karnero a sumursurot ken ni Jesus

Panagawid, ni Yongsung Kim

Hulio 12–18

Doktrina ken Katulagan 77–80

“Iturongkayto”

Bayat ti panagadalmo ti Doktrina ken Katulagan 77–80, sapulem ti ragup dagiti balikas wenno dagiti bersikulo a mabalin a makatulong kadagiti ubbing a maawatan dagiti pagbatayan ti ebanghelio. Nawayaka a mangibinglay kadagiti bersikulo a nasapulam, uray pay saan a nairaman dagitoy iti aktibidad iti baba.

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay kadagiti banag a pagyamananda. Ania ti aramidenda ken dagiti pamiliada tapno maipakitada iti Nailangitan nga Ama nga agyamyamanda kadagiti bendisionna?

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 77:2

Pinarsua ti Dios ti tunggal parsua iti daga.

Ti panagadal maipapan kadagiti banag a naparsua ti Dios ket makatulong kadagiti ubbing a mariknada ti ayatna kadakuada.

Dagiti Mabalin nga Aktibidad

• Ipakitam kadagiti ubbing dagiti ladawan dagiti animal, agraman dagiti insekto ken tumatayab. Bayat ti panagbasam kadagiti balikas nga “ayup,” “agkarkarayam a bambanag,” ken “tumatayab iti tangatang” manipud iti Doktrina ken Katulagan 77:2, awisem dagiti ubbing nga itudoda dagiti maitutop a ladawan. Paneknekam a pinarsua ti Dios amin dagitoy a banag gapu ta ay-ayatennatayo ken kayatna a naragsaktayo (kitaen met iti Doktrina ken Katulagan 59:16–20).

• Makikansionka kadagiti ubbing iti maysa a kanta maipapan kadagiti pinarsua ti Dios, kas iti “My Heavenly Father Loves Me” (Children’s Songbook, 228–29). Saludsoden kadagiti ubbing no kasano a makatulong kadakuada dagiti banag a kankansionenda a mariknada ti ayat ti Dios.

  kulibangbang iti sabong

  Pinarsua ti Dios ti daga ken amin a banag nga adda iti daytoy.

Doktrina ken Katulagan 78:6

Maibinglayko dagiti banag nga adda kaniak kadagiti dadduma.

Kayat ti Nailangitan nga Ama a siwayawayatayo a mangibinglay kadagiti bendisiontayo iti tunggal maysa tapno agbalintayo a “maipatas kadagiti naindagaan a banag” ken kadagiti “nainlangitan a banag” (bersikulo 6).

Dagiti Mabalin nga Aktibidad

• Tapno maisurom no ania ti kaipapanan ti “maipatas kadagiti naindagaan a banag” (bersikulo 6), ikkam dagiti ubbing kadagiti ladawan ti tao nga agkasapulan (kas kadagiti tao a mabisbisin, nasugatan, wenno malamlammin). Kalpasanna ikkam dagiti dadduma nga ubbing kadagiti banag a makatulong (kas iti taraon, benda, wenno ules). Awisem dagiti ubbing a mangibinglay no ania ti adda kadakuada a makatulong kadagiti tao iti ladawan. Bay-an a maaddaan iti batang ti tunggal ubing a mangibinglay. Tulongam dagiti ubbing a maawatan a kayat ti Nailangitan nga Ama a maaddaan dagiti annakna ti kasapulanda, ket tapno maaramid daytoy masansan a kiddawennatayo a mangibinglay no ania ti adda kadatayo kadagiti dadduma.

• Ibasam kadagiti ubbing dagiti binatog iti baba ti umuna a dua a ladawan “Chapter 28: The Prophet Joseph Goes to Missouri Again” (Doctrine and Covenants Stories, 108). Kiddawem kadagiti ubbing nga agpammarang a tumultulongda iti maysa a tao a mangibangon ti maysa a balay, mangibinglay ti taraon, wenno agserbi iti sabali a wagas. Ania ti mariknatayo no tumultulong ken mangibingbinglaytayo? Tulongam dagiti ubbing a mangpanunot kadagiti banag nga ibingbinglay ni Jesucristo kadatayo.

Doktrina ken Katulagan 78:18

Iturongnakto ni Jesucristo.

No sitatalugodtayo a palubosan ti Apo nga “iturongna[tayo],” mabalintayo nga “agragragsak,” uray pay adda dagiti banag a ditayo “pay la kabaelan … ita” (bersikulo 18).

Dagiti Mabalin nga Aktibidad

• Awisem dagiti ubbing a mangibinglay kadagiti panawen idi maysada a lider, kas iti kaadadda iti sango ti maysa a pila wenno mangidaulo iti musiko. Ania ti aramiden ti maysa a lider? Mangipakita ti maysa a ladawan ti Mangisalakan bayat iti panangbasam ti sumaganad a ragup dagiti balikas manipud iti Doktrina ken Katulagan 78:18: “Agragsakkayo, ta iturongkayo.” Usarem ti panid iti aktibidad iti daytoy a lawas tapno matulongan dagiti ubbing a mangpanunot kadagiti wagas a mabalintayo a suruten ti Mangisalakan.

• Awisem dagiti ubbing a suruten ni Jesus, ken iturongmo ida iti lawlaw ti siled bayat ti panangiggemmo ti ladawanna. Bayat nga ar-aramidem daytoy, aggigiddan nga agkansion iti maysa a kanta maipapan iti panangsurot ken ni Jesucristo, kas iti “I’m Trying to Be like Jesus” wenno “Choose the Right Way” (Children’s Songbook, 78–79, 160). Pagsisinnublatem dagiti ubbing a mangiggem iti ladawan ken mangiturong kadagiti dadduma nga ubbing.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 77

Makaawatak kadagiti sungbat ti saludsodko maipapan kadagiti nasantuan a kasuratan.

Ti panangisuro kadagiti ubbing maipapan iti no kasano a nakaawat ni Joseph Smith kadagiti sungbat ti saludsodna ket makatulongto kadakuada a maammuan a sungbatanto ida ti Nailangitan nga Ama no sapulenda ti pannarabayna. Ibilang ti panangibinglay kadagiti padasmo idi nakaawatka kadagiti sungbat ti karagragmo manipud Kenkuana.

Dagiti Mabalin nga Aktibidad

• Basaem kadagiti ubbing dagiti balikas iti umuna a tallo kadagiti ladawan iti “Chapter 27: The Prophet Continues His Work Despite Persecution” (Doctrine and Covenants Stories, 104). Saludsodem kadagiti ubbing no, kas ken ni Joseph, ket nariknada a saanda a maawatan ti maysa a banag kadagiti nasantuan a kasuratan. Paibinglaymo kadakuada dagiti kapadasanda. Ania ti inaramid ni Joseph tapno makasapul kadagiti sungbat? Isaritam kadagiti ubbing maipapan iti maysa a panawen a tinulongannaka ti Nailangitan nga Ama a makaawat ti maysa a banag kadagiti nasantuan a kasuratan.

• Mabalin nga agrag-o dagiti ubbing a sursuruan a mangbasa ti sumagmamano a bersikulo iti libro ti Apocalipsis a ni Joseph Smith ket adda dagiti saludsodna maipanggep kadagitoy. Kalpasanna mabalinda a kitaen iti Doktrina ken Katulagan 77 no ania ti kayat ti Apo a maawatanna. Piliem ti sumagmamano a bersikulo a mariknam nga adda kaipapananna.

Doktrina ken Katulagan 78:3–7

Kabaelak ti tumulong a “mangipatungpal iti gagem” ni Jesucristo.

Iti benneg 78, nangted ti Apo dagiti espesipiko nga pammilin kadagiti sumagmamano a lider ti Simbaan a mangtulong kadakuada a “mangipatungpal iti gagem” ti Apo (bersikulo 4). Tulongam dagiti ubbing a mangibilang no ania ti mabalin nga akemda iti pannakaipatungpal ti gagem ti Apo.

Dagiti Mabalin nga Aktibidad

• Kiddawem dagiti ubbing a basaen ti Doktrina ken Katulagan 78:4. Ania ti “gagem” a “nangikumitan[tayo]” (akseptado wenno pinilina a suportaran) idi nabuniagantayo? Allukoyem ida a kitaen iti binatog ti nasantuan a kasuratan a kas kadagitoy para kadagiti mabalin a sungbat: Mosiah 18:8–10; Doktrina ken Katulagan 20:37; Moises 1:39.

• Ilawlawagmo kadagiti ubbing a ni Newel K. Whitney ket addaan iti tiangge ket kiniddaw kenkuana ti Apo ken dagiti dadduma pay a lallaki nga usarenda ti sumagmamano kadagiti kuartada tapno tumulong para iti paggastuan ti aramid ti Apo (kitaen ti Doktrina ken Katulagan 63:42–43). Awisem ida a basaen ti Doktrina ken Katulagan 78:3–7 ken sapulenda no ania dagiti rason a nakiddaw nga aramiden dagitoy a lallaki. Kasano koma ti mariknatayo no nakiddaw kadatayo a mangibinglay kas iti inaramid ni Newel? Tulongam ida a mangpanunot kadagiti wagas a makatulong dagiti tao iti aramid ti Apo iti aldawtayo, kas iti panagbayad iti apagkapullo, daton iti panagayuno, panagserbi kadagiti takem, ken dadduma pay.

Doktrina ken Katulagan 78:19

Nasken nga awatek dagiti “amin a banag a siyayaman.”

Masansan nga ad-ada a bendisionannatayo ti Apo no siyayamantayo para kadagiti naitednan kadatayo. Kasano a matulongam dagiti ubbing a sursuruam a siyayamanda kadagiti bendisionda?

Dagiti Mabalin nga Aktibidad

• Kiddawen dagiti ubbing nga basaen ti Doktrina ken Katulagan78:19 ken sapulenda iti no ania dagiti kari ti Apo para kadagiti siyayaman. Tulongam dagiti ubbing a maawatan no ania ti kaipapanan ti “maminggasut”, nalabit babaen iti panangipakitam ti maysa a bassit a banag ken kalpasanna 100 a kapada daytoy a banag.

• Agkansion ti maysa a kanta maipapan iti panagyaman, kas iti “I Am Glad for Many Things” (Children’s Songbook, 151), wenno buyaen ti video a “Think to Thank” (ChurchofJesusChrist.org). Ikkam dagiti ubbing ti panawen a mangaramid kadagiti listaan dagiti banag a pagyamyamananda. Allukoyem ida a mangilista kadagiti adu a banag aginggat’ mabalin iti panawen nga naitedmo kadakuada.

icon ti panagsursuro

Yallukoy ti Panagsursuro iti Pagtaengan

Ibilangmo ti pannakisarita kadagiti nagannak dagiti ubbing a sursuruam ken mangisingasingka iti saludsod a mabalinda a damagen kadagiti annakda maipapan iti maysa a banag a nasursuroda iti klase.

Panangpadur-as iti Panangisurotayo

Paneknekam dagiti naikari a bendision. No awisem dagiti ubbing iti Primary a mangtungpal ti naisangsangayan a pagbatayan, mangibinglay kadagiti kari nga inaramid ti Dios babaen kadagiti propeta para kadagiti mangtungpal kadayta a pagbatayan. Ti maysa a pagarigan ti kari a mabalinmo nga ibinglay ket masarakan iti Doktrina ken Katulagan 78:19. (Kitaen met iti Panangisuro iti Wagas ti Mangisalakan, 35.)

panid ti aktibidad: iturongnakto ni Jesucristo