Umuna nga Urit, ni James Taylor Harwood

Mayo 17–23

Doktrina ken Katulagan 51–57

“Napudno, Nalinteg, ken Masirib a Mangaywan”

Ttulongannaka ti panagadal kadagiti nasantuan a kasuratan a mangilasin iti timek ti Apo, gapu ta intedna dagiti nasantuan a kasuratan babaen iti Espirituna (kitaen iti Doktrina ken Katulagan 18:34–36).

Isuratmo dagiti Impresionmo

Para kadagiti miembro ti Simbaan kadagiti tawen ti 1830, ti panangummong kadagiti Santo ken panangipasdek iti siudad ti Zion ket aramid a naespirituan kasta met a naindagaan, nga aduan kadagiti maaramat a pakseknan a banag a risuten: Maysa a tao ti nagkasapulan a gumatang ken agibunong iti daga a mabalin a pagnaedan dagiti Santo. Maysa a tao ti nagkasapulan nga agimaldit kadagiti libro ken dadduma pay a pablaak. Ken maysa a tao ti nagkasapulan a mangpalakad iti pagtagilakuan tapno maipaay dagiti tagilako a kasapulan dagiti adda iti Zion. Kadagiti paltiing a naisurat iti Doktrina ken Katulagan 51–57, tinudingan ken binilin ti Apo dagiti tao a mangasikaso kadagitoy nga aramiden, ket pinilina ti Independence, Missouri, a kas “ti kangrunaan a lugar” ti Zion (Doktrina ken Katulagan 57:3).

Ngem idinto a napateg dagiti paglaingan iti kakasta a banag kas iti panaggatang iti daga, panagimaldit, ken panagpalakad iti pagtagilakuan iti naindagaan nga aramid iti panangbangon iti Zion, isuro pay dagitoy a paltiing a tarigagayan ti Apo nga agbalin dagiti Santo a naespirituan a maikari a maawagan iti tattao ti Zion. Awaganna ti tunggal maysa kadatayo nga agbalin a “napudno, nalinteg, ken masirib a mangaywan,” addaan iti sibababawi nga espiritu, “[panag]talinaed a natibker” kadagiti pagrebbengan a naidutok kadatayo (kitaen iti Doktrina ken Katulagan 51:19; 52:15; 54:2). No mabalintayo nga aramiden dayta —ania man dagiti temporal a paglaingantayo—mausarnatayo ti Apo a mangbangon iti Zion, ket Isu “idaras[nan]to ti panawen ti siudad” (Doktrina ken Katulagan 52:43).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 51

Kayat ti Apo nga agbalinak a napudno, nalinteg, ken nasirib a mangaywan.

No maysaka a miembro ti Simbaan idi 1831, nalabit a naawiska nga agbiag iti linteg ti panangted-pateg babaen iti panangtedmo iti sanikuam iti Simbaan babaen iti bishop. Kalpasanna isublina kenka, iti kaaduan a kasasaad, no ania ti indonarmo, no dadduma adda sobrana. Ngem saan laengen a ti sanikuam—daytoy ti panangaywanmo.

Iti agdama sabalin dagiti annuroten, ngem dagiti pagbatayan ti panangted-pateg ken panangaywan napateg pay laeng iti aramid ti Apo agingga ita. Ibilangmo dagitoy a balikas manipud ken ni Elder Quentin L. Cook: “Agbibiagtayo iti napeggad a panawen nga adu dagiti mamati a saantayo nga agsungbat iti Dios ken awanantayo iti bukod a pagrebbengan wenno panangaywan iti bagbagitayo ken iti dadduma. Adu iti lubong ti naipamaysa ti imatangda iti bukodda a pannakapnek … [ken] dida patien nga isuda ti agay-aywan iti kabsatda. Iti Simbaan, nupay kasta, mamatitayo a sagrado a panagtalek dagitoy a panangaywan” (“Stewardship—a Sacred Trust,” Ensign wenno Liahona, Nob. 2009, 91).

Bayat ti panagbasam iti benneg 51, panunotem maipapan ti no ania ti intalek ti Dios kenka. Ania ti kaipapanan dagiti balikas a “mangaywan” (bersikulo 19) ken “naikkan-pateg” (bersikulo 5), ken no ania ti iparangarangda maipapan kadagiti namnamaen ti Dios kenka? Ania dagiti pagbatayan a masarakam iti benneg 51 ken kadagiti balikas ni Elder Cook a mangisuro kenka no ania ti kaipapanan ti agbalin nga agay-aywan? (kitaen nangnangruna kadagiti bersikulo 9, 15–20).

Kitaen met iti Mateo 25:14–30; “The Law of Consecration,” video, ChurchofJesusChrist.org.

Doktrina ken Katulagan 52:14–19

Inted ti Dios ti pagtuladan para iti panangliklik iti panangallilaw.

Gapu ta adu a tattao ti mangibagbaga nga aw-awatenda dagiti naespirituan a parangarang, maseknan dagiti nagkauna a Santo maipapan iti pannakaallilaw. Kasano a maibagada no asino ti “inawat ti [Dios]”? (bersikulo 15). Iti Doktrina ken Katulagan 52:14–19, nangted ti Apo iti maysa a makatulong a pagtuladan. Kasano a mayaplikarmo daytoy a pagtuladan a mangilasin kadagiti palso a mensahe iti lubong? Mabalinmo pay nga usaren daytoy a pagtuladan a mangamiris iti bagim: ibilangmo ti panangusar kadagiti ragup ti balikas manipud kadagitoy a bersikulo a mangisurat kadagiti saludsod a kas iti “No agsaritaak, napnuan babawi kadi ti espirituk?”

Doktrina ken Katulagan 54

Makapagpannurayak iti Apo no masaktannak kadagiti pili dagiti dadduma.

Kas paset ti panaguummong iti Ohio, maysa a grupo dagiti Santo nga indauluan ni Newel Knight ti simmangpet iti Colesville, Nueva York, ket kinasapulanda ti lugar a pagnaedan. Adda nalawa a bangkag ni Leman Copley iti asideg ti Kirtland, ket nakitulag a mangpalugod kadagiti Santo nga agindeg iti dagana. Nupay kasta, saan a nabayag kalpasan nga inrugida ti panagnaed sadiay, nagduadua ni Copley iti pammatina, ket naglabsing iti katulaganna, ket pinapanawna dagiti Santo manipud iti sanikuana (kitaen iti Saints, 1:125–28).

Kas naisurat iti benneg 54, imbaga ti Apo ken ni Newel Knight no ania ti nasken nga aramiden dagiti Santo maipapan iti kasasaadda. Ania ti masarakam iti daytoy a paltiing a makatulong kenka no maapektuannaka dagiti nadadael a panagkumit wenno dadduma pay a saan a nasayaat a pili?

Disso ti bangkag iti Ohio nga inkari ni Leman Copley iti Simbaan.

Doktrina ken Katulagan 56:14–20

Nagasat dagiti natarnaw iti pusoda.

Kadagitoy a bersikulo, kinasao ti Apo nga agpadpada dagiti nabaknang ken dagiti nakurapay; mabalin a makaay-ayo nga idilig ti balakadna kadagitoy dua a grupo. Ania kadagitoy a bersikulo ti mariknam nga adda personal a pakainaiganna kenka? Kasano a mabalin a “rukeren” ti kararuam ti panagpokus iti kinabaknang? (bersikulo 16). Ania ti kayat a sawen kenka ti agbalin a “natarnaw iti puso” (bersikulo 18) maipanggep kadagiti material a banag?

Kitaen met iti Jacob 2:17–21.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 51:9.Mabalinyo ti agay-ayam iti maysa nga ay-ayam a kaay-ayo ti pamilia ket kalpasanna pagsasaritaanyo no kasano a maiduma ti ay-ayam no nagkusit koma ti maysa a tao. Apay a napateg ti “napudno iti pannakilangen” iti maysa ken maysa? Kasano a makatulong kadatayo ti kinapudno nga “agkaykayssa”?

Doktrina ken Katulagan 52:14–19.Bayat ti panangilawlawagmo iti pagtuladan a nailadawan kadagitoy a bersikulo, mabalin a magustuan ti pamiliam a kumita kadagiti dadduma pay a pagtuladan nga usarem—kas kadagiti pagtuladan para iti panagdait iti lupot wenno panangaramid iti maysa a partuat ti ima. Mabalinyo ti agtitinnulong nga agaramid iti maysa a banag manipud iti maysa a pagtuladan bayat ti panagsarsarita maipapan iti pagtuladan nga inted ti Apo para iti panangliklik iti panangallilaw.

Doktrina ken Katulagan 53:1.Ibilangmo nga iburay iti pamiliam ti maysa a padasmo idi, kas ken ni Sidney Gilbert, sinaludsodmo iti Apo “maipapan iti takemmo.”

Doktrina ken Katulagan 54:2; 57:6–7.Ania ti kayat a sawen ti “agtalinaed a natibker” (Doktrina ken Katulagan 54:2) iti no ania ti indawat ti Dios nga aramidentayo? Mabalinmo nga awisen dagiti miembro ti pamilia nga agtakder ken inagananda ti maysa a banag nga indawat ti Dios nga aramidenda.

Doktrina ken Katulagan 55.Kasano nga inusar ti Apo dagiti kabaelan ni William Phelps kas maysa a mannurat ken agimalmaldit? (kas pagarigan, kitaen ti author index iti hymnbook para iti listaan dagiti himno nga insuratna). Nalabit a makapagsarita dagiti miembro ti pamilia maipapan kadagiti talento ken kabaelan a makitada iti tunggal maysa. Kasano a makatulong dagiti talentotayo iti aramid ti Apo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “‘Give,’ Said the Little Stream,” Children’s Songbook, 236.

Panangpadur-as iti Bukod a Panagadal

Agsurat iti study journal. Mabalin a makitam a makatulong ti agusar iti maysa a journal wenno kuaderno a pagisuratan kadagiti pampanunoten, kapanunotan, saludsod, wenno impresion a sumangbay bayat iti panagadalmo.

Umawat ni Bishop Partridge iti Panangted-pateg, ni Albin Veselka