Sotavi ni Nodra Gagadre na Gone Sobu

Era sa dau tuvakarau ka nanamaki na gonelalai me ra vulica na kosipeli kevaka e vakavulici ena dua na iwalewale era rawa ni kila kina. Vakauasivi kevaka o vakavulici ira na gone sobu, vakasamataka mo vakayagataka na itaviqaravi vakaoqo me vukea nodra vuli.

• Laga. Na serenilotu kei na sere mai na iVolanisere ni Gonelalai e vakavulica vakaukauwa na ivunau. Vakayagataka na ituvatuva ni ulutaga ena daku ni iVolanisere ni Gonelalai mo kunea kina na sere e veiwekani ki na ivakavuvuli ni kosipeli o vakavulica tiko. Vukei ira na gone me ra vakaveiwekanitaka na ivakavuvuli ni sere ki na nodra bula. Kena ivakaraitaki, e rawa ni o taroga na taro me baleta na vosa se malanivosa eso ena qaqa ni sere. Me ikuri ni laga sere, e rawa ni ra matanataka na sere na gone se ra rogoca voqa voli ga na sere ni ra cakava tiko na itaviqaravi tale eso.

• Vakarogoca se matanataka e dua na italanoa. Ira na gonelalai era taleitaka na italanoa, me ra tukuna ka na rogoca talega. Wasea na italanoa mai na ivolanikalou, mai na nomu bula, mai na itukutuku makawa ni Lotu, se mai na mekasini ni Lotu, ka me ra tukuna na italanoa mai na nodra bula na gone. Vaqara na iwalewale eso mo vakaitavitaki ira kina ena italanoa. E rawa ni ra taura tu na iyaloyalo se iyaya eso, droinitaka na iyaloyalo ni veika era rogoca tiko, matanataka na italanoa, se veivuke ena kena tukuni na italanoa. Vukei ira na gone me ra kila na dina vakosipeli ena italanoa eso o wasea tiko.

• Wilika a dua na ivolanikalou. Era sega beka ni rawa ni wilivola vakalevu na gonelalai sobu, ia se rawa tikoga ni o vakaitavitaki ira ena vuli mai na ivolanikalou. O na gadreva beka mo vakanamata ga ena dua na tikina, malanivosa bibi, se vosa. Ni o wilika i cake e dua na ivolanikalou, e rawa ni o sureti ira na gone me ra tucake se laveta na ligadra ni ra rogoca vakatabakidua e dua na vosa se malanivosa o vinakata mo vakabibitaka. Ena rawa sara mada ga ni ra cavuqaqataka e vica na malanivosa leleka mai na ivolanikalou kevaka era tokaruataka toka vakavica. Ni ra rogoca na vosa ni Kalou, era na vakila na Yalotabu.

• Mo bulabula. Me vaka ni ra dau waribariba na gonelalai, tuva eso na iwalewale me ra veitosoyaki toka—tayabe wavoki, rikarika, kisodali, cuva, taubale, kei na veika tale eso e salavata kei na ivakavuvuli ni italanoa o vakavulica tiko. Era na rawa talega ni mana na iwalewale oqo ni o lagasere vata kei ira.

• Raica toka e dua na iyaloyalo se sarava e dua na vidio. Ni o vakaraitaka vei ira na gone e dua na iyaloyalo se vidio ka veiwekani kei na dua na ivakavuvuli vakosipeli se italanoa ena ivolanikalou, taroga vei ira na taro ena vukea me ra vuli mai na veika era raica tiko. Me kena ivakaraitaki, e rawa mo taroga, “Na cava e yaco tiko ena iyaloyalo se vidio oqo?” se “Na cava e cakava mo vakila?” Na Gospel Library app, medialibrary.ChurchofJesusChrist.org, kei na children.ChurchofJesusChrist.org sa vanua vinaka me ra vakaraica kina na vidio.

• Wasea na veika o sotava kei na ivakadinadina. Ena sega soti beka ni levu na ka e tu me ra wasea na gonelalai sobu me vakataki ira na gonelalai qase cake, ia kevaka o solia vei ira na idusidusi vakatabakidua, sa rawa ni ra wasea na veika era vakila se sa sotava kei na ivakadinadina ni veika era vulica tiko.

• Bulia. Ena rawa vei ira na gone me ra bulia, droinitaka, se rokataka e dua na ka e veiwekani kei na italanoa se ivakavuvuli era vulica tiko. Vakauqeti ira me ra kauta i vale na nodra ibulibuli ka wasea vei ira na lewe ni matavuvale me vukei ira na gone me ra nanuma na veika era sa vulica.

• Vakaitavi ena lesoni vakainaki. E rawa ni vukei ira na gone e dua na lesoni vakaraitaki rawarawa ga me ra kila kina e dua na ivakavuvuli ni kosipeli e dredre toka na kena kilai vinaka. Ni o vakayagataka na lesoni vakaraitaki, vaqara na iwalewale eso me ra vakaitavitaki kina na gone. Era na vuli vakalevu cake ni ra vakaitavi toka mai na nodra sarava wale tu ga e dua na ka e caka tiko.

• Matanataka Ni ra matanataka na gone e dua na ituvaki e rawa ni ra sotava ena nodra bula, sa rawa me ra kila vakavinaka cake na iwalewale ena yaga kina ena nodra bula e dua na ivakavuvuli ni kosipeli.

• Tokaruataki na itaviqaravi. Era na gadreva na gone me ra rogoca vakavica e dua na vakasama me ra qai kila vinaka. Kakua ni rere mo tokaruataka vakavica na italanoa se itaviqaravi, ena lesoni vata sara mada ga. Kena ivakaraitaki, o na rawa ni wasea beka vakavica e dua na italanoa vakaivolanikalou ena sala duidui eso ena dua na gauna ni lesoni—mai na wiliwili mai na ivolanikalou, vakalekalekataka ena nomu vosa, vakaraitaka e dua na vidio, laiva me ra vukei iko na gone ena talanoa, sureti ira me ra matanataka na italanoa, kei na so tale. Kevaka e laki tokaruataki i vale e dua na itaviqaravi a vakayagataki ena kalasi, ena vukei ira na gone na kena tokaruataki me ra vulica ka nanuma.

• Veiwasei kei ira tale eso. Era taracake tiko na gone na maqosa vakaveimaliwai ka ra dau marautaka na vuli kei na qito vakaitabavata. Vakarautaka na madigi eso me rawa kina vei ira na veiwasei, vakaitavi yadudua, ka veitokoni ni ra vuli tiko.

• Vakaitavi ena itaviqaravi duidui eso. E dau lekaleka ga nodra gauna ni vakarorogo na gonelalai sobu, ka duidui na ivakarau era vuli kina. Vakayagataka na itaviqaravi duidui, ka wanonova matua na ivakatakilakila ni nodra sa gadreva na gone e dua na veisau ni itosotoso. Kena ivakaraitaki, o na rairai gadreva beka mo na veisau wasoma mai na itaviqaravi malua eso ki na kena e bulabula cake.

E tiki ni nomu itavi vakaqasenivuli vei ira na gonelalai sobu—me ikuri ni kena vakavulici na ivakavuvuli ni kosipeli—o ya me ra vukei na gonelalai me ra vulica na iwalewale ni vakaitavi matau ena kalasi ni Lotu. Kena ivakaraitaki, era na gadreva beka me ra vulica na veivakaliuci, veiwasei, rokovi ira na kena vo, kei na so tale. Eso na qasenivuli era dau cakava na ivolakabi ni nodra ilesilesi ni vakaitavi na gone yadua ena dua na sala matata (me vaka o cei me masu, taura cake na iyaloyalo, se veisoliaka na pepa). E rawa ni veisau e veimacawa na ilesilesi. Oqo e vukei ira na gone ena nodra vakaitavi ka vakanamata ki na itovo matau ni loma ni valenivuli.

O ira na gone—vakauasivi o ira na gonelalai sobu—dau yaga wasoma vei ira na ivakarau tudei era sa vakamatautaki kina. Me vaka ni dau lekaleka nodra gauna ni vakarorogo na gonelalai sobu ka so na gauna dau dredre me ra vakarorogo tiko ena dua taucoko na gauna ni kalasi, e dau vinaka toka me okati ki na ivakarau tudei oqo na veisau wasoma ni dua na mataqali itaviqaravi ki na dua tale. Kena ivakaraitaki, e rawa ni okati ena ivakarau tudei ni nomu kalasi na cegu ena veigauna eso me ia na qito, rokataki iyaloyalo, lagasere, kei na so tale.