“Abril 12–18. Doktrina ken Katulagan 37–40: ‘No Saankayo nga Agkaykaysa Saankayo a Kukua,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Abril 12–18. Doktrina ken Katulagan 37–40,” Umaykayo, Sumurot Kaniak—Para kadagiti Indibidual ken Pamilia: 2021
Immakar dagiti Santo iti Kirtland, ni Sam Lawlor
Abril 12–18
Doktrina ken Katulagan 37–40
“No Saankayo nga Agkaykaysa Saankayo a Kukua”
Ti panangisurat kadagiti impresion bayat ti panagadalmo ket maysa a wagas ti panagtungpal iti balakad ti Dios nga “ipateg ti pagsiriban” (Doktrina ken Katulagan 38:30).
Isuratmo dagiti Impresionmo
Para kadagiti immuna a Santo, ti Simbaan ket ad-adda pay ngem maysa a lugar a pakangngegan iti sumagmamano a panagikasaba iti Domingo. Iti intero a paltiingna ken ni Joseph Smith, inladawan ti Apo ti Simbaan nga addaan kadagiti balikas a kas iti gapu, pagarian, Zion, ken, masansan, aramid. Mabalin a paset dayta ti no ania ti nangallukoy iti adu a nagkauna a miembro iti Simbaan. Ket uray no napalaus ti panangipategda iti naisubli a doktrina ti Simbaan, adu met ti nagtarigagay iti maysa a banag a mabalinda a pangidatonan iti biagda. Uray pay no kasta, ti bilin ti Apo idi 1830 nga agummong sadiay Ohio ket saan a nalaka a tungpalen para iti sumagmamano. Para iti tao a kas ken Phebe Carter, kaipapananna ti mangpanaw kadagiti nanam-ay a pagtaengan para iti di masinunuo a panungpalan (kitaen iti “Timek ti Pannakaisubli” iti udi daytoy a balabala). Ita nalawag a makitatayo no ania ti makita dagiti Santo iti mata laeng ti pammati: adda dagiti naindaklan a bendision ti Apo nga agur-uray kadakuada sadiay Ohio.
Ti panagkasapulan nga agummong iti Ohio ket nabayagen a napasamak, ngem dagiti Santo ita ket agkaykaysa pay laeng iti isu met laeng a gapu, isu met laeng nga aramid: a “mangyeg iti Zion” (Doktrina ken Katulagan 39:13). Kas kadagiti nagkauna a Santo, tallikudantayo “ti panagessem iti lubong” (Doktrina ken Katulagan 40:42) gapu ta agtalektayo iti panagkari ti Apo: “Maawatmonto … ti bendision a naindaklan a dimo pay pulos naam-ammuan” (Doktrina ken Katulagan 39:10).
Kitaen met iti Saints, 1:109–11.
Dagiti Kapanunotan para iti Bukod a Panagadal iti Nasantuan a Kasuratan
Ania ti ipatpatarus ni Joseph Smith idi 1830?
Iti daytoy a bersikulo, dakdakamaten ti Apo ti aramid ni Joseph Smith iti maysa a naparegta a rebision ti Biblia, a nadakamat a maysa a “patarus.” Idi naawat ni Joseph ti paltiing a naisurat iti benneg 37, nalpasnan ti maysa kadagiti sumagmamano a kapitulo ti libro ti Genesis ket kaad-adal na laeng ti maipapan ken Enoc ken ti siudadna a Zion (kitaen iti Genesis 5:18–24; Moises 7). Sumagmamano kadagiti pagbatayan nga insuro ti Apo ken ni Enoc ket kapada dagiti Impalgakna iti benneg 38.
Kitaen met iti Church History Topics, “Patarus ni Joseph Smith iti Biblia,” ChurchofJesusChrist.org/study/topics.
Nakipagtrabaho ni Joseph Smith ken ni Sidney Rigdon iti maysa a naparegta a rebision ti Biblia. Panangiladawan ni Annie Henrie Nader
Ummongennatayo ti Dios tapno bendisionannatayo.
Inggibus ti Apo ti bilinna nga aguummong iti Ohio babaen ti panangibagana iti, “Adtoy, nainsiriban daytoy” (Doktrina ken Katulagan 37:4). Ngem saan a nakita a dagus ti amin ti kinasirib ditoy. Iti benneg 38, impalgak ti Apo ti siribna nga ad-adda a detalyado. Ania ti masursurom manipud kadagiti bersikulo 11–33 maipapan kadagiti bendision ti panagguummong? Saanen a mabilin dagiti miembro ti Simbaan nga agguummong babaen ti yaakar iti maysa a lugar; iti ania a wagas nga agummongtayo ita? Kasano a mayaplikar kadatayo dagitoy a bendision? (kitaen iti Russell M.Nelson, “The Gathering of Scattered Israel,” Ensign wenno Liahona, Nob. 2006,79–81).
Bayat ti panangbasam iti nabati iti daytoy a benneg, sapulem dagiti binatog a mabalin a nakatulong koma kadagiti Santo a manggun-od iti pammati a kasapulanda nga agtulnog iti bilin ti Dios nga agummong iti Ohio. Kasta met a panunotem ti maipapan kadagiti bilin nga intedna kenka ken ti pammati a kasapulam a tungpalen dagitoy. Dagiti sumaganad a saludsod ket mabalin a mangiwanwan iti panagadalmo:
-
Ania ti makitam kadagiti bersikulo 1–4 a makaited kenka iti panagtalek iti Apo ken kadagiti bilinna?
-
Kasano a matulongannaka ti bersikulo 39 nga agtulnog kadagiti bilin ti Dios uray no agkasapulanda iti panagsakripisio?
Ania pay dagiti masarakam?
Doktrina ken Katulagan 38:11–13, 22–32, 41–42
No nakasaganaak, diak kasapulan ti agbuteng.
Naipasangon iti adu a pannuppiat dagiti Santo, ket ammo idin ti Apo nga adu pay iti dumteng (kitaen iti Doktrina ken Katulagan 38:11–13, 28–29) Tapno matulonganna ida a saan nga agbuteng, impalgakna ti maysa a napateg a pagbatayan: “No nakasaganakayo saankayo nga agbuteng” (Doktrina ken Katulagan 38:30). Mangalaka iti maysa a minuto a mangutob kadagiti karit a sanguem. Kalpasanna bayat ti panangadalmo iti benneg 38, dumngegka kadagiti parikna manipud iti Espiritu maipapan kadagiti wagas a pakapagsaganaam para kadagiti karit tapno dika nasken nga agbuteng.
Kitaen met iti Ronald A. Rasband, “Be Not Troubled,” Ensign wenno Liahona, Nob. 2018, 18–21.
Dagiti panagessem iti lubong ket di rumbeng a singaennak manipud iti panagtulnogko iti balikas ti Dios.
Basaem dagiti benneg 39–40, karaman ti pakasaritaan iti nagtaudan kadagiti paulo ti benneg, ket ibilangmo dagiti wagas a mabalin a pakayaplikaram ti padas ni James Covel. Kas pagarigan, panunotem dagiti panawen idi “napudno [iti Dios] … ti puso[m]” (Doktrina ken Katulagan 40:1). Kasano a nabendisionanka gapu iti kinapudnom? Kasta met a panunotem no ania dagiti “pagesseman iti lubong” a pakaipaspasanguam (Doktrina ken Katulagan 39:9; 40:2). Ania ti masarakam kadagitoy a benneg a mangparegta kenka nga agbalin a kanayon a natulnog?
Kitaen met iti Mateo 13:3–23.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Doktrina ken Katulagan 37:3.Tapno matulongan ti pamiliam a makaawat iti inaramid a sakripisio dagiti Santo a nagguummong iti Ohio, mabalinmo nga itudo iti mapa a naipakuyog iti daytoy a balabala.
-
Doktrina ken Katulagan 38:22.Kasano a maaramidtayo ni Jesucristo nga “agit-ited iti linteg” ti pamiliatayo? Kasano nga aramidennatayo a “nawaya a tattao” ti panangsurot kadagiti paglinteganna?
-
Doktrina ken Katulagan 38:24–27.Tapno maisuro kadagiti ubbing no ania ti kaipapanan ti “agmaymaysakayo”, mabalinmo a tulongam ida a mangbilang kadagiti miembro ti pamiliayo ket isaritam no apay a napateg iti pamiliayo ti tunggal tao. Yunay-unaymo nga agkakaduakayo a maysa a pamilia. Mabalinmo a tulongan dagiti annakmo nga agdrowing iti maysa a dakkel a 1 iti maysa a poster ket arkosam kadagiti nagan ken drowing wenno ladawan ti tunggal miembro ti pamilia. Mabalinmo pay a suratan ti poster kadagiti banag nga aramidemto tapno nakaykaysakayo a kas maysa a pamilia. Mabalinyo pay ti agbuya iti video “Love in Our Hearts” (ChurchofJesusChrist.org) wenno basaen ti Moises 7:18.
-
Doktrina ken Katulagan 38:29–30.Mabalinyo a pagsasaritaan dagiti padpadas ti pamilia wenno bukod a padpadas itay nabiit nga agkasapulan iti panagsagana. Kasano a ti panagsaganam ket inaringan ti padas? Ania ti kayat ti Apo nga isaganaantayo? Kasano a matulongannatayo a saan a managbutbuteng ti panagbalintayo a nakasagana? Ania ti maaramidko tapno makapagsagana?
-
Doktrina ken Katulagan 40.Ania ti kaipapananna kadatayo ti ragup dagiti balikas a “panagessem iti lubong” iti (bersikulo 2)? Adda kadi ania man a panagessem iti lubong a manglaplapped kadatayo manipud iti panangawat iti balikas ti Dios a “siraragsak”? Kasano a parmekentayonto dagitoy?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Jesus Said Love Everyone,” Children’s Songbook, 61.
Dagiti Timek ti Pannakaisubli
Panagguummong iti Ohio
Ti Purok ti Kirtland, ni Al Rounds
Maibilang ni Phebe Carter a maysa kadagiti adu a Santo a nagguummong iti Ohio idi 1830. Kimmappeng iti Simbaan iti amianan a daya ti Estados Unidos iti katengngaan ti tawenna a duapulo, nupay saan a kimmappeng dagiti nagannakna. Insuratna idi agangay ti pangngeddengna nga umakar a mapan iti Ohio tapno makitipon kadagiti Santo:
Nasdaaw dagiti gagayyemko iti desisionko, a kas iti inaramidko, ngem adda maysa a banag iti uneg a nagparikna kaniak. Ti panagladingit ti inak iti ipapanawko iti pagtaenganmi ket dumani diak naibturan; ket no di laeng ti espiritu nga adda kaniak napukawak koma ket saanak a nagtuloy. Imbaga kaniak ni nanangko a kaykayatnak a makita a naikali ngem ti mapan nga agmaymaysa iti awan pusona a lubong.
Sidadayaw, a kinunana, “‘[Phebe],’ agsublikanto kadi kaniak no makitam a palso ti Mormonismo?’
“Insungbatko, ‘wen, nanang; aramidekto.’ … Nangpalag-an ti sungbatko iti dandanagna; ngem nakaited kadakami iti napalalo a leddaang ti panagsinami. Idi dimteng ti oras ti ipapanawko saanak a nagtalek iti bagik nga agpakada; isu a nagsuratak kadagiti pammakadak iti tunggal maysa, ket imbatik dagitoy iti lamisaanko, nagtarayak a nagpababa ket tinappuakko ti karuahe. Ngarud, pinanawak ti ipatpategko a pagtaengan ti kinaubingko tapno makikaduaak kadagiti santo ti Dios.”1
Iti maysa kadagiti mensahe a pagpakadana, insurat ni Phebe:
“Ay-ayatek a Nagannak—Pumanawak pay laeng iti pagtaengan ti nagannakko iti apagapaman … Diak ammo no kasano ti kapautna—ngem saan nga awanan iti kinamanagyaman a rikna iti kinasayaat a naawatko manipud idi tagibi-ak agingga iti agdama—ngem ti Mannarabay isun ti mangurnos itan a kas idi. Ikumittayo koma amin dagitoy a bambanag kadagiti ima ti Mannarabay ket managyamantayo gapu ta naipalubos kadatayo ti nagbiag a sangkamaysa iti nabayag iti nasayaat a kasasaad nga adda kadatayo, a mamati nga amin a bambanag ket para iti pagsayaatantayo no ayatentayo ti Dios a nasayaat. Mautobtayo koma a makapagkararagtayo iti maysa a Dios a dumngeg kadagiti napudno a kararag dagiti amin a pinarsuana ket itedna ti no ania ti kasayaatan a para kadatayo. …
“Nanang, mamatiak a daytoy ti pagayatan ti Dios para kaniak a mapan iti laud ket naallukoyak a daytoy ket para iti maysa a naunday a panawen. Itan ta mabalinkon iti mapan… ; mamatiak a ti espiritu ti Apo ti namagbalin a daytoy ket umdas para kadagiti amin a banag. O dikayo koma madanagan iti anakyo; liwliwaennakto ti Apo. Mamatiak nga aywanannakto ti Apo ket itedna kaniak no ania ti para iti kasasayaatan. … Innak gapu iti awag ti Maestrok—inaramidnan a nalawag ti pagrebbengak.”2
