15–21 ʻEpeleli

Toetuʻú

“ʻE Faʻitoka, Kofaʻā Hoʻo Mālohí?”

Fakaʻaongaʻi ho taimi mo e fānaú ke tokoniʻi kinautolu ke nau vakai ki he Toetuʻú ko ha faʻahitaʻu ke tau fiefia ʻi he Fakamoʻuí mo toe fakaloloto ange ʻenau houngaʻia koeʻuhí ko ʻEne feilaulaú. ʻE lava fulihi e ngaahi fakakaukau ko ʻení ke tokoni atu ke akoʻi ha fānau ʻi ha faʻahinga taʻu motuʻa pē.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Ke tokoniʻi e fānaú ke nau vahevahe ʻenau ʻilo fekauʻaki mo Sīsū Kalaisi mo ʻEne Fakaleleí, ʻe lava ke ke fakaʻaliʻali ha ngaahi fakatātā ʻo e Fakamoʻuí ʻi Ketisemani, ʻi he kolosí, pea ʻi he hili ʻEne Toetuʻú (vakai ki he fakatātā ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e Tohi Fakatātā ʻo e Ongoongoleleí, fika 56, 57, 58, 59, mo e 60).

Akoʻi e Tokāteliné

Fānau Iiki Angé

Ko Sīsū Kalaisi hoku Fakamoʻuí.

ʻI hoʻo lau fekauʻaki mo e Fakalelei ʻa Sīsū Kalaisí, fakalaulauloto ki ha founga te ke lava ai ʻo tokoni ke ongoʻi ʻe he fānaú ʻa e lahi e ʻofa ʻa Sīsū kiate kinautolú.

Ngaahi ʻEkitivitī ʻe Ala Fakahokó

• Akoʻi ange ki he fānaú, koeʻuhi ʻoku faiangahala kotoa, he ʻikai lava ke tau toe foki ki he ʻOtuá taʻe ʻi ai ha Fakamoʻui ke fuesia ʻetau ngaahi angahalá. ʻE lava ke fakamoʻui kitautolu ʻe Sīsū Kalaisi mei heʻetau ngaahi angahalá ʻo kapau te tau fakatomala. Puke hake ha sioʻata, pea tuku ki he fānaú ke nau taufetongi ʻi he sio ki aí. ʻI heʻenau fai iá, lea ʻaki e, “ʻOku ʻofa ʻa Sīsū ʻia [hingoa e tokotahá], pea te Ne lava ʻo fakamoʻui ʻa [hingoa e tokotahá].”

• Fakaʻaliʻali e fakatātā Ko e Lotu ʻa Sīsū ʻi Ketisemaní (Tohi Fakatātā ʻa e Ongoongoleleí, fika 56) ʻi hoʻo fai e talanoa ʻo e faingataʻaʻia ʻa e Sīsū ʻi Ketisemani maʻá e ngaahi angahala ʻo e māmaní (vakai Mātiu 26:36–46; Luke 22:39–44). Fakamatalaʻi ange koeʻuhi ʻEne faingaʻataʻaʻiá, ʻe lava ke fakamolemoleʻi kitautolu ʻi he taimi ʻoku tau fai ai ha fili hala. Te ke lava foki ʻo fakaʻaongaʻi e “Vahe  51: Ko e Mamahi ʻa Sīsū ʻi he Ngoue ʻi Ketisemaní,” Ngaahi Talanoa ʻo e Fuakava Foʻoú, 129–32.

• Hivaʻi fakataha e “Fie Siofia Ha Temipale,” Tohi Hiva ʻa e Fānaú, 99. Ko e hā ha ngaahi lea ʻi he hivá ʻokú ne fakamatalaʻi e ʻofa ʻa e Fakamoʻuí? Fehuʻi ki he fānaú ʻa e founga te nau lava ai ʻo tokoniʻi e niʻihi kehé ke nau ongoʻi e ʻofa ʻa e Fakamoʻuí.

Koeʻuhi naʻe toetuʻu ʻa Sīsū, te u lava ʻo toe moʻui.

Te ke tokoniʻi fēfē ʻa e fānaú ke mahino kiate kinautolu, te tau toetuʻu ʻi ha ʻaho mo kinautolu ʻoku tau ʻofa aí, koeʻuhí ko Sīsū Kalaisi?

Ngaahi ʻEkitivitī ʻe Ala Fakahokó

• Akoʻi ki he fānaú ʻa e talanoa ʻo e Toetuʻú ʻaki e ngaahi fakatātā ʻo Kalaisi ʻi Ketisemaní, ʻi he kolosí, pea ʻi he hili ʻEne Toetuʻú, ʻa ia ʻoku maʻu ʻi he Tohi Fakatātā ʻo e Ongoongoleleí (fika 56, 57, 58, 59, mo e 60), pea mo e fakatātā peesi kakato ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Fāmilí. Tuku ki ha fānau ʻe niʻihi ke nau puke ʻa e ngaahi fakatātaá lolotonga hoʻo fai e talanoá. Talanoa ki he fānaú fekauʻaki mo ha kakai ʻe niʻihi ne nau mamata kia Sīsū hili ʻEne toetuʻú, hangē ko Melé (vakai Sione 20:1–18) pe ko Tōmasí (vakai Sione 20:24–29).

• Fekumi pe ʻoku ʻiloʻi nai ʻe he fānaú e ʻuhinga ʻoku tau fakamanatu ai e Toetuʻú. Fakamatalaʻi ange ʻoku tau fakamanatu e Toetuʻú ko e ʻaho mahuʻinga taha ʻi he hisitōliá—ko e ʻaho naʻe toetuʻu ai ʻa Sīsū Kalaisí. Fehuʻi ange pe ʻoku ʻi ai ha fānau ʻoku nau fie vahevahe ʻa e meʻa ʻoku fai ʻe heʻenau ngaahi fāmilí ke fakamanatua e Toetuʻu ʻa Sīsū Kalaisí.

• Fakamatalaʻi ange ʻoku ʻuhinga e toetuʻú ki he toe moʻui hili ʻetau maté. Fai hoʻo fakamoʻoni te tau toetuʻu koeʻuhi ko Sīsū Kalaisi—te tau toe moʻui hili ʻetau maté, pea he ʻikai ʻaupito ke tau toe mate.

• Fakaʻaongaʻi ha kofunima ke akoʻi ki he fānaú ʻoku tau maʻu kotoa ha sino (ʻoku fakafofongaʻi ʻe he kofunimá) mo ha laumālie (ʻoku fakafofongaʻi ʻe ha nima). ʻI he taimi te tau mate aí, ʻoku hokohoko atu e moʻui ʻa hotau ngaahi laumālié, kae ngata e moʻui ʻa hotau ngaahi sinó. ʻI he taimi ʻoku tau toetuʻu aí, ʻoku toe fakatahataha mai hotau laumālié mo e sinó. Tuku ki he fānaú ke nau taufetongi ʻi tui mo vete ʻa e kofunimá.

• Hiva fakataha ha hiva Toetuʻu, hangē ko e “Naʻe Toetuʻu Nai ʻa Sīsū?” pe “Kuo Toetuʻu ʻa Sīsū,” Tohi Hiva ʻa e Fānaú, 45, 44, pea fakaʻaliʻali ki he fānaú ha ngaahi fakatātā ʻo Sīsū hili ʻEne toetuʻú (Tohi Fakatātā ʻo e Ongoongoleleí, fika 59, 60, 61).

• Fakaʻaliʻali ha fakatātā ʻo ha tokotaha ʻokú ke ʻiloʻi kuo mālōlō. Vahevahe hoʻo fakamoʻoni te ne toetuʻu koeʻuhí ko e Fakalelei mo e Toetuʻu ʻa Sīsū Kalaisí.

• Huluʻi ʻa e vitiō “Toetuʻu ʻa Sīsū” (LDS.org). ʻE lava ke maʻu ha ngaahi pōpoaki lahi ange fekauʻaki mo e Toetuʻú ʻi he mormon.org/easter.

Kuó Ne Toe Tuʻu, tā ʻe Greg Olsen

Akoʻi e Tokāteliné

Fānau Lalahi Angé

Naʻe mamahi ʻa Sīsū ʻi Ketisemani pea ʻi he funga kolosí maʻaku.

ʻI hoʻo ako ʻa e Fakalelei ʻa e Fakamoʻuí, fakalaulauloto ki he founga ʻe lava ke ke tokoniʻi ai e fānaú ke nau ako mo manatuʻi naʻe mamahi ʻa Kalaisi ʻi Ketisemani pea ʻi he kolosi maʻa ʻenau ngaahi angahalá, ngaahi mahakí, mo e ngaahi mamahí.

Ngaahi ʻEkitivitī ʻe Ala Fakahokó

• Lau fakataha mo e fānaú e Luke 22:39–44 pea mo e ngaahi veesi filifili mei he Mātiu 27:29–50. Fakaafeʻi kinautolu ke fekumi ki he ngaahi foʻi lea ʻokú ne tokoniʻi kinautolu ke mahino e meʻa ne aʻusia ʻe he Fakamoʻuí ʻi Ketisemani pea ʻi he kolosí.

• Tokoniʻi e fānaú ke nau maʻuloto e tefito ʻo e tui fika tolú. Vahevahe hoʻo fakamoʻoní, ʻoku maʻu ʻe Sīsū Kalaisi e mālohi ke fakahaofi kitautolu mei he angahalá mo e maté.

• Tokoni ki he fānaú ke nau teuteu ha ngaahi lea fekauʻaki mo e Fakalelei ʻo Sīsū Kalaisí ʻa ia te nau lava ʻo vahevahe mo e niʻihi kehé. Poupouʻi kinautolu ke fakakau ha potu folofola mo ʻenau ngaahi fakamoʻoní, ʻi heʻenau ngaahi leá. Kapau te nau fie maʻu ha tokoni makehe, te nau lava ʻo lau e “Fakalelei ʻa Sīsū Kalaisí” ʻi he Tuʻu Maʻu ʻi he Tuí (27–34).

Koeʻuhi naʻe pekia pea toetuʻu ʻa Sīsū, te u lava ʻo toe moʻui.

ʻE aʻusia ʻe he fānau ʻokú ke akoʻí, ha mate ʻo ha ʻofaʻanga ʻi ha ʻaho kapau ʻoku teʻeki ai ke nau aʻusia ia. Tokoniʻi kinautolu ke nau ʻilo, koeʻuhí naʻe toetuʻu ʻa Sīsū Kalaisi, te tau toetuʻu kotoa mo kitautolu.

Ngaahi ʻEkitivitī ʻe Ala Fakahokó

• Fakaʻaliʻali e Tohi Fakatātā ʻo e Ongoongoleleí, fika 57, 58, mo e 59, pea kole ki he fānaú ke nau fakatauhoa e ngaahi fakatātaá ki he ngaahi veesi folofola ko ʻení: Mātiu 27:29–38, 59–60; Sione 20:10–18.

• Fakaafeʻi e fānaú ke nau takitaha lau e “Toetuʻú” ʻi he Fakahinohino ki he Folofolá pea hiki ha ngaahi fehuʻi te nau lava ʻo fehuʻia fekauʻaki mo e meʻa ʻoku nau laú. ʻOange ki he fānaú ha taimi ke nau fai ai ʻenau ngaahi fehuʻí ki he niʻihi kehé pea fekumi fakataha ki he ngaahi talí.

• Tokoniʻi e fānaú ke nau fekumi ʻi he fakahokohoko ʻo e tefitó, ʻi he Tohi Hiva ʻa e Fānaú ke maʻu ha hiva fekauʻaki mo Sīsū Kalaisi pe ko e Toetuʻú, ʻa ia te nau fie ako. Toutou hivaʻi fakataha ʻa e foʻi hivá. Fehuʻi ki he fānaú pe ko e hā e meʻa ʻoku nau ako mei he hivá ni.

• Fakaafeʻi ha fānau ʻe niʻihi kimuʻa ʻi he kalasí, ke nau omi mateuteu ke vahevahe ʻenau ngaahi fakamoʻoni fekauʻaki mo e Fakalelei mo e Toetuʻu ʻa e Fakamoʻuí. Fakaafeʻi e fānaú ke nau hiki hifo ʻenau ngaahi fakamoʻoní ke vahevahe ʻi ʻapi.

Poupouʻi e Ako ʻi ʻApí

Ke tokoni ki he fānaú ke nau vahevahe e meʻa ne nau akó ki honau ngaahi fāmilí, poupouʻi kinautolu ke nau hivaʻi ha foʻi hiva ʻi ʻapi he uiké ni fekauʻaki mo Sīsū Kalaisi.

Fakatupulaki ʻEtau Akoʻí

ʻOku ʻaonga ʻa hono toutou fakahokó ki he fānaú. ʻOua ʻe manavasiʻi ke toutou fai e ngaahi ʻekitivitií, tautefito ki he fānau iiki angé. ʻE tokoni hono toutou fakahokó ke manatuʻi ʻe he fānaú e meʻa ʻokú ke akoʻí.