I Totonu o le Vao, saunia e Eva Koleva Timothy

30 Ianuari–5 Fepuari

Mataio 4; Luka 4–5

“Ua i O’u Luga le Agaga o le Alii”

Amata lau tapenapenaga mo lenei lesona i le faitauina o le Mataio 4 ma le Luka 4–5. O leSau, Mulimuli Mai ia te Au—Mo Tagata Taitoatasi ma Aiga e mafai ona fesoasoani e te malamalama ai i nei mataupu, ma e mafai ona avatu e lenei otootoga ia te oe ni manatu faafaiaoga.

Valaaulia le Fefaasoaai

Fai i tamaiti e pasi atu se ata o Iesu mai lea tamaitiiti i le isi. A o uu e tamaiti taitasi le ata, valaaulia o ia e faasoa mai se mea na faia e Iesu a o i ai o Ia i le lalolagi.

Aoao atu le Aoaoga Faavae: Tamaiti Laiti

Mataio 4:1–11; Luka 4:1–13

E mafai ona ou filifilia le mea sa’o pei ona sa faia e Iesu.

O tamaiti laiti “e le mafai ona agasala” (Mataupu Faavae ma Feagaiga 29:47). Peitai, o le tala ia Iesu i le teenaina o faaosoosoga a Satani e mafai ona musuia ai tamaiti e filifili le mea sa’o.

O Gaoioiga e Mafai Ona Fai

• Faamatala le tala o faaosoosoga o Iesu mai le Mataio 4:1–11. (Tagai foi “Mataupu 11: Ua Tofotofoina Iesu,” i le Tala o le Feagaiga Fou, 30–31, po o le vitio talafeagai o loo i luga o le ChurchofJesusChrist.org.) Pe a oo i vaega talafeagai i le tala, fesili, “O le a se mea e te manatu e tatau ona fai e Iesu?”

• Faaali se ata o Iesu Keriso, ona faamatala lea o filifiliga a se tamaitiiti e ono faia? Fai atu i tamaiti e fai se laa se tasi agai atu i le ata i taimi uma e te faamatalaina ai se filifiliga lelei. Fai atu i tamaiti e fai se laa se tasi agai ese mai le ata i taimi uma e te faamatalaina ai se filifiliga leaga.

• Fesoasoani i tamaiti e aoao upu o le pese e faatatau i le faiga o filifiliga sa’o, e pei o le “Filifili Le Ala Sa’o” (Tusipese a Tamaiti, 82). Faaaoga ata, meafaitino, po o isi mea faitino e fesootai ma upu o le pese.

Luka 4:18–19

O Iesu Keriso o lo’u Faaola.

O loo faamatalaina e leLuka 4:18–19 le misiona a Iesu. E mafai faapefea ona e fesoasoani i tamaiti e talisapaia mea sa Ia faia mo i latou?

O Gaoioiga e Mafai Ona Fai

• Faitau le Luka 4:18–19 i tamaiti, ma faamalamalama atu le mea na auina mai Iesu Keriso i le lalolagi e fai (e aoao i tatou i le auala e toe foi atu ai i le Tama Faalelagi, e faamafanafana i tatou, ma faamalolo i tagata). Faasoa pe na faapefea ona Ia faia nei mea mo oe.

• Valaaulia ni nai tamaiti e faafoliga ua le mautonu, faanoanoa, pe mama’i. Fai i isi tamaiti e faatino i taga mea e mafai ona latou fai e fesoasoani ai ia te i latou. Molimau atu na sau Iesu Keriso e aoao mai, faamafanafana, ma faamalolo i tatou, ma e tatau ona tatou mulimuli i Ana faataitaiga.

• Faaali ni ata o Iesu o loo faataunuuina Lana misiona (tagai Tusi Ata o le Talalelei). Ia valaaulia tamaiti e faamatala mai mea o loo fai e Iesu i ata taitasi. Faaali atu foi ata o tagata o loo taumafai e avea faapei o Iesu (e mafai ona e maua nisi i mekasini a le Ekalesia).

Mataio 4:18–22; Luka 5:1–11

Ua valaaulia i tatou e Iesu Keriso e avea ma “fai faiva i tagata.”

O le valaau a le Faaola, “Mulimuli Mai ia te Au, Ou te faia oulua ma fai faiva i tagata” (Mataio 4:19), e faatatau i tagata uma, e aofia ai ma tamaiti.

O Gaoioiga e Mafai Ona Fai

• Valaaulia ni tamaiti se toalua e faafoliga faapea o Simona Peteru ma Aneterea a o e faitauina le Mataio 4:18–22. Fesoasoani i tamaiti e faailoa mai mea na lafoai e nei tagata ae mulimuli ia Iesu.

• Tuu i tamaiti e feauaua’i e faamatala le tala mai nei faiupu e faaaoga ai le ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga.

• Usu faatasi se pese e faatatau i le mulimuli ia Iesu Keriso, e pei o le “O Le a Ou Mulimuli I Le Fuafuaga a le Atua” (Tusipese a Tamaiti, 86--87). Fesoasoani i tamaiti e saili mea o loo taua i le pese e mafai ona latou faia e mulimuli ai ia Iesu.

• Faaaoga le itulau o gaoioiga o le vaiaso lenei e talanoaina ai ma tamaiti pe mafai faapefea ona avea i latou ma “fai faiva i tagata” e ala i le mulimuli ia Iesu. E mafai foi ona outou taaalo i se taaloga faafetaui ma le itulau o gaoioiga. ‘Oti mai ni kopi se lua o i’a taitasi, tuu faafao i lalo, ma valaaulia tamaiti e fuli i luga taitasi i le taimi e faafetaui ai.

Ua Valaauina e Keriso So’o e Toalua, saunia e Gary Ernest Smith

Aoao atu le Aoaoga Faavae: Tamaiti Matutua

Mataio 4:1–11; Luka 4:1–13

Ua faia e Iesu le faataitaiga mo au i le teena o faaosoosoga.

E oo lava ia Iesu Keriso sa faaosoosoina e Satani, ae sa le’i faamatuu atu lava o Ia i ai. E mafai faapefea ona e fesoasoani i tamaiti e mulimuli i Lana faataitaiga?

Gaoioiga e Mafai Ona Fai

• Fai se siata i le laupapa ma faaigoa O Faaosoosoga a Satani ma le O Tali a Iesu. Fesoasoani i tamaiti e faatumu le siata e faaaoga ai le Mataio 4:1–11 ma le Luka 4:1–13. Fesili i tamaiti pe mafai faapefea ona latou mulimuli i le faataitaiga a Iesu.

• Tusi ni nai tulaga faataitai lea e ono tofotofoina ai se tamaitiiti e fai se faaiuga sese. Tuu atu i se tamaitiiti e filifili se tulaga faataitai se tasi e faitau, ma tuu atu i tamaiti e talanoaina pe mafai faapefea ona latou teena le tofotofoga i lea tulaga.

Mataio 4:1–2

E mafai ona fesoasoani le anapogi ou te lagona ai le latalata atu i le Tama Faalelagi.

A o lei amataina Lana galuega, na anapogi Iesu ma “fesootai atu i le Atua” (Faaliliuga Iosefa Samita, Mataio 4:2 [i le Mataio 4:2, vaefaamatalagai]). Fesoasoani i tamaiti ia iloa pe mafai faapefea e le anapogi ona latou maua ai le malosi faaleagaga ma fesoasoani ia latou lagona le latalata atu i le Tama Faalealagi.

Gaoioiga e Mafai Ona Fai

• Valaaulia se tamaitiiti e faitau le Mataio 4:1–2 e faaaoga ai le faafouga o le Faaliliuga a Iosefa Samita o loo maua i vaefaamatalaga. O le a le mea na faia e Iesu ina “ia faatasi ai ma le Atua”? Faasoa atu pe na faapefea ona fesoasoani le anapogi ia te oe e latalata atili ai i le Tama Faalelagi.

• Valaaulia tamaiti na anapopogi muamua e faasoa mai o latou aafiaga. E faapefea ona latou faamatalaina le anapogi i se tasi e lei anapogi lava muamua?

• Tusi fesili e uiga i le anapogi (e pei o le aisea, o anafea, po o le pe faapefea ona tatou anapogi) i ni fasipepa, ona tuu lea i se pesini. Valaaulia tamaiti e piki se fesili ma taumafai e tali. O a aafiaga e mafai ona e faasoa mai pe faasoa mai e tamaiti e uiga i le anapogi?

Luka 4:16–22, 28–30

O Iesu Keriso o lo’u Faaola

Mafaufau loloto pe na faapefea ona faamanuiaina lou olaga e le Faaola. E mafai faapefea ona e fesoasoani i tamaiti ia talisapaia atili Ana tosinaga i o latou olaga?

Gaoioiga e Mafai Ona Fai

• Valaaulia se tamaitiiti e sau sauni i le vasega e faasoa le tala o loo i le Luka 4:16–30. Atonu e fesoasoani foi le faaaoga o le “Mataupu 17: Tagata Feita o loo i Nasareta” (i le Tala o le Feagaiga Fou, 42-43, po o le vitio talafeagai o loo i le ChurchofJesusChrist.org). E mafai foi ona e faaali atu le vitio “Jesus Declares He Is the Messiah” (ChurchofJesusChrist.org).

• Faitau le Luka 4:18 a o mulimuli atu ai tamaiti. Fai i ai e fatu se lisi o mea na fai mai le Faaola na sau o Ia e fai. Valaaulia tamaiti e faasoa mai faataitaiga o taimi na faia ai e Keriso nei mea, i tusitusiga paia po o o latou olaga.

• Tusi i luga o fasi pepa upu “Ona o Iesu Keriso …” Tuu atu i tamaiti taitasi se pepa, ma valaaulia i latou e tusi pe faapefea ona latou faaumaina le fuaitau. Tuu atu ia i latou e faasoa mai mea na latou tusia.

Mataio 4:18–22; Luka 5:1–11

Ua valaaulia i tatou e Iesu Keriso e mulimuli atu ia te Ia ma avea ma “fai faiva i tagata.”

E tele auala e mafai ai e tamaiti ona mulimuli i le Faaola ma avea ma “fai faiva i tagata” (Mataio 4:19). E faapefea ona e fesoasoani ia i latou ia iloa le tosinaga lelei e mafai ona latou faia i isi

Gaoioiga e Mafai Ona Fai

• Valaaulia tamaiti e faitau le Mataio 4:18–22 ma le Luka 5:1–11. Na faapefea ona tali atu soo o Iesu i Lana valaau e mulimuli atu ia te Ia? O le a se mea e mafai ona tatou faia e mulimuli atili ai i a latou faataitaiga?

• Faaali atu i tamaiti ni nai mea fagota po o se ata o se faifaiva. O le a le uiga o le avea ma “faifaiva i tagata”? O a meafaigaluega o i ai e fesoasoani ai e avea ma fai faiva i tagata?

Uunaia le Aoaoina i le Aiga

Valaaulia tamaiti e faasoa atu i o latou aiga mea sa latou aoaoina e uiga i le avea ma faifaiva i tagata.

Faaleleia o Lo Tatou Aoao Atu

E mafai ona iloa e tamaiti le uunaiga a le Agaga. Aoao atu i tamaiti o lagona o le filemu, alofa, ma le mafanafana latou te mauaina, pe a latou talanoa pe usuina le pese e uiga ia Iesu Keriso ma Lana talalelei e mai le Agaga Paia. E mafai e nei lagona ona fausia a latou molimau.