Abril 26–Mayo 2

Doktrina ken Katulagan 45

“Matungpalton dagiti Kari”

Insuro ni Presidente Russell M. Nelson: “Isuratyo dagiti pampanunotenyo. Isuratyo dagiti riknayo ket suroten babaen dagiti tignay a maiparikna kadakayo” (“Revelation for the Church, Revelation for Our Lives,” Ensign wenno Liahona, Mayo 2018, 95).

Isuratmo dagiti Impresionmo

Agbibiagtayo iti napeggad a panawen, ken mabalin a makariribuk dayta. Uray pay dagiti disipulo ni Jesus, idi mangngeganda Isuna nga agipadto kadagiti kalamidad a mapasamak iti panawentayo, “nariribukanda” (Doktrina ken Katulagan 45:34). Kasta met a mariribukan dagidi nagkauna a Santo iti Kirtland, Ohio, kadagidi napeggad a panawen a nagbiaganda. Kadagiti dadduma pay a banag, “adu dagiti sinsinan a palawag … ken minamaag nga estoria” a mangpakapsut iti mensahe ti ebanghelio (Doktrina ken Katulagan 45, paulo a benneg). Ngem ti sungbat ti Apo, idi ken ita, ket, “saankayo a mariribukan” (bersikulo 35). Wen, adda kinadangkes, ngem adda met pakakitaan nga idardaras ti Dios ti aramidna. Wen, adda peggad a naipadles a mapasamak sakbay ti Maikadua a Yaay, ket nasken nga ammotayo ida. Ngem di laeng ballaag dagitoy iti peggad; pagilasinan pay ti dumanin maipatungpal a karkari ti Dios. Nalabit daytoy ti gapu no apay a ti Doktrina ken Katulagan 45—maysa a paltiing a mangiladawan iti detalye iti adu kadagitoy a tanda—a naawat “iti rag-o dagiti Santo” (paulo ti benneg).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 45:1–5

Ni Jesucristo ti Mangibabaet kadatayo iti Ama.

Nariknam kadin ti saan nga umdas wenno di maikari iti Dios? Mabalinmo a sapulen ti pammaregta iti Doktrina Ken Katulagan 45:1–5. Ania ti isingasing kenka dagiti balikas a “mangibabaet” ken “dumawdawat”? Kasano nga ibabaet, wenno idawdawatannaka ti Mangisalakan? Ania ti kayatna a sawen kenka ti mangammo a ni Cristo ti Mangibabaetmo?

Makatulong kenka a mangutob kadagitoy a bersikulo dagiti sumaganad a balikas manipud ken ni Presidente Joseph Fielding Smith: “Ni Jesus [ti] mangibabaettayo, mangidawdawat kadatayo iti akemna kas mangibabaettayo babaen ti panagserbina ken agtrabaho tapno itunosnatayo, a mangyeg kadatayo iti pannakitulag iti Dios” (iti Conference Report, Okt. 1953, 58).

Kitaen met iti 2 Nephi 2:8–9; Mosiah 15:7–9; Moroni 7:27–28; Doktrina ken Katulagan 29:5; 62:1.

Doktrina ken Katulagan 45:9–10

Ti ebanghelio ket maysa a pagrukodan dagiti pagilian?

Idi un-unana, ti maysa a pagrukodan ket maysa a wagayway wenno bandera nga itugot iti dangadang. Ummongen ken pagkaykaysaenna dagiti soldado ken tulonganna ida a mangammo no sadino ti paguummongan ken no ania ti aramiden. Ti maysa a pagrukodan ket maysa pay a pagwadan wenno pagannurotan a mabalin a pakarukodan ti dadduma pay a bambanag. Bayat ti panangbasam iti Doktrina ken Katulagan 45:9–10, utobem no kasano a nagbalin a pagrukodan kenka dagiti katulagan ti ebanghelio. Kasano a maiduma koma ti biagmo no awan kenka dagitoy a katulagan?

Kitaen met iti Isaias 5:26; 11:10–12; Doktrina ken Katulagan 115:5–6.

Doktrina ken Katulagan 45:11–75

Maipatungpalto dagiti balikas ti Apo.

Sumangbayto ti gubat, kinadangkes, ken pannakadadael sakbay iti Maikadua a Yaay ti Mangisalakan. Ngem “saankayo a mariribukan,” kinuna ti Apo, “ta, inton mapasamak amin dagitoy a banag, ammoyonton a matungpalton dagiti karik kadakayo” (Doktrina ken Katulagan 45:35).

Bayat ti panangadalmo iti Doktrina ken Katulagan 45:11–75, ibilang ti panangipokus saan laeng a dagiti makariribuk a pasamak a naipadto ngem dagiti pay parabur nga ikari ti Apo (kas pagarigan, dagiti kari kadagiti bersikulo 54–59 maipapan iti sangaribu a tawen a panagturay ti Mangisalakan). Mabalinmo nga aramiden daytoy babaen ti panangaramid iti listaan wenno panang-label wenno panangmarka kadagiti bersikulo. Ania ti masarakam a mangtulong kenka a “saan a mariribukan” kadagiti maudinga aldaw?

Doktrina ken Katulagan 45:31–32, 56–57

“Agtakder kadagiti nasantuan a lugar,” ket saan a matignay.

Maysa a gapu nga isuro kadatayo ti Mangisalakan ken dagiti propetana maipapan kadagiti tanda ti Maikadua a Yaay ket tapno mangtulong kadatayo nga agsagana. Ania ti masursurom manipud iti Doktrina ken Katulagan 45:31–32, 56–57 maipanggep iti panagsagana para iti Maikadua a Yaay ti Apo? Mabalin a makatulong nga irebyu ti pangngarig dagiti sangapulo a babbalasang, a masarakan iti Mateo 25:1–13. Indasig ti Mangisalakan ti lana iti daytoy a pangngarig iti kinapudno ken iti Nasantuan nga Espiritu (kitaen iti Doktrina ken Katulagan 45:57). Ania dagiti nalawag a pannakaawat ken pannakaammo a masursurotayo no basaentayo ti pangngarig iti kastoy a wagas?

Pangngarig dagiti Sangapulo a Babbalasang, ni Dan Burr

Doktrina ken Katulagan 45:11–15, 66–71

Ti Zion ket maysa a lugar a natalged para kadagiti Santo ti Dios.

Dagiti Santo iti panawen ni Joseph Smith ti aggagar a mangbangon iti Zion, ti Baro a Jerusalem, kas nailadawan iti Libro ni Mormon (kitaen iti Ether 13:2–9) ken ti naparegta a rebision ni Joseph Smith iti Biblia (kitaen iti Moises 7:62–64). Ania ti masursurom maipapan iti Zion—agpada ti nagkauna a siudad iti aldaw ni Enoc ken ti ud-udina nga aldaw a siudad—manipud iti Doktrina ken Katulagan 45:11–15, 66–71?

Ita nga agdama ti bilin a mangbangon iti Zion ket maitudo a panangipasdek iti pagarian ti Dios sadino man a pagnaedantayo—sadino man a paguummongan dagiti annak ti Dios iti kinatalged ti “agnanayon a katulagan[na]” (bersikulo 9). Ania ti maaramidmo a makatulong a mangipasdek iti Zion iti lugarmo?

Kitaen met iti Gospel Topics, “Zion,” topics.ChurchofJesusChrist.org.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 45:3–5.Ania ti aramiden ti maysa a mangibabaet para kadatayo? Mabalinmo a buyaen ti video “The Mediator” (ChurchofJesusChrist.org) ken isaritam no apay a naawagan a Mangibabaettayo ti Mangisalakan.

Doktrina ken Katulagan 45:9–10.No adda “pagrukodan” ti pamiliam, wenno bandera, a mangibagi iti panagkumitmo iti ebanghelio, ania koma ti langana? Mabalin a naragsak ti agtitinnulong nga agaramid iti maysa a bandera ti pamilia ken paglilinnawagan no kasano a matulongam dagiti dadduma a sumurot kadagiti pagrukodan ti ebanghelio.

Doktrina ken Katulagan 45:32.Ania dagiti “nasantuan a lugar[tayo]”? Ania ti kayat a sawen ti “saan a matignay”? Kasano a maaramidtayo ti pagtaengantayo a maysa a nasantuan a lugar?

Doktrina ken Katulagan 45:39–44.Kasano a matulongam a maawatan dagiti miembro ti pamiliam no ania ti kayat a sawen ti mangsiput iti Maikadua a Yaay ti Mangisalakan? Nalabit a mabalinmo a panunoten ti maysa a pasamak a padpadaanam ket ibinglaymo dagiti wagas a “panangsipsiputmo” iti dayta a pasamak. Wenno mabalinyo ti aggigiddan nga agluto iti maysa a banag ket agsiput kadagiti pagilasinan a mabalinen a kanen daytoy. Ania ti ar-aramidentayo a mangsiput iti Maikadua a Yaay ti Mangisalakan?

Doktrina ken Katulagan 45:55.Ti panangbasa iti 1 Nephi 22:26 ken Apocalipsis 20:1–3 ket makatulong iti pamiliam a mangawat no kasano a “maigalutto” ni Satanas kabayatan ti Milenium. Kasano a maigaluttayo ni Satanas iti biagtayo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “When He Comes Again,” Children’s Songbook, 82–83; kitaen met iti “Dagiti Kapanunotan Tapno Mapadur-as ti Sangapamiliaan a Panagadal iti Nasantuan a Kasuratan.”

Panangpadur-as iti Bukod a Panagadal

Usaren dagiti tulong iti panagadal. Usarem dagiti footnote, ti Topical Guide, ti Bible Dictionary, ken ti Pangiwanwan iti Nasantuan a Kasuratan tapno makagun-od kadagiti nalawag a pannakaammo ken pannakaawat [insights] kadagiti nasantuan a kasuratan.

Ti Yaay ni Cristo, ni Jubal Aviles Saenz