“21–27 Sānuali. Sione 1: Kuo Mau ʻIlo ʻa e Mīsaiá,” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“21–27 Sānuali. Sione 1,” Haʻu, ʻo Muimui ʻIate Au—Maʻá e Palaimelí: 2019
21–27 Sānuali
Sione 1
Kuo Mau ʻIlo ʻa e Mīsaiá
ʻI hoʻo lau ʻa e Sione 1, hiki ha ngaahi ongo fakalaumālie ʻokú ke maʻu. ʻE lava ke tokoni atu ʻa eFokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e vahé ni kiate koe. ʻE lava ke ʻoatu ʻe he ngaahi ʻekitivitī ko ʻeni kuo fokotuʻu atú, ha ngaahi fakakaukau ki ha founga ki hono tokoniʻi ʻa e fānaú ke ako e ngaahi tefitoʻi moʻoni ʻi he Sione 1. ʻE lava ke fulihi ʻa e ngaahi ʻekitivitī maʻá e fānau lalahi angé, ʻo ka fie maʻu, maʻá e fānau iiki angé.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Ke tokoni ki he fānaú ke vahevahe e meʻa ʻoku nau ʻilo fekauʻaki mo Sīsuú, ʻe lava ke ke fakaʻaliʻali ange ha ngaahi fakatātā ʻo ʻEne fakakakato e niʻihi ʻo Hono ngaahi fatongia naʻe fakamatalaʻi ʻi he Sione 1. Kole ange leva ke nau fakamatalaʻi e meʻa ʻoku hokó (hangē ko hono faʻu ʻo e māmaní pe ko hono akoʻi ʻo e ongoongoleleí).
Akoʻi e Tokāteliné
Fānau Iiki Angé
Naʻe nofo fakataha ʻa Sīsū mo e Tamai Hēvaní kimuʻa pea toki ʻaloʻí.
Naʻe akoʻi ʻe Sione, naʻe nofo fakataha ʻa Sīsū Kalaisi mo e ʻOtuá kimuʻa ʻi Heʻene moʻui fakamatelié. Naʻa tau nofo fakataha foki mo e ʻOtuá kimuʻa hono fāʻeleʻi kitautolú (vakai, “Ko e Fāmilí: Ko Ha Fanongonongo Ki Māmani,” Ensign pe Liahona, Nōvema 2010, 129). Te ke akoʻi fēfē ki he fānaú ʻa e foʻi moʻoni ko ʻení?
Ngaahi ʻEkitivitī ʻe Ala Fakahokó
-
Fakamatalaʻi ange ʻoku ʻuhinga e “Folofolá” ʻi he Sione 1:1 kia Sīsū. Lau leʻolahi e vēsí, pea kole ki he fānaú ke lea ʻaki e “Sīsū” ʻi he taimi kotoa pē te ke pehē ai “Folofola.” Fakaʻaliʻali ange ʻa e fakatātā Premortal Life (LDS.org). Fakamatalaʻi ange naʻe nofo fakataha ʻa Sīsū Kalaisi mo e Tamai Hēvaní kimuʻa peá Ne toki hāʻele mai ki māmaní.
-
Akoʻi ange ki he fānaú, ne tau nofo fakataha foki mo e Tamai Hēvaní kimuʻa pea tau toki haʻu ki he māmaní. ʻE malava ke ke fakaʻaongaʻi ʻa e “Talateú: Ko e Palani ʻa ʻEtau Tamai Hēvaní,” Ngaahi Talanoa ʻo e Fuakava Foʻoú, 1–5; pe Fakahinohino ki he Ngaahi Folofolá, “Moʻui ʻi he Maama Fakalaumālié,” scriptures.lds.org.
-
Fakaafeʻi ha mātuʻa ke ʻomi ha pēpē ki he kalasí, pea fakaʻaongaʻi ʻeni ko ha faingamālie ke akoʻi ange, ne tau nofo fakataha ʻi hēvani mo e Tamai Hēvaní ko e fānau fakalaumālie kimuʻa pea fāʻeleʻi kitautolú.
Naʻe fakatupu ʻe Sīsū ʻa e meʻa kotoa pē.
ʻOku fakanatula ke fiefia ʻa e fānau tokolahi ʻi heʻenau ʻi he māmaní. ʻE lava ke fakalahi ʻenau fakaʻapaʻapa kia Kalaisí ʻi heʻenau ʻiloʻi ko Ia ʻa e Tupuʻangá.
Ngaahi ʻEkitivitī ʻe Ala Fakahokó
-
Lau fakataha mo e fānaú ʻa e Sione 1:3 pea fakaʻaliʻali ʻa e fakatātā mei he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Tokoniʻi ʻa e fānaú ke nau maʻuloto ʻa e kupuʻi lea “naʻe fakatupu e meʻa kotoa pē ʻe [Sīsū Kalaisi].”
-
Luelue mo e fānaú ʻi tuʻa. Tuku ki he fānaú ke nau taufetongi ʻi hono fakamatalaʻi ha meʻa ʻoku nau sio ki ai, pea kole ki he kalasí ke nau mateʻi e meʻa ʻoku fakamatalaʻí.
-
Kole ki he fānaú ke nau fakakaukau ki ha ngaahi founga te nau lava ai ʻo tokangaʻi lelei ʻa e ngaahi fakatupu ʻa e ʻOtuá ʻi honau ʻātakaí (hangē ko ʻení, ko e angaʻofa ki he fanga monumanú).
Naʻe fakatupu ʻe Sīsū Kalaisi ʻa e māmaní mo e ngaahi meʻa kotoa pē ʻi aí.
ʻE lava ke u fakaafeʻi e niʻihi kehé ke nau haʻu kia Sīsū Kalaisi mo ako ʻo kau kiate Ia.
ʻOku ʻi he Sione 1 ha ngaahi fakamatala ki he kau ākonga ne nau fakaafeʻi ʻa e kakaí ke “haʻu ʻo mamata” ko Sīsū ʻa e ʻAlo ʻo e ʻOtuá. Naʻa mo e longaʻi fānau īkí ʻe lava ke nau muimui ki he sīpingá ni.
Ngaahi ʻEkitivitī ʻe Ala Fakahokó
-
Fakamatalaʻi ange ʻa e founga naʻe akoʻi ai ʻe Sione ʻa ʻAnitelū fekauʻaki mo Sīsuú, pea fakahā ange kau ki he founga ne akoʻi ʻaki ʻe ʻAnitelū ʻa Pitá (vakai, Sione 1:35–42). Vahevahe e founga naʻá ke ako fekauʻaki mo e Siasí, pe fakaafeʻi ha mēmipa foʻou ke ne vahevahe e founga naʻá ne ako ai kau ki he Siasí.
-
Vahevahe ange ʻa e talanoa ʻo hono fakaafeʻi ʻe Filipe ʻa Nataniela ke “haʻu ʻo mamatá” (Sione 1:43–51). Fufuuʻi ha fakatātā ʻo Sīsū ʻi ha puha, pea fakaafeʻi ha toko taha ke ne “haʻu ʻo mamata” ki ai pea fakahā ki he toenga ʻo e fānaú ʻa e meʻa naʻá ne mamata ki aí.
-
Tuku ki he fānaú ke nau valivali e peesi ʻekitivitī ʻo e uike ní, pea poupouʻi kinautolu ke nau fakaʻaongaʻi ia ke fakaafeʻi ha taha ke ako kau kia Sīsū.
-
Kole ki ha tamasiʻi ke talanoa ki ha taimi naʻá ne vahevahe ai mo ha taha ha meʻa, hangē ko ha meʻavaʻinga pe meʻaʻofa. Te tau lava fēfē ʻo vahevahe ʻa e ongoongoleleí? Fai ha talanoa ʻo ha kiʻi tamasiʻi pe taʻahine naʻá ne vahevahe ʻa e ongoongoleleí ki ha kaungāmeʻa, hangē ko e talanoa ʻa ʻEletā M. Russell Ballard fekauʻaki mo Sōsiuá (“Toe Vakaiʻi,” Ensign pe Liahona, Mē 2014, 78–81).
Akoʻi e Tokāteliné
Fānau Lalahi Angé
Naʻe nofo fakataha ʻa Sīsū Kalaisi mo e Tamai Hēvaní kimuʻa pea toki ʻaloʻi mai Iá.
Naʻa mo e teʻeki ke ʻaloʻi Iá, naʻe ʻi ai ha ngaahi fatongia mahuʻinga ʻa Sīsū Kalaisi ʻi he palani ʻa e Tamai Hēvaní. ʻI hoʻo lau ʻa e Sione1:1–5, ko e hā e ngaahi meʻa ʻokú ke saiʻia ai fekauʻaki mo e ngāue ʻa Kalaisi ʻi he maama fakalaumālié?
Ngaahi ʻEkitivitī ʻe Ala Fakahokó
-
ʻEke ki he fānaú pe ʻoku nau ʻilo ha meʻa fekauʻaki mo e meʻa ne fai ʻe Sīsū kimuʻa Hono ʻaloʻí. Fakaafeʻi kinautolu ke kumi e ngaahi talí ʻi he Sione 1:1–5. ʻE ala tokoni ke kumi ʻi he Liliu ʻa Siosefa Sāmitá, Sione 1:1–5 (ʻi he Fakahinohino ki he Ngaahi Folofolá).
-
Vahevahe mo e fānaú ʻa e “Talateú: Ko e Palani ʻa ʻEtau Tamai Hēvaní,” Ngaahi Talanoa ʻo e Fuakava Foʻoú, 1–5. ʻEke ki he fānaú pe ko e hā e meʻa ʻoku nau ako fekauʻaki mo Sīsū Kalaisí.
-
Fakaafeʻi ha fānau ʻe niʻihi ke nau haʻu mateuteu ki he kalasí ke fakaʻaliʻali pe fakamatalaʻi ha meʻa ne nau faʻu. Fakaʻaliʻali ha ngaahi fakatātā ʻo e ngaahi fakatupu ʻe niʻihi ʻa e ʻEikí, pea fakaʻaongaʻi e Sione 1:3 ke fakamatalaʻi ange naʻe fakatupu ʻe Sīsū ʻa e meʻa kotoa pē.
Ko Sīsū Kalaisi ʻa ʻeku māmá.
ʻE lava ke tokoni ʻa e fakataipe ʻo e māmá ke mahino ki he fānaú ʻa e Fakamoʻuí mo ʻEne ongoongoleleí. Te ke ueʻi fēfē ʻa e fānaú ke nau fekumi ki he maama ʻo e Fakamoʻuí ʻi he taimi ʻoku ngali fakapoʻuli ai ʻa e māmaní?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau e Saame 27:1; Sione 1:4–9; Mōsaia 16:9; mo e Tokāteline mo e Ngaahi Fuakava 39:1–2, ʻo fekumi ki ha ngaahi kupuʻi lea ʻoku tatau ai e ngaahi folofola ko ʻení. Ko e hā e founga ʻoku hangē ai ʻa Sīsū Kalaisi ha māmá?
-
Fakaʻaliʻali ha fakatātā ʻo e Fakamoʻuí mo ha ngaahi meʻa ʻoku nau ʻomi ʻa e māmá, hangē ko ha kasa. Ko e hā e founga ʻoku hangē ai ʻa Sīsū Kalaisi ko e ngaahi meʻá ni? Te tau lava fēfē ʻo vahevahe ʻa ʻEne māmá mo e niʻihi kehé? Hivaʻi fakataha e “Ko e ʻEikí ko ʻEku Maama,” Ngaahi Himí, fika 45, pe ko ha toe hiva fekauʻaki mo e maama ʻo e ongoongoleleí.
-
ʻEke ki he fānaú pe ko e hā ha ngaahi meʻa ʻoku nau fai ʻi he taimi ʻoku nau ʻi he fakapoʻulí ai pea ongoʻi ilifiá. Fakamoʻoni ange te nau lava maʻu pē ʻo tafoki ki he Fakamoʻuí ʻi he taimi ʻoku nau ilifia aí.
ʻI heʻeku hoko ko ha tokotaha muimui ʻia Sīsū Kalaisí, ʻoku ou fakaafeʻi e niʻihi kehé ke nau muimui ʻiate Ia.
Fakakaukau ki ha founga te ke lava ʻo fakaʻaongaʻi ai e ngaahi sīpinga ʻi he Sione 1:35–51 ke poupouʻi ʻa e fānaú ke nau fakaafeʻi e niʻihi kehé ke nau ako fekauʻaki mo e Fakamoʻuí.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau fekumi ʻi he Sione 1:35–51 ke ʻiloʻi e ngaahi meʻa ʻoku lea ʻaki ʻe he kakaí ke fakaafeʻi e niʻihi kehé ke nau ako fekauʻaki mo e Fakamoʻuí. Tuku ke nau akoako fakahoko e meʻa ʻe lava ke nau lea ʻaki ke fakaafeʻi ha kaungāmeʻa ke ako fekauʻaki mo Iá.
-
Kole ki he fānaú ke nau fakaʻaongaʻi ʻa e peesi ʻekitivitī ʻo e uike ní ke faʻu ʻaki ha tohi fakaafe te nau lava fakaʻaongaʻi ke fakaafeʻi ʻaki ha kaungāmeʻa pe ko ha mēmipa ʻo e fāmilí ke ako lahi ange fekauʻaki mo Sīsū Kalaisi.
-
ʻOange ki he fānaú ha faingamālie ke nau tala ki he kalasí ha meʻa ʻoku nau manako ai. Tokoni ke ʻiloʻi ʻe he fānaú ʻa e founga ʻoku faitatau ai hono vahevahe e ongoongoleleí mo hono vahevahe ha ngaahi meʻa kehe ʻoku tau manako ai.
Poupouʻi e Ako ʻi ʻApí
Poupouʻi e fānaú ke nau fakaafeʻi ha taha ʻoku nau ʻofa ai ke ako lahi ange fekauʻaki mo Sīsū Kalaisi.
Fakatupulaki ʻEtau Akoʻí
Tokoniʻi e fānaú ke nau fakakaukauloto ki he talanoá. Kumi ha ngaahi founga ke faʻu ha fakatātā ʻo e talanoá, kau ai e fakatātā ʻo e ongoongoleleí, ngaahi tā fakatātaá, vitioó, fanga kiʻi tamapuá, pe tulamá.