piha Paraimere e rave ra i te hō’ē ’ohipara’a

Fa’a’ohipara’a i te Mai, pe’e mai—nō te Paraimere

Fa’aineinera’a nō te ha’api’i i roto i te Paraimere

’Ia riro te tuatāpapara’a a te ta’ata hō’ē ’e a te ’utuāfare i te fare ’ei pū nō te ’apora’a mai i te ’evanelia. E parau mau te reira nō ’outou ’e nō te mau tamari’i tā ’outou e ha’api’i ra. ’A fa’aineine ai ’outou nō te ha’api’i, ’a ha’amata nā roto i te fāri’ira’a i tō ’outou iho mau ’itera’a i roto i te mau pāpa’ira’a mo’a. E tupu tā ’outou fa’aineinera’a faufa’a roa a’e ’a ’imi ai ’outou i te mau pāpa’ira’a mo’a ’e ’a tītau ai i te fa’aurura’a a te Vārua Maita’i.

E riro ato’a te Mai, pe’e mai—nō te ta’ata hō’ē ’e te ’utuāfare, ’ei tuha’a faufa’a roa nō tā ’outou iho tuatāpapara’a ’e tā ’outou fa’aineinera’a nō te ha’api’i. E tauturu te reira ia ’outou ’ia noa’a te hō’ē hāro’aro’ara’a hōhonu a’e nō te ha’api’ira’a tumu o te mau parau tumu e ’itehia i roto i te mau pāpa’ira’a mo’a.

I roto i tā ’outou fa’aineinera’a, e tae mai te mau mana’o ’e te mau fa’auru’a’īra’a [impression] nō ni’a i te mau tamari’i tā ’outou e ha’api’i ra. E fāri’i ’outou i te mau ’itera’a nāhea te mau parau tumu i roto i te mau pāpa’ira’a mo’a i te ha’amaita’i i tō rātou orara’a. E arata’ihia ’outou nō te fa’auru ia rātou ’ia ’ite mai i teie mau parau tumu, ’a ha’api’i mai ai rātou nā roto mai i te mau pāpa’ira’a mo’a nō rātou iho, ’e nō tō rātou ’utuāfare. E ha’amana’o ’ia vai ara noa nō te mau tamari’i e ’ere tō rātou orara’a ’utuāfare i te mea maita’i roa nō te tuatāpapara’a tāmau a te ’utuāfare i te pāpa’ira’a mo’a ’e nō te pō ’utuāfare.

Mau mana’o nō te ha’api’ira’a

’A fa’aineine ai ’outou nō te ha’api’i, e nehenehe ’outou e fāri’i i te tahi atu fa’aurura’a nā roto i te hi’ohi’ora’a i te ha’api’ira’a i roto i teie rāve’a tauturu. ’Eiaha e fa’ariro i teie mau mana’o ’ei mau arata’ira’a tāta’itahi ’ei mau mana’o rā nō te fa’auru ia ’outou iho. ’Ua mātau ’outou i teie mau tamari’i—’e e rahi atu tō ’outou mātau ia rātou mai te mea ē, e ’ohipa ’outou ’e o rātou i roto i te piha ha’api’ira’a. ’Ua mātau ato’a te Fatu ia rātou, ’e e fa’auru ’oia ia ’outou ma te mau rāve’a maita’i a’e nō te ha’api’i ’e nō te ha’amaita’i ia rātou.

E rave rahi atu ā mau rāve’a tauturu e vai ra nō ’outou nō te fa’a’ohipa ’a fa’aineine ai ia ’outou, e tae noa atu i te mau mana’o i roto i te Mai, pe’e mai—nō te ta’ata hō’ē ’e te ’utuāfare ’e te mau ve’a a te ’Ēkālesia. Nō te mau ha’amāramaramara’a hau atu nō ni’a i teie mau rāve’a tauturu ’e te tahi atu, hi’o « Te tahi atu mau rāve’a tauturu nō te ha’api’i i te mau tamari’i » i roto i teie rāve’a tauturu.

Te tahi mau mea ’ia ha’amana’ohia

• Tei te mau metua te hōpoi’a mātāmua nō te ha’api’i i tā rātou mau tamari’i. ’Ei ’orometua ha’api’i, e hōpoi’a faufa’a roa tā ’outou nō te pāturu, nō te fa’aitoito ’e nō te patu i ni’a iho i te ha’api’ira’a mai i te ’evanelia i te fare. ’Ia vai ara ’outou nō te mau tamari’i ’aita te mau metua e ha’api’i nei i te ’evanelia i tō rātou fare. ’A fa’aō mai te mau tamari’i ato’a i roto i te mau ’āparaura’a ’evanelia, ma te hi’o ’ore i te huru o tō rātou orara’a ’utuāfare.

• E nehenehe te mau tamari’i e ha’api’i mai nā roto i te fa’a’itera’a mai i te mea tā rātou i ’ite. I te tahi taime e tupu te mau taime pūai roa a’e o te ha’api’ira’a ’ia ha’api’i te mau tamari’i i te tahi i te mea tā rātou i ha’api’i mai nā roto mai i te mau pāpa’ira’a mo’a. ’A hōro’a e rave rahi mau rāve’a i te mau tamari’i ’ia fa’a’ite mai.

• E mea ’ōhie a’e nō te mau tamari’i ’ia māramarama i te mau ha’api’ira’a i roto i te Parau Ha’api’ira’a ’e te mau Parau Fafau ’ia ’ite ana’e rātou i te ’ā’amu tumu o teie mau ha’api’ira’a. E nehenehe ’outou e ’ite mai i te ’ā’amu tumu i roto i te Mai, pe’e mai—nō te ta’ata hō’ē ’e te ’utuāfare ’e Te mau ’ā’amu o te Parau Ha’api’ira’a ’e te mau Parau Fafau.

• E mea maita’i ’ia tāpiti-noa-hia. E ’apo maita’i mai a’e te mau tamari’i i te mau parau mau o te ’evanelia mai te mea e ha’api’ihia teie mau parau mau e nā ni’a iho noa, i roto i te mau ’ohipara’a rau. ’Ia ’ite ana’e ’outou ē, e mea maita’i nō te mau tamari’i te hō’ē ’ohipara’a nō te ’apo mai, e feruri ē ’ia nā ni’a iho fa’ahou i te rave i te reira, mai te mea iho ā rā tē ha’api’i ra ’outou i te mau tamari’i ’āpī a’e. E nehenehe ato’a ’outou e hi’o fa’ahou i te hō’ē ’ohipara’a i roto i te hō’ē ha’api’ira’a tahito.

• Tē hina’aro nei te Metua i te Ao ra ’ia manuia ’outou ’ei ’orometua ha’api’i. ’Ua hōro’a mai ’oia e rave rahi mau rāve’a nō te tauturu ia ’outou, ’oia ato’a te mau rurura’a a te mau ’orometua ha’api’i. I roto i teie mau rurura’a e nehenehe ’outou e ’āparau ’e te tahi mau ’orometua ha’api’i i ni’a i te mau fifi tā ’outou e fārerei ra. E nehenehe ato’a ’outou e ’āparau ’e e fa’a’ohipa i te mau parau tumu o te ha’api’ira’a mai te huru Mesia.

• Mai te mea ē, tē ha’api’i ra ’outou i te mau tamari’i ’āpī a’e, ’e tē hina’aro ra ’outou i te tauturu hau atu, hi’o « Pāhonora’a i te mau hina’aro o te mau tamari’i ’āpī a’e » i roto i teie rāve’a tauturu.

• Tē vai ra i roto i teie rāve’a tauturu, te mau arata’ira’a nō te mau hepetoma ato’a o te matahiti. I te mau sābati ’aita e fa’atupuhia te Paraimere, nō te ’āmuira’a titi ānei, ’aore rā, nō te tahi atu tumu, e tāmau noa te mau ’utuāfare i te tai’o i te Parau Ha’api’ira’a ʼe te mau Parau Fafau i te fare mai te au i te tārena i fa’anahohia. ’Eiaha e ha’ape’ape’a nō ni’a i te mau ha’api’ira’a tā ’outou e ’ere ra ; ’a ha’api’i i te mau arata’ira’a ha’api’ira’a hepetoma i fa’anahohia.

vahine e tuatāpapa ra i te buka ha’api’ira’a