 28 tapno makatulong kadakuada a maammuanda a ti propeta laeng ti mabalin a mangidaulo ti Simbaan.

Dagiti Mabalin nga Aktibidad

• Basaem wenno isaritam iti bukodmo a balikas ti pakaammuan maipapan ken ni Hiram Page (kitaen iti “Chapter 14: The Prophet and Revelations for the Church,” Doctrine and Covenants Stories, 56–57). Ibinglaymo ti pammaneknekmo a pinili ti Nailangitan nga Ama ken ni Jesucristo ni Joseph Smith a mangidaulo iti Simbaan iti aldawna (kitaen iti Doktrina ken Katulagan 28:2). Ibinglaymo ti pammaneknekmo a ti agdama a propeta ket naawagan a mangtulong iti Apo a mangidaulo ti Simbaanna iti aldawtayo.

• Kiddawem kadagiti ubbing nga agay-ayam iti “surotem ti lider”—maysa nga ubing ti agtakder iti sango ti siled, ket tuladen dagiti dadduma nga ubbing no ania ti aramidenna. Mabalin a mangiturong daytoy iti panaglilinnawag maipapan iti no apay a surutentayo ti propeta. Mabalin nga ipakitam ti ladawan ni Jesucristo ket yunay-unay a sursurotentayo ti propeta gapu ta sursurotenna ti Mangisalakan ken isaona dagiti balikas ti Mangisalakan.

Isuro ti Doktrina: In-inauna nga Ubbing

Doktrina ken Katulagan 27:1–2

Makatulong kaniak ti sakramento a manglagip ken ni Jesucristo.

Kasano a makatulong kadagiti ubbing a sursuruam ti panagsursuro maipapan kadagiti pagbatayan iti Doktrina ken Katulagan 27:1–2 tapno maaddaan iti napatpateg a padas iti pannakiranud iti sakramento?

Dagiti Mabalin nga Aktibidad

• Awisem dagiti ubbing a mangisurat kadagiti banag a mapanunotda a kayat ti Mangisalakan a maammuanda maipapan iti sakramento. No kasapulan, mabalinda a basaen ti “Sakramento” iti Pangiwanwan iti Nasantuan a Kasuratan (scriptures.ChurchofJesusChrist.org). Palubosam ida a mangibinglay kadagiti banag nga insuratda, ket kiddawen kadakuada a manginayon kadagiti listaanda kalpasan a basaenda ti Doktrina ken Katulagan 27:1–2. Kasano a maapektuanto dagiti banag iti listaanda ti pannakiranudda ti sakramento iti tunggal Domingo?

• Tulongam dagiti ubbing a mangpanunot no ania ti kaipapanan ti pannakiranud iti sakramento a “naitalimudok ti imatang iti gloria ti [Dios]” (bersikulo 2). Pagsasaritaan dagiti saludsod a kas kadagiti sumaganad: Ania dagiti sumagmamano a pakasingaan ti mata wenno panunottayo a mabalin a pakaipamaysaan ti imatangtayo bayat ti sakramento? Ania ti maaramidtayo tapno maipamaysa ti imatangtayo iti Mangisalakan bayat ti pannakiranudtayo iti sakramento? Kasano a mangtulongto daytoy kadatayo a sumurot Kenkuana iti inaldaw?

Kitaen iti Doktrina ken Katulagan 27:15–18

Salaknibannak ti kabal ti Dios a mangsarked ti dakes.

Maipasangonto dagiti ubbing a sursuruam ti adu a dakes nga impluensia iti unos ti panagbiagda. Kayat ti Nailangitan nga Ama ti mangtulong kadakuada a mangsarked ti dakes. Kasano a maparegtam ida a mangikawes iti kabal ti Dios?

Dagiti Mabalin nga Aktibidad

• Awisem dagiti ubbing a mangbasa iti Doktrina ken Katulagan 27:15–18 ken mangidrowing kadagiti paset ti kabal a dinakamat iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Ania dagiti balikas a nailadawan iti tunggal paset ti kabal a mangisuro kadatayo maipapan iti no ania ti kasapulantayo a mangparmek iti dakes iti aglawlawtayo (kas pagarigan, kinalinteg, pammati, pannakaisalakan, ken dadduma pay)?

• Awisem dagiti ubbing a mangpanunot kadagiti banag a mabalinda nga aramiden a mangsarked kadagiti sulisog iti aglawlawda. Kiddawem ida a mangileppas iti binatog nga “Ikawestayo ti kabal ti Dios iti inaldaw babaen iti …” nga usarenda dagiti kapanunotanda. Tulongam ida a mangkita no kasano a dagiti panangkagumaanda nga umasideg ken ni Cristo ket mangtultulong kadakuada a mangikawes iti kabal ti Dios.

Doktrina ken Katulagan 28:1–7, 15

Tarabayennak ti Nailangitan nga Ama babaen ti Espiritu Santo.

Makatulong a mangipaawat kadagiti ubbing a sursuruam tiDoktrina ken Katulagan 28:1–7, 15 a mabalin a tarabayen ti Espiritu Santo ti tunggal maysa, ngem kanayon a maitedto ti paltiing para iti Simbaan babaen ti propeta.

Dagiti Mabalin nga Aktibidad

• Isalaysay ti estoria ni Hiram Page a nangibagbaga nga umaw-awat iti paltiing para iti Simbaan (kitaen iti “Chapter 14: The Prophet and Revelations for the Church,” Doctrine and Covenants Stories, 56–57). Kasano koma a sungbatantayo dagiti ibagbaga ni Hiram Page? Aggigiddan a basaen ti Doktrina ken Katulagan 28:1–7, 15 para iti sumagmamano a kapanunotan.

• Tulongam dagiti ubbing a mangsarak kadagiti sumaganad a nasantuan a kasuratan tapno makaaramidda iti listaan dagiti wagas a mabalin a pangtarabayan ti Espiritu Santo kadakuada: Doktrina ken Katulagan 28:1, 4, 15; Juan 14:26; Moroni 8:26; 10:4–5. Pagtitinnulongem ida nga agtrabaho iti kada paris no makatulong dayta. Apay a napateg unay ti sagut ti Espiritu Santo? Ibinglaymo kadagiti ubbing no kasano a tinarabaynaka ti Espiritu Santo.

Yallukoy ti Panagsursuro iti Pagtaengan

Awisem dagiti ubbing a mangidawat kadagiti nagannakda no mabalinda ti mangisuro iti adalen ti home evening iti maysa a banag a nasursuroda iti klase.

Panangpadur-as iti Panangisurotayo

Usarem ti musika. Makatulong dagiti kanta ti Primary ken himno kadagiti ubbing iti amin nga edad a maawatan ken maipasagepsep dagiti kinapudno ti ebanghelio iti makallalagip a wagas. Mapagbalinda pay nga aktibo dagiti ubbing a makiraman iti panagsursuro.