Marso 29–Abril 4

Paskua ti Panagungar

“Siak ti Nagbiag, Siak ti Napapatay”

Bayat ti panagsaganam a manglagip ti Panagungar ti Mangisalakan inton Paskua ti Panagungar, utobem no kasano a dagiti kabaruanan a paltiing ket mangpapigsa iti pammatim a ni Jesucristo ti Bugbugtong nga Anak ti Dios ken ti Mannubbot ti lubong.

Isuratmo dagiti Impresionmo

Ti Abril 3, 1836, ti aldaw ti Domingo ti Paskua ti Panagungar. Kalpasan ti panangtulong a mangannong iti sakramento nagguummong dagiti Santo iti kabarbaro a naidaton a Templo iti Kirtland, nagsapul da Joseph Smith ken Oliver Cowdery iti maysa a naulimek a lugar iti likudan ti belo iti templo ket nagtamedda iti naulimek a panagkararag. Kalpasanna, iti daytoy nasagraduan nga aldaw idi lagipen dagiti Kristiano iti amin a lugar ti Panagungar ni Jesucristo, nagpakita mismo ti nagungar a Mangisalakan iti templona, a mangipakpakdaar iti, “Siak ti nagbiag, Siak ti napapatay” (Doktrina ken Katulagan 110:4).

Ania ti kaipapananna no sawen a ni Jesucristo ti “isu ti nagbiag”? Saan laeng a ti kayatna a sawen a nagungar Isuna manipud iti tanem iti maikatlo nga aldaw ket nagparang kadagiti disipulona iti Galilea. Kayatna a sawen a sibibiag Isuna iti agdama. Agsao babaen dagiti propetana iti agdama. Idauluanna ti Simbaanna iti agdama. Agasanna dagiti nasugatan a kararua ken malmalday a puspuso iti agdama. Isu a mabalintayo nga uliten nga isao dagiti balikas ti nabileg a pammaneknek ni Joseph Smith: “Kalpasan ti adu a pammaneknek a naipaay kenkuana, daytoy ti pammaneknek, … nga ipaaymi kenkuana: A sibibiag Isuna!” (Doktrina ken Katulagan 76:22). Mangngegantayo ti timekna kadagitoy a paltiing. Masaksiantayo dagiti Imana iti biagtayo. Ket marikna ti tunggal maysa kadatayo “ti rag-o nga ited daytoy a binatog: ‘Ammok a sibibiag ti Mannubbotko!’” (Hymns, no. 136).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 29:5; 38:7; 62:1; 76:11–14, 20–24; 110:1–10

Sibibiag ni Jesucristo.

Nakita ni Propeta Joseph Smith iti namin-adu ti nagungar a Mangisalakan, ket dua kadagitoy a padas ti naisurat iti Doktrina ken Katulagan. Bayat ti panangbasam kadagiti benneg 76:11–14, 20–24; 110:1–10, ania ti makaawis iti riknam maipapan iti pammaneknek ni Joseph Smith? Apay a napateg ti pammaneknekna kenka?

Iti intero a Doktrina ken Katulagan, imburay ti Mangisalakan ti panangsaksina iti bukodna a mision ken kinadiosan. Ania ti masursurom maipapan iti sibibiag a Cristo manipud kadagiti balikasna iti Doktrina ken Katulagan 29:5; 38:7; 62:1? Mabalin nga ibilangmo nga isurat dagiti deklarasion a kas dagitoy a masarakam bayat ti panagadalmo iti Doktrina ken Katulagan

Kitaen met iti Joseph Smith—Pakasaritaan 1:17.

Doktrina ken Katulagan 29:26–27; 42:45–46; 63:49; 88:14–17, 27–31; 93:33–34

Gapu ken ni Jesucristo, agungarakto.

Ammo ni Joseph Smith ti rikna ti agladingit iti ipapatay dagiti ipatpateg. Dua kadagiti kakabsatna, da Alvin ken Don Carlos, ti pimmusay idi agtutuboda. Intabon da Joseph ken Emma ti innem nga annak, tunggal maysa ket ub-ubing iti dua a tawen. Ngem manipud kadagiti paltiing a naawatna, naaddaan ni Joseph iti maysa nga agnanayon a panirigan iti ipapatay ken ti agnanayon a plano ti Dios. Ibilangmo dagiti kinapudno a naipalgak iti Doktrina ken Katulagan 29:26–27; 42:45–46; 63:49; 88:14–17, 27–31; 93:33–34. Kasano nga apektuan dagitoy a paltiing ti wagasmo a panangkitam iti ipapatay? Kasano nga apektuan daytoy ti wagas ti biagmo?

Kitaen met iti 1 Taga Corinto 15; M. Russell Ballard, “The Vision of the Redemption of the Dead,” Ensign wenno Liahona, Nob. 2018, 71–74; Teachings of Presidents of the Church: Joseph Smith (2007), 174–76.

Doktrina ken Katulagan 18:10–13; 19:16–19; 45:3–5; 76:69–70

Naaramid ni Jesucristo ti “naan-anay a pannubbot.”

Maysa a wagas tapno makapagipokus iti Mangisalakan iti oras ti Paskua ti Panagungar isu ti panagadal kadagiti paltiing iti Doktrina ken Katulagan a mangisuro maipapan iti pangsubbot a sakripisiona. Masarakan ti sumagmamano kadagitoy iti Doktrina ken Katulagan 18:10–13; 19:16–19; 45:3–5; 76:69–70. Nalabit a mabalinmo ti agilista kadagiti kinapudno maipapan iti Pannubbot ti Mangisalakan a makitam kadagitoy a bersikulo. Tapno mapadur-asmo ti panagadalmo, mabalinmo a nayonan iti listaam babaen ti panagsukisok kadagiti pagibasaran iti nasantuan a kasuratan iti “Mangsubbot, Pannubbot” (Pangiwanwan iti Nasantuan a Kasuratan, scriptures.ChurchofJesusChrist.org).

Dagitoy ti sumagmamano a saludsod a mabalin a mangiwanwan iti panagadalmo:

• Apay a pinili ni Jesucristo ti agsagaba?

• Ania ti rumbeng nga aramidek tapno maawatko dagiti bendision ti sakripisiona?

• Kasano a maibagak no maap-apektuan ti bileg ti Pannubbotna ti biagko?

Ti Kararag ti Apo, ni Yongsung Kim

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Sapasap a komperensia.Agsipud ta maiggiddan ti sapasap a komperensia iti Domingo ti Paskua ti Panagungar ita a tawen, nalabit nga ibilangmo no kasano a dagiti mensahe iti komperensia (pakairamanan ti musika) ket makapatibker iti pammaneknek ti pamiliam ken ni Jesucristo. Kas pagarigan, mabalin nga idrowing dagiti ubbing ti maysa a ladawan ti Mangisalakan wenno mangtengngel iti maysa a ladawanna, no mangngeganda ti maysa a mensahe wenno kanta maipapan ken ni Jesucristo. Makaaramid dagiti dadduma pay a miembro ti pamilia iti listaan dagiti kinapudno a mangngeganda maipapan iti Mangisalakan. Kapasanna,mabalin nga ibinglay dagiti miembro ti pamilia dagiti drowingda wenno listaan ken dagiti bukodda a pammaneknek maipapan ken ni Jesucristo.

Doktrina ken Katulagan 88:14–17; 138:17, 50.Mabalin a magustuan ti pamiliam ti mangpanunot iti maysa a pangngarig wenno adalen a banag tapno mangilawlawag no ania ti kaipapanan ti matay ken mapagungar—maysa a mangiladawan iti bagi ken espiritu nga agsina ken kalpasanna agtipon manen, a kas iti maysa nga ima ken guantes Kasano a paunegen dagitoy a bersikulo ti panagyamantayo iti inaramid ti Mangisalakan para kadatayo?

“Ti Sibibiag a Cristo: Ti Pammaneknek dagiti Apostol.”Tapno paregtaen ti panaglilinnawag maipapan kadagiti pammaneknek dagiti kabaruanan a propeta maipapan iti Mangisalakan, mabalinmo a dutokan ti tunggal miembro ti pamilia a mangbasa iti maysa a paset ti “Ti Sibibiag a Cristo: Ti Pammaneknek dagiti Apostol” (Ensign wenno Liahona, Mayo 2017, iti uneg ti akinsango nga akkub) ket ibinglayda no ania ti nasursuroda maipapan ken Jesucristo. Mabalinmo pay nga ipabuya ti video “Apostle Testimony Montage” (ChurchofJesusChrist.org). Ania dagiti kinapudno a makitatayo a makaparegta kadatayo?

“Ammok a Sibibiag ti Mannubbotko.”Tapno matulongan ti pamiliam a mangibilang iti adu a wagas a pangbendisionan ti nagungar a Mangisalakan kadatayo iti agdama, mabalinyo nga aggigiddan a kantaen ti “I Know That My Redeemer Lives” (Hymns, no. 136) ket isilpom dagiti kinapudno a naisuro iti daytoy a kanta iti naisuro kadagiti sumaganad a nasantuan a kasuratan: Doktrina ken Katulagan 6:34; 45:3–5; 84:77; 98:18; 138:23. Mabalin a magustuan pay ti pamiliam ti mangisurat kadagiti nayon a bersikulo para iti himno a mangipeksa no kasano a maammuanda a sibibiag ti Mannubbotda.

Para iti maysa nga video ti Paskua ti Panagungar ken dadduma pay a resources, kitaen iti Easter.ComeUntoChrist.org.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Jesus Has Risen,” Children’s Songbook, 70.

Panangpadur-as iti Panangisurotayo

Agbiruk kadagiti leksion kadagiti bambanag iti innaldaw. Ibilang no kasano a dagiti inaldaw a padas dagiti miembro ti pamiliam ket mabalin a mangiturong iti napnuan kaipapanan a panagsasarita maipapan iti maysa a kinapudno ti ebanghelio (kitaen iti Panangisuro iti Wagas ti Mangisalakan, 4). Kas pagarigan, ti panagbagyo iti tudo ket mabalin a maysa a gundaway a pagsasaritaan maipapan no kasano nga ibukbok ti Dios dagiti bendision kadagiti annakna.

Agparang ni Jesucristo kada Propeta Joseph Smith ken Oliver Cowdery, ni Walter Rane