Umayen ti Nobio, ni Elizabeth Gibbons

Nobiembre 15–21

Doktrina ken Katulagan 133–134

“Agsaganakayo iti Yaay ti Nobio”

Insuro ni Presidente Henry B. Eyring: “Nangrugi ti Pannakaisubli ti ebanghelio iti maysa a napakumbaba a saludsod a nautob iti maysa a napakumbaba a pagtaengan, ken makapagtultuloy daytoy iti tunggal pagtaengantayo” (“A Home Where the Spirit of the Lord Dwells,” Ensign wenno Liahona, Mayo 2019, 25).

Isuratmo dagiti Impresionmo

Idi apag-19 a bulan pay la ti Simbaan, nangbuangay ni Propeta Joseph Smith ken dagiti dadduma a lider ti Simbaan kadagiti napursigi a plano a mangummong kadagiti paltiing ti Dios iti ud-udina nga aldaw nga agbalin a maysa a libro ken maimaldit iti 10,000 a kopia—paminduaenna ti immuna a pannakaimaldit ti Libro ni Mormon. Daksanggasat, ta ti dakkel a gastos ti nangtubeng kadagitoy a plano, ket dinarup dagiti bunggoy a mangriribuk ti pagimalditan ti Simbaan bayat a manarimaan ti naannayas a panagimaldit. Inwarawarada dagiti saan pay nagalutan a pinanid, ket nupay nataginayon dagiti natutured a Santo ti sumagmamano kadagitoy, awan dagiti kumpleto a kopia ti Libro dagiti Bilin ti naammuan a nakalasat.

No ania ita ti ammotayo a kas iti benneg 133 ti Doktrina ken Katulagan ti nairanta a nayon (appendix) ti Libro dagiti Bilin, a kasla nabileg a konklusion iti gibus dagiti naipablaak a paltiing ti Apo. Iballaagna ti maysa a yaay ti aldaw ti panangukom ken ulitenna nga ipakaasi ti waragawag a mabirukan iti intero a kabaruanan a paltiing: aglibas iti kinainlubongan, nga isimbolo ti Babilonia; mangbangon iti Zion; agsagana para iti Maikadua a Yaay; ket iwaras daytoy a mensahe “iti tunggal pagilian, ken kakabsat, pagsasao ken tattao” (bersikulo 37). Bayat ti saan a pannakatungpal dagiti orihinal a plano ti Libro dagiti Bilin, daytoy a paltiing ti maysa a palagip ken saksi a ti aramid ti Apo ket saan a mapengdan, “ta ipakitananto ti nasantuan a takiagna …, ken amin a suli ti daga makitadanto ti panangisalakan ti Diosda” (bersikulo 3).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 133

Dagiti kinapudno iti Doktrina ken Katulagan ti mabalin a mangisagana kaniak a mangaramid iti trabaho ti Dios.

No dadduma aggibus dagiti libro iti konklusion a maulit a maipalawag wenno manggupgop kadagiti kangrunaan a punto iti libro. Benneg 133 ti immuna a nairanta a panggibus iti Libro dagiti Bilin, ket mabalin a napateg a basaen daytoy a benneg nga addan iti kasta a pampanunoten. Ania dagiti punto a yunay-unay ti Apo maipapan iti aramidna? Ania ti isuro dagiti bersikulo 57–62 kenka maipapan iti papel a kayat ti Apo nga akmem iti aramidna?

Doktrina ken Katulagan 133:1–19

Kalikagum ti Apo nga agsaganaak para iti Maikadua a Yaayna.

Agpada a benneg 1, ti pakauna ti Apo iti Doktrina ken Katulagan, ken benneg 133, ti orihinal nga appendix iti libro, mangrugi iti isu met la a pakaasi manipud iti Apo: “Imdenganyo, O dakayo a tattao ti simbaanko” (Doktrina ken Katulagan 1:1; 133:1). Ania ti kayat a sawen ti imdengan? (kitaen ti Pangiwanwan iti Nasantuan a Kasuratan,“Imdengan,” scriptures.ChurchofJesusChrist.org). Ania dagiti awis wenno bilin a kayat ti Apo kenka nga imdengan iti Doktrina ken Katulagan 133:1–19? Ania ti naparegta nga aramidem tapno nasaysayaat ti panagsaganam para iti yaayna? Kasano a matulongam dagiti adda iti lawlawmo nga agsagana?

Kitaen met iti Mateo 25:1–13; D. Todd Christofferson, “Preparing for the Lord’s Return,” Ensign wenno Liahona, Mayo 2019, 81–84.

Doktrina ken Katulagan 133:19–56

Naragsakto para kadagiti nalinteg ti Maikadua a Yaay.

Bayat ti panangbasam iti Doktrina ken Katulagan 133:19–32 maipapan kadagiti pasamak a maikaduanto iti Maikadua a Yaay ti Mangisalakan, mabalinmo nga utoben no ania ti isingasing kenka dagiti pangiladawan kadagitoy a pasamak maipapan iti Mangisalakan ken ti aramidna. Ania dagiti mabalin a naespirituan a panangyaplikar a masarakam kadagitoy a panangiladawan?

Bayat ti panangbasam iti pannakailadawan ti panagsubli ti Mangisalakan kadagiti bersikulo 32–56, ania dagiti gapu ti panangpadpadaanmo iti dayta naindaklan nga aldaw? Ania dagiti balikas wenno ragup ti balikas a pangiladawan ti ayat ti Apo kadagiti taona? Ibilangmo ti panangisuratmo kadagiti bukodmo a padas nga addaan “iti managayat a kinaaasi ti Apo[yo], ken ti amin nga insagutna [kadakayo] a maibatay iti kinaimbagna” (bersikulo 52).

Doktrina ken Katulagan 134

“Impasdek ti Dios dagiti gobierno para iti pagimbagan ti tao.”

Kumplikado ti pannakinaig dagiti nagkauna a Santo iti gobierno. Idi napilitan a napapanaw dagiti Santo iti Jackson County, Missouri, idi 1833, awan naawatda a suporta wenno bayad manipud iti gobierno a lokal wenno nasional iti baet dagiti kiddawda a tulong. Iti dayta met la a gundaway, sumagmamano a tao iti ruar ti Simbaan ti nangipatarus kadagiti pannursuro maipapan iti Zion a ti kayatna a sawen a pinagkedkedan dagiti Santo ti turay dagiti gobierno iti daga. Doktrina ken Katulagan 134 ket naisurat, ti pasetna, a mangilawlawag ti saad ti Simbaan iti gobierno.

Kasano ti nasken a riknaen dagiti miembro ti Simbaan maipapan kadagiti gobierno? Bayat ti panangadalmo ti benneg 134, ibilangmo ti mangaramid ti dua a listaan: maysa a listaan ti maipapan kadagiti pagbatayan a sursuruem maipapan iti gobierno ken ti sabali pay ti maipapan kadagiti pagrebbengan dagiti makipagili. Kasano a nakatulong dagitoy a kapanunotan kadagiti nagkauna a Santo? Kasano a mayaplikarda no sadino ti pagnanaedam?

Kitaen met iti Pagannurotan ti Pammati 1:11–12; Gospel Topics, “Religious Freedom,” topics.ChurchofJesusChrist.org.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 133:4–14.Ti naespirituan a kasupadi ti Zion ket ti Babilonia—maysa a nagkauna a siudad nga iti intero a nasantuan a kasuratan isimbolona ti kinadangkes ken naespirituan a pannakaadipen (kitaen iti D. Todd Christofferson, “Umaykayo iti Zion,” Ensign wenno Liahona, Nob. 2008, 37; Pangiwanwan iti Nasantuan a Kasuratan, “Babel, Babilonia,” scriptures.ChurchofJesusChrist.org). Adda kadi ania man a kasapulanyo nga aramiden kas maysa a pamilia nga, iti naespirituan a kaipapanan, “inkayo … rummuarkayo iti Babilonia” (bersikulo 5) ken “inkayo … iti … Zion”? (bersikulo 9).

Dokrina ken Katulagan 133:20–33.Kabayatan ti sangkamaysa a panangbasayo kadagitoy a bersikulo, mabalin ti pamiliam nga agdrowing kadagiti ladawan iti no ania iti panagkunada a kayariganto ti Maikadua a Yaay. Mabalinmo met ti agpatokar wenno agkansion iti maysa a kanta maipapan iti Maikadua a Yaay, kas iti “When He Comes Again” (Children’s Songbook, 82–83), ken paglilinnawagan no ania ti kabaelan ti pamiliam nga isagana para iti Yaayna.

Doktrina ken Katulagan 133:37–39Magustuan kadi ti pamiliam ti mangbasa kadagitoy a bersikulo “iti napigsa a timek”? (bersikulo 38). Ania ti kayat a sawen iti ibinglay ti ebanghelio iti napigsa a timek? Ania dagiti kinapudno a maibinglaytayo?

Doktrina ken Katulagan 134:1–2.Tapno matulongam ti pamiliam a maawatan ti pateg ti gobierno, mabalinyo a paglilinnawagan dagiti saludsod kas kadagitoy: Kasano a nabendisionan ti pamiliatayo iti kaadda dagiti paglintegan? Kasano a nabendisionan ti pagiliantayo iti kaadda dagiti paglintegan? Makaaramidkayo met wenno koloran ti maysa a ladawan iti bandera ti pagilianyo wenno ikabesa ti maikasangapulo-ket‑maysa ken maikasangapulo-ket‑dua a pagannurotan ti pammati.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: ““Come, Ye Children of the Lord,”,” Hymns, no. 58.

Panangpadur-as iti Bukod a Panagadal

Isuro ti nalawag ken simple a doktrina. Iladawan ti Apo ti ebangheliona kadagiti balikas a “silalawag” ken “nalaka a maawatan” (Doktrina ken Katulagan 133:57). Ania ti isingasing dagitoy a balikas kenka maipapan iti pannakaisuro ti ebanghelio iti pagtaengam?

Ni Cristo iti Nalabaga a Robana, ni Minerva Teichert