Ni Joseph Smith a mangisursuro iti Nauvoo

Ni Joseph Smith iti Nauvoo, 1840, ni Theodore Gorka

Nobiembre 8–14

Doktrina ken Katulagan 129–132

“No Makagun-odtayo iti Aniaman a Bendision Manipud iti Dios, Babaen Daytoy ti Panagtulnog”

Inlawlawag ni Elder David A. Bednar: “Saan a panangisuro ti panangisarita ken panangibaga laeng. Ti pannakaikasaba ti ebanghelio iti wagas ti Apo ket iramanna ti panangpaliiw, ken panangdengngeg, ken panangitarus” (“Becoming a Preach My Gospel Missionary,” New Era, Okt. 2013, 6). Ania ti isuro kenka ti Espiritu bayat ti panangpaliiw ken idedengngegmo kadagiti ubbing a sursuruam?

Isuratmo dagiti Impresionmo

icon iti panagbibinninglay

Yawis ti Panagbibinninglay

Pumili iti maysa a topiko manipud kadagiti benneg 129–32, ket paibagam kenka kadagiti ubbing no ania ti nasursurodan maipapan iti dayta a topiko. Kas pagarigan, ania ti ammoda maipapan iti Nailangitan nga Ama wenno iti Kinadios? maipapan iti agnanayon a kallaysa? maipapan iti celestial a pagarian?

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 130:20–21; 132:5

Aggapu dagiti bendision iti panagtulnog iti Dios.

Insuro ni Joseph Smith a maibatay ti tunggal bendision manipud iti Dios iti panagtulnogtayo kadagiti paglinteganna. Kasano a maisurom daytoy a pagbatayan iti wagas a maawatanto dagiti ubbing?

Dagiti Mabalin nga Aktibidad

• Ibinglaymo ti maysa a simple a panangidasig kadagiti ubbing a mangipakita no kasano ti kapateg iti panangsurot kadagiti pangiturong; kas pagarigan, kasaritam ida maipapan kadagiti addang a nasken a surotentayo a mangisagana iti taraon wenno panagay-ayam wenno panangbukel iti maysa a banag. Ania ti mapasamak no saantayo a suroten dagiti pangiturong? (Mabalin nga addaanka ti bukod a padas a mabalinmo nga ibinglay.) Basaem ti Doktrina ken Katulagan 130:21, ken idasigmo dagitoy a pangiturong kadagiti bilin a nasken a surotentayo tapno umawat kadagiti bendision manipud iti Nailangitan nga Ama.

• Kiddawem kadagiti ubbing no makapanunotda iti panawen idi tinungpalda ti maysa kadagiti bilin ti Dios. Kasano ti nariknada? Aggigiddan nga agkansion iti maysa a kanta maipapan iti panagtulnog, kas iti “Keep the Commandments” (Children’s Songbook, 146–47), ket ilasin dagiti bendision ti panagtulnog a nadakamat iti kanta. Pagsaritaan dagiti dadduma pay a banag nga imbilin ti Dios nga aramidentayo. Kasano a bendisionannatayo ti Dios no tungpalentayo dagita a bilin?

Doktrina ken Katulagan 130:22

Addaan iti imortal a pisikal a bagi ti Nailangitan nga Ama ken Jesucristo.

No maawatantayo nga adda bagi ti Dios Ama ken ni Jesucristo a kas kadatayo, mariknatayo nga as-asidegtayo Kadakuada, ket mapatibker ti relasiontayo Kadakuada.

Dagiti Mabalin nga Aktibidad

• Ipakitam kadagiti ubbing ti maysa a ladawan ni Jesucristo, ket awisem ida a mangitudo iti matana, ngiwat, ken dagiti dadduma pay a paset ti bagina. Ket awisem ida a tumakder ken mangitudo kadagiti kapada met la a paset dagiti bukodda a bagi. Agbasa manipud iti Doktrina ken Katulagan 130:22: “Nagtagilasag ken nagtagitulang ti Ama … ; kasta met ti Anak.” Paneknekam a maipada dagiti bagitayo kadagiti bagi ti Nailangitan nga Ama ken ni Jesus.

• Aggigiddan nga agkansion iti maysa a kanta maipapan kadagiti bagitayo, kas iti “Head, Shoulders, Knees, and Toes” (Children’s Songbook, 275), ken awisen dagiti ubbing nga agaramid kadagiti tignay a maigiddan kadagiti balikas. Kiddawen kadagiti ubbing a mangibaga kenka iti sumagmamano a banag a mabalinda nga aramiden kadagiti bagida. Ipeksam ti panagyamanmo para iti bagi nga inted kenka ti Dios. Kasano a maipakitatayo nga agyamyamantayo para iti daytoy naisangsangayan a sagut?

• Awisem dagiti ubbing a mangidrowing kadagiti ladawan ti Nailangitan nga Ama, ni Jesucristo, ken dagiti bagida. Tulongam ida a mangkita no kasano a maipada dagiti bagitayo iti bagi ti Nailangitan nga Ama ken ni Jesus.

Doktrina ken Katulagan 132:19

Inaramid ti Nailangitan nga Ama a makapagdedenna dagiti pamilia iti agnanayon.

Babaen iti bileg ti Apo a mamaglantip ken dagiti ordinansa iti templo, makapagpaut iti agnanayon ti relasion ti pamiliatayo no agtulnogtayo kadagiti katulagantayo.

Dagiti Mabalin nga Aktibidad

• Tulongam dagiti ubbing a mangpanunot kadagiti pagarigan dagiti banag a saan nga agpaut iti agnanayon—taraon a mabangles, sabong a malaylay, ken dadduma pay. Ipakitam ti maysa a ladawan ti pamiliam, ket ibinglaymo no kasano ti riknam maipapan kadagitoy. Paneknekam nga inaramid ti Apo a mabalin daytoy babaen kadagiti ordinansa iti templo, tapno agpaut iti agnanayon dagiti pamilia.

• Lukibem ti Doktrina ken Katulagan iti benneg 132, ket ibagam kadagiti ubbing a daytoy ti maysa a paltiing ken ni Joseph Smith maipapan iti panagasawa ken dagiti pamilia. Ipakitam kadakuada ti bersikulo 19, ket itudom dagiti balikas nga “iti agnanayon” bayat ti panangbasam kadagitoy. Awisem dagiti ubbing a mangbasa kadagitoy a balikas kenka.

• Tulongam dagiti ubbing a mangaramid kadagiti papel a munieka a mangibagi kadagiti miembro iti pamiliada (kitaen iti panid ti aktibidad ita a lawas). Gettengen dagitoy, ket ikabil iti maysa a sobre wenno pagtitiponen dagitoy babaen iti pangipit iti papel tapno mangibagi iti bileg a mamaglantip a mamagbalin nga agnanayon ti pamiliatayo.

  babai ken balasitang iti arubayan ti templo

  Ipalubos dagiti ordinansa iti templo nga agdedenna dagiti pamilia iti agnanayon.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 130:18–19

Kayat ti Nailangitan nga Ama a makagun-odak iti pannakaammo ken saririt.

Adu dagiti banag a magun-odtayo iti daytoy a biag a saantayonto a maitugot iti sumaruno a biag. Ngem maitugottayonto ti “pannakaammo ken saririt[tayo]” (Doktrina ken Katulagan 130:19).

Dagiti Mabalin nga Aktibidad

• Kiddawem kadagiti ubbing nga ibinglayda kenka ti maysa a banag a nasursuroda iti eskuela wennno manipud kadagiti nagannakda. Awisem ida a mangbasa iti Doktrina ken Katulagan 130:18–19 tapno maammuan no ania ti mapasamak iti pannakaammo ken saririttayo iti sumaruno a biag.

• Ania ti isuro ti bersikulo 19 maipapan iti no kasano a magun-odtayo ti pannakaammo ken saririt? Kasano a makapagbalintayo a napasnek ken natulnog bayat ti panangikalikagumtayo nga agsursuro? (Para iti ad-adu pay maipapan iti daytoy a topiko, kitaen iti “Edukasion” iti Para iti Pigsa dagiti Agtutubo [dagiti panid 9–10].)

Doktrina ken Katulagan 130:20–21; 132:5, 21–23

Aggapu dagiti bendision iti panagtulnog iti Dios.

Utobem no kasano a bendisionannaka ti Apo no agtulnogka kadagiti lintegna. Ania dagiti padas a mabalinmo nga ibinglay kadagiti ubbing a mangparegta kadakuada?

Dagiti Mabalin nga Aktibidad

• Agkansionka iti maysa a kanta maipapan iti panagtulnog, kas iti “Keep the Commandments” (Children’s Songbook, 146–47), ken awisem dagiti ubbing a mangbasa iti Doktrina ken Katulagan 130:20–21 ken 132:5. Tulongam ida a mangsapul kadagiti balikas ken kapanunotan iti nasantuan a kasuratan a kapada dagidiay adda iti kanta. Kasano nga awatentayo dagiti bendision manipud iti Dios? Idawat kadagiti ubbing a mangibinglay no kasano a nabendisionanda gapu iti panagtulnogda kadagiti paglintegan ti Dios.

• Aggigiddan a mangbasa iti Doktrina ken Katulagan 132:21–23, ken awisem dagiti ubbing a mangidrowing kadagiti ladawan a mangibagi iti no ania ti nasursuroda manipud kadagitoy a bersikulo. Allukoyem ida nga agbalin a managpartuat, ken isingasingmo nga iramanda kadagiti drowingda dagiti paglintegan wenno bilin a mangtulong kadatayo nga agtalinaed iti akikid a dalan nga agturong iti biag nga agnanayon.

Doktrina ken Katulagan 131:1–4; 132:15, 19

Inaramid ti Nailangitan nga Ama a makapagdedenna dagiti pamilia iti agnanayon.

Aniaman ti agdama a kasasaad iti pamiliatayo, mabalintayo nga agpili itan a mangisagananto kadatayo nga umawat kadagiti bendision ti agnanayon a pamilia iti masangnguanan.

Dagiti Mabalin nga Aktibidad

• Kiddawem ti sumagmamano nga ubbing a mangbasa iti Doktrina ken Katulagan 131:1–4 ken dagiti dadduma pay a mangbasa iti 132:15. Tulongam ida a mangtakuat no ania kadagitoy a bersikulo ti mangisuro maipapan iti panagasawa. Piliem ti kangrunaan a ragup dagiti balikas manipud iti 132:19 (kas iti “no mangasawa ti lalaki iti babai,” “agnanayon a katulagan,” “pinaglantip,” “agtungpal iti katulagak,” “iti agnanayon,” ken “agnanayon nga awan inggana”), ket kiddawem kadagiti ubbing a mangsapul kadagitoy a ragup dagiti balikas iti bersikulo. Ania ti isuro kadatayo dagitoy a ragup ti balikas maipapan iti panagasawa?

• Kansionen ti “Families Can Be Together Forever” (Children’s Songbook, 188), wenno irebyum ti “Chapter 55: A Revelation about Marriage” (Doctrine and Covenants Stories, 198). Kiddawem kadagiti ubbing a dumngeg ken agsagana a mangibinglay no ania ti nasken nga aramidentayo tapno makapagdedenna dagiti pamiliatayo iti agnanayon. Paneknekam nga uray ania man ti agdama a kasasaad ti pamiliatayo, maisaganatayo ti bagbagitayo nga agbalin a paset iti agnanayon a pamilia.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibaga kadagiti pamiliada no kasano ti kadakkel ti ayatda kadakuada ken kayatda nga agkaykaysada a kas agnanayon a pamilia.

Panangpadur-as iti Panangisurotayo

Agbalin a managrikna kadagiti kasasaad ti pamilia. “Maammuan dagiti ubbing ita nga addada iti adu a nagduduma ken naririkut a kita ti pamilia. … Nasken a tulongan[tayo] [dagiti] makarikna nga agmaymaysa, napanawan, wenno adda iti ruar ti alad” (Neil L. Andersen, “Whoso Receiveth Them, Receiveth Me,” Ensign wenno Liahona, Mayo 2016, 49, 52).

panid ti aktibidad: makapagdedenna dagiti pamilia iti agnanayon