Ko e Samēlia Leleí, tā ʻa Dan Burr

22–28 ʻEpeleli

Mātiu 18; Luke 10

“Ko e Hā Te U Fai ke Maʻu ai ʻa e Moʻui Taʻengatá?”

Ko e hā ha ngaahi moʻoni ʻi he Mātiu 18 mo e Luke 10 ʻoku fie maʻu ke ako ʻe he fānaú? Fakafanongo ki ha ngaahi ueʻi mei he Laumālie Māʻoniʻoní ʻi hoʻo lau e ngaahi vahe ko ʻení. ʻE lava ke tokoni atu ʻa e Haʻu ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e tokāteliné, pea ʻe lava ke ʻoatu ʻe he lēsoni ko ʻení ha ngaahi fakakaukau ki he founga ke akoʻi ʻaki e ngaahi moʻoni ko ʻení.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Kole ki he fānaú ke nau vahevahe e founga naʻa nau fakafiefiaʻi ʻaki e Fakalelei ʻa Sīsū Kalaisí ʻi he Toetuʻú.

Akoʻi e Tokāteliné

Fānau Iiki Angé

Mātiu 18:21–35

ʻOku totonu ke u fakamolemoleʻi maʻu pē ʻa e niʻihi kehé.

ʻI hoʻo lau e Mātiu 18:21–35, fakakaukau ki hoʻo ngaahi aʻusia ʻi he fakamolemolé pea mo e meʻa ʻe fie maʻu ʻe he fānaú ke nau ʻilo ai e tefitoʻi moʻoni ko ʻení.

Ngaahi ʻEkitivitī ʻe Ala Fakahokó

• Lau e Mātiu 18:21, pea fakaafeʻi e fānaú ke nau lea “ʻOku ou fakamolemoleʻi koe” tuʻo fitu. Fehuʻi ange, “ʻOku feʻunga nai e fakamolemoleʻi tuʻo fitú?” Lau e veesi 22 pea fakamatalaʻi ange ʻoku finangalo ʻa Sīsū ke tau fili ke fakamolemole maʻu pē.

• Fai e talanoa fakatātā ʻo e tamaioʻeiki angakoví (vakai Mātiu 18:23–35). Kapau ʻe fie maʻu, fakamatalaʻi ange ko e taimi ʻoku fai mai ai ʻe ha taha ha ʻulungaanga kovi kiate kitautolu, mahalo te tau ʻuluaki ongoʻi ʻita pe loto mamahi. Ka ʻoku ʻuhinga ʻa e fakamolemolé te tau lava ʻo toe ongoʻi ʻa e nongá. (Mahalo te ke ongoʻi ʻoku ueʻi koe ke tokoniʻi e fānaú ke mahino kiate kinautolu kapau ʻoku fakamamahiʻi kinautolu ʻe ha taha, ʻoku totonu ke nau fakahā ki heʻenau mātuʻá pe ha taha lahi falalaʻanga.)

• Tohiʻi e ʻOku ou fakamolemoleʻi koe ʻi he palakipoé, pea talaange ki he fānaú ʻe lava ke tokoni e ngaahi leá ni ke liliu e ngaahi momeniti fakamamahí ʻo fakafiefia. Tā ha fofonga loto mamahi ʻi he palakipoé, pea vahevahe ha ngaahi sīpinga ʻe niʻihi ʻo ha fānau ʻoku nau fefakamolemoleʻaki. Hili e ngaahi sīpinga takitaha, fakaafeʻi ha tamasiʻi pe taʻahine ke ne liliu e fofonga lotomamahí ke fofonga fiefia.

• Hiva fakataha mo e fānaú ʻa e “Tokoniʻi Au Tamai,” Tohi Hiva ʻa e Fānaú, fika 52. Kole ange ke nau tuʻu ki ʻolunga ʻi heʻenau fanongo ki he foʻi lea tokoni. Vahevahe hoʻo fakamoʻoni ʻe tokoniʻi kitautolu ʻe he Tamai Hēvaní ke tau fakamolemoleʻi e niʻihi kehé.

Luke 10:25–37

Naʻe akoʻi au ʻe Sīsū ke u vakai ki he kakai kotoa pē ko hoku kaungāʻapi pea ʻofa ʻiate kinautolu.

Ko e talanoa fakatātā ʻo e Samēlia leleí ko ha talanoa fakangalongataʻa ʻoku lava ke ne fakahā ki he fānaú ko hai hotau ngaahi kaungāʻapí. Fakakaukau ki ha ngaahi founga te ke lava ai ʻo ueʻi ʻa e fānaú ke nau “ʻalu, pea ke fai pehē pē” (Luke 10:37).

Ngaahi ʻEkitivitī ʻe Ala Fakahokó

• Fehuʻi ki he fānau takitaha, “Ko hai ho kaungāʻapí?” Fakamatalaʻi ange naʻe akoʻi ʻe Sīsū, ko hotau kaungāʻapí foki ha taha ʻokú ne fie maʻu ʻetau tokoní, neongo kapau ʻoku ʻikai nofo ofi mai, pea ʻoku totonu ke tau feohi mo e tokotaha ko iá ʻi he ʻofa.

• Lau e Luke 10:25–37 lolotonga hono fakatātaaʻi ʻe he fānaú ʻa e talanoa fakatātā ʻo e Samēlia leleí, ʻo nau taufetongi hono fakafofongaʻi e tokotaha takitaha ʻi he talanoá. Hili hono fakatātaaʻí, kole ange ke nau vahevahe e founga te nau lava ai ʻo hoko ko ha Sāmelia lelei.

• Hiki ha ngaahi sīpinga ʻe niʻihi ʻo e ngaahi tūkunga ʻe fie maʻu ai ʻe ha taha ha tokoni, pea fufuuʻi e ngaahi laʻipepá ʻi he lokí. Kole ki he fānaú ke nau kumi ʻa e ngaahi laʻipepá pea fakamatala ki he founga te nau lava ʻo fakahaaʻi e angaʻofá ki he tokotaha ʻoku ʻi he tūkunga ko iá.

• Hivaʻi mo e fānaú e “Folofola ʻa Sīsū Feʻofaʻaki” mo e “Ko e Angaʻofá ʻe Kamata ʻIate Au,” Tohi Hiva ʻa e Fānaú, 39, 83. Vahevahe ʻa e fānaú ke nau tautau toko ua pea fakaafeʻi e hoa takitaha ke na fakakaukau ki ha ngaahi founga ʻe niʻihi te na lava ai ʻo fakahaaʻi ʻa e ʻofá mo e angaʻofá ki he niʻihi kehé. Kole ki he hoa takitaha ke vahevahe ʻenau ngaahi fakakaukaú mo e kalasí.

• Fakaafeʻi e fānaú ke nau hiki hifo e ngaahi founga te nau lava ʻo fakahaaʻi ʻenau ʻofa ki he niʻihi kehé ʻi ha ngaahi laʻipepa iiki. Faʻu ha sēini pepa mei he ngaahi laʻipepa īkí ni pea fakaafeʻi ʻa e fānaú ke tautau e sēini pepá ʻi honau ʻapí, ʻa ia ʻe lava ke fakamanatu ai kiate kinautolu ke nau angaʻofa.

Akoʻi e Tokāteliné

Fānau Lalahi Angé

Mātiu 18:21–35

ʻE fakamolemoleʻi au ʻe he Tamai Hēvaní ʻi heʻeku fakamolemoleʻi e niʻihi kehé.

ʻI he ʻalu ke motuʻa ange ʻa e fānaú, mahalo ʻe kiʻi faingataʻa ange ke nau faʻa fakamolemole. ʻE lava ke hoko ʻa e talanoa fakatātā ʻo e tamaioʻeiki angakoví ko ha founga fakangalongataʻa ke akoʻi ai kiate kinautolu, ʻoku finangalo e Tamai Hēvaní ke tau fakamolemoleʻi e tokotaha kotoa.

Ngaahi ʻEkitivitī ʻe Ala Fakahokó

• Lau e Mātiu 18:23–35 fakataha mo e fānaú; fakamatalaʻi ange ʻoku fakafofongaʻi ʻe he ʻeikí pe tuʻí ʻa e Tamai Hēvaní, pea fakafofongaʻi ʻe he tamaioʻeikí ʻa kitautolu, pea fakafofongaʻi leva ʻe he kaungā tamaioʻeikí ʻa kinautolu ne nau faihala kiate kitautolú. Fehuʻi ki ha fānaú, “Ko e fē taimi kuó ke ongoʻi ai ʻoku faingataʻa ke fakamolemoleʻi ha taha? Naʻe founga fēfē hoʻo tukuange e ngaahi ongoʻi lavea ko iá? Ko e fē taimi kuó ke fie maʻu ai ke fakamolemoleʻi koe ʻi ha fili hala?”

• Tohiʻi ʻi he palakipoé ʻa e palopalema fakafika ko ʻení 70 × 7, pea tokoniʻi e fānaú ke nau ngāueʻi ia. Kole ki ha taha ke ne lau e Mātiu 18:21–22, pea fakamatalaʻi ange naʻe ngāue ʻaki ʻe Sīsū e fika ko ʻení ke akoʻi kiate kitautolu ʻoku totonu ke tau faʻa fakamolemole maʻu pē.

• ʻOange ki he tokotaha kotoa pē ha laʻipepa, pea fakaafeʻi e fānaú ke nau tā ha fakatātā ʻo ha tokotaha ʻoku anga taʻeʻofa ki ha tokotaha kehe. Pea kole ange ke fakafetongi ʻenau ngaahi laʻipepá mo e tokotaha hoko atu ki aí, pea tā ʻi he tuʻa ʻo e laʻipepa foʻoú ha founga te nau lava ai ʻo fakamolemoleʻi e niʻihi kehé.

• Kole ki he fānaú ke nau tokoni atu ke fakakaukauʻi ha ngaahi tūkunga ʻe niʻihi ʻe ala fie maʻu ai ʻe ha tokotaha ke fakamolemoleʻi ha taha kehe. Fakaafeʻi e fānaú ke nau fakatātaaʻi e founga te nau fakahaaʻi ai ʻenau faʻa fakamolemolé ʻi he ngaahi tūkunga ko iá.

• Hiva fakataha mo e fānaú ʻa e “Tokoniʻi Au Tamai,” Tohi Hiva ʻa e Fānaú, fika 52. Tokoniʻi e fānaú ke mahino kiate kinautolu e laine takitaha ʻo e hivá pea mo e meʻa ʻokú ne akoʻi mai fekauʻaki mo hono fakamolemoleʻi ʻo e niʻihi kehé.

Luke 10:30–37

Te u lava ʻo ʻofa mo tokoni ki he niʻihi kehé, tautefito kiate kinautolu ʻoku nau faingataʻaʻiá.

Fakalaulauloto ki ha ngaahi taimi ʻi hoʻo moʻuí naʻe hoko ai ha taha ko “ha tangata Samēlia lelei” kiate koe. Te ke lava fēfē ʻo ueʻi e fānaú ke nau hoko ko “kau Samēlia lelei” ki he niʻihi kehé?

Ngaahi ʻEkitivitī ʻe Ala Fakahokó

• Vahe ki he fānau takitaha ha konga ʻo e talanoa fakatātā ki he Samēlia leleí, ke ne tā fakatātaaʻi. Fakaafeʻi kinautolu ke nau fakahokohoko ʻenau ngaahi fakatātaá pea fakaʻaongaʻi kinautolu ke fai ʻaki e talanoá.

• Fakamatalaʻi ki he fānaú naʻe lahi e tāufehiʻa e kau Siú ki he kau Samēliá, ko ia ai, ʻi he taimi naʻa nau fononga mai ai mei Selusalema ki Kālelí, te nau takai hake ʻi tuʻa ʻi Samēlia ke ʻoua te nau fetaulaki mo ha kau Samēlia.  Ko e hā e ʻuhinga ne fakaʻaongaʻi ai ʻe Sīsū ha Samēlia ke hoko ko ha sīpinga ʻo e angaʻofá ʻi he talanoa fakatātā ko ʻení? Ko e hā ʻoku akoʻi mai ʻe he talanoá ni ʻo kau ki hono tokoniʻi ʻa kinautolu ʻoku nau faingataʻaʻiá? (Vakai foki Mōsaia 4:16–22.)

• Kole ki he fānaú ke vahevahe ha aʻusia ne hangē ai ha tokotaha ko ha Samēlia leleí kiate kinautolu.

• Fakatukupaaʻi e fānaú ke nau fokotuʻu ha taumuʻa ke nau hoko ʻo hangē ko e Samēlia leleí he uiké ni. Hangē ko ʻení, ʻoku nau ʻilo nai ha taha ʻoku puke pe ongoʻi taʻelata? pe ko ha taha ʻoku ʻikai maʻulotu maʻu pē? Fehuʻi ki he fānaú pe te nau tokoniʻi fēfē e tokotaha ko iá.

Poupouʻi e Ako ʻi ʻApí

Fakaafeʻi e fānaú ke nau vahevahe mo honau fāmilí ʻa ʻenau taumuʻa ke hoko ʻo hangē ko e Samēlia leleí he uiké ni.

Fakatupulaki ʻEtau Akoʻí

Akoʻi e fānaú ke hiki e ngaahi ongó. Kapau ʻe lava ʻe he fānaú ʻo ako e ʻulungaanga ʻo hono hiki e ngaahi ongó, ʻe tokoniʻi ai kinautolu ke nau ʻiloʻi mo muimui ʻi he Laumālié. ʻE lava ke hiki ʻe he fānaú e ngaahi ongó ʻaki hono fakaʻilongaʻi e folofolá, tā e ngaahi fakatātā, pe hiki ha ngaahi fakamatala tohinoa faingofua.