“Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Palaimelí,” Haʻu, ʻo Muimui ʻIate Au—Maʻá e Palaimelí: Fuakava Foʻoú 2019 (2019)
“Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Palaimelí,” Haʻu, ʻo Muimui ʻIate Au—Maʻá e Palaimelí: 2019
Ko Hono Fakaʻaongaʻi ʻo e Haʻu, ʻo Muimui ʻIate Aú—Maʻá e Palaimelí
Ko e Teuteu ke Faiako ʻi he Palaimelí
ʻOku totonu ke hoko ʻa e ʻapí ko e uho ia ʻo e ako ki he ongoongoleleí. Ko e meʻa moʻoni ʻeni kiate koe mo e fānau ʻokú ke akoʻí. ʻI hoʻo teuteu ke akoʻí, kamata ʻaki haʻo ngaahi aʻusia pē ʻaʻau ʻi he folofolá. ʻE hoko hoʻo teuteu mahuʻinga tahá ʻi he taimi ʻokú ke fekumi ai ki he ueʻi ʻo e Laumālie Māʻoniʻoní.
Ko ha konga mahuʻinga foki ʻa hoʻo teuteú ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. ʻE tokoni ia ke ke maʻu ha mahino lahi ange ki he ngaahi tefitoʻi moʻoni ʻoku maʻu ʻi he folofolá.
Lolotonga hoʻo teuteú, te ke maʻu ha ngaahi fakakaukau mo ha ngaahi ongo fekauʻaki mo e fānau ʻokú ke akoʻí. Te ke maʻu ha ngaahi fakakaukau ki he founga ʻe faitāpuekina ai ʻenau moʻuí, ʻe he ngaahi tefitoʻi moʻoni ʻi he folofolá. ʻE tataki koe ke ke ueʻi fakalaumālie kinautolu ke nau ʻiloʻi e ngaahi tefitoʻi moʻoni ko iá, ʻi heʻenau ako mei he folofolá maʻanautolu mo honau ngaahi fāmilí. Manatuʻi ke ke ongoʻingofua e fānaú ʻoku ʻikai ke poupouʻi ʻa e ako folofola angamaheni fakafāmilí ʻi he tūkunga honau ngaahi fāmilí.
Ngaahi Fakakaukau ki hono Akoʻí
ʻI hoʻo teuteu ke akoʻí, ʻe malava ke ke maʻu ha ueʻi fakalaumālie makehe ʻaki hoʻo fekumi ʻi he ngaahi fokotuʻutuʻu ʻoku ʻi he maʻuʻanga tokoni ko ʻení. ʻOua te ke pehē ko e ngaahi fakakaukau ko ʻení ko ha ngaahi fakahinohino fakahokohoko, ka ko ha ngaahi fokotuʻu ke tokoni ke ke maʻu ha ngaahi ueʻi fakalaumālie ʻiate koe pē. ʻOkú ke ʻiloʻi e fānau ko ʻení, pea ʻoku ʻafioʻi foki kinautolu ʻe he ʻEikí—kau ai ʻenau ngaahi fie maʻú mo e meʻa ʻoku lava ʻo mahino kiate kinautolú. Te Ne ueʻi fakalaumālie koe ʻaki e ngaahi founga lelei taha ke akoʻi mo tāpuekina ʻaki e fānaú.
ʻOkú ke maʻu ha ngaahi maʻuʻanga tokoni lahi makehe lolotonga hoʻo teuteú, kau ai e ngaahi fakakaukau ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e ʻū makasini ʻo e Siasí. Ki ha toe fakamatala lahi ange fekauʻaki mo e ngaahi meʻá ni mo e ngaahi maʻuʻanga tokoni kehé, vakai ki he “Ngaahi Maʻuʻanga Tokoni Makehe ki hono Akoʻi ʻo e Fānaú.”
Ko Ha Ngaahi Meʻa ke Manatuʻi
-
ʻOku maʻu ʻe he mātuʻá ʻa e tefitoʻi fatongia ke akoʻi ʻenau fānaú. ʻOkú ke maʻu ha fatongia mahuʻinga ko ha faiako, ke ke poupouʻi, fakalotolahi, mo langaki hono ako ʻo e ongoongoleleí ʻi ʻapi. Ke ke ongoʻingofua e fānau ʻoku ʻikai akoʻi ʻe heʻenau ngaahi mātuʻá ʻa e ongoongoleleí ʻi honau ʻapí. Fakakau e fānau kotoa pē ʻi he fealēleaʻaki ʻi he ongoongoleleí neongo honau ngaahi tūkunga ʻi ʻapí.
-
ʻOku lelei hono toutou fakahoko ha meʻa. ʻOku lelei ange hono ako ʻe he fānaú e ngaahi moʻoni ʻo e ongoongoleleí ʻi he taimi ʻoku toutou akoʻi ai e ngaahi moʻoni ko ʻení, ʻi ha ngaahi ʻekitivitī kehekehe. Kapau te ke ʻiloʻi ʻoku lelei ʻa e ngaahi ʻekitivitī akó ki he fānaú, fakakaukau ke toutou fakahoko ia, tautefito kapau ʻokú ke akoʻi ha fānau iiki ange. Te ke lava foki ʻo toe vakaiʻi ha ʻekitivitī mei ha lēsoni kimuʻa.
-
ʻOku finangalo e Tamai Hēvaní ke ke tupulaki ko ha faiako. Kuó ne ʻomi ha ngaahi maʻuʻanga tokoni lahi ke tokoniʻi koe ke ke tupulaki, kau ai e ngaahi fakataha alēlea fakafaiakó. ʻI he ngaahi fakataha ko ʻení, ʻoku lava ke ke fealeaʻaki mo e kau faiako kehé fekauʻaki mo ha faʻahinga faingataʻa te ke ala fehangahangai mo ia. Te ke lava foki ʻo aleaʻi mo akoako fakahoko e ngaahi tefitoʻi moʻoni ʻo e faiako hangē ko Kalaisí.
-
Kapau ʻokú ke akoʻi e fānau iiki angé pea fie maʻu ha tokoni makehe, vakai ki he “Ko Hono Feau e Ngaahi Fie Maʻu ʻa e Fānau Iiki Angé” ʻi he maʻuʻanga tokoni ko ʻení.
-
ʻOku kau ʻi he maʻuʻanga tokoni ko ʻení ha ngaahi lēsoni ki he uike kotoa pē ʻo e taʻú tukukehe e ongo Sāpate ʻe ua ʻoku fakahoko ai e konifelenisi lahí. ʻI he ʻaho Sāpate ʻoku ʻikai fakahoko ai e Palaimelí koeʻuhi ko e konifelenisi fakasiteiki pe ko ha faʻahinga ʻuhinga, ʻe lava hokohoko atu e ngaahi fāmilí hono lau e Fuakava Foʻoú ʻi ʻapi ʻo fakatatau mo e taimi-tēpile kuo fokotuʻutuʻú. Koeʻuhi ke muimui totonu hoʻo kalasi Palaimelí ki he taimi-tēpilé, ʻe lava ke ke fili ke hiki fakalaka mei ha lēsoni pe fakatahaʻi ha foʻi lēsoni ʻe ua. Ke fakaʻehiʻehi mei he puputuʻú, ʻe ala fie maʻu ʻe he kau palesiteni Palaimelí ke faleʻi e kau faiakó fekauʻaki mo e ngaahi liliu ko ʻení kimuʻa.