“Abril 19–25. Doktrina ken Katulagan 41–44: ‘Ti Lintegko a Mangituray ti Simbaanko,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Abril 19–25. Doktrina ken Katulagan 41–44,” Umaykayo, Sumurot Kaniak—Para kadagiti Indibidual ken Pamilia: 2021
Abril 19–25
Doktrina ken Katulagan 41–44
“Ti Lintegko a Mangituray ti Simbaanko”
“No agdawatkayo,” inkari ti Apo, “umawatkayo iti paltiing iti kada paltiing, pagsiriban iti kada pagsiriban” (Doktrina ken Katulagan 42:61. Ania dagiti saludsod ti mabalinmo a damagen tapno maawatmo ti paltiing a kasapulam?
Isuratmo dagiti Impresionmo
Ti napardas a panagdur-as ti Simbaan idi 1830 ken 1831—aglalo ti dadakkel a grupo dagiti kabarbaro a napasurot wenno convert nga aggapu iti Kirtland, Ohio—ket makaay-ayo ken makaparegta kadagiti Santo. Ngem adu dagiti sumagmamano a karit a nakita. Kasano a mapagkaykaysa ti maysa a napardas a panagdakkel a bagi dagiti mamatpati, nangnangruna no itugtugotda ti doktrina ken dagiti aramid a nakairuamanda manipud kadagiti sigud a relihionda? Kas pagarigan, idi dimteng ni Joseph Smith iti Kirtland iti nasapa a Pebrero ti 1831, nakitana dagiti kabarbaro a miembro nga agbibinninglayda iti maymaysa a sanikua iti napudno a gandat a mangtulad kadagidi Kristiano iti Baro a Tulag (kitaen iti Dagiti Aramid 4:32–37). Nagaramid ti Apo iti sumagmamano a panagatur ken pannakailawlawag iti daytoy ken dagiti dadduma pay a topiko, kangrunaan ti amin maysa a paltiing a naisurat iti Doktrina ken Katulagan 42, nga Inawaganna iti “paglintegak a mangiwanwan iti simbaanko” (bersikulo 59). Iti daytoy a paltiing, masursurotayo dagiti kinapudno a napateg iti panangipasdek iti Simbaan ti Apo iti ud-udina nga aldaw, pakairamanan ti maysa a napateg a kari a mangipalawag a kanayon ti adu pay ti masursuro: “No agdawatkayo, umawatkayo iti paltiing kada paltiing, pagsiriban kada pagsiriban” (Doktrina ken Katulagan 42:61).
Kitaen met iti Saints, 1:114–19.
Dagiti Kapanunotan para iti Bukod a Panagadal iti Nasantuan a Kasuratan
“Isu a mangawat iti paglintegak ken mangaramid, isu ti disipulok.”
Idi nasapa ti 1831, nangrugrugin nga agguummong dagiti Santo iti Ohio, nga aggagar nga umawat iti linteg nga inkari ti Dios nga ipalgak sadiay (kitaen iti Doktrina ken Katulagan 38:32). Ngem immuna, nga insuro ti Apo no kasano dagiti disipulona a rumbeng nga agsagana nga umawat iti lintegna. Ania dagiti pagbatayan a masarakam kadagiti bersikulo 1–5 a nakatulong koma kadagiti Santo nga umawat iti paglintegan ti Dios? Kasano a makatulong kenka dagitoy a bersikulo nga umawat iti pangiturong manipud Kenkuana?
Iturayan dagiti linteg ti Dios ti Simbaanna ket maiturayanna met dagiti biagtayo.
Imbilang dagiti Santo ti paltiing a masarakan iti Doktrina ken Katulagan 42:1–72 a maysa kadagiti kakapatgan a naawat ti Propeta. Maysa daytoy kadagiti immuna a naipablaak, nailanad iti dua a pagiwarnak iti Ohio, ket naam-ammo laeng a kas “ti linteg.” Adu dagiti pagbatayan ditoy a benneg ti immun-una nga impalgaken ti Apo. Idinto a di nairaman ditoy a benneg ti tunggal bilin a kayat ti Apo a tungpalen dagiti Santona, napateg nga ut-utoben no apay dagitoy a pagbatayan ket kasapulan unay tapno uliten iti kabarbaro a naisubli a Simbaan.
Nalabit a makatulong kenka ti panangbasa ti benneg 42 iti babbabassit a paset a kas iti sumaganad ket ilasinmo dagiti pagbatayan a naisuro iti tunggal maysa. Iti panangaramidmo, ibilangmo no kasano a mangiwanwan iti Simbaan daytoy a linteg ken makatulong pay a mangiwanwan ti bukodmo a biag.
Dagiti bersikulo 4–9, 11–17, 56–58
Kitaen met iti 3 Nephi 15:9.
Doktrina ken Katulagan 42:30–42
Kasano nga “idaton dagiti [Santo] dagiti sanikua[da]” a pangtulong kadagiti nakurapay?
Maysa a napateg a paset ti paglintegan a naipalgak iti benneg 42 ti naam-ammo a paglintegan ti panagidaton [consecration] ken panangaywan [stewardship]. Insuro daytoy a paglintegan dagiti Santo no kasano a kabaelanda, a kas kadagiti pasurot ni Cristo idi un-unana, nga “agpapadada iti amin a banag” (Dagiti Aramid 2:44; 4 Nephi 1:3), nga “awan napanglaw kadakuada” (Moises 7:18). Indaton dagiti Santo dagiti sanikuada babaen ti panangtedda iti daytoy iti Apo, babaen iti obispo (kitaen iti Doktrina ken Katulagan 42:30–31). Isubli ti obispo kadakuada no ania ti kasapulanda (kitaen iti bersikulo 32)—gagangay no ania ti indatonda ken ad-adu pay. Idonar dagiti miembro dagiti sobrada a mangtulong kadagiti nakurapay (kitaen kadagiti bersikulo 33—34). Daytoy a paglintegan ti maysa kadagiti naindaklan a bendision kadagiti Santo, nangnangruna kadagidi nagibati iti amin a kukuada tapno makapanda iti Ohio. Adu kadagiti Santo ti nabuslon iti donasionda.
Nupay maigiddiat ti panangaramidtayo ita, ibibiag pay laeng dagiti Santo iti Ud-udina nga aldaw ti paglintegan ti panagidaton. Bayat ti panangbasam iti Doktrina ken Katulagan 42:30-42, utobem no kasano nga idatonmo no ania ti inted ti Dios kenka a pangbangon iti pagarianna ken mangbendision kadagiti agkasapulan.
Kitaen met iti Linda K. Burton, “I Was a Stranger,” Ensign wenno Liahona, Mayo 2016, 13–15; “The Law,” Revelations in Context, 93–95, history.ChurchofJesusChrist.org
Ni Cristo ken ti Nabaknang nga Agtutubo nga Agturay, ni Heinrich Hofmann
Doktrina ken Katulagan 42:61, 65–68; 43:1–16
Mangted ti Dios iti paltiing a mangiwanwan iti Simbaanna.
Ipapanmo a makisarsaritaka iti maysa a kabarbaro a miembro ti Simbaan a magagaran a mangammo a ti Simbaan ket maiwanwanwan babaen iti paltiing. Kasano a maaramatmo ti Doktrina ken Katulagan 43:1–16 a mangilawlawag kenkuana a ti pagtuladan ti Apo iti panangiwanwan iti Simbaanna ket babaen iti propetana? Kasano a maaramatmo ti Doktrina ken Katulagan 42:61, 65–68 a mangisuro maipapan iti panangawat iti bukod a paltiing?
Kitaen met iti “All Things Must Be Done in Order,” Revelations in Context, 50–53, history.ChurchofJesusChrist.org
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Doktrina ken Katulagan 41:1–5.Ania dagiti sumagmamano a pagarigan dagiti paglintegan a sibil, ken kasano a para iti pagsayaatantayo dagitoy a linteg? Kasano a bendisionandatayo dagiti paglintegan wenno bilin ti Nailangitan nga Ama? Mabalin nga agdrowing dagiti miembro ti pamilia iti ladladawan ti bagbagida nga agtungtungpal kadagiti paglintegan ti Dios.
-
Doktrina ken Katulagan 42:45, 88.Ania ti makatulong iti pamiliam nga “agbiag a sangsangkamaysa iti ayat”? (kitaen met iti Mosiah 4:14–15). Ibilang ti panangisurat wenno panangisarita kadagiti nasayaat a bambanag maipapan iti maysa ken maysa wenno agkanta iti maysa a himno maipapan iti ayat iti uneg ti pamilia, kas iti “Love at Home” (Hymns, no. 294).
-
Doktrina ken Katulagan 42:61.Mabalinmo a basaen daytoy a bersikulo kabayatan ti panangurnosmo iti maysa a puzzle. Aramatem ti puzzle a mangisuro no kasano nga ipalgak ti Dios dagiti kinadatdatlagna—“paltiing iti kada paltiing, pagsiriban iti kada pagsiriban.” Mabalin nga ibinglay dagiti miembro ti pamilia no kasano nga in-inut nga impalgak ti Dios ti kinapudno kadakuada.
-
Doktrina ken Katulagan 43:25.Nalabit nga adda maysa a banag a mabalin nga aramaten ti pamiliam a mangparnuay kadagiti uni ti maysa a gurru-od kas maysa a wagas a pangyam-ammo iti panaglilinnawag maipapan iti bersikulo 25. Kasano a ti timek ti Apo ket maysa a “dulluog dagiti gurru-od”? Sukisoken a sangkamaysa ti bersikulo para kadagiti wagas a mabalin a pangawagan ti Apo kadatayo tapno agbabawi. Kasano a makapagbalintayo nga ad-adda a makasungbat iti timek ti Dios?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “I Want to Live the Gospel,” Childrens Songbook, 148; kitaen iti “Dagiti Kapanunotan tapno Mapadur-as ti Sangapamiliaan a Panagadalyo iti Nasantuan a Kasuratan”
Panangpadur-as iti Panangisurotayo
Mangpatanor iti maysa a naayat nga aglawlaw. Ti wagas a pakariknaan ken pakatratuan ti tunggal maysa kadagiti miembro ti pamilia ket makaimpluensia unay iti espiritu iti pagtaenganyo. Tulungam amin dagiti miembro ti pamilia nga aramidenda ti pagrebbenganda a mangipasdek iti naayat, madaydayaw a pagtaengan tapno mariknanto ti tunggal maysa a natalged a mangibinglay kadagiti padas, saludsod, ken pammaneknek. (Kitaen iti Panangisuro iti Wagas ti Mangisalakan, 15.)
Ni Joseph Smith a Mangaskasaba iti Nauvoo, ni Sam Lawlor