Ko e Ikunaʻi ʻe Kalaisi ʻa Sētané, tā ʻe Robert T. Barrett

4–10 Fepueli

Mātiu 4; Luke 4–5

“ʻOku ʻiate Au ʻa e Laumālie ʻo [e ʻEikí]”

Kamata hoʻo teuteu ki he lēsoni ko ʻení ʻaki haʻo lau e Mātiu 4 mo e Luke 4–5. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahe ko ʻení, pea lava ke ʻoatu ʻe he lēsoni ko ʻení ha ngaahi fakakaukau ki hono akoʻí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Kole ki he fānaú ke nau paasi takai ha fakatātā ʻo Sīsū. ʻI hono maʻu ʻe he fānau takitaha ʻa e fakatātaá, fakaafeʻi ia ke ne vahevahe ha meʻa ne fai ʻe Sīsū ʻi Heʻene kei ʻi he māmaní.

Akoʻi e Tokāteliné

Fānau Iiki Angé

Mātiu 4:1–11; Luke 4:1–13

Te u lava ʻo fili ki he totonú ʻo hangē ko Sīsuú.

Ko e fānau īkí ʻoku “ʻikai te nau lava ʻo faiangahala” (T&F 29:47). Ka neongo ia, ʻe lava ke ueʻi ʻa e fānaú ʻe he talanoa ki hono fakasītuʻaʻi ʻe Sīsū ʻa e ngaahi ʻahiʻahi ʻa Sētané, ke nau kamata he taimí ni ke fili ki he totonú.

Ngaahi ʻEkitivitī ʻe Ala Fakahokó

• Fai e talanoa hono ʻahiʻahiʻi ʻo Sīsuú mei he Mātiu 4:1–11. (Vakai foki, “Vahe 11: Ko Hono ʻAhiʻahiʻi ʻo Sīsuú,” Ngaahi Talanoa ʻo e Fuakava Foʻoú, 30–31. ʻI he ngaahi konga ʻi he lēsoní ʻe tāú, fehuʻi ange, “Ko e hā ʻoku mou pehē ʻoku totonu ke fai ʻe Sīsuú?”

• Fakaʻaliʻali ha fakatātā ʻo Sīsū Kalaisi, pea fakamatalaʻi e ngaahi fili ʻe ala fai ʻe ha tamasiʻi pe taʻahine kei siʻi. ʻI he foʻi fili lelei kotoa pē, kole ki he fānaú ke nau manga ʻo ofi ki he fakatātaá. ʻI he foʻi fili hala kotoa pē, kole ange ke nau manga mamaʻo mei ai.

• Tokoniʻi e fānaú ke nau ako e ngaahi lea ki he “Fili e Hala Totonú,” Tohi Hiva ʻa e Fānaú, 82, ʻo fakaʻaongaʻi e ngaahi fakatātā, pe ngaahi ʻata ʻoku fekauʻaki mo e fakalea ʻo e hivá.

Luke 4:18–19

Ko Sīsū Kalaisi ʻa hoku Fakamoʻuí.

ʻOku lisi ʻi he Luke 4:18–19 e ngaahi konga kotoa pē ʻo e ngāue fakafaifekau ʻa Sīsuú. Te ke lava fēfē ʻo tokoniʻi e fānaú ke nau houngaʻia ʻi he meʻa kuó Ne fai maʻanautolú?

Ngaahi ʻEkitivitī ʻe Ala Fakahokó

• Lau e Luke 4:18–19 ki he fānaú, pea fakamatalaʻi e meʻa ne hāʻele mai ʻa Sīsū Kalaisi ki he māmaní ke faí (akoʻi, fakafiemālieʻi, mo fakamoʻui e kakaí). Vahevahe e founga kuó Ne fai ai ʻeni maʻau.

• Fakaafeʻi ha niʻihi ʻo e fānaú ke nau fakangalingali pē ʻoku nau puputuʻu, loto mamahi, pe puke. Kole ki he fānau kehé ke nau fakatātaaʻi ko e hā te nau lava ʻo fai ke tokoniʻi e niʻihi ko ʻení. Fakamoʻoniʻi ange naʻe hāʻele mai ʻa Sīsū Kalaisi ke akoʻi, fakafiemālieʻi, mo fakamoʻui kitautolu, pea ʻoku totonu ke tau muimui ki Heʻene sīpingá.

• Fakaʻaliʻali ha ngaahi fakatātā hono fakakakato ʻe Sīsū ʻEne ngāue fakafaifekaú (vakai, Tohi Fakatātā ʻo e Ongoongoleleí), pea kole ki he fānaú ke nau fakamatalaʻi e meʻa ʻoku fai ʻe Sīsuú. Fakaʻaliʻali ange foki ha ngaahi fakatātā ʻo ha kakai ʻoku nau feinga ke nau hangē ko Sīsuú (te ke ala maʻu ha niʻihi mei he ngaahi makasini ʻa e Siasí).

• Hiki ʻi ha ʻū laʻipepa ha ngaahi kupuʻi lea ʻoku kamata ʻaki e “Koeʻuhí ko Sīsū Kalaisi” (hangē ko e “Koeʻuhí ko Sīsū Kalaisi, ʻe lava ke taʻengata hoku fāmilí”). Fakaafeʻi e tamasiʻi mo e taʻahine takitaha ke fili ha taha ʻo e ngaahi laʻipepá, pea tokoniʻi ia ʻi hono lau ʻa e kupuʻi leá.

Mātiu 4:18–22; Luke 5:1–11

ʻOku fakaafeʻi kitautolu ʻe Sīsū Kalaisi ke tau hoko ko ha kau “toutai tangata.”

Ko e ui ʻa e Fakamoʻuí ke, “Muimui ʻiate au, pea te u ngaohi [ʻa kimoutolu] ko e toutai tangatá” (Mātiu 4:19), ko e ui ia ki he taha kotoa, kau ai e fānaú.

Ngaahi ʻEkitivitī ʻe Ala Fakahokó

• Fakaafeʻi ha fānau ʻe toko ua ke na fakatātā pē ko Saimone Pita mo ʻAnitelū kinaua lolotonga hoʻo lau e Mātiu 4:18–22. Tokoniʻi e fānaú ke nau ʻiloʻi e meʻa ne liʻaki ʻe he kau tangata ko ʻení ka nau muimui kia Sīsuú.

• Tuku ki he fānaú ke nau taufetongi ʻi hono fai e talanoa mei he ngaahi veesi ko ʻení, ʻaki hano fakaʻaongaʻi e fakatātā ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.

• Hiva fakataha e“Te u Muimui he Palani ʻa e ʻOtuá,” Tohi Hiva ʻa e Fānaú, 86. Ko e hā ʻoku lava ke tau ako mei he hiva ko ʻení fekauʻaki mo e muimui kia Sīsū Kalaisí?

• Fakaʻaongaʻi e peesi ʻekitivitī ʻo e uike ní ke aleaʻi mo e fānaú e founga te nau lava ai ke hoko ko e kau “toutai tangata” ʻaki ʻenau muimui kia Sīsuú. Te ke lava foki ʻo fai ha vaʻinga fakatauhoa: kosi ha tatau ʻe ua ʻo ha mataʻi ika, fokotuʻu foʻohifo kinautolu, pea fakaafeʻi ʻa e fānaú ke fulihi takitaha kinautolu he taimi pē ʻe taha ke fakatauhoa.

Ko hono Ui ʻe Kalaisi ha Ongo Ākonga, fai ʻe Gary Ernest Smith

Akoʻi e Tokāteliné

Fānau Lalahi Angé

Mātiu 4:1–11; Luke 4:1–13

Naʻe tā ʻe Sīsū e sīpingá maʻaku ʻaki hono fakasītuʻaʻi e ʻahiʻahí.

Ne ʻahiʻahiʻi foki ʻe Sētane ʻa Sīsū Kalaisi, ka naʻe ʻikai ke Ne tukulolo. Te ke tokoni fēfē ki he fānaú ke nau muimui ki Heʻene sīpingá?

Ngaahi ʻEkitivitī ʻe Ala Fakahokó

• Tā ha saati ʻi he palakipoé ʻo fakahingoa ko e Ngaahi ʻAhiʻahi ʻa Sētané mo e Ngaahi Tali ʻa Sīsuú. Tokoniʻi e fānaú ke nau fakakakato e sātí ʻaki hono fakaʻaongaʻi e Mātiu 4:1–11 mo e Luke 4:1–13. Fehuʻi ki he fānaú pe te nau muimui fēfē ki he sīpinga ʻa Sīsuú.

• Hiki hifo ha ngaahi sīpinga ʻa ia ʻe ala ʻahiʻahiʻi ai ha kiʻi tamasiʻi pe taʻahine ke ne fai ha fili ʻoku hala. Tuku ki ha kiʻi tamasiʻi pe taʻahine ke ne fili ha sīpinga ʻe taha ke lau, pea aleaʻi mo e kalasí e founga te nau lava ai ʻo fakasītuʻaʻi ʻa e ʻahiʻahí ʻi he tūkunga ko iá.

Mātiu 4:1–2

ʻOku lava ke tokoni e ʻaukaí ke u ongoʻi vāofi mo e Tamai Hēvaní.

Kimuʻa pea kamata e ngāue fakafaifekau ʻa Sīsuú, naʻá Ne ʻaukai mo “fefolofolai mo e ʻOtuá” (Liliu ʻa Siosefa Sāmitá, Mātiu 4:2). <> Tokoni ke mahino ki he fānaú ʻa e malava ʻe he ʻaukaí ʻo ʻomi e mālohi fakalaumālie mo tokoniʻi kinautolu ke nau ongoʻi vāofi mo e Tamai Hēvaní.

Ngaahi ʻEkitivitī ʻe Ala Fakahokó

• Fakaafeʻi ha tokotaha ke ne lau leʻo lahi e Mātiu 4:1–2. Fakamahinoʻi ange ʻoku tau ako ʻi he Liliu ʻa Siosefa Sāmita ki he ongo veesi ko ʻení, naʻe hāʻele ʻa Sīsū ki he toafá ke Ne “ʻi he ʻOtuá” (Liliu ʻa Siosefa Sāmitá, Mātiu 4:1). Ko e hā ne fai ʻe Sīsū ke vāofi ange ai mo e ʻOtuá? Vahevahe ange e founga kuo tokoniʻi ai koe ʻe he ʻaukaí ke ke ongoʻi ofi ange ai ki he Tamai Hēvaní.

• Fakaafeʻi e fānau kuo nau ʻaukai kimuʻá, ke vahevahe ʻenau ngaahi aʻusiá. Te nau fakamatalaʻi fēfē ʻa e ʻaukaí ki ha taha kuo teʻeki ke ne ʻaukai kimuʻa?

• Tohi ha ngaahi fehuʻi fekauʻaki mo e ʻaukaí (hangē ko e, ko e hā hono ʻuhingá, ko e fē taimí, pe ʻoku founga fēfē ʻetau ʻaukaí) ʻi ha ngaahi laʻi pepa pea faʻo kinautolu ʻi ha poulu. Fakaafeʻi e fānaú ke nau fili ha fehuʻi pea feinga ke tali ia. Ko e hā ha ngaahi aʻusia te ke lava pe ko e fānaú ʻo vahevahe fekauʻaki mo e ʻaukaí?

Luke 4:16–22, 28–30

Ko Sīsū Kalaisi ʻa hoku Fakamoʻuí.

Fakalaulauloto ki he founga kuo faitāpuekina ai ʻe he Fakamoʻuí hoʻo moʻuí. Te ke lava fēfē ʻo tokoniʻi e fānaú ke nau houngaʻia ange ʻi Heʻene tākiekina ʻenau moʻuí?

Ngaahi ʻEkitivitī ʻe Ala Fakahokó

• Fakaafeʻi ha kiʻi tamasiʻi pe taʻahine ke haʻu mateuteu ki he kalasí ke fakamatalaʻi fakanounou e Luke 4:16–30. Mahalo e ʻaonga ke fakaʻaongaʻi e “Vahe 17: Ko e Kakai Ne ʻIta ʻi Nāsaletí,” Ngaahi Talanoa ʻo e Fuakava Foʻoú, 42–43; pe ko e vitiō “Jesus Declares He Is the Messiah” (LDS.org).

• Lau leʻolahi e Luke 4:18 lolotonga iá ʻoku muimui e fānaú ʻi he laukongá. Kole ange ke nau faʻu ha lisi ʻo e ngaahi meʻa naʻe folofola e Fakamoʻuí te Ne hāʻele mai ke fakahokó. Fakaafeʻi e fānaú ke vahevahe e ngaahi sīpinga ʻo e taimi ne fakahoko ai ʻe Kalaisi e ngaahi meʻá ni, ʻi he folofolá pe ʻi heʻenau moʻuí.

Mātiu 4:18–22; Luke 5:1–11

ʻOku fakaafeʻi kitautolu ʻe Sīsū Kalaisi ke tau muimui kiate Ia pea hoko ko ha kau “toutai tangata.”

ʻOku lahi e ngaahi founga ʻe lava ai ʻe he fānaú ʻo muimui ki he Fakamoʻuí pea hoko ko ha kau “toutai tangata” (Mātiu 4:19). Te ke tokoniʻi fēfē kinautolu ke nau ʻiloʻi ʻa e tākiekina lelei te nau lava fakahoko ki he niʻihi kehé?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Mātiu 4:18–22 mo e Luke 5:1–11. Naʻe tali fēfē ʻe he kau ākonga ʻa Sīsuú ʻEne ui ke nau muimui ʻiate Iá? Ko e hā te tau lava ʻo fai ke tau muimui ai ki heʻenau sīpingá?

• Fakaʻaliʻali ki he fānaú ha ngaahi nāunau taumātaʻu pe ko ha fakatātā ʻo ha tokotaha toutai. ʻOku ʻuhinga ki he hā ke tau hoko ko e kau “toutai tangatá”? Ko e hā e ngaahi meʻangāue ʻoku tau maʻu ke tokoniʻi kitautolu ke tau hoko ko ha kau toutai tangatá?

Poupouʻi e Ako ʻi ʻApí

Fakaafeʻi e fānaú ke nau vahevahe mo honau ngaahi fāmili ʻa e meʻa kuo nau ako fekauʻaki mo e hoko ko ha kau toutai tangatá.

Fakatupulaki ʻEtau Akoʻí

ʻOku lava ke ʻiloʻi ʻe he fānaú e tākiekina ʻo e Laumālié. Akoʻi ki he fānaú ʻoku haʻu mei he Laumālie Māʻoniʻoní ʻa e ongo ʻo e nongá, ʻofá, mo e fiefia ʻoku nau maʻu ʻi he taimi ʻoku nau talanoa pe hiva ai kau kia Sīsū Kalaisi mo ʻEne ongoongoleleí. ʻE lava ʻe he ngaahi ongo ko ʻení ke ne langaki ʻenau ngaahi fakamoʻoní.