“Nobiembre 1–7. Doktrina ken Katulagan 125–128: ‘Naragsak a Timek para kadagiti Sibibiag ken kadagiti Natay,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Nobiembre 1–7. Doktrina ken Katulagan 125–128,” Umaykayo, Sumurot Kaniak—Para kadagiti Indibidual ken Pamilia: 2021
Kaduatayo Ida ken Kakaduadatayo,, ni Caitlin Connolly
Nobiembre 1–7
Doktrina ken Katulagan 125–128
“Naragsak a Timek para kadagiti Sibibiag ken kadagiti Natay”
Laglagipem nga isuratmo dagiti riknam bayat ti panagadalmo iti Doktrina ken Katulagan 125–28 tapno mapanunotmo ida ket maibinglay ida kadagiti dadduma.
Isuratmo dagiti Impresionmo
Iti Agosto 1840, dimngeg ti agladladingit a ni Jane Neyman ken ni Propeta Joseph a nagsao iti pamunpon ti gayyemna a ni Seymour Brunson. Pimmusay met itay nabiit ti agtutubo a bukod nga anak ni Jane a ni Cyrus. Ti mangpakaro iti panagladingitna ket ti kinapudno a di pay nakapagbuniag ni Cyrus, ket nagdanag ni Jane no ania ti kaipapanan daytoy para iti agnanayon a kararuana. Ammo ni Joseph no kasano ti nariknana; napanunotna ti isu met laeng a banag maipapan iti patpatgenna a kabsatna a ni Alvin, a natay met sakbay ti pannakabuniagna. Isu nga inkeddeng ti Propeta nga ibinglay ken ni Jane, ken iti tunggal maysa iti pamunpon, no ania ti impaltiing ti Apo kenkuana maipapan kadagiti natay a saan a nakaawat kadagiti ordinansa ti ebanghelio—ken no ania ti maaramidtayo a makatulong kadakuada.
Ti doktrina ti panagbuniag para kadagiti natay ti nangparegta ken nangpagagar kadagiti Santo; naiturong dagiti kapanunotanda kadagiti pimmusayen a nagannak, lelang ken lelong iti tumeng, ken dadduma pay a miembro ti pamilia. Ita addan namnama para kadakuada! Nakipagrag-o ni Joseph kadakuada, inusarna ti narag-o, makaparegta a pagsasao a mangyebkas no ania ti insuro ti Apo kenkuana maipapan iti pannakaisalakan dagiti natay: “Ipukkaw koma dagiti bantay ti rag-o, ket umkiskayo koma amin a tanap; ket dakayo amin a baybay ken natikag a dagdaga ibagayo ti kinadatdatlag ti Agnanayon nga Ariyo!” (Doktrina ken Katulagan 128:23).
Kitaen iti Saints, 1:415–27; “Letters on Baptism for the Dead,” Revelations in Context, 272–76.
Dagiti Kapanunotan para iti Bukod a Panagadal iti Nasantuan a Kasuratan
Kayat ti Apo a taripatuek ti pamiliak.
Kalpasan ti panagsublina iti pagtaengan manipud iti kaudian iti sumagmamano a misionna iti England, inawat ni Brigham Young ti sabali pay a napateg nga awag manipud iti Apo—a “taripatuen a naimbag ti pamilia[na]” (bersikulo 3), a nagsagaba iti kaawanna. Bayat ti panangutobmo no kasano a mayaplikar kenka daytoy ken iti dadduma pay a balakad iti benneg 126 ibilangmo dagitoy a balikas manipud ken ni Presidente Bonnie L. Oscarson, sigud a Young Women General President:
“Laglagipem a sumagmamano kadagiti kadakkelan a kasapulan ket mabalin a dagiti mismo nga adda iti sangoyo. Irugiyo ti panagserbiyo kadagiti bukodyo a pagtaengan ken iti uneg ti bukodyo a pam-pamilia. Dagitoy dagiti relasion a mabalin nga agnanayon. Uray no—ket nalabit a nangnangruna no—nakurang ngem ti naan-anay ti kasasaad ti pamiliam, makabirukka kadagiti wagas tapno makapagserbi, makaitag-ay, ken mangpapigsa. Rugiam no sadino ti ayanmo, ayatem ida a kas isuda, ken agsagana para iti pamilia a kayatmo a maaddaan iti masakbayan” (“The Needs before Us,” Ensign wenno Liahona, Nob. 2017, 27).
Kitaen met iti “Take Special Care of Your Family,” Revelations in Context, 242–49.
Doktrina ken Katulagan 127:2–4
Ammo ti Apo dagiti rag-ok ken ladingitko.
Ulbod a pammabasol ken pammutbuteng iti pannakatiliw manen ti nangpilit ken ni Joseph Smith a naglemlemmeng iti Agosto 1842. Ngem dagiti balikas nga insuratna kadagiti Santo kadagitoy a panawen (itan ti Doktrina ken Katulagan 127) napnuan iti panangnamnama iti nasayaat ken rag-o. Ania ti isuro dagiti bersikulo 2–4 maipapan iti Dios? maipapan no kasano a masarangetmo dagiti bukod a pannubok?
Ibilangmo ti panangisurat no kasano a kanunongannaka ti Apo iti “adalem a danum” iti panagbiagmo.
Doktrina ken Katulagan 127:5–8; 128:1–8
“Ania man nga isuratyo iti daga, maisuratto iti langit.”
Bayat ti panangbasam iti Doktrina ken Katulagan 127:5–8; 128:1–8, sapulem dagiti gapu no apay nga inikkan ti Apo ni Joseph Smith kadagiti kasta a naipangruna a pangiturong maipapan iti panagisurat kadagiti panagbuniag para kadagiti natay. Ania iti isuro kenka daytoy maipapan iti Apo ken ti aramidna?
Ti panagserbi iti templo para kadagiti kapuonantayo ti mamagbegkes iti puspusotayo kadakuada.
Doktrina ken Katulagan 128:5–25
Ti pannakaisalakan dagiti kapuonak ket napateg unay iti pannakaisalakanko.
Nalawag no ania ti impalgak ti Dios babaen ken ni Joseph Smith no apay a dagiti kapuonantayo a saan a nabuniagan iti daytoy a biag ket agkasapulanda iti tulongtayo para iti pannakaisalakanda. Ngem no apay iti panagkunam a ti pannakaisalakan dagiti kapuonantayo ket “nasken ken kasapulan unay iti pannakaisalakantayo”? (kitaen iti Doktrina ken Katulagan 128:15–18; nainayon ti panangyunay-unay).
Isuro tibersikulo 5 a ti ordinansa ti panagbuniag para kadagiti natay ket “insagana ti Apo sakbay ti pannakabukel ti lubong.” Ania iti isuro kenka daytoy maipapan iti Dios ken iti planona? Ania ti inayon ti mensahe ni Presidente Henry B. Eyring a “Gathering the Family of God” iti pannakaawatmo? (Ensign wenno Liahona, Mayo 2017, 19–22).
Inusar ni Joseph Smith dagiti ragup ti balikas a kas “mamagbegkes a bileg,” “mamagtugmok a silpo,” ken “naan-anay a panagtipon” idi nangisursuro maipapan kadagiti ordinansa ti priesthood ken panagbuniag kadagiti natay. Sapulem dagitoy ken dagiti kapada a ragup iti balikas bayat ti panangbasam iti Doktrina ken Katulagan 128:5–25. Ania dagiti sumagmamano a banag a, babaen ken ni Jesucristo, mabalin a mabegkes a sangkamaysa gapu kadagiti ordinansa iti priesthood para kadagiti natay? Apay a ti “natured” ket maysa a nasayaat a balikas a mangiladawan iti doktrina ti pannakaisalakan dagiti natay? (kitaen kadagiti bersikulo 9–11).
Ania ti nakaawisan ti riknam maipanggep kadagiti balikas ni Joseph Smith kadagiti bersikulo 19–25? Kasano nga apektuan dagitoy a bersikulo ti wagas a pakariknaam maipapan iti panagserbi iti templo para kadagiti kapuonam? maipapan ken ni Jesucristo? Ania ti mariknam a makaparegta nga aramidem? (kitaen iti FamilySearch.org/discovery para kadagiti kapanunotan).
Kitaen met iti 1 Taga Corinto 15:29; Dale G. Renlund, “Family History and Temple Work: Sealing and Healing,” Ensign wenno Liahona, Mayo 2018, 46–49; “A Sacrifice of Time” and “Their Hearts Are Bound to You,” videos, ChurchofJesusChrist.org.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
TiDoktrina ken Katulagan 126.Ti panangbasa iti daytoy a balakad ken ni Brigham Young ket mabalin a mangparegta iti pamiliam nga agsarita maipapan iti no kasano a bubosenyo ti ad-adu pay a panawen a mangted iti “[pannaka]taripato a naimbag” (bersikulo 3) iti tunggal maysa.
-
Doktrina ken Katulagan 128:15–18.Ania dagiti sumagmamano a pangisalakan ken mangpaan-anay a bendision ti aramid a family history? Makasarakka ti sumagmamano a kapanunotan iti video “The Promised Blessings of Family History” (ChurchofJesusChrist.org) wenno iti maysa a kanta maipapan iti Family History, a kas “Family History—I Am Doing It” (Children’s Songbook,94).
-
Doktrina ken Katulagan 128:18.Ibilang ti agaramid iti papel a sinankawar nga adda nagan dagiti miembro ti pamilia ken kapuonan iti kada tunggal sipul a mangipakita no kasano a ti family history ken ti aramid iti templo ket mangparnuay iti “mamagtugmok a silpo” a mangikonekta kadatayo kadagiti kapuonantayo. Nalabit mabalinyo nga aramiden ti sumagmamano a panagsukisok iti FamilySearch.org a mangsarak kadagiti nayon pay a miembro ti pamilia ket kitaen no kasano ti kaatiddug ti pagdakkelan ti kawar.
-
Doktrina ken Katulagan 128:19–23.Nalabit a mabalin a sukisoken dagiti miembro ti pamilia dagitoy a bersikulo kadagiti balikas a mangipakita iti gagar ken regta ni Joseph Smith maipapan iti ebanghelio ken iti pannakaisalakan dagiti natay. Mabalin nga ibinglay dagiti miembro ti pamilia dagiti kapadasan a namagbalin met kadakuada a naggagar maipapan iti daytoy nga aramid—wenno makapagsukisokkayo iti kasta a padpadas a sangkamaysa iti FamilySearch.org/discovery.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Family History—I Am Doing It,” Children’s Songbook, 94.
Dagiti Timek ti Pannakaisubli
Ti Panagbuniag para kadagiti Natay, “ Baro ken Nadayag a Pagsasaritaan”
Ipakita daytoy a sketch ti puente a pagbuniagan iti Templo iti Nauvoo ti pannakaiparabawna iti sangapulo-ket-dua a baka.
Da Phebe ken Wilford Woodruf
Agnanaed ni Phebe Woodruff iti asideg ti Nauvoo idi inrugi nga isuro ni Joseph Smith ti maipapan iti panagbuniag para kadagiti natay. Insuratna maipapan iti daytoy iti asawana, ni Wilford, nga agserserbi idi iti mision iti Inglatera:
“Naammuan ni Brother Joseph … babaen ti paltiing a mabalin a buniagan dagiti adda iti daytoy a simbaan para iti asino man kadagiti kabagianda a natayen ket saan a naaddaan iti gundaway a dumngeg iti daytoy nga ebanghelio, uray pay para kadagiti annakda, nagannak, kakabsat a lallaki ken babbai, lelong ken lelang iti tumeng, uuliteg, ken iikit . … Apaman a mabuniaganda para kadagiti gagayyemda mawayawayaanda manipud iti pagbaludan ket matuntonda ida iti panagungar ken maitugotda ida iti celestial a pagarian—sipupudno nga inawat daytoy a doktrina iti simbaan ket agtultuloyda kas dadakkel nga ummong, sumagmamano dagiti mabuniagan iti kas kaadu ti mamin-16 a daras … iti maysa nga aldaw.”1
Idi agangay kinuna ni Wilford Woodruff maipapan iti daytoy a pagbatayan: “Iti kanito a nangngegko daytoy nagrag-o ti kararuak. … Napanak ket nabuniaganak para iti amin a malagipko a natay a kabagiak. … Nariknak nga isaok ti alleluia idi dimteng ti paltiing a mangipalpalgak kadatayo iti panagbuniag para kadagiti natay. Nariknak nga adda karbengantayo a makapagragsak kadagiti bendision ti Langit.”2
Vilate Kimball
Kas ken ni Sister Woodruff, nangngeg ni Vilate Kimball ti maipapan iti panagbuniag para kadagiti natay idinto a mangikaskasaba ti asawana, ni Heber, iti ebanghelio iti adayo. Insuratna kenkuana:
“Linuktan ni Presidente Smith ti maysa a baro ken nadayag a pagsasaritaan… a nakaigapuan ti panagdur-as iti simbaan. Dayta ti, pannakabuniag para kadagiti natay. Nagsarita ni Pablo maipanggep iti daytoy, iti umuna a TagaCorinto maika-15 a kapitulo ti maika-29 a bersikulo. Inawat ni Joseph iti ad-adda a naan-anay a palawag maipapan iti daytoy babaen ti Paltiing. … Daytoy ket ti pribilehio iti daytoy a simbaan a mabuniagan para kadagiti amin a kabagian a natayen sakbay a dimteng daytoy nga Ebanghelio; uray agsubli kadagiti Lelong ken Lelang iti Tumeng. … Ket no aramidentayo, agtignaytayo a kas ahente para kadakuada; ken ikkan ida iti pribilehio a makaumay iti umuna a panagungar. Kunana nga addanto kadakuada ti Ebanghelio a naikasaba kadakuada. … ngem awan ti kasta a banag a pannakabuniag dagiti espiritu. … Manipud idi naikasaban ditoy daytoy a bilin, agtultuloyen a kanayon a mausar dagiti danum. Kabayatan ti komperensia adda dagiti sagpaminsan manipud iti walo agingga iti sangapulo nga Elder iti karayan iti kada maysa a mangbumbuniag. … Kayatko ti mabuniagan para iti Inak. Napanunotko ti aguray pay agingga a makaawidka ngem ti naudi a gundaway a nagsarita ni Joseph iti daytoy a pagsasaritaan, binalakadanna ti tunggal maysa nga agtignay ket agaramidda, ket wayawayaanda dagiti gagayyemda manipud iti pannakaadipenda iti kaalistuan a panawen agingga a mabalin. Isu a napanunotko nga innakto iti daytoy a lawas, ta adun ti bilang dagiti kaarruba a mapan. Sumagmamano ti nabuniaganen iti adun a daras. … Iti kasta makitayo nga adda gundaway para iti amin. Saan kadi daytoy a maysa a nadayag a doktrina?”3
Phebe Chase
Apaman a naileppas ti puente a pagbuniagan iti Templo iti Nauvoo, naaramid dagiti panangbuniag para kadagiti natay sadiay imbes nga iti karayan. Ni Phebe Chase, maysa nga agnanaed iti Nauvoo, nagsurat iti inana maipapan iti templo, nga inladawanna a ti puente a pagbuniagan kas iti lugar a “pakabuniagantayo para kadagiti minataytayo ket agbalintayo a mangisalakan iti Bantay ti Zion.” Intuloyna nga inlawlawag nga iti daytoy a puente “nabuniaganak para iti patpatgek nga amak ken ti amin a dadduma pay a natayen a gagayyemko. … Ita kayatko a maammuan no ania ti nagan ti tatang ken ti Nanangmo tapno mawayawayaak ida, ta tarigagayak a maikkan iti gin-awa dagiti Natay. … Nagsao manen ti Apo ket insublina it nagkauna nga urnos.”4
Sally Randall
Iti panagsuratna kadagiti gagayyem ken pamiliana maipapan iti panangbuniag kadagiti natay, nalagip ni Sally Randall ti pimmusay nga anakna a ni George:
“O anian a mapannubok a panawen kaniak ken kasla diak pay maitunos nga adda daytoy, ngem … nabuniagan ti amana para kenkuana ket anian a kinadayag a banag a mamati ken maawattayo ti pakabuklan ti ebanghelio a kas naikasaba daytoy ita ket mabalin a mabuniagan para iti amin a natay a gagayyemtayo ket maisalakanda inggana iti kabaelantayo no makaalatayo iti ania man a pannakaammo maipanggep kadakuada.
“Kayatko nga isuratyo koma kaniak ti nagnagan ti amin nga adda pakainaiganna kadatayo a natayen a pakairamanan dagiti lelong ken lelang iti ania man a panawen. Panggepko nga aramiden no ania ti kabaelak nga aramiden tapno maisalakan dagiti gagayyemko ken nasken a maragsakanak unay no sumagmamano kadakayo ti umayto ket tulongandak para iti daytoy naindaklan nga aramid para iti maysa a mangaramid nga is-isuna. … Namnamaek a panunotemto daytoy kas maysa a sabali a doktrina ngem makitamto a pudno daytoy.”5
Adda ti puente a pagbuniagan iti Templo iti Ogden Utah iti likud ti sangapulo-ket-dua a baka.