“Sānuali 14–20. Luke 2; Mātiu 2: Kuo Mau Haʻu ke Hū Kiate Ia,” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“14–20 Sānuali. Luke 2; Mātiu 2,” Haʻu, ʻo Muimui ʻIate Au—Maʻá e Palaimelí: 2019
Ke Tau Hū Kiate Ia, tā ʻe Dana Mario Wood
14–20 Sānuali
Luke 2; Mātiu 2
Kuo Mau Omi ke Hū Kiate Ia
Kamata ʻaki haʻo lau ʻa e Mātiu 2 mo e Luke 2. ʻE lava ke tokoni ʻa e Lēsoni ki he uike ní mei he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino kiate koe ʻa e ngaahi vahe ko ʻení, pea ʻe lava ke ʻoatu ʻe he fokotuʻutuʻú ni ha ngaahi fakakaukau ki hono akoʻí.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Kole ki he fānaú ke nau talaatu ʻa e ngaahi meʻa ʻoku nau manatuʻi fekauʻaki mo e ʻaloʻi ʻo Kalaisí. Ko e hā ‘a e ngaahi konga ʻo e talanoá ʻoku nau manako aí?
Akoʻi e Tokāteliné
Fānau Iiki Angé
Naʻe ʻaloʻi ʻa Sīsū.
Naʻe tuku ʻe Sīsū ʻa Hono ʻafioʻanga mo e Tamai Hēvaní, kae lava ke ʻaloʻi Ia ʻi māmani ke Ne hoko ko hotau Fakamoʻui. Te ke lava fēfē ʻo tokoniʻi ʻa e fānaú ke nau manatuʻi e talanoa ʻo hono ʻaloʻi ʻo Kalaisí?
Ngaahi ʻEkitivitī ʻe Ala Fakahokó
-
ʻI hoʻo lau e talanoa ʻo hono ʻaloʻi ʻo Kalaisí, fakaafeʻi e fānaú ke nau fakatātaaʻi ʻa e talanoá pe fakaʻaongaʻi e peesi ʻekitivitī ʻo e uike ní. Vakai foki, “Vahe 5: ʻAloʻi ʻo Sīsū Kalaisí,” Ngaahi Talanoa ʻo e Fuakava Foʻoú, 13–15.
-
Kapau ʻoku ʻi ai, ʻomi ha seti kakato ʻo e ʻAloʻí pea fakaafeʻi ʻa e fānaú ke nau fokotuʻutuʻu ʻa e ngaahi kongá ʻi he ngaahi feituʻu totonú, lolotonga hoʻo fai ange e talanoa ʻo Sīsū Kalaisí. Te ke lava foki ʻo fakaʻaliʻali ange ha fakatātā ʻo e ʻAloʻí (vakai ki he sīpinga ʻi he, lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Tuhu ki ha kakai kehekehe ʻi he fakatātā ʻo e ʻAloʻí pea fakaafeʻi ʻa e fānaú ke nau vahevahe e meʻa ʻoku nau ʻilo fekauʻaki mo e tokotaha takitaha.
-
Hivaʻi fakataha ʻa e ngaahi hiva ʻoku manako taha ai ʻa e fānaú fekauʻaki mo hono ʻaloʻi ʻo Sīsuú. ʻI hoʻo fai iá, fekumi ki ha ngaahi faingamālie ke vahevahe ai hoʻo fakamoʻoni ki he Fakamoʻuí pea fakaafeʻi ʻa e fānaú ke vahevahe ʻa e ʻuhinga ʻoku nau ʻofa ai ʻia Sīsuú.
Te u lava ʻo foaki ha ngaahi meʻaʻofa lelei kia Sīsū.
Naʻe foaki ʻe he Kau Tangata Potó kia Sīsū ha ngaahi meʻaʻofa ʻo e koula, laʻipeno, mo e mula. Te ke lava fēfē ʻo fakaʻaongaʻi e talanoa ko ʻení ke akoʻi ki he fānaú, te nau lava ʻo foaki ha ngaahi meʻaʻofa kia Sīsū—hangē ko e ʻofá, ngāue tokoní, mo e talangofuá?
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo e Kau Tangata Potó ʻi hoʻo toe vakaiʻi ʻenau talanoá, ʻoku ʻi he Mātiu 2:1–12. Te ke lava ʻo fakaʻaliʻali ange ʻa e fakatātā Wise Men Present Gifts (LDS.org).
-
Kofu fakameʻaʻofa ʻa e ngaahi fakatātaá pe ngaahi meʻa ʻokú ne fakafofongaʻi e ngaahi meʻaʻofa ʻe lava ke tau foaki kia Sīsuú. Fakaafeʻi ʻa e fānaú ke tokoni atu ʻi hono fakaava ʻa e ngaahi meʻaʻofá pea aleaʻi e founga ʻoku tau foaki atu ai ʻa e ngaahi meʻaʻofa ko ʻení ki he Fakamoʻuí.
-
Tokoniʻi e fānaú kotoa ke nau tā pe hiki ha lisi ʻo e ngaahi meʻaʻofa te nau lava ʻo foaki kia Sīsuú, hangē ko e “hoko ko ha kaungāmeʻa leleí” pe ko e “lotú.” Fakaafeʻi e fānaú ke nau vahevahe ʻenau ngaahi lisí mo e kalasí pea fili ha meʻaʻofa ʻe taha ke nau ngāue ai he uiké ni.
Naʻe hoko ʻa Sīsū ko ha kiʻi tamasiʻi ʻo hangē ko aú.
ʻE ala tokoni ʻa hono ako fekauʻaki mo e kei siʻi ʻa e Fakamoʻuí, ke fakafekauʻaki ai ʻa e fānaú kiate Ia. ʻEke ki he fānaú ʻa e meʻa ʻoku nau lava ʻo ako mei he ngaahi vēsí ni fekauʻaki mo e founga te nau lava ai he taimí ni ʻo hangē ko Sīsuú.
Ngaahi ʻEkitivitī ʻe Ala Fakahokó
-
Fakaafeʻi ha taha ʻo e toʻu tupu ʻi he uōtí ke ʻaʻahi ki he kalasí pea vahevahe ʻa e talanoa fekauʻaki mo e faiako ʻa Sīsū ‘i he temipalé ʻi Heʻene kei talavoú.
-
Tomuʻa kole ki ha fānau ʻe niʻihi ke nau omi mo ha ngaahi laʻitā ʻo kinautolu ʻi heʻenau kei pēpeé ke vahevahe. ʻEke kiate kinautolu e anga ʻo ʻenau tupu haké. Vahevahe ha niʻihi ʻo e founga ʻo e tupu hake ʻa Sīsuú (vakai, Luke 2:40, 52). Hivaʻi mo e fānaú ʻa e “Ko Sīsuú Naʻá Ne Hangē Ha kiʻi Tamasiʻí,” Tohi Hiva ʻa e Fānaú, 34, pe hiva kehe fekauʻaki mo e Fakamoʻuí.
-
Lau ʻa e Luke 2:52 pea fakamatalaʻi e ʻuhinga ʻo e “potó” mo e “lahí.” Te ke ala kole ki he fānaú ke nau fakahoko e ngaahi tōʻonga ʻokú ne fakahaaʻi e ʻuhinga ke tupulaki ʻi he potó, pea mo loto taha mo e ʻOtuá mo e niʻihi kehé. Hangē ko ʻení, ʻe lava ke nau fakatātaaʻi hono lau ha tohi pe tokoniʻi ha taha ʻoku faingataʻaʻia.
Akoʻi e Tokāteliné
Fānau Lalahi Angé
Naʻe tomuʻa fakahā ʻe he kau palōfita ʻo onoʻahó ʻa e ʻaloʻi ʻo e Fakamoʻuí.
Ne fakatuʻamelie e kau palōfitá mo e kakai tuí ki he ʻaloʻi ʻo e Fakamoʻui ʻi ha laui senituli. ʻI he mahino ʻa e moʻoni ko ʻení, ʻe lava ke tokoni ke maʻu ʻe he fānaú ha loto houngaʻia lahi ange ki he moʻui mo e ngāue fakafaifekau ʻa e Fakamoʻuí.
Ngaahi ʻEkitivitī ʻe Ala Fakahokó
-
Kole ki he fānaú ke nau vahevahe fekauʻaki mo ha ngaahi meʻa ne nau ʻamanaki atu ki ai, hangē ko e hokosia ha ʻaho fāʻeleʻí pe ʻaho mālōloó. ʻAi ke lau ʻe he fānaú e Hilamani 14:2–5 ke nau ʻiloʻi ha meʻa ne ʻamanaki atu ki ai e kau palōfitá.
-
Lau fakataha ha ngaahi kikite ʻo e ʻaloʻi ʻo e Fakamoʻuí (vakai, ʻĪsaia 7:14; 9:6; 1 Nīfai 11:18; Hilamani 14:5). Tokoniʻi e fānaú ke nau hiki e ngaahi fakaikiiki ʻo e ngaahi kikité ni pea fekumi ki hono fakakakato ʻo e kikité ʻi he Luke 2:1–21 mo e Mātiu 2:1–2.
-
Fakaafeʻi ʻa e fānaú ke nau tā ha ngaahi fakatātā ʻo e ʻAloʻí pea vahevahe e ʻuhinga ʻoku nau houngaʻia ai hono ʻaloʻi ʻo Sīsuú.
Ko e Fakaʻapaʻapa ʻa Simione ki he Valevale ko Kalaisí, tā ʻe Greg K. Olsen
Naʻe hoko ʻa Sīsū ko ha kiʻi tamasiʻi ʻo hangē ko aú.
Hangē ko Sīsuú, ʻoku ʻi ai ha misiona mahuʻinga ʻoku teuteu ki ai ʻa e fānau ʻokú ke akoʻí. Ko e hā te nau lava ʻo ako mei he sīpinga ʻa Sīsuú?
Ngaahi ʻEkitivitī ʻe Ala Fakahokó
-
ʻI hoʻo lau e Luke 2:40, 52, tala ki he fānaú ke nau fakafanongo ki he ngaahi meʻa ne fai ʻe Sīsuú. Fakaafeʻi e fānaú ke vahevahe e ngaahi founga kuo nau tupu hake ai talu ʻenau kei siʻí. Vahevahe hoʻo ngaahi aʻusia ʻo hono ako māmālie ʻa e ongoongoleleí; peá ke vahevahe leva hoʻo fakamoʻoní.
-
Fakakakato ʻa e ngaahi ʻekitivitī ʻokú ne fakamatalaʻi e kupuʻi lea ʻi he Luke 2:40, 52. Hangē ko ʻení, ʻe lava ke ke fua e māʻolunga ʻo e fānau takitaha (“[naʻe] tupulaki … [ʻa] Sīsū [ʻi he] lahi”) pe tuku ke nau vahevahe ʻenau ngaahi potufolofola ʻoku nau saiʻia aí (“tupulaki ʻo mālohi ʻi he laumālie”). Tokoniʻi e fānaú ke nau faʻu ha lekooti ʻo e anga ʻo ʻenau tupulakí pea vahevahe ia mo honau fāmilí.
-
Hili hono toe vakaiʻi ʻo e Luke 2:40, 52, fakaafeʻi ʻa e fānaú ke nau vahevahe ʻa e anga ʻo ʻenau fakakaukau pe naʻe fēfē ʻa Sīsū lolotonga ʻEne ʻi he toʻu tatau mo kinautolú. Naʻe fēfē e anga ʻo ʻEne feohi mo ʻEne faʻeé? Hono ngaahi tokouá mo e tuofāfiné?
Te u lava ʻo muimui ʻi he sīpinga ʻa Sīsū Kalaisí.
Neongo ʻene kei siʻí, naʻe akoʻi ʻe Sīsū ʻa e kau matuʻotuʻa ʻi he temipalé. ʻI he founga tatau pē, ʻoku lahi e meʻa ke akoʻi ʻe he fānau ʻi hoʻo kalasí kiate kinautolu ʻoku nau feohí.
Ngaahi ʻEkitivitī ʻe Ala Fakahokó
-
Fakaafeʻi ha tokotaha ke haʻu mateuteu ke ne fakamatala fakanounouʻi ʻa e talanoa ʻi he Luke 2:41–52. Ke tokoni ke mahino ki he fānaú ʻa e talanoá, akoʻi ʻa e ʻuhinga ʻo e “ngāue ʻa e Tamaí”. Hangē ko ʻení, te ke lava ‘o talaange ki he fānaú ʻa hoʻo ngāué pe ngāue ʻa hoʻo ongomātuʻá. Ko e hā ʻa e “ngāue” ʻa Siosefa ko e tamai ʻa Sīsū ʻi he māmaní? (vakai, Mātiu 13:55). Ko e hā ʻa e ngāue ʻa ʻEne Tamai Hēvaní? (vakai, Luke 2:46–49; vakai foki, Mōsese 1:39).
-
Lau fakataha mo e fānaú ʻa e Luke 2:46–49 pea ʻeke ange, “Naʻe founga fēfē hono fakahoko ʻe Sīsū e ‘ngāue ʻa ʻEne Tamaí’?” Tokoni ki he fānaú ke nau lisi pe tā ʻi he palakipoé ʻa e ngaahi founga te nau lava ʻo tokoni ai ke fakahoko foki mo e ngāue ʻa e Tamai Hēvaní.
-
Ke tokoniʻi e fānaú ke langaki ʻenau loto falala, hangē ko e tamasiʻi ko Sīsuú, te nau lava ʻo akoʻi ʻa e ongoongoleleí, tokoniʻi kinautolu ke nau akoako feakoʻiʻaki ha tefitoʻi moʻoni mei he Ki hono Fakamālohia ʻo e Toʻu Tupú.
Poupouʻi e Ako ʻi ʻApí
Fakaafeʻi ʻa e fānaú ke nau akoʻi ki honau fāmilí, ha meʻa ne nau ako fekauʻaki mo hono ʻaloʻi ʻo Kalaisí.
Fakatupulaki ʻEtau Akoʻí
ʻOku fieʻilo mo ako ʻa e fānaú ʻi ha ngaahi founga lahi. ʻOku fiefia ʻa e fānaú ʻi he ako ʻo fakafou ʻi ha ngaahi aʻusia foʻou mo kehekehe. Fakaʻaongaʻi ha ngaahi ʻekitivitī ngaungaue, fakaʻaongaʻi ʻenau ngaahi ongó, fekumi, mo fakahoko ha ngaahi meʻa foʻou. (Vakai, Ko e Faiako ʻi he Founga ʻa e Fakamoʻuí, 25–26.)