Ko ia ʻIate Kimoutolu ʻoku Taʻeangahalá, fai ʻe Liz Lemon Swindle

29 ʻEpeleli–5 Mē

Sione 7–10

“Ko Au ko e Tauhi Leleí”

ʻI hoʻo lau e Sione 7–10, fakakaukau ki he fānau ʻokú ke akoʻí. Ko e lahi ʻo e ngaahi fakakaukau maʻá e fānau lalahi angé ʻi he lēsoni ko ʻení, ʻe lava foki ke liliu maʻá e fānau iiki angé, pe liliu fakafoki.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Kole ki he fānaú ke nau vahevahe ha meʻa ne nau fai ʻi he uike kuo ʻosí ke nau hoko ʻo hangē ko e Samēlia leleí.

Akoʻi e Tokāteliné

Fānau Iiki Angé

Sione 7:14–17

ʻE tokoniʻi au ʻe hono tauhi e ngaahi fekaú, ke u ʻilo ʻoku moʻoni.

Naʻe akoʻi ʻe Sīsú te tau lava ʻo maʻu ha fakamoʻoni ki he ngaahi moʻoni naʻá Ne vahevahé, ʻi heʻetau moʻui ʻaki e ngaahi moʻoni ko iá. Te ke lava fēfē ʻo fakaʻaongaʻi e fakamatala ko ʻení ke akoʻi ki he fānaú, ʻoku tokoni kiate kitautolu e nonga ʻoku tau ongoʻi ʻi he taimi ʻoku tau talangofua ai ki he ngaahi fekaú, ke tau ʻiloʻi ʻoku moʻoni e ngaahi fekau ko iá?

Ngaahi ʻEkitivitī ʻe Ala Fakahokó

• Fakamatala fakanounouʻi e Sione 7:17 ʻi he ngaahi lea ʻe mahino ki he fānaú. Tokoniʻi ke nau ʻiloʻi, ʻoku tokoniʻi kitautolu ʻe heʻetau talangofua ki he ngaahi fekaú, ke tau ongoʻi ofi ange ai kia Sīsū Kalaisi, ʻe lava pē ʻaki hono hivaʻi fakataha e “Tauhi ʻa e Ngaahi Fekaú” pe “Fili e Hala Totonú,” Tohi Hiva ʻa e Fānaú, 68, 82. Kole ki he fānaú ke fakafanongo ki he founga ʻe tāpuekina ai kitautolu ʻi he taimi ʻoku tau tauhi ai e ngaahi fekaú.

• Vahevahe ha aʻusia ʻi he taimi naʻá ke ʻilo ai ha fekau ko e ʻomi mei he ʻOtuá, koeʻuhi ko hoʻo moʻui ʻakí, hangē ko hono totongi e vahehongofulú pe fakamolemoleʻi ha taha ne anga taʻeʻofa atu. Fakaafeʻi ʻa e fānaú ke nau fakakaukau ki ha aʻusia ne nau maʻu ʻi he taimi ne nau talangofua ai ki ha fekau. Fehuʻi ange, “Naʻe fēfē hoʻo ongoʻi hili hoʻo talangofuá?”

• Fili ha niʻihi ʻo e ngaahi fekaú pea ta faʻahinga ʻe ua ʻo e ngaahi fakatātā faingofua ʻokú ne fakafofongaʻi e fekau takitaha. Tuku fakafoʻohifo kotoa e ʻū fakatātaá ʻi he falikí pea fakaafeʻi e fānaú ke nau fetongitongi ʻi hono fakatauhoa fakataha e ngaahi fekaú. Fakamoʻoni ki he mahuʻinga ʻo e ngaahi fekaú pea mo hono fakamālohia hoʻo fakamoʻoní ʻi he muimui ki aí.

Sione 8:29

Naʻe Talangofua ʻa Sīsū ki Heʻene Tamaí.

Naʻe fakahoko ʻe Sīsū Kalaisi e ngaahi meʻa naʻe fakahōifua ki Heʻene Tamai ʻi Hēvaní. Te ke lava fēfē ke tokoniʻi e fānaú ke nau ʻiloʻi e ngaahi hala ke muimui ai ki Heʻene sīpingá?

Ngaahi ʻEkitivitī ʻe Ala Fakahokó

• Tokoniʻi e fānaú ke nau toutou fakahoko e meʻa ne folofola ʻaki ʻe Sīsū fekauʻaki mo e Tamai Hēvaní ʻi he Sione 8:29: “ʻOku ou fai maʻu ai pē ʻa e ngaahi meʻa ʻoku lelei ai iá.” Kole ange ke nau vahevahe ha ngaahi meʻa ne fai ʻe Sīsū naʻe fiefia ai e Tamai Hēvaní. Fakaʻaliʻali ange ha ngaahi fakatātā mei he Tohi Fakatātā ʻo e Ongoongoleleí ke nau maʻu ai ha ngaahi fakakaukau.

• Fehuʻi ki he fānaú ko e hā e ngaahi meʻa ʻokú ne ʻai kinautolu ke nau fiefiá. Pea fehuʻi ko e hā te nau lava ʻo fai he uiké ni ke fiefia ai ha mēmipa ʻo e fāmilí pe ko ha kaungāmeʻa. Fakaafeʻi ʻa e fānaú ke nau tā ha ngaahi fakatātā ʻo kinautolu ʻoku nau fakahoko e ngaahi ʻekitivitī ko iá, ke ʻave ki ʻapi mo fakamanatu kiate kinautolu.

• Fakaafeʻi ha mātuʻa ʻo e taha ʻo e fānaú, ke vahevahe ha aʻusia ʻi he taimi ne fai ai ʻe he kiʻi tamasiʻí pe taʻahiné ha meʻa ʻa ia ne fiefia ai e mātuʻa ko iá. Tuku ki he kiʻi taʻahine pe tamasiʻi ko iá ke ne vahevahe e meʻa naʻá ne ongoʻí.

Sione 10:1–18

ʻOku ʻafioʻi mo ʻofeina au ʻe Sīsū.

ʻE lava ke tokoni e talanoa fakatātā ʻo e tauhi leleí ke mahino ki he fānaú, ʻoku ʻofeina mo ʻafioʻi kinautolu ʻe Sīsū.

Ngaahi ʻEkitivitī ʻe Ala Fakahokó

• Kole ki he fānaú ke nau tā ha fakatātā ʻokú ne fakafofongaʻi ha meʻa ʻi he talanoa fakatātā ʻo e tauhi leleí, hangē ko e sipí, ko ha kaihaʻa, pe ha ulofi. Lau e Sione 10:1–18 ki he fānaú, pea kole ange ke nau puke hake ʻenau ngaahi fakatātaá ʻi he taimi ʻokú ke lau ai fekauʻaki mo e meʻa ne nau taá. Fakamatalaʻi ange, hangē ko hono tataki ʻe he “tauhisipi leleí” mo ʻofaʻi ʻene fanga sipí, ʻoku ʻofaʻi mo tataki kotoa kitautolu ʻe Sīsū ke tau foki kiate Ia. Teuteuʻi ha taha ʻo e fānaú ke hangē ha tauhisipí, pea tuku ki he fānaú ke nau vahevahe pe ʻoku anga fēfē e hangē ʻa Sīsū ko ha tauhisipi kiate kitautolú.

• Fakaʻaliʻali e fakatātā ʻo Sīsū mo e fanga lamí ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Te tau ʻiloʻi fēfē ʻoku ʻofa ʻa Sīsū ʻi he fanga lamí? Te tau lava fēfē ke tala ʻoku ʻofa ʻa e fanga lamí ʻia Sīsuú?

• Tokoniʻi e fānaú ke nau fakakakato e peesi ʻekitivitī ʻo e uike ní.

Akoʻi e Tokāteliné

Fānau Lalahi Angé

Sione 7:14–17

ʻOku tokoni hono tauhi e ngaahi fekaú ke u ʻiloʻi ʻoku moʻoni ia.

Mahalo kuó ke maʻu mo e fānau ʻokú ke akoʻí ha ngaahi aʻusia ʻi hono moʻui ʻaki e ngaahi moʻoni ʻo e ongoongoleleí mo ʻiloʻi ʻoku nau moʻoni. Te ke lava fēfē ʻo hoko atu ʻi he ngaahi aʻusia ko iá ʻi hoʻo akoʻí?

Ngaahi ʻEkitivitī ʻe Ala Fakahokó

• Hiki e veesi takitaha ʻo e Sione 7:14–17 ʻi ha ngaahi laʻipepa kehekehe pea fakaʻaliʻali kinautolu ʻi he hokohoko kehekehe. Kole ki he fānaú ke nau fakahokohoko totonu kinautolu pea vakai ki he Sione 7:14–17 ke ʻilo pe ʻoku tonu. Fakaafeʻi ʻa e fānaú ke nau tauhōhoa pea vahevahe mo honau hoá ʻa ʻenau mahino ki he veesi takitaha. Kuo tokoniʻi fēfē nai kinautolu ʻe he talangofua ki he ngaahi fekau ʻa e ʻOtuá, ke nau ʻiloʻi ʻoku moʻoni ʻa e ngaahi fekaú?

• Vahevahe ha ngaahi sīpinga mei he folofolá ʻoku hā ai e founga ne tāpuekina ha kakai ʻi heʻenau moʻuiʻaki e ngaahi moʻoni ʻo e ongoongoleleí, hangē ko Tanielá (vakai, Taniela 6) pe Nīfai (vakai, 1 Nīfai 3–4).

• Fakaafeʻi ha taha ʻo e fānaú ʻi ha ngaahi ʻaho kimuʻa he kalasí, ke ne tohi fekauʻaki mo ha taimi naʻá ne maʻu ai ha fakamoʻoni ki ha fekau ʻaki hono moʻui ʻaki iá. Lolotonga e kalasí, kole ki he tokotaha ko iá ke ne vahevahe e meʻa naʻá ne tohí.

Sione 8:31–36

ʻE lava ke fakatauʻatāinaʻi kitautolu ʻe he moʻoní.

ʻI he fakaʻau ke matuʻotuʻa ange ʻa e fānaú, te nau fetaulaki mo ha kakai ʻoku nau tui ʻoku fakapōpula ʻa hono moʻui ʻaki ʻo e ongoongoleleí. Te ke lava fēfē ʻo fakaʻaongaʻi ʻa e Sione 8:31–36 ke fakatonutonu e ngaahi fakakaukau ko iá?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Sione 8:31–36 pea vahevahe ʻenau fakakaukau ki he ʻuhinga ʻo e hoko ko ha pōpula ki he angahalá. ʻOku tokoniʻi fēfē kitautolu ʻe he ngaahi akonaki ʻa Sīsuú ke tau tauʻatāina?

• Kole ki ha tamasiʻi ke ne tokoniʻi koe ke ke takaiʻi ha maea, sikaafi, pe ko e hēkesi ʻi ho fasiʻa nimá ke fakahaaʻi e founga ʻoku tau haʻisia ai ki he angahalá ʻi he taimi ʻoku tau fai ai ia pea ʻikai fakatomalá.

• Fakaʻaliʻali ha foʻi loka ke fakafofongaʻi ʻa e angahalá pea mo ha kī ke ne fakafofongaʻi ʻa hono lava ʻe he ngaahi moʻoni ʻo e ongoongoleleí ʻo fakatauʻatāinaʻi kitautolú. Hangē ko ʻení, ʻe lava ke ʻomi kiate kitautolu ʻe he ʻilo fekauʻaki mo e Fakalelei ʻa e Fakamoʻuí, ʻa e tauʻatāina ke fakatomalá pea mo fakamolemoleʻi ʻetau ngaahi angahalá. Pe ko e lava ke ʻomi kiate kitautolu ʻe he ʻilo fekauʻaki mo e Lea ʻo e Potó, ʻa e tauʻatāina ke fakaʻehiʻehi mei he ngaahi maʻunimaá.

Naʻe akoʻi ʻe Sīsū ʻo pehē, “ʻE fakatauʻatāinaʻi ʻa kimoutolu ʻe he moʻoní” (Sione 8:32).

Sione 10:1–18

ʻOku hangē ʻa Sīsū ko ha tauhi lelei maʻatautolu.

ʻI hoʻo ako ʻa e talanoa ʻo e tauhi leleí, fekumi ki ha ngaahi moʻoni ʻokú ne akoʻi mai fekauʻaki mo hotau vā fetuʻutaki mo e Fakamoʻuí. ʻE tāpuekina fēfē e fānaú ʻe hono ʻiloʻi e ngaahi moʻoni ko ʻení?

Ngaahi ʻEkitivitī ʻe Ala Fakahokó

• Tohiʻi ʻa e tauhi leleí mo e unga ngāué ʻi he palakipoé. Fakamatalaʻi ange ko e unga ngāué, ko e taha ia ʻoku totongi ke ne fai ha ngāue ke maʻu ai ha paʻanga. Kole ki he fānaú ke nau lisi e ngaahi faikehekehe ʻoku nau maʻu ʻi he Sione 10:1–18 ʻi he vahaʻa ʻo ha tauhi leleí mo e unga ngāué. Ko e hā ka ke ka fie maʻu ai ke ke muimui ki he tauhi leleí kae ʻikai ko e unga ngāué?

• Tā pe fakaʻaliʻali ha fakatātā ʻo ha matapā. Lau fakataha e Sione 10:7–9, pea fehuʻi ki he fānaú pe ʻoku hangē fēfē nai ʻa Sīsū ko ha matapā. Fakatatau ki he veesi 9, ko e hā ha ngaahi tāpuaki ʻoku maʻu ʻe kinautolu ʻoku nau “hū” ʻi he matapaá? ʻOku tau hū fēfē ʻi he matapā ʻoku ʻomi ʻe Sīsū Kalaisi kiate kitautolú?

Poupouʻi e Ako ʻi ʻApí

Tokoniʻi e fānaú ke nau fakakaukau ki ha fekau te nau lava ʻo talangofua kakato ki ai. Kole ange ke nau feinga ke talangofua ki he fekau ko iá lolotonga e uike ka hoko maí.

Fakatupulaki ʻEtau Akoʻí

Fai ha ngaahi fehuʻi fakalaumālie. Fai ha ngaahi fehuʻi te ne fakaafeʻi ʻa e fānau ʻokú ke akoʻí ke nau fai ha ngaahi meʻa lahi ange ʻi he meʻa angamahení. Ka ʻikai, poupouʻi kinautolu ke nau vahevahe ʻenau ngaahi fakamoʻoni ki he ngaahi moʻoni ʻo e ongoongoleleí. Hangē ko ʻení, kapau ʻoku mou aleaʻi ʻa e ngaahi fekaú, te ke lava ʻo kole ki he fānaú ke nau vahevahe ki he founga kuo faitāpuekina kinautolu ʻi heʻenau talangofua ki he ngaahi fekaú.