Disiembre 13–19

Ti Kaamaan: Maysa a Waragawag iti Lubong

“Ti Kaamaan ti Sentro iti Plano ti Nailangitan nga Ama”

Kinuna ni Presidente Dallin H. Oaks: “Mamatiak a ti ugalitayo a mangusar iti waragawag ti kaamaan ket [maysa a pannubok] para iti daytoy a kaputotan. Agkararagak para iti amin a Santo ti Ud-udina nga Aldaw nga agtakder a natibker iti dayta a pannubok “The Plan and the Proclamation, Ensign wenno Liahona, Nob. 2017, 31). Utobem dagitoy a balikas bayat ti panagadalmo iti waragawag ti kaamaan iti daytoy a lawas.

Isuratmo dagiti Impresionmo

Sakbay a nayanaktayo, pasettayo iti maysa a pamilia—ti pamilia dagiti Nailangitan a Nagannaktayo. Idi immay ti panawen a pumanawtayo iti sidongda, nalabit a makaliwliwa a maammuan nga iti daga, agbalinto met dagiti pamilia a paset iti plano ti Dios. Ti pagtuladan iti daga ket nairanta a mangyallingag iti naan-anay a pagtuladan iti langit.

Awan dagiti pammasingked nga agbalinto a pagulidanan dagiti pamiliatayo iti daga wenno managrebbeng. Ngem kas iti insuro ni Presidente Henry B. Eyring, dagiti pamilia ti “mangted kadagiti annak ti Dios iti kasayaatan a gundaway a mapasangbayda iti lubong iti kakaisuna nga ayat iti daga nga umas-asideg iti nariknatayo iti langit— ayat ti nagannak” (“Gathering the Family of God,” Ensign wenno Liahona, Mayo 2017, 20). Ti pannakaammo a saan a perpekto dagiti pamilia ken maipasangodanto kadagiti idadarup ti kabusor, imbaon ti Dios ti Patpatgenna nga Anak a mangsubbot kadatayo ken mangpaimbag kadagiti pamiliatayo. Ket impatulodna dagiti propeta iti ud-udina nga aldaw iti maysa a waragawag a mangsaluad ken mangpapigsa kadagiti pamilia. No surotentayo dagiti propeta ken mamatitayo iti Mangisalakan, uray pay dagiti mortal a pamilia ket agkurang iti nadiosan a pagulidanan, adda namnama para kadagiti pamilia—iti daga ken iti langit.

Dagiti Kapanunotan para iti Bukod a Panagadal iti Nasantuan a Kasuratan

“Ti kaamaan ti kangrunaan iti plano ti Namarsua.”

“Ti Kaamaan: Maysa a Waragawag iti Lubong” ket nalawag a maipapan kadagiti pamilia. Ngem maipada daytoy maipapan iti plano ti Dios iti pannakaisalakan. Maysa a wagas a panangadal iti waragawag ket ti panangsapul iti no ania ti isuro daytoy maipapan iti biag sakbay daytoy a biag, (premortal), agdama a biag (mortal), ken kalpasan daytoy a biag (postmortal). Ania ti masursurom no adalem ti waragawag iti kastoy a wagas? Kasano a makatulong daytoy kenka a maawatam no apay a napateg ti kallaysa ken ti pamilia iti plano ti Dios?

Kitaen met iti Dallin H. Oaks, “The Plan and the Proclamation,” Ensign wenno Liahona, Nob. 2017, 28–31.

“Magun-od ti ragsak iti biag iti kaamaan no nabangon daytoy kadagiti pannursuro ni Apo Jesucristo.”

Panunotem dagiti parapo innem ken pito ti waragawag ti kaamaan a kas maysa a pagtuladan para iti “ragsak iti biag ti pamilia.” Bayat ti panangbasam kadagitoy a parapo, lasinem dagiti pagbatayan ti “naballigian a kallaysa ken kaamaan.” Kalpasanna panunotem ti maipapan iti maysa a relasion ti pamilia a kayatmo a patibkeren. Ania ti mariknam a makaparegta nga aramiden? Kasano nga iramanmonto ti Mangisalakan kadagiti panagkagumaanmo?

Kitaen met iti Richard J. Maynes, “Establishing a Christ-Centered Home,” Ensign wenno Liahona, Mayo 2011, 37–39. “What Matters Most,” video, ChurchofJesusChrist.org.

Siak ket “agtakderto nga agsungbat iti sango ti Dios” para iti wagas a panangtratok iti pamiliak.

Iraman ti waragawag ti kaamaan dagiti nakaskasdaaw a bendision nga ikari ti Nailangitan nga Ama para kadagiti agtungpal iti balakadna. Iramanna pay dagiti napigsa a ballaag para kadagiti saan nga agtungpal. Ibilangmo ti panangaramid iti maysa a listaan dagiti bendision ken ballaag a masarakam.

Kasano a makapagtignayka iti balakad ti Dios iti waragawag? No nagtakderka iti sango ti Dios ita, ania ti mapagtalkam a mangilawlawag Kenkuana maipanggep kadagiti relasionmo iti pamiliam? Ania ti kasapulan a padur-asem?

Kitaen met iti Alma 5:15–22; Doktrina ken Katulagan 42:22–25; 93:39–44.

Nasken a padakkelen dagiti nagannak dagiti annakda iti ayat ken kinalinteg.

Makaawatak ngata kadagiti naikari a bendision no saan unay a nasayaat ti situasion ti pamiliak?

Insuro ni Elder D. Todd Christofferson: “Ti mangipakdaar kadagiti kangrunaan a kinapudno a mainaig iti kallaysa ken pamilia ket ti saan a panangbaybay-a wenno panangpabassit kadagiti sakripisio ken balligi dagiti asino man a saan a makitaan iti nasayaat iti agdama a realidad. … “Addaan amin kadagiti sagut, addaan amin kadagiti talento; makatulong amin iti pannakaipalgak ti nadiosan a plano iti tunggal henerasion. Adu a nasasayaat, adu a napapateg—uray no dadduma amin a kasapulan itan—mabalin a magun-od iti saan unay a nasayaat a kasasaad. … Paneknekanmi nga addaan iti panagtalek a ti Pannubbot ni Jesucristo ket ninamnama ken, iti kamaudiananna, supapakannanto amin a pannakapaidam ken pannakapukaw para kadagiti umasideg Kenkuana. Awan ti immun-una a natudingan nga umawat iti basbassit ngem iti amin nga adda iti Ama para kadagiti annakna.” (“Why Marriage, Why Family,” Ensign wenno Liahona, Mayo 2015, 52).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

“Ti katatao [gender] ket maysa a napateg a talugading iti pakabigbigan ken panggep ti tao sakbay daytoy a biag, agdama a biag, ken agnanayon.No agbalin a makatulong iti pamiliam a paglilinnawagan ti doktrina a mainaig iti katatao ken panaggusto iti , mabalin a makatulong dagiti sumaganad a pagadawan: Dallin H. Oaks, “Truth and the Plan,“ Ensign wenno Liahona, Nob. 2018, 25–28; Gospel Topics, “Same-Sex Attraction,” topics.ChurchofJesusChrist.org.

“Ti nadiosan a plano ti ragsak.”Tapno matulongam ti pamiliam a mangkita iti kinapateg dagiti pamilia iti plano ti Nailangitan nga Ama, mabalinmo nga isurat ti sakbay daytoy a biag, biag iti daga, ken biag kalpasan ti ipapatay iti tallo a benneg iti maysa a pidaso ti papel. Aggigiddan a sukisokenyo ti waragawag, ket isuratyo iti papel no ania ti masursurom maipapan iti tunggal maysa kadagitoy a paset ti plano ti Dios. Apay a napateg unay dagiti pamilia iti Dios?

“[Mabalin] nga agdedenna dagiti pamilia iti agnanayon.“Mabalinyo met a buyaen ti video “Plan of Salvation—We’re Still a Family” (ChurchofJesusChrist.org). Sukisoken ti waragawag ti pamilia para kadagiti kinapudno a a naawatan ti agtutubo a lalaki iti video a nakatulong kenkuana a maaddaan iti pammati.

“Ragsak iti biag ti pamilia.”Tapno ilawlawag no kasano a magun-od nga ad-adda pay ti “ragsak iti biag ti pamilia[m],” mabalinyo ti aggigiddan nga agkansion ti maysa a kanta maipapan kadagiti pamilia, kas iti “Home Can Be a Heaven on Earth” (Hymns, no. 298). Ania ti masursurotayo manipud iti kanta ken manipud iti ti waragawag ti pamilia a mangyegto iti ad-adda a ragsak iti pamiliatayo? Kasano a masiguradotayo a ti pamiliatayo ket “nabangon kadagiti pannursuro ni Apo Jesucristo”? Ibilang ti panangpili iti maysa a pannursuro a kayatmo nga aramiden itoy a lawas.

“Papigsaen ti pamilia a kas kangrunaan a yunit ti kagimongan.”Kasano a padpadasen ni Satanas a dadaelen dagiti pamilia iti lubong? Kasano a makaaramidtayo iti pasettayo a mangpatibker kadagiti pamilia? Para kadagiti kapanunotan, kitaen ti mensahe ni Sister Bonnie L. Oscarson, “Defenders of the Family Proclamation” (Ensign wenno Liahona, Mayo 2015, 14–17).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Home Can Be a Heaven on Earth,” Hymns, no. 298.

Panangpadur-as iti Bukod a Panagadal

Sapulen iti ayat ti Dios. Insuro ni Presidente M. Russell Ballard, “[Ti] ebanghelio ket maysa nga ebanghelio ti ayat—ayat para iti Dios ken ayat para iti tunggal maysa” (“God’s Love for His Children,” Ensign, Mayo 1988, 59). Bayat ti panangbasam iti ti waragawag ti pamilia, ibilangmo nga isurat wenno markaan dagiti pakakitaan ti ayat ti Dios a nangnangruna a napnuan kaipapanan kenka.