“Abril 5–Abril 11. Doktrina ken Katulagan 30–36: ‘Naawaganka a Mangikasaba iti Ebangheliok,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Abril 5–Abril 11. Doktrina ken Katulagan 30-36,” Umaykayo, Sumurot Kaniak—Para kadagiti Indibidual ken Pamilia: 2021
Abril 5–Abril 11
Doktrina ken Katulagan 30–36
“Naawaganka a Mangikasaba iti Ebangheliok”
Kadagiti nasantuan a kasuratan, masarakantayo dagiti nalawag a pannakaammo ken pannakaawat para kadagiti naidumduma a kasasaadtayo. Dawatem iti Apo a tulongannaka a mangsapul iti maysa a mensahe a nairanta para kenka iti Doktrina ken Katulagan 30–36.
Isuratmo Dagiti Impresionmo
Miembron ti Simbaan iti agarup maysan a bulan ni Parley P. Pratt idi naawagan a “mapan iti langalang” tapno ikasaba ti ebanghelio (Doktrina ken Katulagan 32:2). Miembron ni Thomas B. Marsh iti basbassit a tiempo ngem dayta idi naibaga kenkuana, “Dimtengen ti oras ti misionmo” (Doktrina ken Katulagan 31:3). Nabiit pay a nabuniagan da Orson Pratt, Edward Partidge, ken adu a dadduma pay idi simmangpet dagiti awagda nga agmision . Nalabit nga amin dagitoy a pannakaitiempo ket kasapulan—iti panawen ti panagtitinnag ti 1830, awan ti asinoman uray maysa a nagmiembro iti Simbaan iti nalablabes ngem innem a bulan. Ngem adda pay maysa a leksion iti daytoy a pagtuladan para kadatayo ita: no umdas ti pannakaammom nga umawat iti naisubli nga ebanghelio babaen ti panagbuniag, umdasen ti ammom a mangibinglay iti daytoy kadagiti dadduma. Siempre kayattayo a kanayon a padur-asen ti pannakaammotayo iti ebanghelio, ngem saan a nagkedked ti Dios a mangawag kadagiti “saan a nakaadal” a mangikasaba iti ebangheliona (Doktrina ken Katulagan 35:13). Kinaagpaysona, Inawisnatayo amin, “Ungapem ti ngiwatmo a mangipakdaar iti ebangheliok”Doktrina ken Katulagan 30:5. Ket aramidentayo dayta a kasayaatan saan a babaen ti bukodtayo a sirib ken padas ngem “babaen ti bileg [ti] Espiritu” (Doktrina ken Katulagan 35:13).
Kiten met iti “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69.
Dagiti Kapanunotan para iti Bukod a Panagadal iti Nasantuan a Kasuratan
Naawaganak a mangikasaba ti ebanghelio ni Jesucristo.
Adda man wenno awan pormal nga awagmo kas maysa a misionario, kayat ti Apo nga ibinglaymo ti ebangheliona, ket adu kadagiti balikasna kadagiti immuna a missionario iti daytoy a dispensasion ti para kenka pay. Bayat ti panagadalmo iti Doktrina ken Katulagan 30–36, isuratmo no ania ti masursurom maipapan iti awag a mangikasaba ti ebanghelio. Mabalinmo ti agaramid iti listaan dagiti banag nga idawat ti Apo kadagiti misionario (kas pagarigan, kitaen iti Doktrina ken Katulagan 30:8) ken sabali pay a listaan dagiti banag nga inkari ti Apo kadakuada (kas pagarigan, kitaen iti Doktrina ken Katulagan 30:11).
Kasano a makaallukoy dagitoy a bersikulo iti maysa a tao nga agserserbi wenno agsagsagana nga agserbi iti maysa a panangasaba wenno mision iti serbisio ti Simbaan? Ania ti masarakam a mangparegta kenka a mangibinglay iti ebanghelio?
Kitaen met iti Doktrina ken Katulagan 35:13–15; Russell M. Nelson and Wendy W. Nelson, “Hope of Israel” (sangalubongan a debosional para kadagiti agtutubo, Hunio 3, 2018), HopeofIsrael.ChurchofJesusChrist.org; Silvia H. Allred, “Go Ye Therefore,” Ensign wenno Liahona, Nob. 2008, 10–12.
Misionariotayo amin para iti Simbaan ni Jesucristo.
Doktrina ken Katulagan 3:1–2, 5–6, 9, 13
Matulongannak ti Apo kadagiti relasionko iti pamiliak.
Nagkarigatan dagiti pamilia idi 1830 iti adu nga isu met la nga isyu a sangsanguen dagiti pamilia ita. Ania ti pannarabay ken karkari nga inted ti Apo ken ni Thomas B. Marsh maipapan iti pamiliana? Kasano a matulongannaka dagiti Balikasna kadagiti relasionmo iti pamiliam?
Para iti ad-adu pay nga impormasion maipapan ken ni Thomas B. Marsh, kitaen iti Saints, 1:79–80, 119–20.
Maysa kadi a pannakapaay ti mision kadagiti Lamanite?
Idi ginandat da Oliver Cowdery, Peter Whitmer Jr., Parley Pratt, ken Ziba Peterson ti mangikasaba kadagiti American Indian iti laud ti Missouri, namatida nga ipatpatungpalda dagiti padto iti Libro ni Mormon maipapan iti panangawat dagiti Lamanite iti ebanghelio iti ud-udina nga aldaw (kitaen kas pagarigan, iti 1 Nephi 13:34–41; Enos 1:11–18). Ket iti kasta iti gibus ti misionda, nupay naaddaanda kadagiti nasayaat a pannakaipasango iti sumagmamano a grupo, saanda a nakabuniag iti uray maysa nga American Indian. Ngem nakabuniagda iti nalablabes ngem sangagasut a tattao iti asideg ti Kirtland, Ohio, a nagsardenganda iti dalan a mapan iti Missouri. Pakairamanan dagitoy a napasurot ket dagiti adda impluensiana a dadaulo ti Simbaan iti masakbayan, a pakairamanan ni Sidney Rigdon, ket idi saan a nabayag nagbalin ti Kirtland a napateg a lugar a pagguummongan para iti Simbaan. Ania iti isuro kenka daytoy a padas maipapan iti no kasano nga ipatungpal ti Apo ti aramidna?
Kitaen met iti “A Mission to the Lamanites,” Revelations in Context, 45–49.
Doktrina ken Katulagan 33:12–18
No bangonek ti biagko iti ebanghelio ti Mangisalakan, saanakto a matnag.
Maiturong ti Doktrina ken Katulagan 33 kada Northrop Sweet ken Ezra Thayer, dua a kabumbuniag. Pimmanaw ni Northrop iti Simbaan iti nabiit kalpasan a naited daytoy a paltiing. Nagserbi ni Ezra a sipupudno iti adu a panawen, ngem kimmayakay met iti kamaudiananna. Mabalin a nasayaat a gundaway daytoy a panangamiris no kasano ti kinatibker ti pannakabangonmo “[iti] bato” (bersikulo 13) ti ebanghelio. Ania ti masarakam kadagitoy a bersikulo a makatulong kenka nga agtalinaed a napudno iti Mangisalakan?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Doktrina ken Katulagan 30:2Kasano ti ar-aramidentayo kas pamilia iti panangipokus kadagiti bambanag iti Dios ngem “dagiti bambanag iti lubong”?
-
Doktrina ken Katulagan 31.Bayat ti panangbasam kadagiti kari ti Apo ken ni Thomas B. Marsh maipapan iti pamiliana, mabalinmo nga isarita maipapan dagiti bendision a simmangbay iti pamiliam gapu iti aramid ti misionario. Mabalinyo pay ti agkanta iti adda pakainaiganna a himno, kas iti: “I’ll Go Where You Want Me to Go,” (Hymns, no. 270). Kasano a nabendisionan ti pamiliam babaen ti panangibinglaymo ti ebanghelio kadagiti dadduma?
-
Doktrina ken Katulagan 33:7–10.Ania ti imahen nga inaramat ti Apo kadagitoy a bersikulo a mangiladawan iti panangibinglay iti ebanghelio? Ania pay dagiti dadduma nga imahen wenno metapora a mapanunot ti pamiliam? Nalabit dagitoy nga imahen ket makatulong iti pamiliam kadagiti makapartuat a wagas a pangibinglayan iti ebanghelio. Daytoy a panaglilinnawag ket mabalin a mangiturong iti maysa a plano a mangibinglay iti ebanghelio. Ibilang ti panagyakem iti sumagmamano a mabalin a situasion.
-
Doktrina ken Katulagan 34:10.Pumili iti maysa a ragup ti balikas [phrase] manipud iti bersikulo 10, ket awisem ti maysa a miembro ti pamilia a yarasaasna daytoy. Mabalin a padasen dagiti dadduma pay a miembro ti pamilia ti mangpugto iti ragup ti balikas. Kalpasanna, idawat iti maysa a miembro ti pamilia a mangisao iti napigsa a timek ti ragup dagiti balikas. Kasano a matulongannatayo daytoy nga aktibidad a makaawat no apay a bilinennatayo ti Apo nga “ipigsa ti timekmo”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “I Hope They Call Me on a Mission,” Children’s Songbook, 169.
Dagiti Boses ti Pannakaisubli
Dagiti Nagkauna a Napasurot [Convert]
Uray idi sakbay a nabuangay ti Simbaan, impakdaar ti Apo, “Purawen ti kataltalonan a pagapitan” (Doktrina ken Katulagan 4:4). Napaneknekan a pudno daytoy a palawag kadagiti simmaruno a bulan, gapu iti adu nga agsapsapul iti kinapudno, nga inturong ti Espiritu ti Dios a mangsapul iti naisubli a Simbaan ni Jesucristo.
Adu kadagidi immun-una a napasurot [convert] ti nagbalin a ramit iti pannakaiplastar ti pamuon ti Pannakaisubli, ket dagiti estoriada ti pannakapasurot ket napategda kadatayo ita. Ti impakitada a pammati ket isu met la ti pammati a kasapulantayo nga agbalin a mapasurot iti ebanghelio ni Jesucristo.
Abigail Calkins Leonard
Idi adda iti katengngaan ti edadna a tallopulo ni Abigail Calkins Leonard, nariknana ti tarigagay a mapakawan kadagiti basolna. Sagpaminsan nga agbasa iti Biblia, ket sinarungkaran dagiti tattao manipud kadagiti simbaan a Kristiano ti pagtaenganna, ngem natikaw maipapan iti paggigiddiatan ti maysa a simbaan iti sabali. “ Maysa a bigat,” kinunana, “innalak ti Bibliak ket napanak iti kakaywan, idi nagparintumengak.” Nagkararag a sipapasnek iti Apo. “Madagdagus nga adda maysa a parmata a nakita dagiti matak,” kinunana, “ket nagsasaruno a nakitak a saggaysa dagiti nadumaduma a sekta, ket maysa a timek ti nangawag kaniak, a kunkunana: ‘Naipasdek dagitoy para iti pakairanudan.’ Kalpasanna, iti labes dagitoy, makitak ti dakkel a lawag, ken maysa a timek manipud iti ngato ti mangipukpukkaw: ‘Mangitag-ayakto iti tattao, a pakaragsakakto a tagikuaen ken bendisionan.’” Kalpasan ti nabiit a kanito, nangngeg ni Abigail ti maipapan iti Libro ni Mormon. Nupay awan pay iti kopiana, kinalikagumanna nga “ammuen ti kinapudno daytoy a libro, babaen ti sagut ken bileg ti Espiritu Santo,” ket “nariknana a dagus ti kaaddana.” Idi iti kamaudiananna a kabaelannan a basaen ti Libro ni Mormon, isu ket “nakasaganan nga umawat iti daytoy.” Isu ken ti asawana, ni Lyman, ket nabuniagan idi 1831.
Thomas B. Marsh
Idi baro pay ni Thomas B, Marsh, inadalna ti Biblia ket kimmappeng iti maysa a simbaan a Kristiano. Ngem saan a napnek isuna, agingga nga iti kamaudiananna simmina manipud iti amin a simbaan. Addaannak iti sangkabassit nga espiritu ti paltiing,” kinunana, “ket imbagana iti [maysa a pangulo ti relihion] a mangnamnamaak a maysa a kabarbaro a simbaan ti maipasdek, nga addaaan ti kinapudno iti kinadalusna.” Iti saan a nabayag kalpasan daytoy, naaddaan ni Thomas iti naespirituan a parikna a pumanaw iti pagtaenganna iti Boston, Massachusetts, ket agbaniaga iti laud. Kalpasan ti panangbubosna iti tallo a bulan iti akinlaud a Nueva York a dina nasarakan ti ania man a birbirokenna, inrugina ti nagawid. Iti dalan, maysa a babai ti nagsaludsod ken niThomas no nadamagnan ti maipapan iti “ti Balitok a Libro a nasarakan ti maysa nga agtutubo nga agnagan iti Joseph Smith.” Naallukoy iti daytoy a kapanunotan, sigud a nagbiahe ni Thomas iti Palmyra ket nagkitada ken ni Martin Harris iti pagimprentaan, apagisu a naiimprentan ti umuna a 16 a panid ti Libro ni Mormon. Napalubosan ni Thomas a nangala ti kopia kadagitoy 16 a panid, ket inyawidna iti balayda iti asawana, ni Elizabeth. “Naragsakan unay isuna” iti libro, nalagipna, “a namati nga aramid ti Dios daytoy.” Idi agangay immakar da Thomas ken Elizabeth iti Nueva York a kaduada dagiti annakda ken nabuniaganda.2 (Para iti ad-adu pay a pakadamagan maipapan ken ni Thomas B. Marsh, kitaen ti Doktrina ken Katulagan 31.)
Parley ken Thankful Pratt
Kas ken Thomas Marsh, nagresponde da Parley ken Thankful Pratt kadagiti naespirituan a pannakadagdag a pumanaw iti narang-ay a talonda iti Ohio nga addaan iti gandat a mangikasaba iti ebanghelio kas iti pannakaawatda iti daytoy manipud iti Biblia. Kas iti imbaga ni Parley iti kabsatna, “Ti espiritu dagitoy a bambanag ket sibibileg unay a nangaring iti panunotko ta diak makapaginana,”3 Idi nadanonda ti akindaya a Nueva York, adda parikna ken ni Parley nga agbati biit dita a lugar. inkeddengda, nga agtultuloy ni Thankful nga awan isuna. Adda trabaho nga aramidek iti paset daytoy a pagilian,” imbaga ni Parley kenkuana, “ket ania daytoy, wenno kasano ti kabayagnanto a maaramidko daytoy, diak ammo; ngem umayakto no malpas daytoy.”4 Sadiay nga immuna a nangngeg ni Parley maipapan iti Libro ni Mormon. “Nariknak ti karkarna a pannakaay-ayok iti libro,” kinunana.5 Dimmawat iti maysa a kopia ket nagbasa a nagpatnag. Iti agsapa, naammuanna a pudno ti libro, ket ipatpategna daytoy nga “ad-adda pay ngem iti amin a kinabaknang ti lubong.”6 Iti uneg ti sumagmamano nga aldaw nabuniagan ni Parley. Kalpasanna, nagsubli isuna ken ni Thankful , a nabuniagan met. (Para iti ad-adu pay nga impormasion maipapan ken ni Parley P. Pratt, kitaen ti Doktrina ken Katulagan 32.)
Naipinta a ladawan ni Parley P. Pratt ni Jeffrey Hein
Sidney ken Phebe Rigdon
Iti dalanna manipud iti Nueva York a mapan iti misionna iti Missouri, dimmagas ni Parley Pratt ken dagiti padana a trabahador iti Mentor, Ohio, iti pagtaengan da Sidney ken Phebe Rigdon—nabayagen a gagayyem ni Parley a naam-ammona kadagidi aldawna sadiay Ohio. Maysa a ministro a Kristiano ni Sidney, ket maysa idi a miembro ti kongregasionna ni Parley ket imbilangna isuna a maysa a naespirituan a mannursuro. Sigagagar nga imbaga ni Parley kadagiti gagayyemna maipapan iti Libro ni Mormon ken ti Pannakaisubli ti ebanghelio ni Jesucristo. Agsuksukisok mismo ni Sidney iti pannakaisubli ti pudno a Simbaan a nasarakanna a nailadawan iti Baro a Tulag, nupay nagduadua idi damo maipapan iti Libro ni Mormon. “Ngem basaekto ti librom, ” imbagana iti gayyemna a ni Parley, “ket padasekto a takuaten, no maysa met la daytoy a paltiing manipud iti Dios wenno saan”7 Kalpasan ti dua a lawas a panagadal ken panagkararag, agpadada ken ni Phebe a naallukoy a pudno ti libro. Ngem ammo ni Sidney a ti pannakikameng iti Simbaan ket dakkel a sakripisio para iti pamiliana. Madlaw a mapukawnanto ti trabahona a kas maysa a ministro, kasta met iti kasasaadna iti kagimongan iti komunidad. Kabayatan ti panagsaritada ken ni Phebe maipapan iti daytoy a posibilidad, imbaga ni Phebe, “Ammokon no ania ti ibungana, ket … tarigagayak nga aramiden ti pagayatan ti Dios, agbiag wenno matayak man.”8
Inka iti Langalang, ni Robert T. Barrett