Pagbaludan ti Carthage

Nobiembre 22–28

Doktrina ken Katulagan 135–136

Isu “Pinaneknekanna ti Misionna ken dagiti Aramidna Babaen ti Bukodna a Dara”

Bayat ti panagadalmo ti Doktrina ken Katulagan 135–36, mabalin nga iparikna ti Apo kenka dagiti nalawag a pannakaawat ken pannakaammo (insights) a mangtulong kenka a mangyaplikar iti no ania ti mabasam. No mapasamak dayta, isuratmo no ania ti isurona kenka.

Isuratmo dagiti Impresionmo

Iti malem ti Hunio 27, 1844, naipupok manen da Joseph ken Hyrum Smith iti pagbaludan, a kinadua da John Taylor ken Willard Richards. Namatida nga inosenteda iti ania man a krimen, ngem intulokda a tiliwenda ida ta mangnamnamada a maliklikan ti kinaranggas a maibusor kadagiti Santo iti Nauvoo. Saan a daytoy ti umuna a gundaway nga impan dagiti kabusor ti Simbaan ni Propeta Joseph iti pagbaludan, ngem iti daytoy a kanito kasla ammonan a saan aa makasubli a sibibiag. Pinadasna ken dagiti gagayyemna a mangliwliwa iti tunggal maysa babaen ti panagbasa iti Libro ni Mormon ken panagkanta kadagiti himno. Kalpasanna nangngeg dagiti kanalbuong ti paltog, ket iti uneg ti sumagmamano a minuto naggibusen ti biag ni Joseph Smith ken ti kabsatna a ni Hyrum.

Ngem saan pay a nanggibus ti nasantuan a panggep nga inarakupda. Ket saan a daytoy ti naggibusan iti Pannakaisubli ti ebanghelio ni Jesucristo. Adu pay a trabaho nga aramiden ken adu pay a paltiing a mangiwanwan iti panagdur-as ti Simbaan. Ti pannakapapatay ti Propeta ket saan a makapapatay iti aramid ti Dios.

Kitaen iti Saints, 1:521–52.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 135; 136:37–39

Pinatalgedan da Joseph ken Hyrum Smith dagiti pammaneknekda babaen iti darada.

Panunotem no kasano koma ti nariknam no nagnanaedka iti Nauvoo idi pinapatayda DA Joseph ken Hyrum Smith (kitaen ti Saints, 1:554 –55). Kasano nga inkarigatam koma ti nangsapul iti kaipapanan daytoy nakaam-ames a pasamak? Ti Doktrina ken Katulagan 135, ti immun-una a naipablaak iti nakurang a tallo a bulan kalpasan ti pannakapapatay, ti mabalin koma a nakatulong. Mabalinmo a markaan dagiti balikas ken ragup ti balikas a nangyeg kenka manen iti pannakaawat ken pammatalged. Ania koma ti isaom iti maysa a tao nga agdamag, “Apay nga ipalubos ti Dios a mapapatay ti Propetana?”

Kitaen met iti Doktrina ken Katulagan 5:21–22; 6:29–30; “Remembering the Martyrdom,” Revelations in Context, 299–306; Teachings of Presidents of the Church: Joseph Smith, 522 –23, 529–40; M. Russell Ballard, “Shall We Not Go On in So Great a Cause?” Ensign wenno Liahona, Mayo 2020, 8–11).

Doktrina ken Katulagan 135:3

Ad-adu ti naaramidan ni Joseph Smith para iti pannakaisalakantayo ngem iti asino man a tao malaksid ken ni Jesucristo.

Panunotem maipapan kadagiti bendision a simmangbay kenka a kas miembro iti Simbaan ni Jesucristo. Mano kadagitoy ti bunga ti mision a nagapuanan ni Propeta Joseph Smith? Ti Doktrina ken Katulagan 135:3 manginagan iti sumagmamano a naindaklan a banag a naipatungpal ni Joseph Smith iti 24 a tawen kalpasan ti Umuna a Parmata. Kasano nga inapektuannaka dagitoy a banag ken ti relasionmo iti Nailangitan nga Ama ken ni Jesucristo? Ibilangmo ti panangisurat iti pammaneknekmo maipapan ken ni Propeta Joseph Smith. Asino ti mabalin nga agkasapulan a dumngeg iti pammaneknekmo?

Doktrina ken Katulagan 136

Ikkannak ti Apo iti balakad para kadagiti “panagdaldaliasatko” iti biag.

Kalpasan a napapanawda manipud iti Nauvoo, naipasango dagiti Santo iti atiddog a panagdaliasat nga agturong iti Salt Lake Valley, ket nabayag ken narigat ti sumagmamano nga umuna a sangagasut a milia. Ni Brigham Young, nga isu itan ti nangidaulo iti Simbaan kas Presidente ti Korum dagiti Sangapulo-ket-dua nga Apostol, ket nariribukan maipapan iti no kasano a makalasatda iti nabati a panagdaliasatda. Nangipasdek iti temporario a pagindegan a naawagan iti Winter Quarters ken dimmawat iti pannarabay. Kas sungbat, inikkan ti Apo isuna iti paltiing, nga itan ti benneg 136. Maibilang ti dadduma pay a banag, impalagip daytoy a paltiing kadagiti Santo “a napateg ti ugalida iti panagdaliasatda kas iti pagtungpalanda” ken “nangtulong a mangbalbaliw iti lumaud a panagindeg manipud iti naleddaang a panagkasapulan nga agbalin a maysa a napateg a naibinglay a naespirituan a padas” (“This Shall Be Our Covenant,” Revelations in Context, 308).

Panunotem daytoy a konteksto bayat ti panangbasam iti benneg 136. Ania ti balakad a masarakam a makatulong a mamagbalin ti narigat a pannubok iti biagmo a “napateg … a naespirituan a padas”? Mabalinmo pay nga utoben no kasano a makatulong kenka ti balakad a mangipatungpal iti pagayatan ti Apo iti biagmo, kas ti panangtulong dagiti nagkauna a Santo iti naririgat a panagdaliasat iti Laud.

Kitaen met iti “This Shall Be Our Covenant,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics.

Winter Quarters, ni Greg Olsen

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 135:1, 3.Tapno matulongan dagiti miembro ti pamilia a makaawat iti no ania ti kayat a sawen dayta a ni Joseph Smith “impatalgedna ti misionna ken dagiti aramidna babaen ti bukodna a dara,” mabalin a buyaen ti pamiliam ti video “Testimony of the Book of Mormon” (ChurchofJesusChrist.org; kitaen met iti Jeffrey R. Holland, “Safety for the Soul,” Ensign wenno Liahona, Nob. 2009, 88–90). Ania ti makaawis iti riknatayo maipapan kadagitoy a bersikulo? Kasano nga agbalintayo a napudpudno kadagiti pammaneknektayo, uray no saan a maidawat kadatayo ti panangted iti biagtayo para kadagitoy?

Doktrina ken Katulagan 135:3.Tapno ilawlawag no ania ti kaipapanan ti palawag nga “ad-adu [ti inaramid ni Joseph Smith], malaksid laeng ken ni Jesus, para iti pannakaisalakan dagiti tao iti daytoy a lubong, ngem iti asino man a tao,” ibilang ti panangrebiyu no ania ti nasursuro ti pamiliam maipapan ken ni Joseph Smith ita a tawen. Mabalinmo nga usaren dagiti ladawan manipud iti daytoy a resource tapno matulongam ida a manglagip iti no ania ti nasursuroda ken awisem ida a mangibinglay kadagiti paggugustoda nga estoria wenno pannursuro. Apay a managyamantayo para ken ni Propeta Joseph Smith ken para iti no ania ti naaramidan ti Apo babaen kenkuana? Mabalinmo met a buyaen ti video “Joseph Smith:The Prophet of the Restoration” (ChurchofJesusChrist.org).

Doktrina ken Katulagan 136.Idi impalgak ti Apo ti benneg 136, naaddaan dagiti Santo iti atiddog, narigat a panagdaliasat iti masanguananda, babaen ti panangiturong ni Brigham Young (kitaen kadagiti kapitulo 58,60, ken 62 iti Doctrine and Covenants Stories, 206–8, 211–16, 222–24). Bayat ti panagbasayo iti benneg 136 nga aggigiddan, panunotem maipapan kadagiti narigat a banag a mabalin a sanguenyo kas pamilia. Ania a balakad ti masarakantayo iti daytoy a paltiing a makatulong kadatayo tapno maaddaan iti gundaway a magun-od iti tulong ken bileg ti Apo?

Doktrina ken Katulagan 136:4.Ania ti kayat a sawen ti “magnatayo iti amin nga ordinansa ti Apo”? Kasano nga inapektuan dagiti ordinansa a naawattayo dagiti inaldaw a panagbiagtayo?

Para iti ad-adu pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Praise to the Man,“ Hymns, no. 27.

Panangpadur-as iti Bukod a Panagadal

Sapulen ti ayat ti Dios. Insuro ni Presidente M. Russell Ballard, “[Ti] ebanghelio ket maysa nga ebanghelio ti ayat—ayat para iti Dios ken ayat para iti tunggal maysa” ”God’s Love for His Children,” Ensign, Mayo 1988, 59). Bayat ti panangbasam kadagiti nasantuan a kasuratan, ibilangmo ti panangisurat wenno panangmarka kadagiti pammaneknek iti ayat ti Dios.

Awan Dakdakkel nga Ayat iti Tao, ni Casey Childs