Ou Te Le Faasala Foi ia Te Oe”, saunia e Eva Koleva Timothy

24–30 Aperila

Ioane 7--10

“O A’u o le Leoleo Mamoe Lelei”

A o e faitauina le Ioane 7–10, mafaufau i tamaiti o loo e aoaoina. O le tele o manatu mo tamaiti matutua atu i lenei otootoga e mafai foi ona fetuunai mo tamaiti laiti ifo, pe o le isi itu.

Valaaulia le Fefaasoaai

Faamanatu i tamaiti se mea na e valaaulia i latou e fai i se lesona talu ai. Fai atu ia i latou e faasoa mai mea na latou faia e faatino ai le valaaulia.

Aoao atu le Aoaoga Faavae: Tamaiti Laiti

Ioane 7:14–17

O le tausia o poloaiga o le a fesoasoani ia te au e iloa ai e moni.

Na aoao mai Iesu e mafai ona tatou maua se molimau o upumoni na Ia faasoa mai pe a tatou ola ai. O le filemu tatou te lagonaina pe a tatou usiusitai i poloaiga e fesoasoani tatou te iloa ai e moni. Manatunatu i se auala e mafai ona e aoao atu ai i tamaiti lenei upumoni.

Gaoioiga e Mafai Ona Fai

• Aotele le Ioane 7:17 i upu o le a malamalama ai tamaiti. Fesoasoani ia latou iloa o le usiusitai i poloaiga e fesoasoani tatou te lagona ai le latalata atili atu ia Iesu Keriso. Mo se faataitaiga, e mafai ona outou usuina faatasi se pese e pei o le “Tausi Poloaiga” po o le “Filifili le Ala Sa‘o” (Tusipese a Tamaiti, 62, 82). Fai i tamaiti e faalogologo pe faapefea ona faamanuiaina i tatou pe a tatou tausi i poloaiga.

• Faasoa atu se aafiaga ina ua e mauaina se molimau o se poloaiga e mai le Atua aua sa e ola ai, e pei o le totogi o le sefuluai po o le faamagalo atu o se tasi sa agaleaga mai. Valaaulia tamaiti e mafaufau i so latou aafiaga ina ua latou usitai i se poloaiga. Fai atu ia i latou e faasoa mai po o a ni o latou lagona i le taimi na latou usiusitai ai.

• Valaaulia ni tamaiti e tusi ni a latou ata o loo usiusitai i se poloaiga. (Fesoasoani ia i latou e mafaufau i ni faataitaiga.) Valaaulia i latou e faasoa mai a latou ata i le tasi ma le isi ma talanoa e uiga i le fiafia latou te maua mai le usitaia o lena poloaiga.

Ioane 8:29

Sa usiusitai Iesu Keriso i Lona Tama

Sa faia pea lava e Iesu Keriso mea sa fiafia i ai Lona Tama i le Lagi. E mafai faapefea ona e fesoasoani i tamaiti e sue ala e mulimuli ai i Lana faataitaiga?

Gaoioiga e Mafai Ona Fai

• Fesoasoani i tamaiti e toe fai mai le mea na fetalai ai Iesu e uiga i le Tama Faalelagi i le Ioane 8:29: “Ou te faia pea lava o mea e lelei ia te ia.” Fai i ai e faasoa mai mea na faia e Iesu e fiafia ai le Tama Faalelagi. Faaali atu i ai ni nai ata mai le Tusi Ata o le Talalelei e avatu ai ia te i latou ni manatu.

• Fesili i tamaiti pe o le a le mea latou te fiafia ai. Pe valaaulia se matua o se tasi o tamaitiiti e faasoa mai se aafiaga ina ua faia e se tamaitiiti se mea na faamalieina pe faafiafiaina ai matua. O le a se mea e mafai ona tatou faia e faafiafia ai le Tama Faalelagi? Valaaulia tamaiti e tusi ni ata o i latou lava o faia na gaoioiga e ave i le fale ma faamanatu ai ia te i latou.

Ioane 10:1–16

E silafia a’u e Iesu ma e alofa ia te au.

E mafai ona fesoasoani le faataoto i le leoleo mamoe lelei i tamaiti e malamalama ai e alofa Iesu ia te i latou ma iloa pe o ai i latou.

Gaoioiga e Mafai Ona Fai

• Fai i tamaiti e tusi ni ata e faatusa i se mea o i le faataoto i le leoleo mamoe lelei, e pei o se mamoe, se leoleo mamoe, po o se luko. Filifili ni nai fuaiupu mai le Ioane 10:1–16 e faitau atu i tamaiti, ma fai i ai e uu i luga a latou ata pe a latou faalogo ua e faitau e uiga i mea o i a latou ata. Fesoasoani i tamaiti e mafaufau i auala e pei ai Iesu o se leoleo mamoe ia i tatou. Tuu atu lau molimau e alofa le Faaola ia i tatou ma o le a taialaina i tatou e toe foi atu ia te Ia.

• Faaali le ata o Iesu ma tamai mamoe i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. E faapefea ona tatou iloaina e alofa Iesu i tamai mamoe? E mafai faapefea ona tatou iloa e alofa tamai mamoe ia Iesu? E faapefea ona tatou faaali atu ia Iesu tatou te alolofa ia te Ia?

Aoao atu le Aoaoga Faavae: Tamaiti Matutua

Ioane 7:14–17

O le tausia o poloaiga o le a fesoasoani ia te au e iloa ai e moni.

Atonu ua i ai ni ou aafiaga faapea tamaiti o loo e aoaoina i le ola ai i upumoni o le talalelei ma le aoaoina e moni. E mafai faapefea ona e tuputupu ae i luga o na aafiaga a o e aoao atu?

Gaoioiga e Mafai Ona Fai

• Tusi fuaiupu taitasi o le Ioane 7:14–17 i luga o ni fasipepa eseese, ma faaali i soo se faatulagaga. Fai i tamaiti e tuu i le faasologa sa’o ma siaki le Ioane 7:14–17 e iloa ai pe o sa’o. Valaaulia tamaiti e fai paga ma faasoa atu i a latou paga lo latou malamalama i fuaiupu taitasi. Na faapefea i le usitai i poloaiga a le Atua ona fesoasoani latou te iloa ai e moni poloaiga?

• Faasoa mai faataitaiga mai mau o loo faaalia ai pe na faapefea ona faamanuiaina tagata ona o le ola ai i upumoni o le talalelei, e pei o Tanielu (tagai Tanielu 6) po o Elisapeta (tagai Luka 1:5–14). O a faamanuiaga ua tuuina mai ia i tatou mo le usiusitai i poloaiga?

• I ni nai aso a o lei faia le vasega, valaaulia se tasi o tamaiti e tusi e uiga i se taimi na ia maua ai se molimau i se poloaiga e ala i le ola ai. I le taimi o le vasega, fai i le tamaitiiti e faasoa mai le mea sa ia tusia.

Ioane 8:31–36

O le upumoni e mafai ona faasaolotoina ai au.

O nisi tagata e manatu o le ola ai i le talalelei e faasāina ai i latou. E mafai faapefea ona e faaaogaina le Ioane 8:31–36 e fesoasoani ai i tamaiti ia malamalama o le ola ai i le talalelei e faasaolotoina moni ai i tatou?

Gaoioiga e Mafai Ona Fai

• Valaaulia tamaiti e faitau le Ioane 8:31–36 ma faasoa mai o latou manatu i le uiga o le avea ma pologa i le agasala. E fesoasoani faapefea aoaoga a Iesu ia tatou saoloto ai?

• Faaali se loka e faatusa i le agasala ma se ki e faatusa i le ala e mafai ai e upumoni o le talalelei ona faasaolotoina i tatou. Mo se faataitaiga, o le iloa e uiga i le Togiola a le Faaola e mafai ai ona tatou maua le saolotoga e salamo ai ma faamagaloina mai a tatou agasala. Po o le iloa foi e uiga i le Upu o le Poto e mafai ai ona tatou maua le saolotoga e aloese ai mai mausa.

Na aoao mai Iesu, “E tuu saoloto foi outou e le upu moni” (Ioane 8:32).

Ioane 10:1–18

O Iesu ua pei o se leoleo mamoe ia te au.

A o e suesueina le faataoto i le leoleo mamoe lelei, vaavaai mo upumoni o loo aoao mai ai e uiga i lo tatou sootaga ma le Faaola. E faapefea ona faamanuiaina tamaiti i le iloa ai o nei upumoni?

Gaoioiga e Mafai Ona Fai

• Tusi le leoleo mamoe lelei ma le auauna i le laupapa. Faamalamalama o le auauna o se tasi e faafaigaluega e faia se galuega mo le tupe. Fai i tamaiti e lisi mai eseesega latou te maua i le Ioane 10:1--18 i le va o le leoleo mamoe lelei ma se auauna. Aisea o le a e manao ai e mulimuli i le leoleo mamoe lelei nai lo se auauna? E faapefea ona pei Iesu o se leoleo mamoe ia i tatou?

• Tusi pe faaali se ata o se faitotoa. Faitau faatasi le Ioane 10:7–9, ma fesili i tamaiti pe faapefea ona pei Iesu o se faitotoa. E tusa ai ma le fuaiupu 9, o a faamanuiaga e maua e i latou o e “ulu atu” i le faitotoa? E faapefea ona tatou ulu atu i le faitotoa ua saunia e Iesu Keriso mo i tatou?

Uunaia le Aoaoina i le Aiga

Fesoasoani i tamaiti e mafaufau i se poloaiga e mafai ona latou usitaia atoatoa. Fai i ai e taumafai e usitai i lena poloaiga i le vaiaso a sau.

Faaleleia o Lo Tatou Aoao Atu

Fai fesili musuia. Fai fesili e valaaulia ai tamaiti e te faiaoga ai e faia mea i talaatu o le na ona lipoti o mea moni. Nai lo lena, ia fautuaina i latou e faasoa mai a latou molimau i upumoni o le talalelei. Mo se faataitaiga, afai o outou talanoaina poloaiga, e mafai ona e fesili i tamaiti e faasoa mai pe na faapefea ona faamanuiaina i latou ona o le usitai i poloaiga.