tattao nga agtataripnong iti libtong

Ti Taripnong iti Kampo, ni Worthington Whittredge

Mayo 3–9

Doktrina ken Katulagan 46–48

“Sapulenyo a Sipapasnek dagiti Kasayaatan a Sagut”

Bayat ti panangbasam iti Doktrina ken Katulagan 46–48, isuratmo dagiti impresion a maawatmo. Kalpasanna mabalinmo a saludsoden, kas insingasing ni Elder Richard G. Scott, “Adda kadi pay nasken a maammuak?” (“To Acquire Spiritual Guidance” Ensign wenno Liahona, Nob. 2009, 8).

Isuratmo dagiti Impresionmo

Iti ipapanaw da Parley P. Pratt, Oliver Cowdery, Ziba Peterson, ken Peter Whitmer Jr. iti Kirtland ken ti panagakarda kadagiti sabali a lugar a pangasabaanda, pinanawanda ti nasurok a sangagasut a napasurot a napnuan iti kinaregta ngem kurangda iti padas wenno direksion. Awan dagiti hanbuk iti panangiturong, awan dagiti miting iti panagsanay a mangidaulo, awan dagiti waragawag iti sapasap a komperensia—kinapudnona, awan pay unay ti adu a kopia ti Libro ni Mormon a maibunong. Adu kadagitoy baro a mamatpati ti naggusto iti naisubli nga ebanghelio babaen ti kari dagiti datdatlag a parangarang ti Espiritu, nangnangruna ti maipapan kadagiti naammuanda manipud iti panagadalda iti Baro a Tulag (kas pagarigan, kitaen iti 1 Taga Corinto 12:1–11). Saan a nagbayag, sumagmamano a karkarna a panangipakita iti panagrukbab—agraman ti panagpakleb iti daga wenno panaguyas a kas iti maysa nga uleg—ket nayam-ammo kadagiti mitingda iti Simbaan. Adu ti narigatan a nangammo no ania kadagitoy a parangarang ti naggapu iti Espiritu wenno saan. Idi nakitana ti pannakariribukda, nagkararag ni Joseph Smith para iti tulong. Agpada a napateg agingga ita ti sungbat ti Apo, no masansan a pagkedkedan wenno saan nga ikankano dagiti tao dagiti banag a mainaig iti Espiritu. Impalgak ti Apo a pudno dagiti naespirituan a parangarang ken inlawlawagna no ania dagitoy—dagiti sagut manipud iti managayat a Nailangitan nga Ama, “naited a para iti pagimbagan dagiti agayat [Kenkuana] ken agtungpal iti amin a bilin[na]” (Doktrina ken Katulagan 46:9).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 46:1–6

Nabara a mapasangbay ti amin a sipapasnek nga agsapsapul tapno makapagdaydayawda iti Simbaan ti Apo.

Nasken a maibilang dagiti miting ti Ti Simbaan ni Jesucristo dagiti Santo iti Ud-udina nga Aldaw kadagiti kababaraan nga agpaspasangbay ken agparparegta nga ummong iti lubong. Kasano a balakadannatayo ti Apo iti Doktrina ken Katulagan 46:1–6 iti panangawat kadagiti dumar-ay kadagiti mitingtayo? Marikna kadi dagiti gagayyemmo ken tattao iti sangakarrubaanyo ti nabara a pannakapasangbayda kadagiti serbisio ti panagdaydayaw iti wardyo? Ania ti ar-aramidem tapno mapagbalinmo dagiti lugar a pagmimitingan ti Simbaan a tarigagayan a pagsublian dagiti tao? Utobem no kasano a makaapekto iti padasmo dagiti panagkagumaam a mangsurot iti Espiritu Santo kadagiti miting iti Simbaan.

Kitaen met iti 3 Nephi 18:22–23; Moroni 6:5–9; “Welcome,” video, ComeUntoChrist.org; “Religious Enthusiasm among Early Ohio Converts,” Revelations in Context 105–11.

Doktrina ken Katulagan 46:7–33

Nangted ti Dios kadagiti naespirituan a sagut a mangbendision kadagiti annakna.

Namati dagiti nagkauna a Santo kadagiti naespirituan a sagut ngem kinasapulanda ti sumagmamano a pannarabay maipapan iti panggepda. Bayat ti panagadalmo maipapan kadagiti sagut ti Espiritu nga us-usaren ti Doktrina ken Katulagan 46:7–33, utobem no apay a napateg a “kanayon[mo] a [laglagipen] ti gapu ti nakaitedanda” (bersikulo 8). Ibilang no kasano a mayaplikar dagitoy a bersikulo iti daytoy a palawag manipud ken ni Elder Robert D. Hales: “Maited dagitoy a sagut kadagiti napudno ken ni Cristo. Tulongandatayonto a mangammo ken mangisuro kadagiti kinapudno ti ebanghelio. Tulongandatayonto a mangbendision kadagiti dadduma. Isudanto ti mangtarabay kadatayo nga agsubli iti Nailangitan nga Amatayo” (“Gifts of the Spirit,” Ensign, Peb. 2002, 16). Ania pay ti masursurom manipud kadagitoy a bersikulo maipapan kadagiti naespirituan a parangarang? Kasano a matulongannaka dagitoy a kinapudno a “saan a maallilaw”? (bersikulo 8).

Utobem no ania dagiti naespirituan a sagutmo—ken no kasano a mausarmo ida “para iti pagimbagan dagiti annak ti Dios” (bersikulo 26). No addaanka iti maysa a bendision ti patriarka, nalabit a madakamat ditoy dagiti sagutmo a naited kenka.

Kitaen met iti Gospel Topics, “Spiritual Gifts,” topics.ChurchofJesusChrist.org.

Doktrina ken Katulagan 47

Kayat ti Apo a mangisurat ti Simbaanna iti maysa a pakasaritaan.

Ti takem ni John Whitmer a mangisurat iti pakasaritaan ti Simbaan ket nagtultuloy a napaut a kannawidan dagiti agsursurat iti rekord kadagiti tao ti Dios (kitaen iti 2 Nephi 29:11–12; Moises 6:5; Abraham 1:28, 31). Kinapudnona, adda pay laeng ita ti saad a para Salaysay ken para Surat iti Simbaan. Apay nga iti panagkunam a napateg unay iti Apo ti panagsurat iti pakasaritaan? Utobem daytoy bayat ti panagbasam kadagiti pangiturongna ken ni John Whitmer maipapan itoy naituding nga aramiden iti benneg 47. Ibilangmo met no ania dagiti bukodmo a padas a kasapulam nga isurat. Kas pagarigan, ania ti insuro kenka ti Dios a kayatmo a taginayonen?

Bayat ti panangutobmo kadagitoy a saludsod, ibilangmo daytoy nalawag a pannakaawat ken pannakaammo [insights] manipud ken ni Elder Marlin K. Jensen ti Pitupulo, a nagserbi kas para Salaysay ken para Surat iti Simbaan manipud idi 2005 agingga iti 2012:

“Isurattayo dagiti kasuratan tapno matulongannatayo a manglaglagip. … Tarigagayantayo ti mangtulong kadagiti miembro ti Simbaan a manglagip kadagiti naindaklan a banag nga inaramid ti Dios para kadagiti annakna. … Matulongannatayo dagiti adalen manipud iti napalabas a mangsango iti agdama ken mangted kadatayo iti namnama para iti masakbayantayo” (“There Shall Be a Record Kept among You,” Ensign, Dis. 2007, 28, 33).

Tapno masursuro ti ad-adu pay maipapan iti trabaho a madama a maar-aramid babaen iti panangiturong ti para Salaysay iti Simbaan, bisitaen iti history.ChurchofJesusChrist.org.

John Whitmer

Naawagan ni John Whitmer a mangisurat ti pakasaritaan ti Simbaan.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 46:2–6.Ania ti maaramidtayo kas pamilia tapno marikna dagiti dadduma a nabara a mapasangbayda kadagiti miting iti Simbaan? (kitaen met iti 3 Nephi 18:22–23). Ti ladawan a naikadua itoy a balabala ket mabalin a mainayon itoy a panaglilinnawag.

Doktrina ken Katulagan 46:7–26.Ania dagiti naespirituan a sagut a makitatatayo iti maysa ken maysa? Kasano a mabendisionan dagitoy a sagut ti pamiliatayo?

Doktrina ken Katulagan 47.Kasano a maallukoymo ti pamiliam a mangisurat kadagiti bukodda a pakasaritaan iti unos ti makalawas? Mabalinmo nga ibinglay ti sumagmamano a serrek [entry] manipud iti bukodmo a journal wenno mangibinglay iti maysa nga estoria maipanggep iti maysa a kapuonan (kitaen iti FamilySearch.org). Ilatang ti sumagmamano a pamilia ti sumagmamano a minuto iti tunggal lawas tapno agsurat ti tunggal maysa kadagiti journalda. Mabalin a mangtedka iti sumagmamano a parikna ti journal, kas iti “Ania ti napasamak iti daytoy a lawas a kayatmo a maammuan dagiti appokom?” wenno “Kasano a nakitam ti ima ti Apo ti biagmo itoy a lawas?” Mabalin nga agdrowing dagiti babassit nga ubbing kadagiti ladawan iti padpadasda, wenno mabalinmo nga isuratan ida a mangisarsarita kadagiti estoriada. Ania dagiti bendision a sumangbay iti panangisurat iti maysa a “gagangay a pakasaritaan”?(bersikulo 1).

Doktrina ken Katulagan 48.Nabilin dagiti Santo iti Ohio a mangibinglay iti dagada kadagiti tao nga umak-akar a mapan iti Ohio manipud iti akindaya nga Estados Unidos. Ania ti maibinglaytayo tapno maipaay dagiti kasapulan dagiti dadduma?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Have I Done Any Good?” (Hymns, no. 223).

Panangpadur-as iti Panangisurotayo

Agusar kadagiti estoria ken pagarigan. Masansan a nagusar ti Mangisalakan kadagiti estoria ken pagarigan a mangisuro kadagiti pagbatayan ti ebanghelio. Mangpanunot kadagiti pagarigan ken estoria manipud iti bukodmo a biag a mamagbalin iti maysa a pagbatayan ti ebanghelio a maar-aramat para iti pamiliam (kitaen iti Panangisuro iti Wagas ti Mangisalakan, 22

tattao iti simbaan

Mangted ti Nailangitan nga Ama kadagiti naespirituan a sagut kadagiti annakna a mangbendision ti biag dagiti dadduma.