The Good Samaritan [Ang Maayo nga Samarianhon], ni Dan Burr

Abril 17–23

Mateo 18; Lucas 10

“Unsay Kinahanglan Kong Buhaton aron Ako Makadawat sa Kinabuhing Dayon?”

Unsa nga mga kamatuoran diha sa Mateo 18 ug Lucas 10 ang kinahanglang makat-onan sa mga bata? Paminaw sa mga pag-aghat sa Espiritu Santo samtang basahon nimo kini nga mga kapitulo. Ang Dali, Sunod Kanako—Alang sa mga Indibidwal ug mga Pamilya makatabang kanimo sa paggiya sa imong pagtuon, ug kini nga latid makahatag kanimo og mga ideya sa pagtudlo.

Dapita ang Pagpaambit

Hangyoa ang mga bata sa pagpaambit og butang nga ilang nakat-onan mahitungod ni Jesukristo diha sa panimalay o sa Primary.

Itudlo ang Doktrina: Mas Gagmay nga mga Bata

Mateo 18:21–35

Kinahanglang kanunay akong mopasaylo sa uban.

Samtang imong basahon ang Mateo 18:21–35, ikonsiderar ang imong kaugalingong mga kasinatian kabahin sa pagpasaylo ug unsa ang kinahanglang mahibaloan sa mga bata mahitungod niini nga baroganan.

Posible nga mga Kalihokan

• Isaysay ang sambingay bahin sa walay kaluoy nga sulugoon (tan-awa sa Mateo 18:23–35). Ipasabot nga kon dili mabination o dili makiangayon ang usa ka tawo, tingali mobati kita og kasuko o kaguol sa sinugdanan. Apan ang pagpasaylo nagpasabot nga mahimo kitang mobati og kalinaw pag-usab. Kon pasayloon nato ang usa ka tawo, modesisyon kita nga dili na masuko kanila. (Tabangi ang mga bata nga makasabot nga kon dili mabination o dili makiangayon ang usa ka tawo ngadto kanila, kinahanglan nga mangayo sila og tabang sa ilang mga ginikanan o sa lain nga kasaligan nga hamtong.)

• Isulat ang Gipasaylo ko ikaw diha sa pisara, ug sultihi ang mga bata nga kini nga mga pulong makatabang sa pag-usab sa subo nga mga gutlo ngadto sa malipayon nga mga gutlo. Pagdrowing og masulub-on nga nawong diha sa pisara, ug pagpaambit og pipila ka ehemplo sa mga bata nga nagpinasayloay sa usag usa. Human sa matag ehemplo, pagdapit og usa ka bata nga mousab sa masulub-on nga nawong ngadto sa malipayon nga nawong.

• Kantaha uban sa mga bata ang usa ka awit mahitungod sa pagpasaylo, sama sa “Tabangi Ko, Mahal nga Amahan” (Songbook sa mga Bata, 52). Ipaambit ang imong pagpamatuod nga ang Langitnong Amahan motabang kanato sa pagpasaylo sa uban.

Lucas 10:25–37

Gitudloan ko ni Jesus nga tan-awon ang tanang tawo isip akong mga silingan ug higugmaon sila.

Ang sambingay sa maayo nga Samarianhon makapakita sa mga bata kon kinsa ang atong mga silingan ug kon unsaon nato sila sa pagtratar. Paghunahuna og mga paagi nga imong madasig ang mga bata nga “[mo]lakaw ug buhat[on] ang sama sa iyang gibuhat” (Lucas 10:37).

Posible nga mga Kalihokan

• Pangutan-a ang matag bata, “Kinsa ang imong silingan?” I-summarize ang istorya diha sa Lucas 10:25–37, aron mahibalo kon giunsa pagtubag ni Jesus kana nga pangutana. Unsa ang gitudlo ni Jesus mahitungod kon unsaon nato sa pagtratar ang atong mga silingan?

• Basaha ang Lucas 10:25–37 samtang idrama-drama sa mga bata ang sambingay sa maayong Samarianhon. Tabangi sila nga maghunahuna og mga paagi nga mahimo silang sama sa maayo nga Samarianhon pinaagi sa pagpakita og gugma ug kamabination ngadto sa uban.

• Pagsulat og pipila ka ehemplo sa mga sitwasyon diin adunay tawo nga magkinahanglan og tabang, ug tagoi ang mga papel libot sa lawak. Hangyoa ang mga bata sa pagpangita sa mga papel. Basaha ang mga sitwasyon, ug dapita ang mga bata sa pagpaambit kon unsaon nila sa pagpakita og kamabination ngadto sa tawo niana nga sitwasyon.

• Kantaha uban sa mga bata ang usa ka awit mahitungod sa kamabination, sama sa “Si Jesus Miingon Higugmaa ang Tanan” o “Pagkamabination Magsugod Kanako” (Songbook sa mga Bata, 39, 83). Tabangi ang mga bata sa paghunahuna og pipila ka paagi nga sila mopakita og gugma ug kamabination ngadto sa uban. Makadrowing usab sila og mga hulagway sa ilang kaugalingon nga nagbuhat niining mga butanga.

Itudlo ang Doktrina: Mas Magulang nga mga Bata

Mateo 18:21–35

Ang Langitnong Amahan mopasaylo kanako samtang ako mopasaylo sa uban.

Ang sambingay sa walay kaluoy nga sulugoon mahimong usa ka halandomon nga paagi sa pagtudlo sa mga bata nga gusto sa Langitnong Amahan nga pasayloon nato ang tanan.

Posible nga mga Kalihokan

• Basaha ang Mateo 18:23–35 ngadto sa mga bata. Ipasabot nga ang hari o agalon nagrepresentar sa Langitnong Amahan, ang sulugoon nagrepresentar kanato, ug ang kaubang sulugoon nagrepresentar niadtong nakahimo og sayop kanato. Pangutan-a ang mga bata og sama sa “Unsa ang gitudlo niini nga istorya mahitungod kon unsaon nato sa pagtratar ang uban? Kanus-a kamo nakasinati nga lisod ang pagpasaylo sa usa ka tawo? Giunsa man ninyo pagwagtang kadtong sakit nga mga pagbati? Kanus-a man kamo nagkinahanglan nga mapasaylo alang sa usa ka sayop nga pagpili?”

• Isulat diha sa pisara ang problema sa multiplikasyon nga 70 × 7, ug tabangi ang mga bata sa pagsulbad niini. Hangyoa ang usa ka tawo sa pagbasa sa Mateo 18:21–22, ug ipasabot nga si Jesus migamit niini nga numero aron sa pagtudlo kanato nga kinahanglang kanunay kita nga mopasaylo.

• Hangyoa ang mga bata sa pagtabang kanimo sa paghunahuna og pipila ka sitwasyon diin ang usa ka tawo tingali kinahanglang mopasaylo sa laing tawo. Dapita ang mga bata sa pagdrama-drama kon unsaon nila sa pagpakita og pagpasaylo niadto nga mga sitwasyon.

• Kantaha uban sa mga bata ang usa ka awit mahitungod sa pagpasaylo, sama sa “Tabangi Ko, Mahal nga Amahan” (Songbook sa mga Bata, 52). Tabangi ang mga bata nga makasabot kon unsay gitudlo sa mao nga awit mahitungod sa pagpasaylo sa uban.

Lucas 10:30–37

Makahigugma ug makaserbisyo ako sa uban, ilabi na niadtong nanginahanglan.

Pamalandongi ang mga higayon sa imong kaugalingong kinabuhi sa dihang ang usa ka tawo nahimong “maayo nga Samarianhon” nganha kanimo. Unsaon nimo pagdasig ang mga bata nga mahimong “maayo nga mga Samarianhon” ngadto sa uban?

Posible nga mga Kalihokan

• I-assign ang matag bata nga hilom nga basahon ang usa ka bahin sa sambingay sa maayo nga Samarianhon. Dapita ang mga bata sa pagsulti sa ilang mga bahin sa sambingay subay sa han-ay sa mga panghitabo.

• Ipasabot sa mga bata nga ang mga Judeo dili gayod ganahan sa mga Samarianhon nga kon mobiyahe sila gikan sa Jerusalem ngadto sa Galilea, molipot sila sa Samaria aron dili makaistorya ni bisan kinsang Samarianhon. Sa paghulagway niini, ipakita ang Mapa sa Biblia 1, “Pisikal nga Mapa sa Balaan nga Yuta.” Nganong migamit man si Jesus og Samarianhon isip ehemplo sa kamabination niini nga sambingay? Unsa man ang gitudlo niini nga istorya kanato mahitungod sa pagtabang sa uban nga nanginahanglan? (Tan-awa usab sa Mosiah 4:16–22.)

• Hangyoa ang mga bata sa pagpaambit og kasinatian sa dihang adunay tawo nga nahimong sama sa maayong Samarianhon ngadto kanila.

• Hagita ang mga bata sa paghimo og tumong nga mahimong sama sa maayong Samarianhon karong semanaha. Mahimo kang mangutana kanila kon nakaila ba sila og tawo nga masakiton o nag-inusara o usa ka tawo nga dili kanunay mosimba. Pangutan-a ang mga bata kon sa unsang paagi sila makatabang niana nga tawo. Tabangi ang mga bata nga makasabot kon sa unsang paagi nga ang pagserbisyo sa uban makatabang kanila sa pagtuman sa mga saad nga ilang gihimo sa bunyag (tan-awa sa Mosiah 18:8–10).

Awhaga ang Pagkat-on diha sa Panimalay

Dapita ang mga bata sa pagpaambit sa ilang mga pamilya kon unsay giplano nila nga buhaton aron mahimong mas mapasayloon o mas mahisama sa maayo nga Samarianhon karong semanaha.

Pagpalambo sa Atong Pagtudlo

Tudloi ang mga bata sa pagrekord og mga impresyon. Kon makakat-on ang mga bata sa gawi sa pagrekord og mga impresyon, makatabang kini kanila sa pag-ila ug pagsunod sa Espiritu. Ang mga bata makarekord og mga impresyon pinaagi sa pagmarka sa mga kasulatan, pagdrowing og mga hulagway, o paghimo og yano nga mga pagsulat diha sa journal.