Independence, Missouri, ni Al Rounds

Mayo 24–30

Doktrina ken Katulagan 58–59

“Siaanep a Makiraman iti Nasayaat nga Aramid”

Bayat ti panangbasam ti Doktrina ken Katulagan 58–59, isuratmo dagiti naespirituan nga impresion a maawatmo. Makatulong kenka dagitoy nga impresion a mangplano nga isuro ti doktrina a nasursurom kadagiti ubbing. Mabalin met a makakitaka kadagiti kapanunotan iti daytoy a balabala, iti Umaykayo, Sumurot Kaniak—Para kadagit Indibidual ken Pamilia, wenno kadagiti magasin ti Simbaan.

Isuratmo dagiti Impresionmo

Yawis ti Panagbibinninglay

Awisem ti sumagmamano kadagiti ubbing a mangibinglay iti maysa a banag nga inaramidda kabayatan iti lawas a makasursuro manipud kadagiti nasantuan a kasuratan.

Isuro ti Doktrina: In-inaudi nga Ubbing

Doktrina ken Katulagan 58:27–28

Inikkannak ti Nailangitan nga Ama iti bileg nga agpili.

Tulongam dagiti ubbing a maammuan a kayat ti Nailangitan nga Ama nga agaramidtayo kadagiti naimbag a pili a mangipaay ti kinaragsak iti biagtayo ken dagiti dadduma.

Dagiti Mabalin nga Aktibidad

• Basaem ti ragup dagiti balikas manipud iti Doktrina ken Katulagan 58:27–28 tapno tulongan dagiti ubbing a maawatan a mabalinda nga pilien nga aramiden ti naimbag. Mangikabil ti naragsak a rupa iti maysa a bangir ti siled ken maysa a naliday a rupa iti sabali pay a bangir. Kasano ti riknatayo no pilientayo ti naimbag? Iladawanmo ti sumagmamano a kasasaad agraman ti naimbag wenno biddut a pili iti tunggal maysa. Kalpasan ti panangiladawanmo ti tunggal kasasaad ken pili, kiddawem dagiti ubbing nga agtakder iti abay ti naragsak a rupa no naimbag ti pili ken iti abay ti naliday a rupa no biddut daytoy.

• Ipakitam kadagiti ubbing ti maysa a container nga addaan iti adu a nadumaduma a kolor ti krayola. Ipakitam kadakuada ti maikadua a container nga addaan iti maysa laeng a krayola. Saludsodem kadagiti ubbing no ania kadagiti container ti kayatda nga usaren. Apay? Ilawlawagmo a ti pannakabael a pumili ket maysa a bendision manipud iti Nailangitan nga Ama. Paneknekam nga ay-ayatennatayo ti Nailangitan nga Ama ken ni Jesucristo ken kayatda a pilientayo ti naimbag.

• Isaritam kadagiti ubbing maipapan iti maysa a gundaway a pinilim ti naimbag, ken iladawam ti nariknam kalpasanna. Awisem dagiti ubbing a mangidrowing iti ladawan ti estoriam wenno ti bukodda nga estoria. Kalpasanna paibinglaymo kadakuada dagiti ladawanda iti klase ken isaritam no ania ti nasursuroda manipud iti estoria.

Doktrina ken Katulagan 59:7

Kayat ti Nailangitan nga Ama a managyamanak.

Kasano a matulongam dagiti ubbing a maawatanda ti kinapateg ti panagyaman iti Nailangitan nga Ama para kadagiti bendisionda?

Dagiti Mabalin nga Aktibidad

• Ibagam kadagiti ubbing ti maysa a banag a pagyamyamanam, ket kiddawem kadakuada a mangibinglayda kadagiti banag a pagyamyamananda. Basaem ti Doktrina ken Katulagan 59:7, ken tulongam dagiti ubbing a mangpanunot kadagiti wagas a makapagyamanda iti Nailangitan nga Ama para kadagiti bendisionda. Ania dagiti mabalinda nga aramiden a maiyawidda a mangipalagip kadakuada nga agyaman iti Nailangitan nga Ama para kadagiti bendisionda?

• Aggigiddan nga agkansion iti maysa a kanta maipapan iti panagyaman, kas iti “For Health and Strength” (Children’s Songbook, 21). Awisem dagiti ubbing a sukatanda dagiti balikas iti kanta kadagiti dadduma a banag a pagyamyamananda.

• Pagdrowingem dagiti ubbing kadagiti banag a pagyamyamananda.

Doktrina ken Katulagan 59:9–12

Ti Sabbath ket aldaw ti Apo.

Bayat iti panangibinglaymo ti rag-o a nasarakam babaen iti panagaramidmo a nasantuan ti aldaw ti Sabbath, matulongam dagiti ubbing a makitada a ti Sabbath ket aldaw a panagdaydayawtayo ti Apo.

Dagiti Mabalin nga Aktibidad

• Mangitugotka kadagiti ladawan wenno banag a mangipakita kadagiti naimbag a banag a mabalintayo nga aramiden iti Domingo tapno agdaydayaw iti Apo ken makagun-od ti rag-o. Masarakan ti sumagmamano a kapanunotan iti Doktrina ken Katulagan 59:9–12 ken “Panagdayaw ti Aldaw ti Sabbath” (Para iti Pigsa dagiti Agtutubo, 30–31). Kas pagarigan, tapno mangibagi ti sakramento, mabalinmo nga ipakita ti ladawan 108 iti Libro ti Arte ti Ebanghelio wenno baso ti sakramento ken maysa a pirgis ti tinapay. Kasano a makatulong kadatayo ti tunggal maysa kadagitoy a banag tapno iyas-asidegnatayo pay iti Nailangitan nga Ama ken ni Jesucristo iti Sabbath?

• Kompletuem ti panid ti aktibidad iti daytoy a lawas a kadua dagiti ubbing tapno makaitedka kadakuada kadagiti kapanunotan tapno maaramid a nasantuan nga aldaw ti Sabbath.

  

  Ti pannakiranud ti sakramento ket makatulong kadatayo a dayawen ti aldaw ti Sabbath.

Isuro ti Doktrina: In-inauna nga Ubbing

Doktrina ken Katulagan 58:27–28

Ti kinawaya nga agpili ket isu ti bileg nga agpili.

Inted kadatayo ti Dios ti bileg nga agpili, ket gapu iti dayta a bileg mabalintayo ti “agipatungpal iti adu a kinalinteg” (bersikulo 27). Kasano a matulongam dagiti ubbing a sursuruam a mangkita nga uray pay addaan iti kinadangkes iti lubong, “adda kadakuada ti bileg” nga “agaramid ti nasayaat”? (bersikulo 28).

Dagiti Mabalin nga Aktibidad

• Ipakitam kadagiti ubbing ti maysa a papel nga addaan iti balikas a pili a naisurat iti maysa a bangir ken ti balikas a bunga iti sabali a bangir. Ilawlawagmo a dagiti pili addaan kadagiti bunga, wenno resulta a gagangay a kakuykuyog dagiti aramid. Awisem ti maysa nga ubing a piduten ti papel tapno maipakita a no pidutem ti papel, maalam nga agpadpada dagiti pili ken bunga dayta a pili. Kiddawem iti maysa nga ubing a basaen ti Doktrina ken Katulagan 58:27–28. Ania dagiti pili a mabalintayo nga aramiden nga “agipatungpal iti adu a kinalinteg” wenno dagiti nasayaat a bunga?(bersikulo 27). Kaano idi a nakaaramidtayo kadagiti naimbag a pili nga addaan ti bunga a nabendisionan dagiti dadduma?

• Isurat ti ragup dagiti balikas manipud iti Doktrina ken Katulagan 58:27–28 iti babassit a papel, ket ikkam ti maysa ti tunggal ubing. Awisem ida a siuulimek a mangbasa kadagitoy a bersikulo ken utobenda ti ragup dagiti balikasda. Awisem dagiti ubbing nga agtugawda sigun ti urnos a panagparang ti ragup dagiti balikas iti bersikulo 27–28 ket ibinglayda ti nasursuroda iti tunggal maysa kadakuada. Ania ti mensahe ti Apo a para kadatayo kadagitoy a bersikulo?

• Agkansion ti maysa a kanta maipapan kadagiti pili, kas iti “Choose the Right” (Hymns, num. 239). Agsaludsodka tapno matulongam dagiti ubbing a mangutob kadagiti balikas iti kanta—kas pagarigan, Asino ti mangtartarabay kenka tapno makaaramidka iti rumbeng a pili? Asino ti mangpadpadas kenka a mangaramid ti biddut a pili? Kasano ti mariknam no piliem ti rumbeng?

Doktrina ken Katulagan 59:9–16

Ti Sabbath ket aldaw ti Apo.

Imbaga ti Apo a makatulong kadatayo ti panangngilin iti Sabbath nga “awanan[ti bagiyo iti] mulit iti lubong” (Doktrina ken Katulagan 59:9). Kasanom a matulongan dagiti ubbing a sursuruam a ngilinen ti Sabbath ken aramidenda daytoy kas maysa a pagilasinan iti ayatda iti Nailangitan nga Ama ken ni Jesucristo?

Dagiti Mabalin nga Aktibidad

• Awisem dagiti ubbing a mangbasa iti Doktrina ken Katulagan 59:9–16 nga agpaparis, ken kiddawem ti tunggal paris a mangisurat ti maysa a banag a masursuroda maipapan iti aldaw ti Sabbath manipud iti tunggal bersikulo. Kalpasan ti sumagmamano a minuto, kiddawem ti tunggal paris a mangibinglay iti klase no ania ti insuratda. Ania ti balbaliwantayo nga aramiden iti Sabbath gapu kadagiti nasursurotayo?

• Mangisaganaka ti simple a panagyasping nga ay-ayam nga iyasping dagiti ubbing ti ragup dagiti balikas manipud iti Doktrina ken Katulagan 59:9–16 iti umiso a bersikulo. Piliem ti ragup dagiti balikas a mangisuro no ania ti kayat ti Mangisalakan nga aramidentayo iti Sabbath. Paglilinawagan no ania ti isuro ti ragup dagiti balikas maipapan iti aldaw ti Apo ken no kasano a mabalintayo ti ad-adda pay nga umas-asideg Kenkuana.

• Ti aldaw ti Sabbath ket “aldaw ti Apo” (Doktrina ken Katulagan 59:12)—aldaw nga ipakitatayo a malaglagiptayo ti adu nga aramid ti Apo bayat iti panagdaydayawtayo Kenkuana (kitaen ti Bible Dictionary, “Sabbath”). Tulongam dagiti ubbing a mangutob kadagitoy nga aramid babaen iti panangawis kadakuada a mangbasa kadagiti sumaganad a paset ti nasantuan a kasuratan ken ti panangipakita kadakuada kadagiti mainaig a ladawan: Genesis 2:1–3 (kitaen ti Libro ti Arte ti Ebanghelio, num. 3); Juan 20:1–19 (kitaen ti Libro ti Arte ti Ebanghelio, num. 59). Ania pay dagiti nabileg nga aramid ti Apo a malagiptayo iti Sabbath? Ania ti pay ti masursurotayo maipapan iti Sabbath manipud iti Doktrina ken Katulagan 59:9–16?

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada ti banag a mabalinda nga aramiden tapno mapagtalinaedda a nasantuan ti aldaw ti Sabbath.

Panangpadur-as iti Panangisurotayo

Bangonem ti panagtalek dagiti ubbing iti bagbagida. Mabalin a marikna dagiti sumagmamano nga ubbing a saanda a kabaelan ti agsursuro iti ebanghelio iti bukodda. Ikarim kadagiti ubbing a ti Espiritu Santo ket tumulongto kadakuada tapno makasursuroda.