Ti Panagtataripnong iti Kampo, ni Worthington Whittredge

Mayo 3–9

Doktrina ken Katulagan 46–48

“Sapulenyo a Sipapasnek dagiti Kasayaatan a Sagut”

Panunotem maipapan kadagiti ubbing a sursuruam bayat ti panangbasam ti Doktrina ken Katulagan 46–48. Ibasar iti “Panangipaay kadagiti Kasapulan dagiti In-inaudi nga Ubbing” iti rugi daytoy a resource para kadagiti mainayon a kapanunotan nga ibilang.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangidrowing kadagiti ladawan ti maysa a banag a naadalda iti leksion iti naudi a lawas wenno iti pagtaengan bayat ti napalabas a lawas. Ikkam ida kadagiti palagip no kasapulan. Kalpasanna pagsaritaem ida maipapan kadagiti ladawanda.

Isuro ti Doktrina: In-inaudi nga Ubbing

Doktrina ken Katulagan 46:2–6

Matulongak dagiti dadduma a makarikna a nasayaat a mapasangbay iti simbaan.

Kayattayo amin, agraman dagiti ubbing, a nasayaat a mapasangbay ken maibilang. Kasano a mausarmo dagitoy a bersikulo a mangtulong kadagiti ubbing a makarikna a nasayaat a mapasangbayda iti simbaan?

Dagiti Mabalin nga Aktibidad

• Basaen ti Doktrina ken Katulagan 46:5 a napigsa, ket isaritam kadagiti ubbing iti bukodmo a balikas no ania ti kaipapanan daytoy a bersikulo. Mangipakitaka kadagiti ladawan ti tattao manipud iti intero a lubong. Saludsodem kadagiti ubbing no ania kadagitoy a tao ti kayat ti Nailangitan nga Ama nga awisentayo kadagiti miting ti Simbaantayo. Tulongam dagiti ubbing nga agsanay iti panangawis kenka wenno iti tunggal maysa nga umay iti maysa a miting wenno aktibidad iti Simbaan.

• Awisem dagiti ubbing a mangipapan nga umay ti maysa a gayyem iti miting ti simbaan iti umuna a gundaway. Tulongam ida nga agpanunot kadagiti wagas a makatulong iti gayyemda a makarikna a nasayaat ti pannakapasangbayna. Pagsanayem ida no ania ti ibaga wenno aramidenda no nakitada ti maysa a gayyem a magmagna a mapan iti kapilia wenno iti siled ti klase iti umuna a gundaway.

Doktrina ken Katulagan 46:13–26

Pinaraburannak ti Nailangitan nga Ama kadagiti sagutna.

Annak ti Nailangitan nga Ama ti tunggal maysa kadagiti ubing a sursuruam, ket binendisionanna ida kadagiti naespirituan a sagut.

Dagiti Mabalin nga Aktibidad

• Usarem ti Doktrina ken Katulagan 46:13–26 wenno “Kapitulo 20: Dagiti Sagut ti Espiritu” (Dagiti Estoria ti Doktrina ken Katulagan, 77–80) tapno mangilawlawag kadagiti ubbing iti sumagmamano a sagut nga inted ti Nailangitan nga Ama babaen iti Espirituna ken no apay nga Intedna dagitoy. No mabalin, mangipakitaka kadagiti banag wenno ladawan a mangibagi iti tunggal sagut. Agsardengka sagpaminsan tapno agsaludsod kadagiti ubbing no kasano a mangbendision iti maysa a tao dagitoy a sagut.

• Ikkam ti maysa nga ubing ti maysa a banag a mabalin a maibinglay, kas iti maysa a tinapay wenno dua nga ay-ayam. Kiddawem iti maysa nga ubing a mangibinglay iti intedmo kenkuana iti sabali pay a miembro ti klase. Ilawlawag nga ikkanatayo ti Nailangitan nga Ama kadagiti sagut, ket kayatna nga usarentayo dagitoy a mangtulong kadagiti dadduma. Isaritam kadagiti ubbing maipapan iti maysa a panawen idi nabendisionanka gapu ta adda maysa a tao a nangibinglay kadagiti naespirituan a sagutna.

Isuro ti Doktrina: In-inauna nga Ubbing

Doktrina ken Katulagan 46:8–26

Mangted kaniak ti Nailangitan nga Ama kadagiti naespirituan a sagut a mangbendision kadagiti dadduma.

Dagiti sagut a nailadawan iti Doktrina ken Katulagan 46—ken adu pay a sabsabali a naespirituan a sagut—ket naggapu iti Dios babaen ti Espiritu Santo. Matulongam dagiti ubbing a mangilasin kadagiti sagut a naited kadakuada—ken dagiti dadduma pay a masarakanda—bayat ti panagadalyo iti Doktrina ken Katulagan 46 nga aggigiddan.

Dagiti Mabalin nga Aktibidad

• Isurat kadagiti papel ti sumagmamano kadagiti naespirituan a sagut a masarakan iti Doktrina ken Katulagan 46:13–26 ken Pagannurotan ti Pammati 1:7, ket ilemmengmo ida iti lawlaw ti siled. Awisen ti tunggal ubing a mangsapul iti maysa kadagiti papel ken mangsukisok kadagiti bersikulo tapno saraken no sadino dayta a sagut kadagiti nasantuan a kasuratan. Kalpasanna aggigiddan a basaen ti Doktrina ken Katulagan 46:8–9, 12. Apay a mangted ti Nailangitan nga Ama kadatayo kadagiti naespirituan a sagut?

• Tulongam dagiti ubbing a mangilista iti pisarra dagiti sagut ti Espiritu a nadakamat iti Doktrina ken Katulagan 46. Bayat ti pannakailista ti tunggal sagut, isaritamno kasano a mausar dayta a sagut a mangbendision kadagiti dadduma. Makatulong dagiti panangiladawan iti “Kapitulo 20: Dagiti Sagut ti Espiritu” (Dagiti Estoria iti Doktrina ken Katulagan, 77–80). Ibagam kadagiti ubbing nga addaan kadagiti naespirituan a sagut ti tunggal maysa kadakuada . Allukoyem ida nga agpatulong iti Nailangitan nga Ama a a mangilasin kadagiti sagutda ken no kasano a mausarda dagitoy a mangtulong kadagiti dadduma.

Doktrina ken Katulagan 47:1, 3

Maisuratko ti pakasaritaak.

Inawagan ti Apo ni John Whitmer a mangitalimeng iti pakasaritaan ti Simbaan. Sibabaknangtayo ita a nabendisionan gapu kadagiti pakasaritaan ti Simbaan a naitalimeng iti panaglabas ti adu a tawen.

Dagiti Mabalin nga Aktibidad

• Aggigiddan a basaen ti Doktrina ken Katulagan 47:1, 3, ket kiddawen kadagiti ubbing a mangtakuat no ania ti kayat ti Apo nga aramiden ni John Whitmer. Ania ti kayat a sawen ti balikas nga “awan ressatna” iti bersikulo 3? Kasano a mabendisionantayo babaen ti pannakaammo maipapan iti pakasaritaan ti Simbaan?

• No agsursurat iti diurnal dagiti ubbing a sursuruam, kiddawem kadakuada a mangisarita maipapan kadagiti kita ti bambanag nga isursuratda iti diurnalda. Mabalin a magustuan a dengdenggen dagiti ubbing ti maysa nga estoria manipud iti diurnal ti kinaubingmo wenno ti diurnal ti maysa a kapuonan.

• Ipakitam kadagiti ubbing dagiti pagtuladan tiwagas a makapagtalimengda kadagiti gagangay a pakasaritaan dagiti biagda. Kas pagarigan, makapagsuratda iti maysa a libro, makapagkolekta kadagiti ladawan iti maysa nga scrapbook, maka[ag-type iti computer, wenno makapagrekord kadagiti audio wenno video. Tulongam dagiti ubbing a mangilista kadagiti banag a nasayaat nga iraman iti bukodda a pakasaritaan, kas iti pammaneknekda ken ni Jesucristo. Awisem dagiti ubbing a mangaramid iti karatula wenno poster a yawidda iti pagtaenganda nga addaan iti sumagmamano a kapanunotan a mangipalagip kadakuada nga agsurat kadagiti bukodda a pakasaritaan.

  

  Maysa a wagas dagiti diurnal a pakaitalimengan ti maysa a pakasaritaan.

Doktrina ken Katulagan 48:1–4

Makatulongak kadagiti dadduma babaen iti panangibinglayko no ania ti naited kaniak.

Allukoyen ti Apo dagiti Santo iti Ohio a mangtulong kadagiti dadduma a Santo babaen ti panangibinglayda iti daga ken kuartada. Kasano a mausarmo dagitoy a bersikulo a mangtulong kadagiti ubbing a mangsapul kadagiti wagas a pakaibinglayanda iti dadduma dagiti inted kadakuada ti Dios?

Dagiti Mabalin nga Aktibidad

• Ipakita kadagiti ubbing ti mapa ti Nueva York ken Ohio (kitaen iti April 12–18 a balabala iti Umaykayo, Sumurot Kaniak—Para kadagiti Indibidual ken Pamilia.). Ilawlawag nga imbilin ti Apo kadagiti Santo iti Nueva York ken sabsabali a lugar nga aguummongda iti Ohio, ngem adu kadakuada ti awanan iti umdas ti kuarta a mangbangon ti maysa a balay idi nakadanonda. Awisem dagiti ubbing a mangsapul iti Doktrina ken Katulagan 48:1–4 no ania ti kiniddaw ti Apo nga aramiden dagiti Santo iti Ohio tapno makatulong. Saludsodem kadagiti ubbing no ania koma a tulong ti maaramidda no agnaedda iti Ohio iti daytoy a panawen. Ania dagiti naited kadatayo ita a mausartayo tapno mangtulong kadagiti dadduma? Kas pagarigan, kitaen ti “The Coat” (video, ChurchofJesusChrist.org).

• Basaen ti Doktrina ken Katulagan 48:4 nga aggigiddan, ken awisen dagiti ubbing a mangkita ti maysa a banag a kiniddaw ti Apo nga aramiden dagiti Santo a mangtulong iti aramidna. Ilawlawag a ti panagurnong iti kuarta ti mangpalugod kadakuada a gumatang iti daga ken mangbangon iti templo iti umay nga aldaw. Para iti ania ti maurnongtayo a kuarta tapno makatulongtayo iti aramid ti Apo? Ipabuya ti video “First Things First” (ChurchofJesusChrist.org), ket paglilinnawagan no kasano a natungpal dagiti ubbing iti video ti bilin ti Apo nga agurnongda ti kuarta.

Yallukoy ti Panagsursuro iti Pagtaengan

Awisem dagiti ubbing a saludsodenda kadagiti miembro ti pamilia iti pagtaengan maipapan iti maysa a naespirituan a sagut a mariknada a naited kadakuada. Allukoyem pay dagiti ubbing nga agkararag ken mangsapul ti maysa a sagut ti Espiritu a kayatda a padur-asen.

Panangpadur-as iti Panangisurotayo

Tulongam dagiti ubbing nga agsursuro manipud kadagiti nasantuan a kasuratan. Mabalin a saan unay a kabaelan dagiti inaudi nga ubbing ti agbasa, ngem mabalinmo latta a tulongan ida nga agsursuro manipud kadagiti nasantuan a kasuratan. Kas pagarigan, mabalinmo a basaen ti maysa a binatog ket awisem ida a tumakder wenno ingato ti imada no mangngegda ti maysa a maitudo a balikas wenno ragup dagiti balikas.