The Transfiguration [Ang Transpigurasyon], ni Carl Heinrich Bloch

Abril 10–16

Mateo 15–17; Marcos 7–9

“Ikaw Mao ang Kristo”

Samtang pamalandongan nimo ang Mateo 15–17 ug Marcos 7–9, bantayi ang espirituhanong mga pag-aghat nga makatabang kanimo nga mahibalo kon unsay gikinahanglan sa mga bata sa imong klase.

Dapita ang Pagpaambit

Dapita ang mga bata sa pagpaambit kon nganong mapasalamaton sila sa mga lider sa Simbahan, lakip sa propeta ug apostoles ug lokal nga mga lider. Unsay bag-ohay natong nadungog nga gitudlo nila?

Itudlo ang Doktrina: Mas Gagmay nga mga Bata

Mateo 16:13–17

Makaangkon ako og pagpamatuod nga si Jesukristo mao ang Anak sa Dios.

Ikonsiderar kon sa unsang paagi nga imong magamit ang pagpamatuod ni Pedro ug ang tubag ni Jesus aron sa pagtudlo sa mga bata kon unsa ang pagpamatuod ug sa pagdasig kanila sa pagtinguha og ilang kaugalingong pagpamatuod.

Posible nga mga Kalihokan

• Hangyoa ang mga bata sa pagpaminaw kon unsa ang gisulti ni Pedro samtang basahon nimo ang Mateo 16:15–17. (Tan-awa usab sa Kapitulo 32: [Si] Pedro Mipamatuod kabahin kang Kristo,” sa Mga Istorya sa Bag-ong Tugon, 76–77.) Ipasabot nga si Pedro mihatag sa iyang pagpamatuod mahitungod ni Jesukristo. Basaha pag-usab ang mga bersikulo. Niining higayona hangyoa ang mga bata sa pagpaminaw kon kinsa ang nagsulti kang Pedro nga si Jesukristo mao ang Anak sa Dios.

• Ipaambit ang imong pagpamatuod mahitungod ni Jesukristo, ug ipasabot kon sa unsang paagi nimo kini nadawat. Dapita ang mga bata sa pagtinguha sa ilang kaugalingong mga pagpamatuod gikan sa Langitnong Amahan.

Mateo 16:15–19

Si Jesukristo mihatag sa mga yawe sa pagkapari ngadto sa mga propeta ug apostoles aron sa paggiya sa Iyang Simbahan.

Gitandi sa Manluluwas ang pagpadayag ngadto sa usa ka bato ug ang awtoridad sa pagkapari ngadto sa mga yawe. Unsaon nimo paggamit niini nga mga pagtandi aron sa pagtabang sa mga bata nga makabaton og hugot nga pagtuo ngadto niadtong nangulo sa Iyang Simbahan?

Posible nga mga Kalihokan

• Pakit-a ang mga bata og usa ka bato samtang imong basahon ang Mateo 16:18 uban kanila. Isulti og balik uban kanila ang pulongan nga “ibabaw niining bato tukoron ko ang akong simbahan,” nga mohimo og mga aksiyon nga mobagay sa mga pulong. Ipasabot nga ang Simbahan natukod diha sa “bato” sa pagpadayag.

• Pakit-a ang mga bata og pipila ka yawe, ug pangutan-a kon para sa unsa nato gamiton ang mga yawe. Ipasabot nga si Pedro ug ang ubang Apostoles nakadawat og mga yawe sa pagkapari gikan ni Jesus. Kini nga mga yawe “moabli” sa mga panalangin alang kanato ug moabli sa dalan paingon ngadto sa langit. Sama pananglit, ang mga yawe sa pagkapari nagtugot kanato nga mabunyagan ug makaambit sa sakramento. Hatagi ang mga bata og mga papel nga yawe, ug pasulata sila og pipila ka panalangin nga “maablihan” sa mga yawe sa pagkapari.

• Ipakita ang usa ka hulagway sa Presidente sa Simbahan, ug ipaambit ang imong pagpamatuod nga naghupot siya sa tanang yawe sa pagkapari karon, sama ni Pedro kaniadto.

Ang mga yawe sa pagkapari mao ang awtoridad sa pagdumala sa paggamit sa pagkapari.

Mateo 17:19–20

Ang akong hugot nga pagtuo makahimo og mga milagro.

Sa imong pagbasa sa saad ni Jesus nga ang hugot nga pagtuo sama sa usa ka liso sa mustasa makabalhin og bukid, unsa man nga mga impresyon ang imong nadawat mahitungod sa mga bata nga imong gitudloan?

Posible nga mga Kalihokan

• Basaha ang Mateo 17:19–20 uban sa mga bata. Dapita sila nga magpuli-puli sa pagdrowing og dagko nga mga bukid og gagmay nga mga liso diha sa pisara. Ipasabot nga ang mga bukid sama sa mga butang nga lisod nga buhaton alang kanato. Unsa ang pipila ka butang nga mahimong bation nga daw mga bukid alang kanato? Gamita ang pahina sa kalihokan karong semanaha aron sa pagtabang sa mga bata sa paghunahuna kon sa unsang paagi nga ang hugot nga pagtuo makatabang kanila sa pagbuhat sa mga butang nga gusto sa Dios nga ilang buhaton.

• Pagbutang og hulagway sa bukid diha sa usa ka kilid sa lawak. Hangyoa ang mga bata sa pagngalan og pipila ka butang nga ilang mabuhat aron makaangkon og dugang nga hugot nga pagtuo kang Jesukristo. Tugoti ang matag bata nga dunay gitubag nga maoy mosibog sa bukid paduol ngadto sa pikas nga bahin sa lawak. Basaha ang Mateo 17:19–20, ug pagpamatuod bahin sa gahom sa hugot nga pagtuo diha sa imong kinabuhi.

• Kantaha og dungan ang usa ka awit mahitungod sa hugot nga pagtuo, sama sa “Hugot nga Pagtuo” (Songbook sa mga Bata, 50–51). Hatagi ang matag bata og liso nga dad-on sa balay. Dapita sila sa pagtanom sa liso ug ibutang kini sa usa ka dapit diin ilang makita ang pagtubo niini aron sa pagtabang kanila nga mahinumdom nga magbaton og hugot nga pagtuo sa Langitnong Amahan ug ni Jesukristo.

Itudlo ang Doktrina: Mas Magulang nga mga Bata

Mateo 16:13–17

Ang usa ka pagpamatuod ni Jesukristo moabot pinaagi sa pagpadayag.

Sa unsang paagi ang pagpamatuod ni Pedro diha sa Mateo 16:13–17 makatabang sa mga bata samtang maglig-on sila sa ilang mga pagpamatuod?

Posible nga mga Kalihokan

• Pangutan-a ang mga bata kon unsay ilang isulti kon dunay mangutana kanila, “Kinsa si Jesus?” Dapita ang mga bata sa pagbasa sa Mateo 16:13–17 aron mahibalo kon giunsa pagtubag ni Pedro kana nga pangutana. Sa unsang paagi siya nakabaton sa iyang pagpamatuod mahitungod ni Jesus? Unsay atong mahimo aron sa paglig-on sa atong mga pagpamatuod?

• Tabangi ang mga bata sa pagtandi sa paagi nga masayod kita sa espirituhanon nga mga kamatuoran ngadto sa mga paagi nga masayod kita sa ubang mga kamatuoran. Sama pananglit, unsaon nato pagkasayod kon unsay gitas-on sa usa ka tawo o kon unsa ang kahimtang sa panahon? Unsaon nato pagkasayod nga si Jesukristo mao ang Anak sa Dios? Sultihi ang mga bata kon sa unsang paagi nga ang Espiritu Santo mipamatuod kanimo bahin sa Manluluwas.

• Ipaambit ang imong pagpamatuod kabahin ni Jesukristo, ug awhaga ang mga bata sa pag-angkon o paglig-on sa ilang kaugalingon nga mga pagpamatuod kabahin Kaniya.

Mateo 16:15–19

Ang Simbahan ni Jesukristo gipangulohan niadtong nanaghupot sa mga yawe sa pagkapari.

Ang pagtuon sa Mateo 16:15–19 makalig-on sa hugot nga pagtuo sa mga bata nga Ang Simbahan ni Jesukristo sa mga Santos sa Ulahing mga Adlaw usa ka pagpahiuli sa mao ra gihapon nga Simbahan nga gitukod ni Jesus samtang mipuyo Siya dinhi sa yuta.

Posible nga mga Kalihokan

• Isulat ang Mateo 16:19 diha sa pisara, nga blangkohan ang pipila ka pulong, lakip ang mga pulong nga “mga yaw[e].” Hangyoa ang mga bata sa pagpangita sa kulang nga mga pulong.

• Rebyoha ang “Yawe sa Pagkapari, Mga” diha sa Giya ngadto sa mga Kasulatan (scriptures.ChurchofJesusChrist.org). Unsa ang mga yawe sa pagkapari? Sa unsang paagi ang mga yawe sa pagkapari sama sa tinuod nga mga yawe?

• Tabangi ang mga bata sa paglista diha sa pisara sa pipila ka tawo nga adunay mga yawe sa pagkapari. Ang “Yawe sa Pagkapari, Mga” diha sa Giya ngadto sa mga Kasulatan (scriptures.ChurchofJesusChrist.org) adunay lista nga makatabang kanila. Dapita ang usa ka tawo sa inyong ward nga naghupot og mga yawe sa pagkapari nga magpaambit og kadiyot sa klase kon nganong importante kini nga mga yawe.

• Tagoi ang pipila ka yawe (o mga litrato sa mga yawe) libot sa lawak, ug dapita ang mga bata sa pagpangita niini. Human makit-an ang matag yawe, tabangi ang mga bata sa paghunahuna og mga panalangin nga natagamtam nato tungod sa mga yawe sa pagkapari (sama pananglit, mahangtoron nga mga pamilya, bunyag, ug ang sakramento).

Mateo 17:1–9

Si Jesukristo mao ang Anak sa Dios.

Kini nga mga bersikulo naghulagway sa usa sa pipila ka higayon diha sa mga kasulatan sa dihang nadungog ang tingog sa Dios nga Amahan nga nagpamatuod kabahin sa Iyang Pinalanggang Anak. Ang pagtuon niini nga istorya uban sa mga bata makalig-on sa ilang hugot nga pagtuo diha ni Jesukristo.

Posible nga mga Kalihokan

• Dapita ang mga bata sa pagdrowing og mga hulagway sa nahitabo nga gihulagway diha sa Mateo 17:1–9. Hangyoa sila sa pagpasabot sa ilang mga hulagway ngadto sa usag usa. (Tan-awa sa “Kapitulo 33: Pagpakita uban sa Himaya: Ang Transpigurasyon,” diha sa Mga Istorya sa Bag-ong Tugon, 78–79.)

• Hatagi ang mga bata og panahon sa pagpamalandong kon unsay gitudlo kanila sa istorya diha sa Mateo 17:1–9 mahitungod ni Jesukristo. Dapita sila sa pagsulat sa ilang mga hunahuna diha sa pisara. Dapita ang mga bata sa pagpaambit kon giunsa nila pagkasayod nga si Jesukristo mao ang Anak sa Dios.

Awhaga ang Pagkat-on diha sa Panimalay

Dapita ang mga bata sa pagpangutana sa ilang mga ginikanan o ubang mga sakop sa pamilya kon sa unsang paagi nila nabatonan ang ilang mga pagpamatuod kabahin ni Jesukristo.

Pagpalambo sa Atong Pagtudlo

Paggamit og musika. Ang mga awit sa primary ug mga himno makatabang sa mga bata sa tanang edad nga makasabot ug makahinumdom sa mga kamatuoran sa ebanghelyo. Ang pagkanta makahimo usab sa mga bata nga aktibong moapil sa pagkat-on. (Tan-awa sa Pagtudlo sumala sa Pamaagi sa Manluluwas, 22.)