Ni Joseph Smith a mangisursuro iti Nauvoo

Ni Joseph Smith iti Nauvoo, 1840, ni Theodore Gorka

Nobiembre 8–14

Doktrina ken Katulagan 129–132

“No Makagun-odtayo iti Ania Man a Bendision Manipud iti Dios, Babaen ti Panagtulnog”

Isuro dagiti benneg 129–32 dagiti adu a napapateg a pagbatayan, sumagmamano laeng a dagiti naugedan iti daytoy a balabala. Ania dagiti dadduma pay a kinapudno a masarakam?

Isuratmo dagiti Impresionmo

Kinuna iti naminsan ni Brigham Young maipanggep ken ni Joseph Smith “Mailawlawagna dagiti nailangitan a banag tapno maawatan ida dagiti tao” (iti Teachings of Presidents of the Church: Joseph Smith, 499–500). Nangnangruna daytoy a pudno kadagiti pannursuro ti Propeta iti Nauvoo idi 1840s, sumagmamano kadagitoy ti naisurat iti Doktrina ken Katulagan 129–32. Ania ti langa ti Mangisalakan? “Isu ket tao a kas kadatayo.” Ania ti langa ti langit? “Dayta met laeng a pannakipulapol nga adda kadatayo ditoy ti addanto kadatayo sadiay” (Doktrina ken Katulagan 130:1–2), ket ti kapatgan a pagnaigantayo iti pamilia iti daytoy a lubong, no nailantipda ti umno a turay, “a rumbeng a napnuan bileg” iti sumaruno a lubong (Doktrina ken Katulagan 132:19). Dagiti kinapudno a kas kadagitoy ti mamagbalin a mariknatayo a di unay adayo ti langit—nadayag, ngem magaw-at.

Ngem kalpasanna, no dadduma mabalin a kiddawen ti Dios kadatayo nga agaramid kadagiti banag a saan unay a nagin-awa a kasla saanda a magaw-at. Para iti adu a nagkauna a Santo, ti panagkallaysa iti ad-adu ngem maysa ket maysa a kasta a bilin. Ti bilin a mangikallaysa iti nayon pay nga assawa ket maysa a nakaro a pannubok ti pammati para ken ni Joseph Smith, ti asawana a ni Emma, ken ti dumani tunggal maysa a nangawat iti daytoy. Tapno maparmekda daytoy a pannubok, kasapulanda ti ad-adu pay a nasayaat a rikna maipapan iti naipasubli nga ebanghelio; kasapulanda ti pammati iti Dios a napigpigsa pay ngem dagiti ania man a bukod a tarigagay wenno bayas. Saanen a maipakat dayta a bilin itan, ngem ti napudno a pagwadan dagita a nagtungpal iti daytoy ket maar-aramid pay laeng ita. Ket paregtaennatayo dayta a pagwadan no maidawat kadatayo nga aramidentayo dagiti bukodtayo a “sakripisio iti panagtulnog” (Doktrina ken Katulagan 132:50).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 130–31

Impalgak ni Joseph Smith dagiti kinapudno a maipanggep iti Kinadios ken “ti lubong nga umay.”

Mabalin a madlawmo dagiti benneg 130–31 ket mabasa a maigidiat bassit iti dadduma pay a benneg iti Doktrina ken Katulagan. Daytoy ti gapu a naibatay dagiti benneg 130–31 kadagiti surat nga indulin ni William Clayton, maysa kadagiti sekretario ni Joseph Smith, maipapan kadagiti banag a nangngegna nga insuro ti Propeta. Kas bungana, dagitoy a benneg ket ad-adda a kasla koleksion ngem dagiti napagtitipon a naidikta a paltiing. Nupay kasta, adda dagiti sumagmamano a gagangay a tema kadagitoy adu a kinapudno. Kas pagarigan, mabalinmo a basaen kadagiti benneg 130–131 nga addaan kadagiti saludsod kas kadagitoy iti panunot: Ania ti masursurok maipapan iti Dios? Ania ti masursurok maipapan iti biag kalpasan daytoy a biag? Kasano nga apektuan daytoy a pannakaammo ti biagko?

Kitaen met iti “Our Hearts Rejoiced to Hear Him Speak,” Revelations in Context, 277–80.

Doktrina ken Katulagan 131:1–4; 132:7, 13–25

Inaramid ti Nailangitan nga Ama a posible a makapagdedenna dagiti pamilia iti agnanayon.

Ti maysa kadagiti kangrunaan a makaliwliwa a kinapudno a naisubli babaen ken ni Propeta Joseph Smith ket ti relasion iti panagasawa ken pamilia ket mabalin nga agpaut iti agnanayon. Insubli ti Apo babaen ken ni Joseph Smith, dagiti ordinansa ken turay a kasapulan tapno mamagbalin nga agnanayon dagitoy a relasion (kitaen iti Doktrina ken Katulagan 132:7, 18–19). Panunotem maipapan kadagiti relasion ti pamilia nga adda kenka wenno namnama a maaddanka iti masanguanan bayat ti panangbasam iti Doktrina ken Katulagan 131:1–4; 132:7, 13–15. Kasano nga apektuan dagitoy a bersikulo ti wagas a panangpanunotmo maipapan kadagitoy a relasion?

No dadduma, nupay kasta, ti pagbatayan ti agnanayon a pamilia ket saan unay a makaliwliwa—makayeg iti gagar, uray pay kinaliday, no ti agdama a situasion ti pamiliatayo ket saan a maikanada iti celestial a pagulidanan. Idi nagdanag ni Presidente Henry B. Eyring maipapan iti kasta a situasion iti bukodna a pamilia, a naawatna daytoy nainsiriban a balakad manipud iti maysa a miembro iti Korum dagiti Sangapulo-ket-dua nga Apostol: “Agbiagka laeng a maikari iti celestial a pagarian, ket ti pannakaurnos ti pamilia ket ad-adda a nakaskasdaaw ngem iti imabalinmo nga ipagarup” (iti “A Home Where the Spirit of the Lord Dwell,” Ensign wenno Liahona, Mayo 2019, 25). Kasano a mabendisionannaka ti panangsurot iti daytoy a balakad iti agdama situasion ti pamiliam?

Kitaen met iti Kristen M. Oaks, “To the Singles of the Church” (Church Educational System devotional for young adults, Sept. 11, 2011), broadcasts.ChurchofJesusChrist.org.

maysa a lalaki ken maysa a babai iti ruar ti Templo iti Accra Ghana.

Makapagbalin nga agnanayon dagiti relasion ti pamilia babaen kadagiti ordinansa ti templo.

Doktrina ken Katulagan 132:1–2, 29–40

Palubosan ti Dios ti panagkallaysa iti ad-adu ngem maysa no ibilinna daytoy.

Asino man ti nakabasa iti Daan a Tulag ti nalabit a nasdaaw maipapan kada Abraham, Isaac, Jacob, Moises, ken dadduma pay a mangikallaysa iti ad-adu ngem maysa nga asawa. Naglabsing kadi iti pannakiabig dagitoy nasasayaat a lallaki? Wenno inanamongan kadi ti Dios dagiti aramidda? Sapulen dagiti sungbat iti Doktrina ken Katulagan 132:1–2, 29–40.

Ti panagkallaysa iti maysa a lalaki ken maysa a babai ti pagrukodan ti Dios iti kallaysa (kitaen ti paulo ti benneg ti Opisial a Palawag 1; kitaen met iti Jacob 2:27, 30). Nupay kasta, adda dagidi panawen iti pakasaritaan idi imbilin ti Dios kadagiti annakna a praktisenda ti panagkallaysa iti ad-adu ngem maysa.

Dagiti immuna a tawen ti naipasubli a Simbaan ti maysa kadagita a panawen ti pannakailaksid. Kalpasan nga inawatna daytoy a bilin, inaramid ni Joseph Smith ken dagiti dadduma pay a Santo ti panagkallaysa iti ad-adu ngem maysa. No kayatmo a sursuruen ti ad-adu pay maipapan iti panagkallaysa iti ad-adu ngem maysa kadagiti nagkauna a Santo iti Ud-udina nga aldaw, kitaen iti “Mercy Thompson and the Revelation on Marriage” (Revelations in Context, 281– 93); Saints, 1:290–92, 432–35, 482–92, 502–4; “Plural Marriage in The Church of Jesus Christ of Latter-day Saints” (Gospel Topics, topics.ChurchofJesusChrist.org); “Why Was It Necessary for Joseph Smith and Others to Practice Polygamy?” (video, ChurchofJesusChrist.org).

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 130:2, 18–19; 132:13, 19.Kasano a mausarmo dagitoy a bersikulo a mangtulong iti pamiliam a mangipangruna kadagiti banag nga agpaut iti agnanayon? Nalabit a mabalinmo nga ipempen iti maysa a maleta wenno bakpak dagiti aytem a mangibagbagi kadagiti banag a, maibatay iti Doktrina ken Katulagan 130:2, 18–19; 132:19, a maitugottayo iti sumaruno a biag, a kas ladawan ti pamilia wenno dagiti nasantuan a kasuratan. Ania ti isuro kadatayo ti Doktrina ken Katulagan 132:13 maipapan kadagiti banag iti lubong? Makaiturong daytoy iti panaglilinnawag maipapan iti panagpokus kadagiti banag nga addaan iti agnanayon a kinapateg.

Doktrina ken Katulagan 130:20–21.Mabalin nga agkansionka iti maysa a kanta maipapan iti kinamanagyaman, kas iti “Count Your Blessings”Hymns, no. 241, ket paglilinnawagan dagiti bendision a naawat ti pamiliam babaen ti panagtulnog kadagiti paglintegan ti Dios. Ania dagiti bendision a namnamaentayo nga awaten? Kasano a maawattayo dagitoy a bendision?

Doktrina ken Katulagan 131:1–4; 132: 15–19.Ti video a “Marriage Is Sacred” (ChurchofJesusChrist.org) mabalin a makatulong iti pamiliam a mangilawlawag kadagiti kinapudno kadagitoy a bersikulo. Kasano ti marikna ti Apo maipapan iti kallaysa? Kasanotayo—naasawaantayo man wenno saan pay—nga agsagana a maaddaan iti agnanayon a kallaysa?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta “Families Can Be Together Forever,” Children’s Songbook,188.

Panangpadur-as iti Bukod a Panagadal

Mangsapul kadagiti kinapudno iti banghelio. No dadduma direkta a mailawlawag dagiti kinapudno iti ebanghelio; ken no dadduma mailadawanda babaen iti pagwadan wenno estoria. Bayat ti panagbasam, saludsodem ti bagim, “Ania ti agnanayon a kinapudno a naisuro kadagitoy a bersikulo?”

siled a pagilantipan iti Templo iti Paris France

Maysa a pagilantipan a siled iti Templo iti Paris France.