O Iesu o loo Lauga Atu i luga o le Mauga, saunia e Gustave Doré

13–19 Fepuari

Mataio 5; Luka 6

“Amuia Outou”

O lou avanoa e aoao ai tamaiti e taua tele. A o e saunia oe lava faaleagaga, o le a taialaina oe e le Alii.

Valaaulia le Fefaasoaai

Fai atu i tamaiti e talanoa e uiga i se mea na latou faia i lenei vaiaso e faasoa atu ai le malamalama o le Alii i se tasi—atonu e ala i le avea ma se faataitaiga lelei po o le faaali atu o le alofa ma le agalelei.

Aoao atu le Aoaoga Faavae: Tamaiti Laiti

Mataio 5:9

E mafai ona avea au o se faatupu filemu.

E mafai e tamaiti e te aoaoina ona maua se tosinaga mamana i le fale a o latou taulimaina isi ma le alofa ma le agalelei.

Gaoioiga e Mafai ona Fai

• Faitau le Mataio 5:9 i tamaiti, ma faamalamalama i ai o e faatupuina le filemu e faia soo se nofoaga ia toafilemu, tusa lava po o fea e i ai. Tusi ni fasipepa o ni nai faataitaiga o tulaga faigata e ono feagai ma tamaiti (mo se faataitaiga, o tamaiti ma o latou tei o loo taufao i se meataalo). Valaaulia tamaiti taitasi e piki se fasipepa. A o e faitauina le ata faataitai, fai ia i latou e faasoa mai pe mafai faapefea ona avea i latou o se e faatupuina le filemu i lena tulaga. Pe faasoa atu ni nai ata fatu faataitai, e fesoasoani i tamaiti e faailoa mai pe o ni faatupu filemu ia tagata o loo aofia ai.

• Valaaulia ni nai matua o tamaiti e asiasi ane i le vasega ma faasoa mai ni faataitaiga o taimi na avea ai a latou fanau ma e faatupu filemu i le fale.

Mataio 5:14–16

E finagalo Iesu ia ou avea ma malamalama i isi.

E mafai e tamaiti laiti ona i ai se tosinaga mamana mo le lelei o isi. E mafai faapefea ona e musuia i latou e faasusulu atu lo latou malamalama?

Gaoioiga e Mafai ona Fai

• Faaali i tamaiti ni mea e maua mai ai le malamalama, ma faaali atu se ata o tamaiti. Faitau le Mataio 5:14–16, ma ta‘u atu i tamaiti o a latou faataitaiga lelei e mafai ona pei o se malamalama mo isi e vaai i ai. E mafai faapefea ona tatou faaaogaina lo tatou malamalama e aumaia ai isi i le Atua?

• Ki se moliuila faataamilo i le potu, ma valaaulia tamaiti e mulimuli ai o latou mata i le malamalama. Faaaoga le malamalama e tata’i ai mata i se ata o le Faaola. E fesoasoani faapefea le malamalama ia i tatou? E mafai faapefea ona avea oe ma se malamalama i le lalolagi? Pupuni le moliuila. O le a le mea e tupu pe a tatou le faasoa atu lo tatou malamalama pe nanaina foi?

• Nana se moliuila i le potu, ma tape moli. Tuu i tamaiti e taumafai e sue. Toe faamanatu le Mataio 5:15, ma talanoa pe aisea e le tatau ai ona tatou nanaina lo tatou malamalama.

• Fesoasoani i tamaiti e sue ma valivali moliga’o o loo nana i le itulau o gaoioiga o lenei vaiaso.

• Usu faatasi ma tamaiti se pese e faatatau i le avea ma se malamalama mo isi, e pei o le “E Manao Iesu Ia Ou Fai ma Sulu,” “Susulu Pea,” po o le “E Pei A’u o se Fetu” (Tusipese a Tamaiti, 38, 96, 84).

E mafai ona tatou fiafia e ala i le ola ai i le ala na aoao mai e Iesu.

Mataio 5:44–45

E finagalo Iesu Keriso ia ou alofa i tagata uma.

E mafai e tamaiti laiti ifo ona amata nei ona faataitai le faaalia o le alofa, tusa lava pe soona fai i latou e a latou uo po o o latou tei. A o e faitauina le Mataio 5:44–45, mafaufau pe faapefea ona faatatau aoaoga a le Faaola i tamaiti o loo e faiaoga ai.

Gaoioiga e Mafai ona Fai

• Toe faaupu le Mataio 5:44 e faaaoga ai upu ma tulaga o le a malamalama ma fesootai i ai tamaiti. Fai i tamaiti e faasoa mai ni taimi na latou faaali atu ai le alofa i se tasi tusa lava pe na faigata. O a ni o latou lagona e uiga i nei aafiaga?

• Usu faatasi o se vasega se pese e faatatau i le alofa atu i isi, e pei o le “Ia Fealofani” (Tusipese a Tamaiti, 74). O le a se mea ua tatou aoao mai i lenei pese e uiga i le alofa i isi?

• Avatu i tamaiti ia fatu pepa ua tusia ai upu “O le a ou faaalia lo’u alofa mo tagata uma.” Fai i ai e teuteu ia ata ma faatautau i o latou fale e fai ma faamanatu ia alolofa atu i isi.

Aoao atu le Aoaoga Faavae: Tamaiti Matutua

Mataio 5:3–12

E mafai ona ou fiafia pe a ou ola i le ala ua aoao mai e Iesu.

Ao e faitauina le Mataio 5:3–12, o a upu ma fasifuaitau o tu matilatila mai ia te oe? O le a faamanuiaina faapefea olaga o tamaiti e te faiaoga ai ona o nei aoaoga?

Gaoioiga e Mafai ona Fai

• Fatu se siata i le laupapa e i ai ni koluma se lua, faaigoa Amuia e … ma le Faamanuiaga. Valaaulia tamaiti e saili le Mataio 5:3–12 ma vaavaai mo uiga lelei o i latou na fetalai Iesu o le a faamanuiaina ma faamanuiaga na Ia folafola atu ia i latou. Ona faatumu lea o le siata i mea e te maua. Talanoa ma tamaiti po o le a le uiga o uiga lelei taitasi ma faamanuiaga e o faatasi ai.

• Tusi uiga lelei taitasi mai nei fuaiupu i luga o se kata ma lona faamanuiaga talafeagai i luga o se kata. Mo se faataitaiga, e fai mai se tasi o kata “agamalu,” ae fai mai le isi “e fai mo latou tofi le nuu” (fuaiupu 5). Tuu atu i tamaiti e faafetaui uiga lelei ma faamanuiaga. Fai i tamaiti e piki se uiga auaumama se tasi i fuaiupu nei latou te mananao e atinae.

Matao 5:9, 21–24, 38–47

E mafai ona avea au o se faatupu filemu.

Na aoao mai e Iesu o e faatupu filemu o le a ta’ua o fanau a le Atua. E mafai faapefea ona e musuia tamaiti e avea ma e faatupu filemu?

Gaoioiga e Mafai ona Fai

• Valaaulia se tamaitiiti e faitau leotele le Mataio 5:9 . O le a le tagata e faatupuina le filemu? O a ni auala e mafai ai ona avea i tatou o ni tagata e faatupuina le filemu i o tatou aiga ma uo? (Mo ni nai manatu, tagai fuaiupu 21–24, 38–47.)

• Fai i tamaiti taitasi e mafaufau i se tulaga e ono manaomia ai le fesoasoani a se faatupu filemu. O le a se mea e ono fai e se faatupu filemu i le tulaga lea?

• Valaaulia tamaiti e faasoa mai taimi na latou faaali atu ai le alofa i se tasi, tusa lava pe ese lena tagata mai ia i latou pe faigata foi ona alofa i ai.

Mataio 5:14–16

O la’u faataitaiga e mafai ona faamalamalama ai le ala mo isi e mulimuli ia Iesu.

O le toatele o tamaiti o loo e aoaoina ua osia feagaiga o le papatisoga. Mafaufau pe faapefea ona fesootai upu a le Faaola i le Mataio 5:14–16 ma a latou feagaiga. O a ni savali atonu o i ai a le Alii i lenei fuaitau mo tamaiti o lau vasega?

Gaoioiga e Mafai ona Fai

• Fesoasoani i tamaiti e tauloto le Mataio 5:16. Tusi le fuaiupu i luga o le laupapa. Faitau faatasi mo ni nai taimi, ma tape ese ni nai upu i taimi taitasi. Valaaulia tamaiti e tusi ata o mea e mafai ona latou fai e avea ai o se malamalama i isi. Talanoa pe faapefea e le avea o se malamalama i isi ona fesoasoani ia i tatou e faataunuu a tatou feagaiga o le papatisoga (tagai Mosaea 18:8–10).

• Usu faatasi se pese e faatatau i le faasoaina o le malamalama, e pei o le “Susulu Pea” (Tusipese a Tamaiti, 96). E mafai faapefea ona tatou faasoa atu le malamalama o le Faaola?

• Fai i tamaiti e tusi ata o mea e maua mai ai le malamalama. Faitau le Mataio 5:14–16. Fai i ai pe aisea ua manao ai Iesu ia avea i tatou ma malamalama o le lalolagi.

• Valaaulia ni tamaiti se toalua e faafesagai, ona fai lea i le tasi e faa’ata le isi e aunoa ma le pa’i atu ia te ia. Talanoaina le mana o loo i ai i tamaiti e aumaia ai le fiafia i isi.

Uunaia le Aoaoina i le Aiga

Lu’i tamaiti e vaavaai mo se tasi na avea ma faatupu filemu i lenei vaiaso. I le amataga o le vasega i le vaiaso a sau, valaaulia i latou e talanoa mai po o ai ae pe o le a foi na latou vaai i ai.

Faaleleia o Lo Tatou Aoao Atu

Fesoasoani i tamaiti ia sagisagi mai. “Ao e aoaoina tamaiti, faataga i latou e fau, tusi ata, valivali, tusitusi, ma fatufatu. O nei mea e sili atu nai lo na o ni gaoioiga malie—e taua i le aoaoina” (Aoao Atu i le Ala a le Faaola, 25).