“13–19 Mē. Mātiu 19–20; Maʻake 10; Luke 18: ‘Ko e hā ʻOku ou Kei Hala Aí?’” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“13-19 Mē. Mātiu 19-20; Maʻake 10; Luke 18,” Haʻu, ʻo Muimui ʻIate Au—Maʻá e Palaimelí: 2019
13–19 Mē
Mātiu 19–20; Maʻake 10; Luke 18
“Ko e hā ʻOku ou Kei Hala Aí?”
Lau e Mātiu 19–20; Maʻake 10; mo e Luke 18, mo fakakaukau ki he fānau ʻokú ke akoʻí. Lekooti ha faʻahinga ueʻi te ke maʻu. ʻE tokoni hoʻo teuteú ke ke akoʻi ki he fānaú ʻa e meʻa ʻoku nau fie maʻu ke ʻilo mei he ngaahi vahe ko ʻení.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi e fānaú ke nau tala ki he kalasí ha meʻa ʻoku nau saiʻia ai fekauʻaki mo honau fāmilí. ʻE lava foki ke ke kole ki he ngaahi mātuʻa ʻo e fānaú ke nau ʻomi ha ngaahi fakatātā ʻo honau fāmilí ke vahevahe ʻe heʻenau fānaú mo e kalasí.
Akoʻi e Tokāteliné
Fānau Iiki Angé
ʻOku finangalo e Tamai Hēvaní ke tau mali ʻi he temipalé mo maʻu ha ngaahi fāmili ʻoku taʻengatá.
ʻE ʻaonga fēfē ʻa e ako fekauʻaki mo e tokāteline ʻo e mali taʻengatá ki he fānau ʻokú ke akoʻí? ʻE ala tokoni ke fakafehokotaki ki he “Ko e Fāmilí: Ko ha Fanongonongo ki Māmani” (Ensign pe Liahona, Nōvema 2010, 129).
Ngaahi ʻEkitivitī ʻe Ala Fakahokó
-
Lau e Maʻake 10:6–8 ki he fānaú, pea fakaʻaliʻali ha laʻitā ʻo ha ongomeʻa mali. Kole ki he fānaú ke nau tuhu ki he tangatá mo e fefiné ʻi heʻenau fanongo ki hoʻo lau ʻa e ngaahi lea tangata mo e fefine. Fakamatalaʻi ange ko e taumuʻa ʻa e Tamai Hēvaní ki ha tangata mo ha fefine ke na mali (vakai Sēnesi 1:27–28).
-
Fakaʻaliʻali ha laʻitā ʻo ha fāmilí mo ha temipale. Fakamatalaʻi ange ko e finangalo ʻa e Tamai Hēvaní ke silaʻi kitautolu ki hotau ngaahi fāmilí ʻi he temipalé, kae lava ke tau fakataha mo kinautolu ʻo taʻengata. Ke ke ongoʻingofua e fānau ʻoku teʻeki ai sila ʻenau ongomātuʻá.
-
Hivaʻi e “Ko ha Fāmili Fiefia,” Tohi Hiva ʻa e Fānaú, 104. Fakaafeʻi e fānaú ke tuku kiate kinautolu ʻi he taimi te nau hiva ai “ou,” mo e “au.” ʻE lava ke fakahoko tuʻo lahi e ʻekitivitī ko ʻení. Fakaafeʻi e fānaú ke vahevahe ha ngaahi meʻa fakafiefia kuo nau fakahoko mo honau ngaahi fāmilí. Ko e hā ʻoku nau fakamālōʻia koeʻuhi ko honau ngaahi fāmilí?
-
Hivaʻi ha foʻi hiva fekauʻaki mo e temipalé pe ngaahi fāmilí, hangē ko e “Fie Siofia Ha Temipale” pe “Ko e Fāmilí ke Taʻe Ngata,” Tohi Hiva ʻa e Fānaú, 99, 98. Tuku ki he fānaú ke nau puke ha ngaahi fakatātā ʻo e ngaahi temipalé pe ngaahi fāmilí, pea fakaafeʻi kinautolu ke nau puke hake ʻenau ngaahi fakatātaá ʻi he taimi te nau hiva ai “temipale” pe “fāmili.” Ko e hā ʻoku mahuʻinga ai ke mali ʻi he temipalé?
Ko e mali taʻengatá ko ha konga ia ʻo e palani ʻa e ʻOtuá.
ʻOku finangalo ʻa Sīsū ke haʻu kiate Ia ʻa e fānau īkí kae lava ke Ne tāpuakiʻi kinautolu.
ʻOku ʻomi ʻe he talanoa ko ʻení ha fakamatala ke tokoniʻi ʻaki e fānaú ke nau ongoʻi e lahi ʻo e ʻofa ʻa Sīsū ʻiate kinautolú.
Ngaahi ʻEkitivitī ʻe Ala Fakahokó
-
ʻI hoʻo lea pē ʻaʻau, vahevahe ʻa e talanoa ʻi he Maʻake 10:13–16. Ko e fē ha taimi kuo ongoʻi ai ʻe he fānaú ʻa e ʻofa ʻa Sīsū ʻiate kinautolú? Fai hoʻo fakamoʻoní ki he fānaú ʻoku ʻofa ʻa Sīsū ʻiate kinautolu mo finangalo ke tāpuekina kinautolu.
-
Fakaʻaliʻali e fakatātā Ko Kalaisi mo e Fānaú (Tohi Fakatātā ʻo e Ongoongoleleí, fika 47). Fakamatalaʻi ange kapau ʻoku tau fie maʻu ke tau hangē ko e fānau ʻoku tangutu ʻi he tafaʻaki ʻo Sīsuú, pea ʻe fie maʻu ke tau muimui ki Heʻene ngaahi fekaú, pea ʻofa ʻiate Ia mo e niʻihi kehé. Ko e hā ʻe lava ke fai ʻe he fānaú ke nau hangē ai ko e fānau ʻoku nau tangutu he tafaʻaki ʻo Sīsuú?
-
Tuku ki he fānaú ke nau tā ha fakatātā ʻoku tāpuakiʻi kinautolu ʻe Sīsū (vakai Maʻake 10:16).
Kapau te tau talangofua ki he ngaahi fekaú, te tau lava ʻo maʻu ʻa e moʻui taʻengatá.
Naʻe akoʻi ʻe Sīsū ʻa e talavou koloaʻiá, ʻoku totonu ke ne talangofua ki he ngaahi fekaú—ka ne maʻu e moʻui taʻengatá—ko ha moʻui hangē ko ia ʻoku maʻu ʻe he Tamai Hēvaní.
Ngaahi ʻEkitivitī ʻe Ala Fakahokó
-
Lau fakataha mo e fānaú e talanoa ʻo e talavou koloaʻiá ʻi he Maʻake 10:17–22. (Vakai foki “Vahe 42: Ko e Talavou Koloaʻiá,” Ngaahi Talanoa ʻo e Fuakava Foʻoú, 105–6. Kole ange ke nau fakafanongo ki he meʻa ne tala ange ʻe Sīsū ki he talavou koloaʻiá ke ne faí pea mo e tali ʻa e talavoú.
-
Fai ha talanoa ʻe taha pe lahi ange fekauʻaki mo fānau ne nau kole faleʻi mo e fakahinohino mei heʻenau ngaahi mātuʻá kae ʻikai muimui pe talangofuá. Ko e hā ha ngaahi meʻa ʻoku kole mai ʻe he Tamai Hēvaní ke tau faí? Ko e hā e ongo ʻoku tau maʻu ʻi he taimi ʻoku tau talangofua ai ki Heʻene ngaahi fekaú?
-
Vahevahe ha ngaahi aʻusia ʻi he taimi ʻokú ke maʻu ai ha ngaahi ueʻi fakataautaha ke fai ha meʻa ke toe lelei ange.
Akoʻi e Tokāteliné
Fānau Lalahi Angé
ʻOku finangalo ʻa e Tamai Hēvaní ke tau mali ʻi he temipalé pea maʻu ha fāmili taʻengata.
ʻE lava ke tokoni ki he fānaú, ʻa e ngaahi meʻa naʻe akoʻi ʻe Sīsū fekauʻaki mo e malí ʻi he taimi ʻoku fehangahangai ai mo ha ngaahi pōpoaki fepakipaki ʻi he māmaní.
Ngaahi ʻEkitivitī ʻe Ala Fakahokó
-
Kole ki ha taha ʻo e fānaú ke ne lau leʻo lahi e Maʻake 10:6–8. Fakamatalaʻi ange ʻoku ʻuhinga e pikitai ki he “pipiki ki he” pe “puke maʻu” ha meʻa. Ko e hā ʻoku mahuʻinga ai ke kau fakataha ʻa e ngaahi husepānití mo e uaifí, feʻofaʻaki, mo ngāue ko ha ongo hoa ngāué?
-
Vahevahe ʻa e fakamatala ko ʻení mei he “Ko e Fāmilí: Ko ha Fanongonongo ki Māmani,” pea tokoniʻi e fānaú ke mahino ʻa hono ʻuhingá: “Ko e tuʻunga tangata pe fefiné ko ha ʻulungaanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, mo e moʻui fakamatelié pea mo e taʻengatá.”
-
Kole ki he fānaú ke nau tokoniʻi koe ke ke fakakaukau ki ha ngaahi tali ki he ngaahi fehuʻi hangē ko e “Ko e hā e ʻuhinga ʻoku mahuʻinga ai ʻa e ngaahi fāmilí ʻi he Siasí?” pe “Ko e hā e ʻuhinga ʻoku mahuʻinga ai kiate koe ke ke mali ʻi he temipalé?” Hivaʻi fakataha e “Ko e Fāmilí ke Taʻe Ngata,” Tohi Hiva ʻa e Fānaú, 98. Vahevahe ki he fānaú hoʻo fakamoʻoni ki he fāmili taʻengatá mo e fāmilí. Fakaafeʻi kinautolu ke vahevahe foki ʻenau fakamoʻoní.
-
Fakaafeʻi e fānaú ke nau takitaha lau ha folofola mei he lisi ko ʻení: Maʻake 10:6–8; 1 Kolinitō 11:11; TF 42:22; 131:1–4; mo e Mōsese 3:18, 21–24. Ko e hā ʻoku akoʻi mai ʻe he ngaahi folofola ko ʻení fekauʻaki mo e malí?
ʻE lava ke tokoniʻi au ʻe Sīsū ke u ʻiloʻi e meʻa ʻoku fie maʻu ke u fai ke u tupulaki aí.
Naʻe fekumi ʻa e talavou koloaʻiá kia Sīsū peá ne maʻu ha fakahinohino pau ʻa ia naʻe fakataumuʻa pē kiate ia. Te ke lava fēfē ʻo ueʻi ʻa e fānaú ke nau fekumi ki ha fakahinohino tatau ʻi heʻenau moʻuí?
Ngaahi ʻEkitivitī ʻe Ala Fakahokó
-
Kole ki he fānaú ke nau kumi ha veesi ʻi he Maʻake 10:17–22 ʻa ia ʻokú ne fakamatalaʻi e fakatātā ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakamatalaʻi ange naʻe fakataautaha e faleʻi ne ʻoange ʻe Sīsū ki he talavoú, pea te tau lava kotoa ʻo maʻu ha fakahinohino fakataautaha mei he ʻEikí ʻo fakafou ʻi he Laumālié.
-
Lau fakataha e Maʻake 10:17–22. Fakaafeʻi ʻa e fānaú ke nau hiki ʻi he palakipoé ʻa e ngaahi fekau naʻe tala ange ʻe he Fakamoʻuí ki he talavoú ke talangofua ki aí (vakai, veesi 19). Ko e hā ha toe meʻa naʻe fie maʻu ke ne fai? (vakai, veesi 21). Poupouʻi e fānaú ke nau fakakaukau fekauʻaki mo e ngaahi meʻa te nau ala fie maʻu ke kamata fai pe taʻofi ka nau muimui lelei ange kia Sīsuú. Ko e hā ha ngaahi founga ʻe niʻihi te tau lava ai ʻo ʻiloʻi e meʻa ʻoku finangalo ʻa Sīsū ke tau faí?
Poupouʻi e Ako ʻi ʻApí
Fakaafeʻi ʻa e fānaú ke nau tala ki honau ngaahi fāmilí e ngaahi meʻa ʻoku nau houngaʻia ai koeʻuhí ko kinautolu, mahalo ʻe lava ʻaki hano fai ha kiʻi tohi ke ʻave ki heʻenau ngaahi mātuʻá, pe vahevahe ʻenau ngaahi fakamoʻoni fekauʻaki mo e fāmilí lolotonga e efiafi fakafāmili ʻi ʻapí.
Ko Hono Fakatupulaki ʻEtau Faiakó
Tokanga ki he fānaú. ʻOku tali fēfē ʻe he fānau ʻi ho kalasí ʻa e ngaahi ʻekitivitī akó? Kapau ʻoku hangē ʻoku ʻikai ke nau kau maí, mahalo ʻoku taimi ke ʻahiʻahiʻi ha ʻekitivitī ʻe taha pe fai ha kiʻi luelue nounou lotoʻapasia. ʻI he tafaʻaki ʻe tahá, kapau te ke fakatokangaʻi ʻoku kau mai mo ako ʻa e fānaú mei ha konga pau ʻo e lēsoní, ʻoua naʻá ke hohaʻa ke hoko atu koeʻuhí pē ke fakapapauʻi ʻokú ke akoʻi kotoa e lēsoni mei he nāunaú.